ꓒꓲ‐ꓕꓱ ꓡꓰ ꓐꓰ ꓠꓲ, ꓟ ꓘꓶꓻ ꓡꓶꓽ ꓔꓬ ꓟ ꓙꓵ, ꓗꓪ ꓥ ꓟꓲ ꓢꓲ ꓒ ꓬꓰ‐ꓢꓴ ꓐꓰ ꓫ. ꓕꓱ ꓓꓴ ꓬꓰ꓾
Castel Gandolfo ꓗꓪ ꓬꓰ ꓗꓷ ꓟ ꓠꓽ ꓦꓬꓼ ꓠꓬꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵ, ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓢꓲ ꓫꓬ ꓢꓴ ꓒꓲ‐ꓕꓱ ꓠꓬ ꓟꓲ ꓠꓯ ꓡ ꓞꓳ ꓞꓳ ꓙꓳ ꓢꓴ ꓕꓲ ꓣꓳ ꓥ ꓟ ꓡꓰ ꓐꓰ ꓣꓳ ꓥ ꓟꓲ ꓢꓲ ꓫꓬ ꓢꓴ ꓒꓲ‐ꓕꓱ ꓡꓰ ꓐꓰ “ꓠꓲ, ꓟ ꓐꓬ ꓔꓬ ꓟ ꓙꓵ, ꓠꓲ, ꓟ ꓘꓶꓻ ꓡꓶꓽ ꓔꓬ ꓟ ꓙꓵ, ꓗꓪ ꓚꓲ. ꓛꓬ ꓓꓵꓽ ꓙ ꓟ ꓔꓯ ꓢꓲ ꓒ ꓬꓰ‐ꓢꓴ ꓠꓯꓼ ꓗꓪ ꓙꓽ ꓣꓳꓺ ꓢꓲ ꓒꓴ ꓒꓴ ꓡꓯꓽ ꓡꓯꓽ ꓐꓰ ꓟ. ꓖꓶ ꓠ, ꓟ” ꓙꓲ‐ꓢꓴ ꓢꓲ ꓤ ꓐꓴ ꓔꓯ ꓟ. ꓖꓶ ꓗꓷ ꓟ ꓥꓳ꓿
ꓔꓲꓺ ꓒ ꓪ ꓔꓲ ꓡꓰ ꓟ. ꓟꓲꓽ ꓚ ꓟ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓛꓳꓽ ꓒꓯ, ꓐꓴ ꓔꓯ ꓚꓲ. ꓛꓬ ꓔꓳ, ꓜꓳ ꓗꓷ ꓟ ꓫ. ꓙꓵ ꓓꓴ꓾ ꓫꓵꓻ ꓟ ꓐꓰ ꓢꓯ. ꓬꓲꓼ ꓡ ꓟ ꓚꓱ, ꓔꓯ ꓟꓳ. ꓓꓵꓽ ꓙ ꓟꓶ ꓓꓴ ꓔꓱ, ꓟ ꓟꓳ. ꓖꓶ ꓟ ꓢꓲ ꓫꓬ ꓕꓳ ꓶ ꓟ‐ꓕꓲ ꓕꓳ ꓶ ꓔꓯ ꓝꓮꓲ ꓔꓱ, ꓕ ꓖꓶ_ ꓡꓳ꓿
ꓢꓲ ꓒ ꓬꓰ‐ꓢꓴ ꓐꓯ ꓔ ꓟ ꓗꓪ ꓛꓴꓽ ꓙꓳ ꓢꓴ ꓔꓯ ꓧꓪ. ꓡꓰ ꓠ, ꓟ ꓬꓰ ꓙ ꓟ ꓚꓬꓴ ꓢꓲ ꓒꓽ ꓐꓰ ꓛꓳꓽ ꓒꓯ, ꓐꓴ ꓥꓳ ꓡꓳ. ꓔ ꓟ ꓡꓰ ꓐꓰ ꓮ ꓘꓶ. ꓚꓬ, ꓟ ꓥꓳ꓿ ꓖꓳ ꓟ ꓑꓶ ꓓꓴ ꓒꓲ‐ꓕꓱ ꓠꓬ ꓓꓵꓽ ꓙ ꓟꓶ ꓠꓲ, ꓟ ꓐꓬ ꓡꓰ ꓢꓲ ꓢꓲ ꓒ ꓬꓰ‐ꓢꓴ ꓔꓯ “ꓢꓲ ꓒꓽꓳ꓾ ꓮ ꓡꓲ ꓥ ꓟꓲ ꓠꓴ ꓔꓯ ꓖꓳ ꓡꓱ ꓕꓽ ꓗꓷ ꓡꓰ ꓝꓲ꓾” ꓐꓰ ꓐꓯ ꓔ ꓟ ꓥ ꓡꓳ꓿
ꓕꓱ ꓟ ꓠꓬ ꓣꓳ ꓟꓲ ꓠꓯ ꓞꓳ ꓤ ꓤꓶꓻ ꓔꓯ ꓬꓲꓼ ꓠꓬꓲ. ꓟꓳ. ꓖꓶ ꓔ ꓡꓳ꓿
“ꓣꓳ ꓐꓱ ꓶ ꓥ ꓟꓲ ꓪꓴ‐ꓢ ꓬꓲ. ꓚꓱ, ꓠꓬ ꓚꓲ. ꓛꓬ ꓬꓲ. ꓚꓱ, ꓐꓰ ꓮ ꓘꓶ. ꓛꓲ ꓚꓬ, ꓟ ꓙꓵ, ꓗꓪ ꓖꓳ ꓟ ꓔꓯ ꓣꓳ ꓢꓷ. ꓠ, ꓟ ꓘꓳ, ꓣꓴ ꓠ, ꓟ ꓫ. ꓔ ꓡꓳ꓾ ꓟꓽ ꓢ ꓟ ꓥꓳ꓾”
ꓖꓳ ꓟ ꓡꓰ ꓟꓽ ꓞꓲ “ꓙꓵꓻ ꓠꓲ, ꓚꓱ, ꓮ ꓙꓵ ꓔꓯ ꓒꓳ, ꓢꓲ ꓪꓴ‐ꓢ ꓠꓬ ꓥꓳꓽ ꓔꓬ ꓢꓴ ꓥ ꓡꓳ꓾ ꓐꓰ ꓓꓵꓽ ꓙ ꓟ ꓙꓵ,꓾ (ꓥ ꓠꓬ) ꓣꓳ ꓐꓯ ꓘꓶꓽ ꓔꓯ ꓟꓽ ꓠ ꓠ, ꓡꓳ꓾ (ꓥ ꓠꓬ) ꓣꓳ ꓔꓯ ꓟꓽ ꓠꓬꓲ ꓙ ꓡꓳ꓾ ꓐꓰ ꓓꓵꓽ ꓙ ꓟ ꓙꓵ, ꓗꓷ ꓡꓰ ꓗꓴ. ꓟ ꓔꓯ ꓥ ꓟꓲ ꓐꓯ ꓔ ꓡꓳ꓿
ꓟꓽ ꓚꓬ, ꓪ ꓟ ꓐꓰ ꓔꓳ, ꓜꓳ ꓟ ꓙꓵ, ꓗꓪ ꓒꓲ‐ꓕꓱ ꓠꓬ ꓬꓲ. ꓠꓲ, ꓟ ꓞ, ꓟ ꓙꓵ, ꓗꓪ ꓐꓰ ꓣꓳ ꓔꓯ ꓣꓳ. ꓚꓵ_ ꓟ ꓬꓲ. ꓚꓱ, ꓠꓬꓲꓽ ꓟ ꓔꓯ ꓟ. ꓖꓶ ꓔ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿
“ꓬꓲ. ꓪꓴ. ꓠꓬ ꓕꓱ ꓡꓱ ꓫ. ꓔ ꓟ ꓙꓵ, ꓗꓪ ꓪꓴ‐ꓢ ꓐꓰ ꓖꓪ ꓙꓱ ꓓꓴ ꓬꓰ ꓟ꓾ꓫ. ꓕꓱ ꓓꓴ ꓬꓰ ꓟ ꓔꓯ ꓮ ꓕꓯ ꓟꓲ ꓕꓽ ꓠꓽ ꓡꓰ ꓐꓰ” ꓐꓯ ꓔ ꓡꓳ꓾ ꓖꓳ ꓟ ꓡꓰ ꓐꓰ “ꓣꓳ ꓠꓬ ꓪꓴ‐ꓢ ꓠꓯꓼ ꓗꓪ ꓶꓽ ꓓꓰ_ ꓟ ꓔꓯ ꓣꓳ ꓫ. ꓓꓴ ꓟꓷꓼ ꓓꓴ ꓔꓯ ꓙꓵꓻ ꓢꓲ ꓟ. ꓖꓶ ꓠ, ꓟ ꓥ ꓡꓳ꓾”
ꓠꓬꓲꓽ ꓚꓱ, ꓠꓬ “ꓪꓴ‐ꓢ ꓬꓰ ꓟ ꓟꓬꓱꓽ ꓔꓯ ꓮ ꓕꓯ ꓟꓲ ꓟꓽ ꓙ ꓘꓶꓽ ꓘꓶ ꓚꓲ. ꓛꓬ ꓥꓳ ꓡꓳ. ꓓꓴ ꓐꓰ ꓟꓽ ꓪ ꓕꓯ ꓬꓲ ꓡꓰ ꓬꓰ ꓖꓶ_ ꓟ ꓗꓪ ꓐꓰ ꓕꓲꓽ ꓝ. ꓣꓳ ꓶꓽ ꓓꓰ_ ꓟ ꓔꓯ ꓙꓽ ꓣꓳꓺ ꓢꓲ ꓪꓽ ꓘꓴ ꓠ, ꓟ ꓠ ꓠ, ꓠ, ꓟ ꓥ ꓡꓳ꓿”
ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓠ ꓠ, ꓗꓷ ꓗ. ꓠꓯ. ꓢꓲ ꓫꓬ ꓢꓴ ꓒꓲ‐ꓕꓱ ꓠꓬ ꓫ. ꓟ ꓔꓯ ꓘꓳ, ꓣꓴ ꓢꓲ ꓟꓬꓱꓽ ꓟꓯ ꓗꓷ ꓟ ꓥꓳ꓾ ꓚꓲ. ꓛꓬ ꓐꓱ ꓶ ꓚꓬꓴ ꓙ ꓢꓴ ꓐꓰ ꓓꓵꓽ ꓙ ꓢꓲ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓠꓯꓼ ꓗꓪ ꓬꓲ. ꓤꓶꓻ꓾ ꓬꓲ. ꓟꓶꓽ ꓗꓪ ꓛꓲ ꓔꓱ ꓔꓱ, ꓐꓰ ꓟꓬꓱꓽ ꓟꓯ ꓡꓳ, ꓬꓰ ꓗꓷ ꓟ ꓥꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿
ꓖꓳ ꓟ ꓑꓶ ꓓꓴ ꓔꓲꓺ ꓒ ꓪ ꓔꓲ ꓡꓰ “ꓣꓳ ꓥ ꓟꓲ ꓙꓵꓻ ꓠꓲ, ꓤꓶꓻ ꓐꓰ ꓪꓽ ꓘꓴ ꓟ ꓗꓪ ꓢꓲ ꓫꓬ ꓢꓴ ꓒꓲ‐ꓕꓱ ꓡꓰ ꓐꓰ ꓠꓲ, ꓟ ꓐꓬ ꓟ ꓙꓵ, ꓗꓪ ꓥ ꓟꓲ ꓚꓲ. ꓛꓬ ꓚꓵ ꓚꓵ ꓓꓵꓽ ꓙ ꓔꓬ ꓟ ꓔꓯ ꓢꓲ ꓒ ꓬꓰ‐ꓢꓴ ꓠꓯꓼ ꓗꓪ ꓙꓽ ꓣꓳꓺ ꓢꓲ ꓒꓴ ꓒꓴ ꓡꓯꓽ ꓡꓯꓽ ꓐꓰ ꓟ. ꓖꓶ ꓫ. ꓕꓱ ꓖꓶ ꓐ ꓡꓰ ꓓꓴ ꓬꓰ ꓡꓯ꓾”ꓐꓰ ꓢꓲ ꓒꓽ ꓠꓯꓼ ꓗꓪ ꓕꓲꓽ ꓪ ꓪꓽ ꓘꓴ ꓠ, ꓟ ꓘꓴ ꓔ ꓡꓳ꓿
“ꓣꓳ ꓥꓳ ꓡꓳ. ꓟ ꓗꓪ ꓐꓰ ꓙ ꓡꓰ ꓢꓲ ꓢꓲ ꓒ ꓬꓰ‐ꓢꓴ ꓶꓽ ꓓꓰ_ ꓟ ꓔꓯ ꓘꓳ, ꓣꓴ ꓟ ꓗꓪ ꓢꓲ ꓫꓬ ꓢꓴ ꓒꓲ‐ꓕꓱ ꓡꓰ ꓐꓰ ꓙꓽ ꓣꓳꓺ ꓢꓲ ꓒꓵꓽ ꓛꓳ ꓗꓴ._ ꓟ ꓠꓲ, ꓟ ꓙꓳ ꓡꓰ ꓝꓲ꓾” ꓐꓰ ꓐꓯ ꓔ ꓡꓳ꓿
“ꓬꓲ ꓤ ꓢꓲ ꓒ ꓬꓰ‐ꓢꓴ ꓡꓯꓼ ꓐꓳ ꓔꓶ. ꓓꓴ ꓗꓪ ꓔꓬ ꓢꓲ ꓪꓴ‐ꓢ ꓟꓬꓱꓽ ꓔꓯ ꓘꓳ, ꓣꓴ ꓗꓷ ꓟ ꓢꓲ ꓫꓬ ꓟ ꓟ, ꓟ ꓟ‐ꓡꓲ ꓡꓰ ꓣꓳ ꓔꓯ ꓬꓰ ꓙ ꓖꓶ ꓡꓰ ꓝꓲ ꓐꓰ” ꓪꓽ ꓘꓴ ꓖꓶ ꓢꓲ ꓬꓲ. ꓟꓶꓽ ꓢꓰꓼ ꓗꓷ ꓟ ꓥꓳ꓿
