ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓣꓳ ꓔꓯ ꓛꓬ ꓡ ꓥꓳꓽ ꓡ ꓢꓴ ꓔꓯ ꓖꓽ ꓖꓶˍ ꓟ ꓗꓪ ꓐꓰ ꓮ ꓫꓵꓽ ꓕꓲ ꓫꓵꓽ ꓡꓯꓼ ꓫꓴ ꓪˍ ꓡ꓿ ꓖꓽ ꓖꓶˍ ꓟ ꓑꓶ. ꓓꓴ ꓣꓳ ꓤꓶꓻ ꓗꓪ ꓮ ꓫꓵꓽ ꓙꓲꓻ ꓖꓴ ꓙꓳˍ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓔꓯ ꓥꓪ ꓐꓰ ꓕꓲ ꓡꓰ, ꓠ ꓠ, ꓓꓴ ꓬꓰ ꓡꓯ꓿ ꓟ‐ꓕꓲ ꓕꓳꓽ ꓶ 18ꓽ21‐35 ꓗꓪ ꓛꓲ ꓧꓶ. ꓕꓯ ꓣꓳ ꓠ ꓠ, ꓓꓴ ꓬꓰ ꓡꓯ꓿
ꓖꓳ ꓗ ꓠꓯ. ꓒꓲ‐ꓕꓱ ꓠꓬ ꓬꓰ‐ꓢꓴ ꓔꓯ ꓡ ꓢꓲ꓾ ꓢꓲ ꓒꓽꓳ꓾ ꓥꓪ ꓬꓲꓼ ꓥꓪ ꓠꓬꓲ ꓡꓰ ꓥꓪ ꓔꓯ ꓥꓬ ꓡ ꓠꓬ꓾ ꓥꓪ ꓬꓲ ꓔꓯ ꓮ ꓟꓬ ꓧꓪ, ꓖꓽ ꓖꓶ ꓠꓯ, ꓡ? ꓫꓵꓽ ꓧꓪ, ꓛꓲ ꓖꓽ ꓖꓶ ꓗꓷ ꓠꓬ ꓡꓳꓼˍ ꓥꓳ ꓪ? ꓐꓰ ꓠ ꓠꓬꓲˍ ꓡꓳ꓿ ꓬꓰ‐ꓢꓴ ꓡꓰ ꓬꓲ ꓔꓯ꓾ ꓠꓴ ꓔꓯ ꓥꓪ ꓫꓵꓽ ꓧꓪ,ˍ ꓡꓰꓽ ꓟꓽ ꓐꓯ꓾ ꓫꓵꓽ ꓧꓪ, ꓟ ꓫꓵꓽ ꓞꓲ ꓧꓪ,ˍ ꓟꓲ ꓖꓽ ꓖꓶ꓿ ꓮ ꓡꓲꓳ ꓐꓯ ꓠꓬ ꓪꓴ‐ꓢ ꓗꓴꓷꓼ ꓠꓽ꓾ ꓪ ꓔꓲ ꓕꓲ ꓣꓳ ꓬꓲ ꓚꓳ ꓑ. ꓐꓴˍ ꓐꓰ ꓶ ꓡꓯꓼ ꓢꓪ. ꓠꓲ, ꓫꓵˍ ꓟ ꓡꓰ ꓐꓰ ꓗ, ꓡꓳ꓿ ꓬꓲ ꓢꓪ. ꓪꓴ. ꓔꓴˍ ꓕꓯ꓾ ꓬꓲ ꓔꓯ ꓒꓴ ꓕꓲ ꓟꓶꓽ ꓕ‐ꓡꓰ‐ꓔꓷ ꓐꓵˍ ꓟ ꓕꓲ ꓣꓳ ꓧꓳꓽ ꓔꓯ, ꓡˍ ꓡꓳ꓿ ꓬꓲ ꓠꓽ ꓮ ꓫꓵꓽ ꓐꓶꓻ ꓓꓴ ꓟꓽ ꓙꓳ ꓠꓬꓲ ꓪ ꓔꓲ. ꓡꓰ꓾ ꓬꓲˍ ꓐꓰ ꓬꓲ ꓤ ꓟꓶ ꓤ ꓠꓱˍ ꓐꓰ꓾ ꓬꓲ ꓙꓳˍ ꓟ ꓮ ꓙꓵꓽ ꓪꓴꓽ ꓗꓷ ꓢꓲ ꓐꓶꓻ ꓖꓴ ꓡꓰ ꓝꓲ꓾ ꓐꓰ ꓕꓵꓼ ꓪꓽ ꓖꓶˍ ꓡꓳ꓿ ꓖꓳ ꓕꓯ ꓚꓳ ꓑ. ꓠꓽ ꓟꓳꓼ ꓔ ꓢꓲ ꓬꓲ ꓔꓯ ꓪꓴ. ꓓꓵ ꓕꓱꓼ ꓢꓲ ꓠꓬꓲ꓾ ꓢꓲ ꓒꓽꓳ꓾ ꓥꓪ ꓔꓯ ꓠꓲ, ꓟ ꓫꓵ ꓖꓶ ꓡꓯ꓿ ꓥꓪ ꓠꓬ ꓮꓽ ꓙꓵ ꓡꓱꓸꓼ ꓚꓱꓹ ꓖꓶˍ ꓥꓳ꓾ ꓐꓰ ꓐꓯˍ ꓡꓳ꓿ ꓖꓳ ꓕꓯ ꓪ ꓔꓲ ꓠꓬ ꓬꓲ ꓚꓳ ꓑꓸ ꓔꓯ ꓫꓱꓸ ꓤ ꓠꓬꓲ꓾ ꓬꓲ ꓔꓯ ꓩꓴ ꓗꓷ ꓢꓲ꓾ ꓬꓲ ꓐꓵˍ ꓟ ꓶꓻ ꓡꓯꓼ ꓮꓽ ꓙꓵ ꓖꓽ ꓖꓶ ꓗꓷꓳ꓿ ꓖꓳ ꓡꓱ ꓥ ꓟꓲ ꓚꓳ ꓑꓸ ꓖꓳ ꓟ ꓓꓳ ꓙꓰ ꓢꓲ꓾ ꓬꓲ ꓔꓯ ꓓꓲ-ꓠ-ꓣꓲ ꓒꓴ ꓕꓲ ꓦꓬꓻ ꓒꓯꓼˍ ꓡꓰꓽ ꓐꓵˍ ꓟ ꓛꓳꓽ ꓒꓯꓹ ꓕꓲ ꓣꓳ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓔꓯ ꓗꓶꓸ ꓝꓲꓸ ꓗꓪ ꓣꓴ ꓠꓬꓲꓸ ꓔ ꓢꓲ꓾ ꓥꓪ ꓔꓯ ꓠꓴ ꓐꓵˍ ꓟ ꓮꓽ ꓙꓵ ꓚꓱꓹ ꓖꓶ ꓡꓯ꓾ ꓐꓯˍ ꓡꓳ꓿ ꓬꓲ ꓛꓳꓽ ꓒꓯꓹ ꓠꓬ ꓟꓳꓼ ꓔ ꓢꓲ꓾ ꓥꓪ ꓔꓯ ꓠꓲꓹ ꓟ ꓦꓲꓺ ꓖꓶ ꓡꓯ꓾ ꓥꓪ ꓠꓬ ꓚꓱꓹ ꓖꓶˍ ꓥꓳ꓾ ꓐꓰ ꓓꓰꓽˍ ꓟꓲ꓾ꓬꓲ ꓠꓽ ꓟꓽ ꓓꓻ ꓢꓲ꓾ ꓬꓲ ꓐꓵꓻˍ ꓟ ꓟꓽ ꓚꓱꓹ ꓖꓶ ꓡ ꓕ ꓑꓳꓸ ꓬꓲ ꓔꓯ ꓐꓱ ꓓꓴꓽ ꓗꓪ ꓐꓱ ꓔ ꓝꓲˍ ꓡꓳ꓿ ꓬꓲ ꓕꓱ ꓡꓱ ꓬꓰˍ ꓟ ꓔꓯ ꓠꓱꓸ ꓐꓯꓼ ꓚꓳ ꓑꓸ ꓛꓳꓽ ꓒꓯꓹ ꓐꓴ ꓟꓳꓻ ꓗꓷ ꓠꓬ ꓠꓲꓹ ꓟ ꓮꓽ ꓘꓶꓸ ꓫꓸ ꓢꓲ꓾ ꓬꓲ ꓬꓰˍ ꓟ ꓮꓽ ꓙꓵ ꓪ ꓔꓲ ꓔꓯ ꓪꓽ ꓗꓳꓹ ꓬꓰˍ ꓡꓳ꓿ ꓖꓳ ꓕꓯ ꓪ ꓔꓲ ꓡꓰ ꓛꓳ ꓑꓸ ꓖꓳ ꓕꓲ ꓣꓳ ꓔꓯ ꓘꓴ ꓔꓯꓹ ꓡ ꓢꓲ꓾ ꓥꓶˍ ꓟ ꓚꓳ ꓑꓸꓳ꓾ ꓠꓴ ꓥꓪ ꓔꓯ ꓓꓰꓽˍ ꓠꓬꓲ ꓠꓴ ꓐꓵˍ ꓟ ꓮꓽ ꓙꓵ ꓥꓪ ꓖꓽ ꓖꓶ ꓗꓷꓳ꓿ ꓠꓴ ꓔꓯ ꓥꓪ ꓫꓱꓸ ꓤ ꓗꓷ ꓟ ꓡꓰ ꓐꓰ ꓚꓳ ꓑꓸ ꓛꓳꓽ ꓒꓯꓹ ꓔꓯ ꓠꓴ ꓫꓱꓸ ꓤ ꓠꓯꓹ ꓡꓳ꓾ ꓟꓽ ꓥ ꓡ?꓾ ꓐꓰ ꓐꓯ ꓗꓷ ꓠꓬ꓾ꓪ ꓔꓲ ꓠꓬ ꓠꓲꓹ ꓟ ꓮꓽ ꓘꓶꓸ ꓦꓶ ꓢꓲ꓾ ꓬꓲ ꓐꓵ ꓞꓹ ꓟ ꓶꓻ ꓡꓯ ꓟꓽ ꓐꓶꓻ ꓖꓴ ꓡꓰ ꓕ ꓑꓳ꓾ ꓟꓸ ꓙꓽ ꓢꓴ ꓔꓯ ꓡꓯꓼ ꓙꓱ ꓗꓷˍ ꓡꓳ꓿ ꓠꓴ ꓪꓽ ꓮꓽ ꓟ ꓥ ꓟꓲ꓾ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓠꓴ ꓬꓲꓼ ꓠꓴ ꓠꓬꓲ ꓔꓯ ꓟꓽ ꓖꓽ ꓖꓶ ꓠꓬ꓾ ꓟꓴꓽ ꓗꓪ ꓗꓪ ꓔꓬ ꓟ ꓥꓪ ꓐꓹ ꓐˍ ꓟꓲ ꓖꓳ ꓟ ꓡꓰ ꓐꓰ ꓠꓴ ꓪꓽ ꓔꓯ ꓬꓰ ꓖꓶ ꓡ ꓥꓳ꓾ ꓐꓯˍ ꓡꓳ꓿
ꓥ ꓡꓳ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓟ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓣꓳ ꓠ ꓠ, ꓗꓷ ꓟ ꓥ ꓡꓳ꓿ ꓟ. ꓟꓲꓽ ꓕꓱ ꓟ ꓗꓪ ꓐꓰ ꓣꓳ ꓔꓯ ꓬꓲ ꓪꓴ. ꓕꓲ ꓫꓵꓽ ꓟꓳ. ꓖꓶ ꓡˍ ꓟ ꓠꓬ ꓚꓳ ꓑ. ꓖꓳ ꓕꓲ ꓣꓳ ꓟ ꓠꓬ ꓬꓲ ꓢꓯꓼ ꓪ ꓗꓪ ꓐꓰ ꓮ ꓡꓲ ꓥ ꓟꓲ ꓕꓲ ꓟꓶꓽ ꓕ‐ꓡꓰ‐ꓔꓷ ꓔꓯ ꓖꓶ ꓟꓽ ꓐ ꓡ꓿ ꓖꓳ ꓟ ꓠꓬ ꓞꓳ ꓫ. ꓕꓲ ꓣꓳ ꓔꓯ ꓒꓴ ꓬꓲ ꓔꓴ ꓫꓬ, ꓚꓱ, ꓝꓲˍ ꓟ ꓡꓰ ꓐꓰ ꓗ, ꓡꓳ꓿ ꓮ ꓡꓲ ꓥˍ ꓟꓲ ꓚꓳ ꓑ ꓖꓳ ꓕꓲ ꓣꓳ ꓟ ꓠꓬ ꓬꓲ ꓙꓳˍ ꓟ ꓥ ꓕ ꓑꓳꓸꓼ ꓮ ꓙꓵꓽ ꓪꓴꓽ ꓗꓷ ꓥ ꓡꓰ. ꓖꓳ ꓟ ꓔꓯ ꓝꓱ, ꓟꓽ ꓐ ꓡ꓿ ꓖꓳ ꓡꓱ ꓛꓲ ꓬꓲ ꓠꓬ ꓐꓵ ꓓ, ꓟ ꓥ ꓡꓳ꓿
ꓕꓱ ꓟ ꓠꓬ ꓣꓳ ꓔꓯ ꓮ ꓫꓵꓽ ꓐꓯ ꓟꓳ. ꓖꓶ ꓡ ꓔꓬ ꓡ ꓐꓯ ꓠꓬ ꓐ, ꓐ ꓪꓴ‐ꓢ ꓣꓳ ꓝꓴꓲ. ꓔꓯ ꓖꓽ ꓖꓶ ꓗꓷ ꓟ ꓠꓬ ꓣꓳ ꓠꓱ. ꓐꓯ ꓢꓴ ꓔꓯ ꓖꓽ ꓖꓶˍ ꓟ ꓝꓴꓲ. ꓕꓯꓽ ꓢꓲ ꓮ ꓘꓶ. ꓟꓬꓽˍ ꓡꓳ ꓐꓰ ꓐꓯ ꓟ ꓚꓱ, ꓥ ꓡꓳ꓿ ꓣꓳ ꓐ, ꓐ ꓪꓴ‐ꓢ ꓔꓯ ꓛꓬ ꓗꓷ ꓟ ꓪꓴ‐ꓢ ꓔꓯ ꓛꓬ ꓗꓷ ꓟ ꓝꓴꓲ. ꓠꓬ ꓢꓴ ꓡꓰ ꓣꓳ ꓔꓯ ꓛꓬ ꓗꓷ ꓟ ꓝꓴꓲ. ꓕꓯꓽ ꓢꓲ ꓗꓪ ꓐꓯ ꓖꓴ ꓟꓽ ꓓꓻ ꓗꓪ ꓛꓲ ꓪꓴꓽˍ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓪꓴ‐ꓢ ꓔꓯ ꓮ ꓘꓶ. ꓐꓵ ꓓ, ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓪꓴ‐ꓢ ꓔꓯ ꓪꓽ ꓘꓴˍ ꓡꓳ꓿ “ꓐ, ꓐꓽꓳ ꓥꓪ ꓝꓴꓲ. ꓔꓯ ꓖꓽ ꓖꓶ ꓡꓯ꓿ ꓥꓪ ꓔꓯ ꓫꓱ. ꓤ ꓡꓯ꓿ ꓥꓪ ꓔꓯ ꓣꓱꓽ ꓛꓰꓽ ꓖꓶ ꓡꓯ꓿” ꓐꓯ ꓢꓲ ꓠꓬꓲ ꓣꓳ ꓠꓬ ꓪꓽ ꓘꓴˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓣꓳ ꓠꓬ ꓣꓳ ꓔꓯ ꓐꓵ ꓓ, ꓟ ꓣꓳ ꓔꓯ ꓛꓬ ꓡ ꓟ ꓝꓴꓲ. ꓔꓯ ꓟꓽ ꓖꓽ ꓖꓶ ꓥꓳ ꓐꓯˍ ꓠꓬ ꓐ, ꓐ ꓡꓰ ꓣꓳ ꓔꓯ ꓟꓽ ꓖꓽ ꓖꓶ ꓡ꓾ ꓐꓯˍ ꓟ ꓬꓲ ꓪꓴ. ꓕꓲ ꓫꓵꓽ ꓣꓳ ꓔꓯ ꓢꓷ. ꓡꓰ ꓝꓲˍ ꓟ ꓥ ꓡꓳ꓿
ꓝꓮꓲ ꓠꓬꓲꓽ ꓫꓵꓽ ꓕꓲ ꓫꓵꓽ ꓟ ꓠꓬ ꓟ. ꓟꓲꓽ ꓘꓴꓽ ꓗꓪ ꓚꓳ ꓑ. ꓕꓲ ꓣꓳ ꓟ ꓠꓬ ꓐ, ꓐ ꓪꓴ‐ꓢ ꓬꓲ ꓫꓱ. ꓤˍ ꓟ ꓔꓯ ꓟꓶ ꓡꓰꓳ꓿ ꓖꓳ ꓡꓱ ꓐꓯ ꓥ ꓟꓲ ꓪ ꓔꓲ. ꓬꓲ ꓫꓱ. ꓤ ꓠꓲ, ꓠꓬ ꓚꓳ ꓑ ꓖꓳ ꓕꓲ ꓣꓳ ꓠꓲ, ꓟ ꓔꓯ ꓒꓳ, ꓡꓶ. ꓗꓷ ꓟꓽ ꓐ ꓡ꓿ ꓖꓳ ꓡꓰ ꓠꓬꓲ ꓬꓲ ꓠꓬ ꓬꓲ ꓔꓯ ꓐꓵ ꓓ, ꓢꓴ ꓬꓲ ꓛꓳꓽ ꓒꓯ, ꓔꓯ ꓗꓶ. ꓝꓲ. ꓗꓪ ꓛꓵ, ꓢꓲ ꓠꓬꓲ ꓐꓱ ꓓꓴꓽ ꓗꓪ ꓐꓱ ꓗꓷˍ ꓟ ꓬꓰˍ ꓡꓳ꓿ ꓪ ꓔꓲ. ꓡꓰ ꓬꓲ ꓝꓴꓲ. ꓮ ꓙꓵꓽ ꓔꓯ ꓖꓽ ꓖꓶ ꓗꓷˍ ꓟꓲ ꓬꓲ ꓠꓬ ꓬꓲ ꓛꓳꓽ ꓒꓯ, ꓬꓲ ꓔꓯ ꓒꓴ ꓮ ꓔꓲ. ꓤ ꓐꓵˍ ꓟ ꓔꓯ ꓖꓽ ꓖꓶ ꓟꓽ ꓐ ꓡ꓿ ꓕꓱ ꓟ ꓥˍ ꓟꓲ ꓣꓳ ꓔꓯ ꓕꓲ ꓫꓵꓽ ꓟꓳ. ꓖꓶ ꓡ ꓟ ꓠꓬ꓾ ꓣꓳ ꓠꓬ ꓪꓽ ꓘꓴ ꓦꓲ ꓗꓪ ꓙꓰ ꓔꓬ ꓡꓳ꓿ ꓐ, ꓐ ꓪꓴ‐ꓢ ꓬꓲ ꓖꓽ ꓖꓶˍ ꓟ ꓔꓯ ꓣꓳ ꓘꓳ ꓣꓴ ꓔꓬ ꓡꓳ꓿ ꓪꓴ‐ꓢ ꓦꓲ ꓗꓰ ꓙꓰ꓾ ꓢꓲꓽ ꓫꓬ ꓖꓳ ꓓꓱꓽ ꓔꓯ ꓣꓳꓽ ꓘꓳ ꓣꓴ꓾ ꓟ. ꓟꓲꓽ ꓠ ꓠ,꓾ ꓪꓽ ꓘꓴ꓾ ꓪꓴ‐ꓢ ꓠꓬ ꓫꓱ. ꓤ ꓗꓴ.ˍ ꓡꓳ ꓐꓰ ꓐꓯ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓣꓳ ꓠꓬ ꓣꓳ ꓔꓯ ꓛꓬ ꓗꓷ ꓥꓳꓽ ꓗꓷ ꓢꓴ ꓝꓴꓲ. ꓖꓽ ꓖꓶ ꓟꓽ ꓐ ꓡ ꓥꓳ ꓐꓯˍ ꓠꓬ ꓬꓲ ꓖꓳꓽ ꓥꓳ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿
