ꓠꓬꓲ. ꓠꓬꓲ ꓪꓴ‐ꓢ ꓬꓲ ꓟ, ꓟ ꓟ‐ꓡꓲ‐ꓬ ꓦꓵꓻ ꓑꓮꓲꓽ ꓗꓪ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓝꓲ. ꓠꓬ ꓟ‐ꓕꓲ 1ꓽ1‐16, 18‐23 ꓥ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓓ‐ꓪꓵ ꓞꓲꓼ ꓤ ꓡꓯ, ꓤ ꓬꓰ‐ꓢꓴ ꓬꓲ ꓫꓵꓽ ꓚꓺ ꓠꓬ ꓕꓱ ꓡꓱ ꓥꓳ꓾ ꓐꓯ ꓢꓲ ꓬꓲ ꓪꓴ. ꓘꓶꓽ ꓒꓴ ꓔˍ ꓡꓳ꓿ ꓝꓮꓲ ꓟ‐ꓡꓲ ꓐꓰ ꓬꓳ‐ꓢꓷ ꓠꓬ ꓡꓯꓽ ꓒꓯ, ꓝ. ꓠ, ꓟ ꓠꓲ, ꓒꓴ ꓔˍ ꓟ ꓚꓱ, ꓐꓰ꓾ ꓟꓴ ꓗꓪ ꓝꓲ ꓓꓴ ꓓꓳ ꓡ ꓢꓲ ꓠꓬꓲ ꓟ‐ꓡꓲ ꓠꓬ ꓤ ꓕꓲ ꓣꓳ ꓶꓻ ꓞ, ꓠ ꓗ, ꓡꓳ꓾ ꓐꓯ ꓖꓶˍ ꓟ ꓚꓱ, ꓔꓯ ꓐꓳ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓟ‐ꓡꓲ ꓶꓻ ꓞ, ꓠ ꓔˍ ꓟ ꓤ ꓠꓱ ꓠꓬ ꓬꓲ ꓦꓲ ꓢꓲ ꓒ ꓬꓳ‐ꓢꓷ ꓗꓪ ꓐꓰ ꓟꓽ ꓥ ꓥ ꓪꓴ‐ꓢ ꓬꓲ ꓤ ꓔꓲ. ꓔꓯ ꓶꓻ ꓞ, ꓠ ꓗ, ꓟ ꓥ ꓡꓳ꓿

ꓟꓴ ꓗꓪ ꓝꓲ ꓓꓴ ꓟꓽ ꓬꓯꓼ ꓡ ꓢꓰꓽ ꓕꓯ꓾ ꓟꓴ ꓗꓪ ꓝꓲ ꓓꓴ ꓟꓽ ꓟꓳ. ꓖꓶ ꓡ ꓢꓰꓽ ꓕꓯ ꓡꓰ ꓟ‐ꓡꓲ ꓠꓬ ꓪꓴ‐ꓢ ꓔꓯ ꓬꓲ ꓮ ꓘꓶ. ꓠꓲ, ꓠꓵ ꓢꓲ꓾ ꓙꓵꓻ ꓢꓴ ꓕꓲ ꓣꓳ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓥˍ ꓟꓲ ꓟꓴ ꓗꓪ ꓝꓲ ꓓꓴ ꓡꓰ ꓬꓲ ꓔꓯ ꓶꓼ ꓓꓳꓽ ꓫꓱ, ꓓꓳꓽ ꓐꓯ ꓖꓶ ꓡˍ ꓕꓯ ꓮ ꓫꓵꓽ ꓙꓳꓺ ꓗꓽ ꓓꓴ ꓟꓽ ꓙꓳ ꓙꓳ ꓘꓳ ꓣꓴ ꓐ ꓡ ꓗꓷ ꓟ ꓥ ꓡꓳ꓿ ꓕꓽ ꓞ ꓦꓰꓼ꓾ ꓥꓪ ꓓꓵꓽ ꓙꓽ ꓠꓬꓲˍ ꓠꓬꓲ꓾ ꓥꓪ ꓪꓽ ꓘꓴ ꓠꓬꓲˍ ꓠꓬꓲ꓾ ꓐꓰ ꓬꓲ ꓟꓽ ꓐꓯ꓿ “ꓥꓪ ꓠꓬ ꓠꓴ ꓢꓲ ꓒ ꓚꓳ ꓟ ꓥꓳ꓿ ꓠꓴ ꓐꓯˍ ꓟ ꓡꓰ ꓥꓪ ꓖꓳ ꓓꓱꓽ ꓗꓪ ꓒꓬꓱꓼ ꓡ ꓝꓲ” ꓐꓰ ꓐꓯˍ ꓡꓳ꓿

ꓟ‐ꓡꓲ ꓠꓬ ꓣꓳ ꓟꓲ ꓠꓯ ꓞꓳ ꓤ ꓐꓱ ꓶ ꓔꓯꓺ ꓢꓳ ꓓꓴ ꓕꓲ ꓟ ꓥ ꓡꓳ꓿ ꓟ‐ꓡꓲ ꓡꓰ ꓐꓰ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓥˍ ꓟꓲ ꓬꓰ‐ꓢꓴ ꓙꓲ‐ꓢꓴ ꓬꓲ ꓙꓲꓻˍ ꓟ ꓓꓳꓽ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓲ ꓠꓯ ꓑꓶ. ꓗꓪ ꓛꓲ ꓔꓯ, ꓙꓰ ꓠ, ꓟ ꓪꓴ‐ꓢ ꓡꓰ ꓣꓳ ꓔꓯ ꓘꓴꓻ ꓔꓬ ꓡꓳ꓿

ꓟ‐ꓡꓲ ꓔꓯ ꓪꓴ‐ꓢ ꓢꓲꓺ ꓗꓷ ꓟˍ ꓡꓰ ꓐꓰ ꓣꓳ ꓔꓯ ꓥˍ ꓟꓲ ꓢꓲꓺ ꓔ ꓟ ꓥ ꓡꓳ꓿ ꓮ ꓟꓶˍ ꓡꓰ ꓬꓲ ꓙꓵ, ꓣꓴ ꓢꓲ ꓣꓳ ꓠꓲ, ꓗꓴ ꓟꓬ ꓗꓴ ꓟꓶ ꓖꓴ ꓗꓪ ꓠꓬꓲ ꓠ. ꓢꓲ ꓠꓬꓲ꓾ ꓥꓪ ꓠꓬ ꓪꓴ‐ꓢ ꓡꓰ ꓢꓲꓺ ꓔ ꓟ ꓟꓶ ꓢꓴ ꓥ ꓡꓳ꓾ ꓐꓰ ꓟꓽ ꓠꓽ ꓠꓽ ꓐꓯ ꓡꓯ꓿ ꓐꓯ ꓘꓶꓽ ꓕꓱ ꓟ ꓔꓯ ꓕꓲ ꓧꓪ, ꓑꓶ. ꓝ. ꓕꓲ ꓧꓪ, ꓐꓯ ꓢꓲ ꓔꓱ, ꓚꓵˍ ꓟ ꓚꓵ ꓘꓶꓽ ꓥ ꓟ꓾ ꓣꓳ ꓠꓬ ꓪꓴ‐ꓢ ꓡꓰ ꓢꓲꓺ ꓔ ꓢꓴ ꓥ ꓡꓳ꓾ ꓐꓯˍ ꓟ ꓔꓯ ꓣꓳ ꓠꓲ, ꓟ ꓛꓲ ꓬꓰ ꓗꓪ ꓛꓲ ꓢꓯꓼ ꓕꓵꓼ ꓡꓯ꓿

ꓮ ꓡꓲꓳ ꓐꓯˍ ꓠꓬ ꓣꓳ ꓠꓽ ꓪꓴ‐ꓢ ꓡꓰ ꓢꓲꓺ ꓚꓰ. ꓔ ꓟ ꓟꓶ ꓢꓴ ꓐꓴ ꓥ ꓡꓳ꓿