ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓣꓳ ꓞꓳ ꓙꓳˍ ꓟ ꓗꓪ ꓡ ꓞꓳ ꓠꓬꓲꓽ ꓫꓵꓽ ꓣꓳ ꓟꓳꓻ ꓪ ꓓ, ꓡꓳ꓿ ꓕꓲ ꓫꓵꓽ ꓟ ꓠꓬ ꓢꓴ ꓥꓳꓽ ꓡꓰ ꓟ ꓔꓯ ꓮ ꓘꓶ. ꓟ. ꓖꓶ ꓠꓲ, ꓫꓵˍ ꓫꓵꓽ꓾ ꓟ. ꓒ ꓬꓰ ꓠꓲ, ꓫꓵˍ ꓫꓵꓽ ꓡ ꓞꓳ ꓕꓲ ꓫꓵꓽ ꓣꓳ ꓟꓳ ꓠꓬꓲˍ ꓥꓳ꓿ ꓮ ꓫꓵꓽ ꓕꓲ ꓫꓵꓽˍ ꓥꓳꓽ ꓡꓰ ꓟꓽ ꓓꓻ꓿ ꓫ. ꓪ ꓕꓲ ꓘꓶꓽ ꓥꓳꓽ ꓝꓲ ꓟꓽ ꓓꓻ꓿ ꓛꓲ ꓕꓳꓼ ꓕꓲ ꓕꓳꓼ ꓥꓳꓽ ꓡꓰ ꓟꓽ ꓓꓻ꓿ ꓠꓴ ꓔꓯ ꓟ. ꓢꓴ ꓑꓱ ꓢꓴ ꓟ. ꓒ ꓬꓰ ꓢꓴ ꓮ ꓘꓶ. ꓙꓳˍ ꓡꓳ꓿

ꓝꓮꓲ ꓠꓬꓲꓽ ꓫꓵꓽ ꓕꓲ ꓫꓵꓽ ꓟ ꓠꓬ ꓠꓴ ꓮ ꓫꓵꓽ ꓬꓰˍ ꓥ ꓟꓲ ꓠꓴ ꓔꓯ ꓮ ꓫꓵꓽ ꓡꓰ. ꓟꓽ ꓐꓯ ꓡ꓿ ꓠꓴ ꓔꓯ ꓡꓳ ꓒꓰ ꓔˍ ꓟ ꓡꓰ ꓠꓴ ꓔꓯ ꓟꓽ ꓡꓳ.꓿ ꓠꓴ ꓔꓯ ꓟꓽ ꓗꓪꓽ ꓫꓵꓼ꓿ ꓠꓴ ꓮ ꓫꓵꓽ ꓬꓰˍ ꓥ ꓡꓰ. ꓠꓴ ꓔꓯ ꓮ ꓫꓵꓽ ꓐꓯ ꓠꓲ, ꓟꓽ ꓫꓵ ꓫꓵꓽ꓾ ꓕꓱ ꓡꓱ ꓡ ꓞꓳ ꓠꓬꓲꓽ ꓫꓵꓽ ꓔꓯ ꓠꓴ ꓟꓳ ꓪˍ ꓥꓳ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓮ ꓡꓲ ꓛꓳ ꓫꓱꓽ ꓠ, ꓟ ꓠꓬ ꓫꓬꓽ ꓫꓬꓽ ꓡꓰꓽ ꓐꓳ ꓔˍ ꓡꓳ꓿

ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓟ‐ꓕꓲ ꓕꓳꓽ ꓶ 18ꓽ15‐20 ꓥ ꓡꓳ꓿ ꓟ. ꓟꓲꓽ ꓔꓯ ꓧꓶ. ꓕꓯ ꓠ ꓠ, ꓓꓴ ꓬꓰ ꓡꓯ꓿

ꓛꓬ ꓢꓴ ꓔꓯ ꓮ ꓡꓲ ꓬꓰ ꓠꓯ, ꓟ

ꓠꓴ ꓬꓲꓼ ꓠꓴ ꓠꓬꓲ ꓕꓲ ꓣꓳ ꓝꓴꓲ ꓬꓰˍ ꓠꓬ꓾ ꓙꓰ ꓢꓲ ꓠꓴ ꓪ ꓠꓬꓲꓽ ꓣꓳ ꓔꓵꓸꓼ ꓔꓬ ꓗꓪ ꓬꓲ ꓝꓴꓲ ꓖꓴ ꓟꓳ. ꓖꓶ꓿ ꓬꓲ ꓠꓴ ꓔꓯ ꓠ ꓠ,ˍ ꓕꓯ ꓠꓽ ꓠꓴ ꓬꓲꓼ ꓠꓬꓲ ꓠꓬꓲ ꓔ ꓠꓴ ꓘꓶ. ꓟꓶˍ ꓟ ꓥ ꓡꓳ꓿ ꓬꓲ ꓠ ꓠ, ꓟꓽ ꓫꓳ ꓕꓯ ꓠꓽ ꓢꓷ. ꓙ ꓟꓳꓻ ꓙ ꓢꓴ ꓠꓬꓲꓽ ꓢ ꓣꓳ ꓐꓯ ꓘꓶ ꓗꓪ ꓐꓰ꓾ ꓮ ꓡꓲ ꓕꓲ ꓘꓶˍ ꓟꓲ ꓕꓶ ꓡꓡꓰ ꓝꓲ ꓠ, ꓟ꓾ ꓠꓱ. ꓐꓯꓼ ꓕꓲ ꓠꓬꓲꓽ ꓣꓳ ꓧꓳꓽ ꓙꓰ꓿ ꓬꓲ ꓪ ꓘꓶ. ꓘꓶꓽ ꓔꓯˍ ꓟꓲ ꓟꓽ ꓘꓳ ꓣꓴ ꓠꓬ ꓘꓴ ꓜꓲꓼ ꓞꓳ ꓔꓯ ꓐꓯ ꓖꓶ꓿ ꓘꓴ ꓜꓲꓼ ꓞꓳ ꓐꓯ ꓘꓶ ꓔꓯˍ ꓟꓲ ꓟꓽ ꓘꓳ ꓣꓴ ꓠꓬ꓾ ꓬꓲ ꓔꓯ ꓐꓶꓽ ꓞꓳˍ ꓐꓰ ꓝꓲ. ꓫ ꓢꓴ ꓚꓬ, ꓗꓷ꓿

ꓠꓴ ꓪ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓟꓲ ꓠꓯ ꓗꓪ ꓠꓴ ꓪ ꓡꓰ ꓞꓳ, ꓔ ꓟ ꓔꓯ ꓠ ꓬ ꓟ ꓴ ꓗꓪ ꓗꓪˍ ꓟꓲ ꓞꓳ, ꓔ ꓥꓳ꓿ ꓟꓲ ꓠꓯ ꓗꓪ ꓠꓴ ꓪ ꓡꓰ ꓩꓴ ꓗꓷ ꓟ ꓔꓯ ꓠꓬꓲ ꓟꓴ ꓗꓪ ꓗꓪˍ ꓟꓲ ꓩꓴ ꓗꓷˍ ꓥꓳ꓿ ꓥꓪ ꓝꓮꓲ ꓠꓴ ꓪ ꓔꓯ ꓐꓯ ꓖꓶˍ ꓠꓬꓲ꓾ ꓟꓲ ꓠꓯ ꓗꓪ ꓡ ꓞꓳ ꓠꓬꓲꓽ ꓣꓳ ꓮ ꓫꓵꓽ ꓓꓰꓽˍ ꓟꓲ ꓕꓲ ꓠꓲ, ꓟˍ ꓡꓰꓽ ꓥ ꓕꓯ ꓠꓽ꓾ ꓟꓴ ꓗꓪ ꓗꓪ ꓟ ꓥꓪ ꓐ, ꓐꓽ ꓡꓰ ꓬꓲ ꓪ ꓐꓱ ꓶ ꓒꓬꓱꓼ ꓡ ꓝꓲˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓮ ꓡꓲ ꓗꓪˍ ꓟꓲ꓾ ꓥꓪ ꓟꓬꓱ ꓗꓪ ꓐꓰ ꓡ ꓞꓳ ꓠꓬꓲꓽ ꓢ ꓣꓳ ꓜꓲꓼ ꓡꓯ ꓘꓳˍ ꓠꓬ꓾ ꓥꓪˍ ꓟꓲ ꓬꓲ ꓪ ꓗꓳ ꓡꓳ ꓗꓪ ꓔꓬ ꓡꓳ꓾ ꓐꓯˍ ꓡꓳ꓿

ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓠꓬꓲ ꓡꓳ. ꓠ, ꓟ ꓗꓪꓽ ꓫꓵꓼ ꓠ, ꓟ ꓐꓱ ꓶ ꓮ ꓙꓵꓽ ꓢꓴ ꓕꓯꓽ ꓢꓲ ꓗꓪ ꓶꓻ ꓙꓳˍ ꓡꓳ ꓐꓯˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓟꓳˍ ꓡꓳ꓿ ꓮ ꓢꓳ ꓕꓯ ꓣꓳ ꓡ ꓞꓳ ꓠꓬꓲꓽ ꓫꓵꓽ ꓙꓳˍ ꓟ ꓔꓯ ꓢꓷ. ꓡꓰꓳ꓿ ꓕꓲ ꓫꓵꓽ ꓟ ꓠꓬ ꓢꓴ ꓔꓯ ꓮ ꓘꓶ. ꓟ. ꓖꓶ ꓑꓱ ꓖꓶ ꓠꓲ, ꓫꓵˍ ꓟ ꓞꓳ ꓫꓵꓽ ꓕꓲ ꓫꓵꓽ꓿ ꓖꓳ ꓟ ꓠꓬ ꓬꓲ ꓪ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓚꓳ. ꓡˍ ꓟ꓾ ꓫꓱ. ꓤ ꓠꓲ, ꓠꓵ ꓠꓲ, ꓗꓪ ꓐꓰ ꓡˍ ꓫꓵꓽ ꓟꓽ ꓥ ꓟ ꓟꓬꓽˍ ꓡꓳ꓿ ꓬꓲ ꓪ ꓠꓬ ꓢꓴ ꓕꓯꓽ ꓢꓲ ꓗꓪ ꓓꓻˍ ꓡꓳ꓾ ꓢꓴ ꓕꓯꓽ ꓢꓲ ꓗꓪ ꓓꓵꓽ ꓙ ꓗꓴ.ˍ ꓡꓳ꓾ ꓢꓴ ꓕꓯꓽ ꓢꓲ ꓗꓪ ꓐꓯ ꓓ, ꓡꓳ ꓐꓯˍ ꓟ ꓚꓬ, ꓠꓲ, ꓫꓵˍ ꓟ ꓑꓶ. ꓓꓴ꓾ ꓙꓵꓽ ꓪ ꓟꓶ ꓠꓲ, ꓫꓵˍ ꓟ ꓑꓶ. ꓓꓴ ꓢꓴ ꓔꓯ ꓟ. ꓖꓶˍ ꓟ ꓑꓱ ꓖꓶˍ ꓟ ꓬꓰ ꓠꓲ, ꓫꓵˍ ꓟ ꓥ ꓡꓳ꓿ ꓮ ꓚꓲ. ꓛꓲ ꓬꓲ ꓪ ꓥꓳꓽ ꓓ, ꓢꓴ ꓛꓬ ꓓ, ꓢꓴ ꓖꓳ ꓕꓲ ꓣꓳ ꓔꓯ ꓔꓱ, ꓟ ꓙ ꓖꓴ ꓗꓪ ꓡ ꓠ, ꓟ ꓐꓱ ꓶ ꓠꓵꓻ ꓠꓲ, ꓡꓰ  ꓖꓴ ꓟ. ꓖꓶˍ ꓟ ꓢꓶ. ꓟꓽ ꓞꓲ ꓚꓲ. ꓛꓬ ꓓꓻˍ ꓟ ꓗꓴ.ˍ ꓟ ꓔꓯ ꓡ ꓞꓳ ꓐꓴ ꓟꓳꓻ ꓠ, ꓟ ꓐꓱ ꓶ ꓢꓴ ꓕꓯꓽ ꓢꓲ ꓗꓪ ꓮ ꓟꓴ. ꓟꓴ ꓚꓬ, ꓓ, ꓠ, ꓟ ꓐꓱ ꓶ ꓬꓲ ꓪ ꓠꓬ ꓢꓴ ꓔꓯ ꓟ. ꓒ ꓬꓰˍ ꓫꓵꓽ ꓟꓬꓽˍ ꓡꓳ꓿ ꓕꓱ ꓟ ꓠꓬ ꓟꓽ ꓜꓳꓽ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓴ ꓔꓯ ꓟ. ꓖꓶ ꓑꓱ ꓖꓶ ꓠ, ꓟ ꓠꓬ ꓶꓻ ꓙꓳˍ ꓐꓰ ꓐꓯ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓮ ꓡꓲ ꓗꓪ ꓚꓳ. ꓓꓳ ꓠ ꓔˍ ꓐꓯˍ ꓠꓬ ꓠꓵꓻ ꓠꓲ, ꓗꓪ ꓚꓳ. ꓓꓳ ꓠ ꓔˍ ꓡꓳ꓿ ꓮ ꓚꓲ. ꓛꓲ ꓣꓳ ꓠꓲ, ꓟ ꓠꓯꓸꓼ ꓗꓪ ꓐꓰ ꓖꓳ ꓕꓲ ꓣꓳ ꓟ ꓔꓯ ꓫꓱ. ꓤˍ ꓟ ꓥꓳꓽ ꓞ, ꓟ ꓖꓳ ꓕꓲ ꓣꓳ ꓔꓯ ꓐꓯ ꓟ. ꓖꓶˍ ꓟ ꓠꓬ ꓬꓰ ꓠ ꓔˍ ꓡꓳ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓡꓳ. ꓟꓳˍ ꓡꓳ꓿

ꓝꓮꓲ ꓬꓲ ꓚꓰ ꓬꓲ ꓪꓴ. ꓕꓳꓽ ꓶ ꓗꓪ ꓥˍ ꓟꓲ ꓗꓳ. ꓗꓳ. ꓐꓰ ꓠꓬꓲ ꓤ ꓠꓬꓲꓽ ꓣꓳ꓾ ꓬꓲ ꓮ ꓗꓳ ꓣꓱꓽ ꓢꓴ ꓠꓬ ꓬꓲ ꓠꓬꓲꓽ ꓤ ꓔꓯ ꓢꓰꓼ ꓗꓷˍ ꓕꓯ ꓪꓴ‐ꓢ ꓠꓬ ꓬꓲ ꓔꓯ ꓠ ꓠꓬꓲˍ ꓡꓳ꓿ ꓠꓴ ꓠꓬꓲ ꓤ ꓮ ꓡꓲ ꓗꓪ ꓙꓰ ꓗꓷ ꓡ꓾ ꓐꓰ ꓠ ꓠꓬꓲˍ ꓡꓳ꓿ ꓖꓳ ꓕꓯ ꓬꓲ ꓠꓬ꓾ ꓥꓪ ꓠꓬ ꓥꓪ ꓠꓬꓲ ꓤ ꓔꓯ ꓡꓳ. ꓢꓴ ꓥ ꓡ ꓐꓰ ꓐ, ꓐ ꓪꓴ‐ꓢ ꓔꓯ ꓒꓳ, ꓖꓶˍ ꓡꓳ꓿ ꓚꓲ. ꓛꓬ ꓠꓬꓲ ꓤ ꓕꓲ ꓣꓳ ꓮ ꓡꓲ ꓗꓪ ꓙꓰ ꓗꓷ ꓡ ꓐꓯˍ ꓟ ꓮ ꓗꓳ ꓣꓱꓽ ꓢꓴ ꓔꓯ ꓶꓻ ꓙꓳˍ ꓡꓳ꓿ ꓬꓲ ꓔꓯ ꓠꓬꓲ ꓡꓳ. ꓠ ꓔˍ ꓡꓳ꓿ ꓗꓪꓽ ꓫꓵꓼ ꓠ ꓔˍ ꓡꓳ꓾ ꓐꓯˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓫꓬꓽ ꓫꓬꓽ ꓡꓰꓽ ꓟꓳˍ ꓡꓳ꓿

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓞꓳ ꓫꓵꓽ ꓠꓬꓲꓽ ꓫꓵꓽ ꓙꓳˍ ꓟ ꓗꓪ ꓮ ꓡꓲ ꓕꓲ ꓫꓵꓽ ꓗꓪˍ ꓟꓲ ꓠꓴ ꓕꓽ ꓓꓵꓽ ꓙꓰ ꓝꓲ꓿ ꓢꓴ ꓔꓯ ꓟ. ꓖꓶ ꓑꓱ ꓖꓶˍ ꓟ ꓠꓬꓲ ꓡꓳ. ꓖꓶˍ ꓟ ꓠꓬ ꓚꓲ. ꓛꓬ ꓓꓻˍ ꓟ ꓗꓴ.ˍ ꓟ ꓔꓯ ꓟꓳ. ꓖꓶ ꓠ, ꓟ ꓟꓽ ꓥ꓿ ꓕꓱ ꓟˍ ꓡꓰ ꓐꓰ ꓠꓴ ꓠꓬꓲ ꓤ ꓠꓴ ꓗꓳ ꓡꓳ ꓗꓪ ꓥꓳꓽ ꓓ, ꓕꓯ ꓛꓬ ꓓ, ꓕꓯ ꓬꓲ ꓪ ꓮ ꓡꓲ ꓗꓷ ꓡꓰ ꓠꓲ, ꓫꓵˍ ꓗꓷ ꓡꓰ ꓐꓰ ꓐꓯ ꓢꓲ ꓠꓬꓲ ꓡꓳ ꓒꓰ ꓔˍ ꓟ ꓟꓽ ꓡꓳ. ꓟˍ ꓟꓲ ꓬꓰ ꓟꓽ ꓓꓻ꓾ ꓐꓯˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓟꓳˍ ꓡꓳ꓿ ꓣꓳ‐ꓟ ꓕꓳꓽ ꓶ 13ꓽ8‐10 ꓗꓪ ꓥˍ ꓟꓲ “ꓕꓲ ꓣꓳ ꓛꓳꓽ ꓕꓲ ꓣꓳ ꓠꓵꓻ ꓠꓲ, ꓗꓪ ꓚꓳ. ꓗꓳ. ꓙꓰ ꓠꓬ ꓠꓱ. ꓐꓯ ꓮ ꓫꓵꓽ ꓶꓻ ꓡꓯꓼ ꓟꓲ ꓕꓽ ꓐꓵ ꓝꓲ”꓾ ꓐꓰ ꓐꓯ ꓔ ꓡꓳ꓿