ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓗꓪ ꓬꓲ ꓚꓲ. ꓛꓬ ꓔꓯ ꓟꓳ. ꓖꓶ ꓟ ꓥ (laudatosi)
ꓮ ꓙꓵꓽ ꓢꓴ ꓔꓯ ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓗꓪ ꓐꓰ ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓗꓪ ꓬꓲ ꓚꓲ. ꓛꓬ ꓔꓯ ꓟꓳ. ꓖꓶ ꓔꓬ ꓡꓳ ꓐꓰ ꓐꓯ ꓟ ꓚꓱ, ꓗꓪ ꓐꓰ ꓐꓯ ꓟ. ꓖꓶ ꓓꓴ ꓥꓳ꓿
ꓠꓲ, ꓠꓵ ꓟ ꓬꓲ ꓤ ꓠꓬꓲ ꓤ ꓐꓴ ꓣꓳ ꓕꓲ ꓑ ꓤ ꓪꓴ‐ꓢ ꓡꓰ ꓚꓰꓼ ꓔ ꓟ ꓚꓱ, ꓔꓯ ꓓꓴ ꓙ ꓠꓬꓲ ꓓꓴ ꓬꓰ ꓡꓯ꓿ ꓣꓳ ꓔꓬ ꓟ ꓒ ꓕꓲ ꓗꓪ ꓥ ꓟꓲ ꓪꓴ‐ꓢ ꓡꓰ ꓚꓰꓼ ꓔ ꓟ ꓔꓯ ꓡꓳ. ꓠꓬꓲ ꓓꓴ ꓬꓰ ꓡꓯ꓿
ꓢꓲ, ꓜꓲ ꓢꓲ ꓟꓲ꓾ ꓪ ꓚꓲ ꓪ ꓐ ꓬꓲꓻ ꓙꓬ ꓡꓳ ꓗ ꓠꓬꓲ ꓐꓴ ꓬꓲ ꓢꓯꓼ ꓟꓶ ꓔꓬ ꓟ ꓕꓱ ꓟ ꓮ ꓙꓵꓽ ꓠꓬ ꓮ ꓔꓳ ꓔꓳ ꓬꓲ ꓢꓯꓼ ꓟꓶ ꓔꓬ ꓡꓳ ꓐꓰ ꓣꓳ ꓓꓴ ꓙ ꓖꓴ ꓥ ꓟꓲ ꓕꓱ ꓟ ꓮ ꓙꓵꓽ ꓠꓬ ꓪꓴ‐ꓢ ꓬꓲ ꓡꓳ. ꓐꓲ ꓟ꓾ ꓪꓴ‐ꓢ ꓬꓲ ꓠꓵꓻ ꓠꓲ, ꓐꓰ ꓢꓷ. ꓠꓲ, ꓔꓯ ꓟꓲ ꓠꓯ ꓡ ꓞꓳ ꓔꓯ ꓟꓳ. ꓖꓶ ꓟ ꓪꓴ‐ꓢ ꓡꓯ ꓟꓲ ꓥ ꓡꓳ꓿
ꓪꓴ‐ꓢ ꓔꓯ ꓣꓳ ꓟꓲ ꓠꓯ ꓧꓪꓽ ꓖꓳ ꓓꓱ ꓟꓬ ꓢꓷ ꓗꓪ ꓐꓰ ꓡꓳ. ꓟꓳ ꓪ ꓟꓽ ꓓ ꓥ ꓟꓲ꓾ ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓔꓯ ꓣꓳ ꓔꓬ ꓟ ꓟꓲ ꓠꓯ ꓗꓪ ꓡꓳ. ꓟꓳ ꓓ ꓟ ꓥ ꓡꓳ꓿
ꓟꓲ ꓟꓲ ꓓꓳ ꓡ ꓟ ꓙꓵ, ꓕꓯ ꓟꓶ ꓞ ꓔꓯ ꓣꓳ ꓡꓳ. ꓟꓳ ꓪ ꓟ ꓐꓰ꓾ ꓢꓲ, ꓜꓲ ꓢꓲ, ꓟꓲ ꓗꓪ ꓟꓶ ꓞ ꓮ ꓘꓶ. ꓞ ꓟ ꓙꓵ, ꓕꓯ ꓠꓽ ꓪ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓪꓴ‐ꓢ ꓡꓰ ꓚꓰꓼ ꓔ ꓟ ꓗꓪ ꓐꓰ ꓟꓲ ꓠꓯ ꓡ ꓞꓳ ꓔꓯ ꓪꓴ‐ꓢ ꓠꓬ ꓮ ꓟꓬ, ꓛꓲ ꓠꓲ, ꓠꓵ ꓟ ꓚꓱ, ꓔꓯ ꓡꓳ. ꓟꓳ ꓪ ꓟ ꓥꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓡꓮꓴꓓꓮꓔꓳꓢꓲ ꓡꓰ ꓠꓬꓲ. ꓠꓬꓲ ꓣꓳ ꓔꓯ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓔꓯ ꓗꓽ ꓕꓽ ꓠ, ꓟ ꓐꓱ ꓶ ꓐꓯ ꓖꓶ ꓔꓬ ꓟ ꓥ ꓡꓳ꓿
ꓣꓳ ꓔꓬ ꓟ ꓟꓲ ꓠꓯ ꓗꓪ ꓑꓶ ꓛꓵꓽ ꓡꓳ ꓠ, ꓟ ꓬꓲ ꓔꓶ. ꓡꓰ ꓟꓽ ꓥ꓾ ꓣꓳ ꓟꓲ ꓠꓯ ꓡ ꓞꓳ ꓮ ꓙꓵꓽ ꓢꓯꓼ ꓫꓵꓽ ꓢꓯꓼ ꓙꓵꓽ ꓮ ꓙꓵꓽ ꓔꓬ ꓠ, ꓟ ꓟꓲ ꓠꓯ ꓦꓲꓻ ꓓ ꓥ ꓡꓳ ꓐꓰ ꓡꓮꓴꓓꓮꓔꓳꓢꓲ ꓡꓰ ꓐꓯ ꓖꓶ ꓔ ꓡꓳ꓿
ꓠꓲ, ꓠꓵ ꓟ ꓞꓳ ꓡꓱ ꓞꓳ ꓡꓯ. ꓐꓴ ꓠꓴ ꓥꓪ ꓠꓯ, ꓗꓪ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓶꓻ ꓙꓳ ꓟ ꓥ ꓡꓳ꓿ ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓔꓯ ꓠꓲ, ꓠꓵ ꓟ ꓔꓯ ꓫ. ꓔꓱ ꓘꓶꓽ ꓗꓪ ꓐꓰ ꓠꓲ, ꓠꓵ ꓐꓯ ꓟꓽ ꓓ꓿
ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓢꓯ. ꓔꓬ ꓟ ꓙꓵ, ꓕꓯ ꓑꓡꓮꓢꓔꓲꓚ ꓣꓳ ꓟ ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓢꓲ, ꓜꓲ ꓔꓯ ꓮ ꓟꓬ, ꓔꓶ ꓓꓴ ꓬꓰ ꓡꓯ꓿ ꓬꓲꓻ ꓙꓬ ꓐꓰ ꓟꓵꓽ ꓗꓪ ꓔꓬ ꓟ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓐꓰ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓙꓲ ꓡꓰ ꓝꓲ ꓠ, ꓟ ꓣꓳ ꓢꓯꓼ ꓕꓵꓼ ꓡꓯ꓿
ꓣꓳ ꓮ ꓘꓶ. ꓛꓲ ꓣꓳ ꓚꓵˍ ꓟ ꓠꓬ ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓔꓯ ꓗꓽ ꓕꓽ ꓓꓴ ꓬꓰ ꓡꓯ꓿ ꓣꓳ ꓔꓬ ꓟ ꓟꓵꓽ ꓘꓳꓼ ꓒꓳ, ꓡ ꓝꓲ꓾ ꓡ ꓟ ꓟꓬꓱꓽ ꓔꓯ ꓣꓳ ꓬꓰ ꓔꓬ ꓟ ꓠꓬ ꓛꓲ ꓡ ꓟ ꓣꓳ ꓤ ꓠꓱ ꓐꓴ ꓮ ꓟꓲ ꓮ ꓐꓲ ꓐꓴ ꓔꓯ ꓫꓵꓽ ꓪꓴꓽ ꓖꓶ ꓢꓴ ꓐꓴ ꓠꓬ ꓠꓴ ꓥꓪ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓠꓬꓲ. ꓠꓬꓲ ꓗꓪ ꓪꓴ‐ꓢ ꓡꓰ ꓚꓰꓼ ꓔ ꓟ ꓔꓯ ꓡꓳ. ꓠꓬꓲ ꓢꓲ ꓠꓬꓲ ꓪꓴ‐ꓢ ꓔꓯ ꓡꓳ. ꓟꓳ ꓢꓴ ꓒꓬꓱꓼ ꓡ ꓠ,ꓟ ꓢꓯꓼ ꓕꓵꓼ ꓡꓯ꓿
ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓔꓯ ꓗꓽ ꓕꓽ ꓢꓲ ꓠꓬꓲ ꓪꓴ‐ꓢ ꓔꓯ ꓠꓲ, ꓠꓵ ꓓꓴ ꓬꓰ ꓡꓯ꓿
ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓒꓬꓱꓼ ꓡ ꓝꓲ ꓠ, ꓟ ꓢꓯꓼ ꓕꓵꓼ ꓡꓯ꓿ ꓫ. ꓟꓳ ꓪ꓿
