ꓔꓲꓺ ꓒ ꓓꓽ ꓟ ꓚꓮꓣꓓꓲꓠꓮꓡ ꓚꓧꓮꓣꓡꓰꓢ ꓐꓳ ꓡꓰ ꓢꓲ ꓡꓲ, ꓟ ꓐꓰ ꓫꓵꓽ ꓪꓴ ꓫꓬ ꓡꓰ ꓠ, ꓟ ꓐꓱ ꓶ ꓢꓲ ꓒ ꓬꓰ‐ꓢꓴ ꓬꓲ. ꓚꓱ, ꓔꓯ ꓢꓲꓺ ꓣꓴ ꓠ, ꓟ ꓐꓯ ꓔ ꓟ꓾

ꓬꓮꓠꓖꓳꓠ ꓔꓲꓺ ꓒ ꓓꓽ ꓟ ꓚꓮꓣꓓꓲꓠꓮꓡ ꓚꓧꓮꓣꓡꓰꓢ ꓐꓳ ꓡꓰ 2026 ꓘꓳꓼ 8 ꓦ 30 ꓠꓬꓲ (22) ꓠꓽ ꓟ ꓠꓽ ꓦꓬꓼ ꓠꓬꓲ ꓟꓲ‐ꓢ ꓪꓽ ꓘꓴ ꓙꓵ, ꓗꓪ ꓟ. ꓟꓲꓽ ꓚ_ ꓟ ꓗꓪ ꓘꓴ ꓜꓲꓼ ꓞꓳ ꓢꓲꓺ ꓤ ꓐꓴ ꓗꓪ ꓐꓰ ꓛꓴꓽ ꓙꓳ_ ꓟ꓾ ꓠꓲ, ꓜꓳ_ ꓟ꓾ ꓒꓳ, ꓔꓴ_ ꓟ ꓐꓰ ꓜꓲ ꓜꓲ ꓟꓴ ꓟꓴ ꓬꓰ_ ꓟ ꓔꓯ ꓒꓰ, ꓗꓷ ꓢꓲ ꓔꓱ, ꓟ꓾ ꓖꓽ ꓖꓶ_ ꓟ꓾ ꓢꓲ ꓡꓲ, ꓟ ꓐꓰ ꓫꓵꓽ ꓪꓴ ꓫꓬ ꓡꓰ ꓟ ꓗꓪ ꓐꓰ ꓕꓲꓽ ꓝ. ꓢꓲ ꓒ ꓬꓰ‐ꓢꓴ ꓢꓲ ꓒ ꓬꓰ‐ꓢꓴ ꓬꓲ. ꓚꓱ, ꓠꓯꓼ ꓗꓪ ꓛꓳ ꓫꓱꓽ ꓠ, ꓟ ꓢꓯꓼ ꓖꓶ ꓔ ꓡꓳ꓿

ꓬꓰ‐ꓡꓲ‐ꓟꓲ ꓕꓳ ꓶ 20ꓽ7‐9꓾ ꓣꓳ‐ꓟ 12ꓽ1‐2 ꓐꓰ ꓟ‐ꓕꓲ 16ꓽ21‐27 ꓗꓪ ꓵ ꓗꓷ ꓟ ꓢꓲ ꓫꓬ ꓕꓳ ꓶ ꓔꓯ ꓝꓮꓲ ꓓꓵꓽ ꓙ ꓡꓰ ꓝꓲ ꓢꓲ꓾ ꓔꓲꓺ ꓒ ꓓꓽ ꓡꓰ ꓪꓴ‐ꓢ ꓐꓯ ꓘꓶꓽ ꓶꓼ ꓓꓳ ꓫꓱ, ꓓꓳ ꓠꓬ ꓙꓲ‐ꓢꓴ ꓢꓲ ꓤ ꓐꓴ ꓕꓲꓽ ꓣꓳ ꓐꓰ ꓕꓲꓽ ꓣꓳ ꓐꓰ ꓘꓴ ꓜꓲꓼ ꓞꓳ ꓐꓱ ꓶ ꓡꓰ ꓟꓽ ꓞꓲ ꓫꓵꓽ ꓪꓴ꓾ ꓜꓲ ꓜꓲ ꓟꓴ ꓟꓴ ꓬꓰ ꓟ꓾ ꓔꓬ ꓖꓴ ꓗꓪ ꓐꓰ ꓘꓰ, ꓑꓬ ꓡꓰ ꓟ꓾ ꓫ. ꓙꓵ ꓟꓷꓼ ꓙꓵ ꓟ ꓐꓰ ꓛꓬ, ꓡꓰ ꓓꓴ ꓟꓽ ꓙꓳ ꓟ ꓔꓯ ꓔꓳ, ꓜꓳ ꓔꓬ ꓟ ꓟꓬ‐ꓟ ꓗꓴꓷꓼ ꓐꓱ ꓶ ꓥ ꓟꓲ ꓮ ꓘꓶ. ꓣꓳ. ꓚꓵ_ ꓟ ꓓꓳꓽ ꓔꓯ ꓖꓶ ꓔꓬ ꓡꓳ ꓐꓰ ꓐꓯ ꓔ ꓡꓳ꓿

ꓙꓵꓻ ꓠꓲ, ꓮ ꓔꓳ.

ꓟꓷꓼ ꓠꓷ, ꓝ. ꓒꓽ ꓬꓰ‐ꓡꓲ‐ꓟꓲ ꓚꓱ, ꓔꓯ ꓝꓮꓲ ꓓꓵꓽ ꓙ ꓔꓱ, ꓕ ꓢꓲ꓾ ꓬꓰ‐ꓡꓲ‐ꓟꓲ ꓠꓬ ꓪꓴ‐ꓢ ꓬꓲ. ꓔꓱ, ꓟ ꓚꓱ, ꓔꓯ ꓚꓺ ꓟ ꓑꓶ ꓓꓴ ꓬꓲ ꓔꓯ ꓒꓰ, ꓗꓷ ꓟ꓾ ꓬꓲ ꓔꓯ ꓐꓯ ꓔꓳ, ꓟ ꓐꓰ ꓫ. ꓙꓵ ꓟꓷꓼ ꓙꓵ ꓓꓴ ꓮ ꓟꓬ, ꓔꓯ ꓔꓳ, ꓜꓳ ꓡꓰ ꓥ ꓟꓲ ꓬꓲ. ꓚꓲ. ꓛꓬ ꓠꓬ ꓢꓲꓺ ꓚꓰ. ꓟꓶ ꓟ ꓕꓱ ꓟ ꓔꓯ ꓮ ꓡꓰ ꓥ ꓟꓲ ꓒꓰ, ꓗꓷ ꓟꓽ ꓓ꓾ ꓖꓳ ꓟ ꓑꓶ ꓓꓴ ꓪꓴ‐ꓢ ꓐꓯ ꓘꓶꓽ ꓠꓬ “ ꓥꓪ ꓠꓲ, ꓟ ꓘꓴꓽ ꓗꓪ ꓐꓬ ꓡꓰ ꓟ ꓮ ꓔꓳ. ꓡꓰ ꓐꓰ ꓥ ꓡꓳ꓾” ꓐꓰ ꓐꓯ ꓔ ꓟ ꓥꓳ꓿

ꓔꓲꓺ ꓒ ꓓꓽ ꓟ ꓚꓮꓣꓓꓲꓠꓮꓡ ꓡꓰ ꓕꓱ ꓟ ꓠꓬ ꓙꓵꓻ ꓠꓲ, ꓬꓲ. ꓠꓯ. ꓟ ꓔꓯ ꓟ. ꓖꓶ ꓔ ꓟ ꓔꓯ ꓐꓯ ꓔ ꓡꓳ꓿ ꓪꓴ‐ꓢ ꓠꓵꓻ ꓠꓲ, ꓠꓬ ꓞꓳ ꓤ ꓕꓲꓽ ꓣꓳ ꓠꓲ, ꓟ ꓠꓯꓼ ꓗꓪ ꓔꓳ, ꓜꓳ ꓡꓰ ꓠꓬ ꓫ. ꓙꓵ ꓟꓷꓼ ꓙꓵ ꓓꓴ ꓗꓳ, ꓡꓳ ꓗꓪ ꓥ ꓟꓲ ꓖꓳ ꓕꓲꓽ ꓣꓳ ꓠꓬ ꓪꓴ‐ꓢ ꓔꓯ ꓢ ꓢ ꓐꓰ ꓒꓰ, ꓗꓷ ꓡꓰ ꓟꓽ ꓓ꓿

ꓪꓴ‐ꓢ ꓗ. ꓠꓯ. ꓗꓪ ꓛꓳ ꓟ ꓠꓬ ꓫ. ꓙꓵ ꓟꓷꓼ ꓙꓵ ꓓꓴ ꓟꓽ ꓔꓳ, ꓜꓳ ꓡ ꓥ ꓟꓲ ꓟꓽ ꓥ ꓐꓰ ꓙꓲ‐ꓢꓴ ꓢꓲ ꓤ ꓐꓴ ꓔꓯ ꓐꓯ ꓔ ꓡꓳ꓿ ꓖꓳ ꓟ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓠꓯꓼ ꓗꓪ ꓛꓳ ꓠꓬ ꓡꓯꓼ ꓐꓳ ꓔꓶ. ꓓꓴ ꓬꓲ. ꓚꓱ, ꓯꓼ ꓗꓪ ꓛꓳ ꓫꓱ ꓠ, ꓟ ꓟꓲ ꓥ ꓡꓳ꓿

“ꓪꓴ‐ꓢ ꓠꓯꓼ ꓗꓪ ꓛꓳ ꓫꓱꓽ_ ꓟ ꓠꓬ ꓕꓲꓽ ꓧꓪ, ꓧꓪ, ꓡꓯꓼ ꓐꓳ ꓔꓶ ꓓꓴ ꓬꓲ. ꓚꓱ, ꓠꓯꓼ ꓗꓪ ꓛꓳ ꓫꓱꓽ ꓓꓴ ꓥ ꓟꓲ ꓗꓷ ꓡ ꓥꓳ꓾” ꓐꓰ ꓐꓯ ꓔ ꓢꓲ ꓠꓬꓲ ꓔꓱ, ꓟ ꓔꓯ ꓢꓲꓺ ꓚꓰ. ꓟ ꓠꓬ ꓚꓲ. ꓛꓬ ꓔꓱ, ꓜꓲ ꓘꓴ_ ꓟ ꓠꓲ, ꓟ ꓣꓱ ꓬꓯꓼ ꓟ꓾ ꓖꓽ ꓖꓽ ꓟ ꓠꓬ ꓙꓽ ꓣꓳꓺ ꓟ ꓠꓲ, ꓟ ꓣꓱ ꓬꓯꓼ ꓡꓳ꓾ ꓢꓲ ꓡꓲ, ꓟ ꓔꓯ ꓫꓬ, ꓔꓶ ꓠꓬ ꓑꓶ. ꓟ ꓢꓯꓼ ꓪ ꓐꓰ ꓠꓻ ꓙꓵ_ ꓟ ꓔꓯ ꓗꓳ. ꓙꓰ ꓐ ꓡ ꓟ ꓠꓲ, ꓟ ꓣꓱ ꓬꓯꓼ ꓡꓳ ꓐꓰ ꓐꓯ ꓔ ꓡꓳ꓿

ꓟꓲ ꓠꓯ ꓞꓳ ꓤ ꓓꓵꓽ ꓙ ꓚꓱ, ꓐꓰ ꓪꓴ‐ꓢ ꓓꓵꓽ ꓙ ꓠꓲ,  

ꓒꓲ‐ꓕꓱ ꓠꓬ ꓢꓲ ꓒ ꓬꓰ‐ꓢꓴ ꓫ. ꓙꓵ ꓓꓴ ꓔꓳ, ꓜꓳ ꓡ ꓟ ꓐꓰ ꓫꓵꓻ ꓟ ꓚꓱ, ꓔꓯ ꓟꓳ. ꓖꓶ_ ꓟ ꓢꓲ ꓫꓬ ꓕꓳ ꓶ ꓚꓱ, ꓔꓯ ꓝꓮꓲ ꓓꓵꓽ ꓙ ꓔꓱ, ꓕ ꓢꓲ ꓔꓲꓺ ꓒ ꓓꓽ ꓟ ꓡꓰ ꓟꓲ ꓠꓯ ꓞꓳ ꓤ ꓓꓵꓽ ꓙ ꓟ ꓐꓰ ꓪꓴ‐ꓢ ꓠꓲ, ꓟ ꓠꓯꓼ ꓗꓪ ꓚꓬ, ꓟ ꓔꓯ ꓬꓲꓼ ꓠꓬꓲ. ꓐꓯ ꓔ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓒꓲ‐ꓕꓱ ꓔꓯ “ꓠꓴ ꓠꓬ ꓪꓴ‐ꓢ ꓓꓵꓽ ꓙ ꓟ ꓡꓰ ꓐꓰ ꓟꓽ ꓓꓵꓽ ꓙ꓾ ꓞꓳ ꓤ ꓠꓲ, ꓟ ꓡꓰ ꓐꓰ ꓓꓵꓽ ꓙ ꓔꓬ ꓡꓳ꓾” ꓐꓰ ꓐꓯ ꓖꓶ ꓔ ꓟ ꓥꓳ꓿

ꓙꓲ‐ꓢꓴ ꓢꓲ ꓤ ꓐꓴ ꓗꓪ ꓐꓰ ꓥ ꓟꓲ ꓚꓲ. ꓛꓬ ꓓꓵꓽ ꓙ ꓟ ꓐꓰ ꓠꓲ, ꓟ ꓔꓯ ꓢꓲ ꓒ ꓬꓰ‐ꓢꓴ ꓡꓰ ꓬꓰ ꓖꓶ ꓔꓬ ꓡ ( ꓥ ꓠꓬ) ꓟꓲ ꓠꓯ ꓕꓲ ꓒꓳ, ꓬꓲ. ꓒꓵꓽ ꓗꓪ ꓐꓰ ꓬꓰ ꓖꓶ ꓔꓬ ꓡ ꓐꓰ ꓚꓲ. ꓛꓬ ꓔꓱ, ꓚꓲ. ꓛꓬ ꓓꓵꓽ ꓙ ꓔꓱ, ꓕ ꓠ, ꓟ ꓔꓲꓺ ꓒ ꓓꓽ ꓡꓰ ꓢꓯꓼ ꓖꓶ ꓔ ꓡꓳ꓿

ꓟꓲ ꓠꓯ ꓗꓪ ꓠꓬ ꓙꓵꓽ ꓪ꓾ ꓝꓮꓲ ꓒꓳ, ꓔꓳ, ꓟ꓾ ꓔꓯꓺ ꓡꓯ ꓘꓳ_ ꓟ ꓐꓰ ꓛꓴꓽ ꓙꓳ ꓢꓴ ꓠꓯꓼ ꓗꓪ ꓧꓪ ꓡꓰ ꓓꓴ ꓔꓯ ꓢꓯꓼ ꓖꓶ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓒꓵꓽ ꓛꓳ_ ꓟ꓾ ꓖꓽ ꓖꓶ_ ꓟ꓾ ꓛꓴꓽ ꓙꓳ ꓢꓴ ꓔꓯ ꓠꓲ, ꓠꓵꓻ ꓟ ꓐꓰ ꓞꓳ ꓤ ꓟꓬꓱꓺ ꓓꓳꓽ ꓔꓯ ꓒꓵꓽ ꓠ, ꓟ ꓟ. ꓖꓶ ꓔ ꓟ ꓥꓳ꓿

ꓢꓲ ꓫꓬ ꓢꓴ ꓒꓳ‐ꓡꓳ ꓐꓯ ꓘꓶꓽ ꓗꓪ ꓐꓰ “ꓮ ꓟꓶ ꓤꓶꓻ ꓦꓬꓼ ꓠꓬꓲ ꓡꓰ ꓐꓰ ꓕꓽ ꓛꓳ꓾ ꓠꓴ ꓪ ꓠꓲ, ꓟ ꓐꓰ ꓓꓵꓽ ꓙ ꓟ ꓔꓯ ꓝꓮꓲ ꓬꓲ. ꓫꓵꓼ ꓫꓬ, ꓔꓶꓻ ꓟ ꓗꓪ ꓐꓰ ꓒꓳ, ꓡꓶ. ꓓꓴ ꓬꓰ꓾” ꓐꓰ ꓢꓯꓼ ꓖꓶ ꓗꓷ ꓟ ꓥꓳ꓿

ꓙꓲ‐ꓢꓴ ꓢꓲ ꓤ ꓐꓴ ꓐꓱ ꓶ ꓮ ꓘꓶ. ꓪꓴꓽ ꓓꓰ ꓡꓰ ꓟ ꓫꓵ ꓪꓴ ꓠꓬ ꓞꓳ ꓤ ꓠꓲ, ꓟ ꓘꓴꓽ ꓗꓪ ꓐꓰ ꓒꓬꓱꓼ ꓡ ꓟ ꓔꓯ ꓐꓯ ꓔ ꓡꓳ꓿ ꓕꓱ ꓟ ꓠꓬ ꓠꓲ, ꓜꓳ ꓟ ꓐꓰ ꓠꓵꓻ ꓠꓲ,꓾ ꓝꓮꓲ ꓒꓳ, ꓔꓴ ꓟ ꓐꓰ ꓖꓽ ꓖꓶ_ ꓟ꓾ ꓙꓳꓺ ꓠꓲ, ꓐꓰ ꓙꓵꓻ ꓠꓲ,꓾ ꓠꓲ, ꓟ ꓣꓳꓺ ꓟ ꓐꓰ ꓥꓳ ꓡꓳ. ꓓꓴ ꓗꓪ ꓒꓬꓱꓼ ꓔꓬ ꓟ ꓥ ꓡꓳ꓿

“ꓣꓳ ꓠꓲ, ꓟ ꓔꓯ ꓮꓽ ꓟ ꓡꓰ ꓬꓰ ꓖꓶ ꓔꓬ ꓡ?” ꓐꓰ ꓔꓲꓺ ꓒ ꓓꓽ ꓟ ꓡꓰ ꓠꓽ ꓠꓬꓲ ꓔ ꓡꓳ꓿ ꓟꓰꓓꓲꓮ ꓐꓴ ꓗꓴꓷꓼ ꓫꓵꓽ ꓪꓴ꓾ ꓠꓲ, ꓦꓶ_ ꓟ꓾ ꓙꓳꓺ ꓠꓲ, ꓐꓴ ꓠꓬ ꓞꓳ ꓤ ꓠꓲ, ꓟ ꓠꓯꓼ ꓗꓪ ꓞꓯꓼ ꓐ ꓡ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓖꓳ ꓟ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓚꓲ. ꓛꓬ ꓠꓲ, ꓟ ꓐꓰ ꓓꓵꓽ ꓙ ꓚꓱ, ꓔꓯ ꓬꓰ ꓖꓶ ꓐ ꓡ ꓝꓲ ꓠ, ꓟ ꓙꓲ‐ꓢꓴ ꓢꓲ ꓤ ꓐꓴ ꓔꓯ ꓢꓯꓼ ꓖꓶ ꓔ ꓡꓳ꓿

ꓟꓬ‐ꓟ ꓗꓴꓷꓼ ꓐꓱ ꓶ ꓓꓳꓽ ꓫꓵꓽ

ꓟꓬ‐ꓟ ꓗꓴꓷꓼ ꓫꓵꓽ ꓪꓴ ꓔꓯ ꓔꓲꓺ ꓒ ꓓꓽ ꓡꓰ ꓟꓶꓻ ꓫꓵꓻ ꓡꓰ ꓟ ꓫꓵꓽ ꓪꓴ ꓐꓰ ꓜꓲ ꓜꓲ ꓟꓴ ꓟꓴ ꓬꓰ ꓟ ꓚꓱ, ꓠꓯꓼ ꓗꓪ ꓫ. ꓙꓵ ꓓꓴ ꓔꓯ ꓐꓯ ꓖꓶ ꓔ ꓡꓳ꓿

ꓕꓲꓽ ꓦꓲꓻ ꓢꓴ ꓐꓴ ꓠꓬ ꓠꓲ, ꓟ ꓫ. ꓔꓬ ꓡꓳ꓾ ꓞꓳ ꓡꓱ ꓤ ꓐꓴ ꓠꓬ ꓬꓲ. ꓚꓱ, ꓟꓶ ꓔꓬ ꓡꓳ꓾ ꓤ ꓠꓱ ꓐꓴ ꓠꓬ ꓢꓷ. ꓠꓲ, ꓐꓰ ꓳ ꓟꓬ ꓟꓶꓽ ꓡꓰ ꓔꓬ ꓡꓳ꓾ ꓞꓳ ꓤ ꓗꓳ ꓡꓳ ꓗꓪ ꓠꓲ, ꓟ ꓟꓽ ꓫꓱ, ꓟ ꓐꓰ ꓞꓳ ꓤ ꓮ ꓟꓬ, ꓠꓲ, ꓟ ꓗꓪ ꓠꓻ ꓓꓴ ꓡꓰ ꓔꓬ ꓡꓳ ꓐꓰ ꓐꓯ ꓔ ꓡꓳ꓿ꓕꓱ ꓟ ꓙꓵ, ꓗꓪ ꓘꓴ ꓜꓲꓼ ꓞꓳ ꓠꓬ ꓛꓴꓽ ꓙꓳ ꓟ ꓐꓰ ꓒꓳ, ꓔꓴ_ ꓟ ꓚꓱ, ꓗꓪ ꓐꓰ ꓟꓽ ꓥ꓾ ꓪꓴ‐ꓢ ꓬꓲ. ꓚꓱ, ꓠꓯꓼ ꓗꓪ ꓡꓰ ꓛꓳ ꓫꓱꓽ ꓠ, ꓟ ꓐꓯ ꓔ ꓡꓳ꓿

“ꓪꓴ‐ꓢ ꓚꓱ, ꓠꓬ ꓠꓵꓻ ꓠꓲ, ꓐꓰ ꓔꓱ, ꓟ ꓐꓰ ꓕꓲꓽ ꓪ ꓝ. ꓖꓶ ꓔ ꓟ ꓚꓱ, ꓥ ꓡꓳ꓾” ꓔꓱ, ꓟ ꓔꓯ ꓧꓪ ꓟ ꓠꓬ ꓒꓳ, ꓔꓴ ꓟ ꓚꓱ, ꓕꓲꓽ ꓟ ꓒꓬꓱꓼ ꓡ ꓓꓴ ꓟꓽ ꓙꓳ ꓟ ꓔꓯ ꓬꓲꓼ ꓠꓬꓲ. ꓐꓯ ꓔ ꓡꓳ꓿ ꓢꓲ ꓡꓲ, ꓟ ꓠꓬ ꓢꓯꓼ ꓐ ꓚꓱ, ꓟꓽ ꓥ꓾ ꓖꓽ ꓖꓶ_ ꓟ ꓠꓬ ꓞꓳ. ꓡꓰ ꓟ ꓟꓽ ꓥ꓾ ꓝꓮꓲ ꓫꓬ ꓡꓰ ꓓꓴ ꓢꓯꓼ ꓕꓵꓼ ꓟ ꓠꓬ ꓗꓳ. ꓗꓷ ꓟ ꓔꓯ ꓟꓲ ꓡꓰ ꓟ ꓟꓽ ꓥ ꓐꓰ ꓐꓯ ꓔ ꓡꓳ꓿ ꓝꓮꓲ ꓫꓬ ꓡꓰ ꓓꓴ ꓠꓬ ꓠꓻ ꓓꓴ ꓔꓯ ꓓꓵꓽ ꓙ ꓢꓲ ꓕꓲ ꓣꓳ ꓐꓰ ꓕꓲ ꓣꓳ ꓕꓲ ꓪꓽꓛꓳ ꓫꓱꓽ ꓢꓲ ꓙꓲ_ ꓟ ꓤꓶꓻ ꓔꓯ ꓫꓬ, ꓔꓶ ꓠ, ꓟ ꓢꓲꓺ ꓚꓰ. ꓓꓴ ꓥ ꓡꓳ꓿

ꓞꓳ ꓡꓱ ꓐꓴ ꓐꓱ ꓶ ꓓꓳꓽ ꓫꓵꓽ

ꓟꓬ‐ꓟ ꓗꓴꓷꓼ ꓗꓪ ꓔꓬ ꓟ ꓞꓳ ꓡꓱ ꓤ ꓐꓴ ꓗꓪ ꓐꓰ ꓢꓷ. ꓠꓲ,꓾ ꓬꓲ. ꓟꓬꓱꓽ ꓐꓰ ꓡ ꓠ, ꓟ ꓤꓶꓻ ꓐꓱ ꓶ ꓙ ꓖꓴ ꓟꓶꓽ ꓡꓰ ꓟ ꓐꓰ ꓔꓳ, ꓜꓳ ꓔꓬ ꓟ ꓔꓯ ꓥ ꓟꓲ ꓔꓲꓺ ꓒ ꓓꓽ ꓡꓰ ꓐꓯ ꓔ ꓡꓳ꓿ ꓖꓳ ꓟ ꓑꓶ ꓓꓴ ꓞꓳ ꓡꓱ ꓤ ꓐꓴ ꓔꓯ ꓚꓲ. ꓛꓬ ꓓꓵꓽ ꓙ_ ꓟ ꓳ ꓟꓬ ꓔꓯ ꓠꓲ, ꓟ ꓟꓽ ꓐꓬ ꓠ, ꓟ ꓢꓯꓼ ꓕꓵꓼ ꓠ, ꓟ ꓢꓯꓼ ꓖꓶ ꓔ ꓡꓳ꓿ “ꓟꓬ‐ꓟ ꓗꓴꓷꓼ ꓤꓶꓻ ꓦꓬꓼ ꓠꓬꓲ ꓔꓯ ꓛꓴꓽ ꓙꓳ ꓟ ꓗꓪ ꓐꓰ ꓫꓬ, ꓔꓶꓻ ꓟꓽ ꓐ ꓡ꓾” ꓐꓰ ꓐꓯ ꓔ ꓡꓳ꓿ ꓖꓳ ꓟ ꓗꓪ ꓐꓰ ꓞꓳ ꓡꓱ ꓤ ꓐꓴ ꓠꓬ ꓢꓷ. ꓠꓲ,꓾ ꓔꓱ, ꓟ꓾ ꓢꓯꓼ ꓪ꓾ ꓠꓵꓻ ꓠꓲ,꓾ ꓖꓽ ꓖꓶ ꓠꓲ, ꓐꓰ ꓢꓲ ꓡꓲ, ꓟ ꓐꓰ ꓗꓴꓷꓼ ꓔꓯ ꓫꓬ, ꓔꓶꓻ ꓠ, ꓟ ꓢꓯꓼ ꓖꓶ ꓔ ꓡꓳ꓿

ꓢꓲ ꓡꓲ, ꓟ ꓠꓬ ꓞꓳ ꓤ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓠꓲ, ꓟ ꓘꓴꓽ ꓠꓯꓼ ꓗꓪ ꓐꓰ ꓪꓴ. ꓔꓴ_ ꓟ ꓔꓯ ꓐꓯ ꓔ ꓡꓳ꓿ ꓛꓴꓽ ꓙꓳ ꓟ ꓔꓯ ꓒꓰ, ꓗꓷ ꓢꓲ ꓠꓱ. ꓐꓯꓼ ꓢꓴ ꓔꓯ ꓖꓽ ꓖꓶ_ ꓟ꓾ ꓫ. ꓓꓴ ꓔꓳ, ꓜꓳ ꓔꓬ ꓢꓴ ꓔꓯ ꓠ ꓠ, ꓖꓶ_ ꓟ ꓐꓰ ꓚꓲ. ꓛꓬ ꓐꓰ ꓟꓽ ꓪ ꓢꓴ ꓟꓬꓱꓺ ꓓꓳꓽ ꓔꓯ ꓒꓵꓽ ꓛꓳ_ ꓟ ꓐꓰ ꓢꓲ ꓡꓲ, ꓟ ꓗꓪ ꓐꓰ ꓪꓴ. ꓔꓴ_ ꓡꓳ꓿

“ꓢꓲ ꓡꓲ, ꓟ ꓠꓬ ꓠꓱ. ꓐꓯꓼ ꓕꓲꓽ ꓣꓳ ꓗꓪ ꓐꓰ ꓪꓴ. ꓔꓴ_ ꓟ ꓟꓽ ꓥ꓾ ꓢꓲ ꓡꓲ, ꓟ ꓠꓬ ꓚꓲ. ꓛꓬ ꓗꓪ ꓐꓰ ꓪꓴ. ꓔꓴ_ ꓟ ꓥ ꓡꓳ꓾” ꓐꓰ ꓐꓯ ꓔ ꓡꓳ꓿

ꓡꓯꓽ ꓐꓳ ꓔꓶ. ꓓꓴ ꓐꓰ ꓢꓯ. ꓬꓲꓼ ꓡ ꓟ꓾

ꓢꓲ ꓒ ꓬꓰ‐ꓢꓴ ꓡꓰ ꓚꓲ. ꓛꓬ ꓡꓯꓼ ꓐꓳ ꓔꓶ. ꓓꓴ ꓔꓯ ꓑꓱ. ꓢꓲ ꓬꓲ ꓠꓯꓼ ꓗꓪ ꓛꓳ ꓠ, ꓟ ꓘꓴ ꓔ ꓟ ꓔꓯ ꓓꓵꓽ ꓙ ꓢꓲ ꓔꓲꓺ ꓒ ꓓꓽ ꓡꓪ ꓠꓬꓲ. ꓠꓬꓲ ꓟꓬ‐ꓟ ꓗꓴꓷꓼ ꓠꓬ ꓮ ꓘꓶ. ꓪꓴꓽ_ ꓟ ꓡꓯꓼ ꓐꓳ ꓔꓶ. ꓓꓴ ꓕꓲꓽ ꓟ ꓔꓯ ꓐꓱ. ꓔ ꓔꓬ ꓡꓳ ꓐꓰ ꓐꓯ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓕꓱ ꓡꓯꓼ ꓐꓳ ꓔꓶ. ꓓꓴ ꓠꓬ ꓬꓲ. ꓟꓶꓽ ꓟꓽ ꓥ꓾ ꓐꓰ ꓐꓯ ꓔ ꓡꓳ꓿

“ꓡꓯꓼ ꓐꓳ ꓔꓶ. ꓓꓴ ꓗ. ꓠꓯ. ꓗꓪ ꓢꓯꓼ ꓬꓲꓼ ꓡ ꓟ ꓙꓳ_ ꓡꓳ꓾” ꓥꓳ ꓡꓳ. ꓓꓴ ꓙꓳ ꓢꓴ ꓐꓰ ꓦꓰꓼ ꓞ, ꓓꓴ ꓬꓰ ꓡꓯ ꓐꓰ ꓢꓯꓼ ꓖꓶ ꓔ ꓡꓳ꓿

ꓬꓰ‐ꓡꓲ‐ꓟꓲ ꓮ ꓔꓳ. ꓐꓬ ꓡꓰ ꓟ ꓠꓲ, ꓟ ꓔꓯ ꓔꓯ ꓟ꓾ ꓙꓵꓻ ꓠꓲ,꓾ ꓥꓳ ꓡꓳ. ꓓꓴ꓾ ꓠꓵꓻ ꓠꓲ, ꓢꓲ ꓡꓲ, ꓟ ꓐꓰ ꓝꓮꓲ ꓫꓱ, ꓡꓯ ꓘꓳ ꓟ “ꓮ ꓔꓳ.” ꓔꓯ ꓘꓴ ꓜꓲꓼ ꓞꓳ ꓗꓪ ꓐꓰ ꓝꓮꓲ ꓦꓰꓼ ꓞ, ꓐ ꓡ ꓠ, ꓟ ꓢꓯꓼ ꓖꓶ ꓔ ꓡꓳ꓿ “ꓣꓳ ꓪꓽ ꓘꓴ ꓦꓲꓻ ꓠꓬ ꓪꓽ ꓘꓴ ꓟ ꓡꓰ ꓒꓬꓱꓼ ꓡꓰ ꓟꓽ ꓓ꓾ ꓢꓲ ꓡꓲ, ꓟ ꓬꓲ. ꓔꓶ. ꓒꓬꓱꓼ ꓡ ꓠ ꓔ ꓡꓳ꓾” ꓐꓰ ꓐꓯ ꓔ ꓡꓳ꓿ ꓙꓲ‐ꓢꓴ ꓢꓲ ꓤ ꓐꓴ ꓗꓳ ꓡꓳ ꓗꓪ ꓟꓬ ꓠꓬꓲ ꓬꓲ. ꓠꓯ, ꓟ ꓬꓲ. ꓔꓶ. ꓟꓽ ꓥ꓾ “ꓪꓽ ꓡꓯ ꓘꓳ ꓫꓱ, ꓶꓯ ꓘꓳ ꓟ ꓓꓽ ꓖꓴ” ꓒꓬꓱꓼ ꓡ ꓠ, ꓟ ꓢꓯꓼ ꓨꓶ ꓔ ꓡꓳ꓿

ꓟꓬ‐ꓟ ꓗꓴꓷꓼ ꓐꓱ ꓶ ꓪꓽ ꓘꓴ ꓖꓶ_ ꓟ꓾

ꓬꓲ. ꓟꓶꓽ ꓗꓪ ꓔꓲꓺ ꓒ ꓓꓽ ꓡꓰ ꓟꓲ ꓠꓯ ꓚꓱ, ꓔꓯ ꓟꓽ ꓛꓳ꓾ ꓢꓲ ꓒ ꓬꓰ‐ꓢꓴ ꓬꓲ. ꓚꓱ, ꓔꓯ ꓛꓳ ꓫꓱꓽ ꓠ, ꓟ ꓢꓯꓼ ꓖꓶ ꓔ ꓡꓳ꓿ ꓛꓴꓽ ꓙꓳ ꓟ ꓓꓰ ꓢ ꓔꓱ, ꓟ꓾ ꓒꓳ, ꓔꓴ ꓟ ꓓꓰ ꓢ ꓖꓽ ꓖꓶ_ ꓟ꓾ ꓙꓳꓺ ꓟ ꓓꓰ ꓢ ꓙꓵꓻ ꓠꓲ,꓾ ꓠꓲ, ꓟ ꓐꓬ ꓟ ꓓꓰ ꓢ ꓥꓳ ꓡꓳ. ꓓꓴ꓾ ꓟꓽ ꓪ ꓟ ꓓꓰ ꓢ ꓫꓱ, ꓡꓯ ꓘꓳ_ ꓟ ꓐꓰ ꓜꓲ ꓜꓲ ꓟꓴ ꓟꓴ ꓬꓰ ꓟ ꓓꓰ ꓢ ꓢꓲ ꓡꓲ, ꓟ ꓔꓯ ꓢꓲꓺ ꓚꓰ. ꓠ, ꓟ ꓘꓴ ꓔ ꓡꓳ꓿

ꓟꓬ ꓠꓬꓲ ꓟꓬ‐ꓟ ꓗꓴꓷꓼ ꓐꓱ ꓶ ꓪꓽ ꓘꓴ ꓖꓶ ꓢꓲ꓾ ꓑ ꓫꓬ ꓐꓴ ꓫ. ꓙꓵ ꓔꓬ ꓟ ꓔꓯ ꓪꓴ‐ꓢ ꓡꓰ ꓠꓻ ꓫꓬ, ꓖꓶ ꓠ, ꓟ꓾ ꓠꓲ, ꓟ ꓫ. ꓢꓴ ꓐꓴ ꓕꓲ ꓦꓲꓻ ꓢꓴ ꓔꓯ ꓠꓲ, ꓟ ꓗꓳ. ꓖꓶ ꓠ, ꓟ꓾ ꓔꓬ ꓦꓲꓻ ꓒꓰ, ꓗꓷ ꓢꓴ ꓔꓯ ꓗꓽ ꓕ. ꓠ, ꓟ꓾ ꓞꓳ ꓡꓱ ꓐꓴ ꓔꓯ ꓢꓯꓼ ꓪ ꓖꓶ ꓠ, ꓟ꓾ ꓪꓴ. ꓔꓴ ꓣꓱꓽ ꓢꓴ ꓐꓴ ꓔꓯ ꓢꓷ. ꓠꓲ, ꓐꓰ ꓫꓱ. ꓤ ꓠꓲ, ꓐꓰ ꓟꓯꓼ ꓶꓻ ꓤ ꓣꓱ ꓢꓴ ꓐꓴ ꓔꓯ ꓠꓲ, ꓟ ꓒꓳ, ꓡꓶ. ꓖꓶ ꓠ, ꓟ ꓪꓽ ꓘꓴ ꓖꓶ_ ꓡꓳ꓿

“ꓡ ꓛꓴ. ꓢꓯꓼ ꓢꓲ ꓡꓲ, ꓡꓰ ꓝꓲ꓾ ꓛꓴ ꓙꓳ ꓔꓬ ꓟ ꓢꓲ ꓡꓲ, ꓟꓶ ꓝꓲ꓾” ꓐꓰ ꓪꓽ ꓘꓴ ꓖꓶ ꓢꓲ ꓟꓬ‐ꓟ ꓑ ꓫꓬ ꓐꓴ ꓗꓪ ꓐꓰ “ꓫ. ꓢꓴ ꓟꓷꓼ ꓢꓴ ꓐꓴ ꓢꓯꓼ ꓓꓰ ꓢ ꓢꓲ ꓡꓲ, ꓟ ꓟꓴ ꓖꓪ ꓢꓯꓼ” ꓔꓯ ꓑ ꓙ ꓪ ꓟꓶ ꓡ ꓝꓲ ꓐꓰ ꓪꓽ ꓘꓴ ꓖꓶ_ ꓡꓳ꓿

ꓘꓴ ꓜꓲꓼ ꓞꓳ ꓠꓬ ꓕꓲꓽ ꓠꓲ, ꓕꓲ ꓪ ꓫꓱ, ꓡꓯ ꓘꓳ ꓟ ꓐꓰ ꓝꓮꓲ ꓫꓬ ꓡꓰ ꓠ, ꓟ ꓔꓯ ꓒꓬꓱꓼ ꓡ ꓠ, ꓟ ꓐꓰ ꓟꓬ‐ꓟ ꓗꓴꓷꓼ ꓠꓬ ꓛꓴꓽ ꓙꓳ ꓟ ꓓꓰ ꓢ ꓠꓵꓻ ꓠꓲ꓾ ꓜꓲ ꓜꓲ ꓟꓴ ꓟꓴ ꓬꓰ ꓟ ꓓꓰ ꓢ ꓢꓲ ꓡꓲ, ꓟ꓾ ꓟꓽ ꓪ ꓟ ꓓꓰ ꓢ ꓫꓬ ꓡꓰ ꓠ, ꓟ ꓐꓰ ꓠꓲ, ꓟ ꓐꓬ ꓟ ꓓꓰ ꓢ ꓥꓳ ꓡꓳ. ꓓꓴ ꓙꓳ_ ꓟ ꓗꓴꓷꓼ ꓕꓲꓽ ꓗꓴꓷꓼ ꓒꓬꓱꓼ  ꓡ ꓠ, ꓟ ꓪꓽ ꓘꓴ ꓖꓶ_ ꓡꓳ꓿

“ꓢꓲ ꓒ ꓬꓰ‐ꓢꓴ꓾ ꓥꓪ ꓠꓴ ꓠꓲ, ꓟ ꓔꓯ ꓒꓳ, ꓡꓶ. ꓖꓶ ꓶꓯ꓾ ꓥꓪ ꓠꓴ ꓑ ꓫꓬ ꓐꓴ ꓔꓯ ꓠꓻ ꓫꓬ, ꓖꓶ ꓡꓯ꓾ ꓟꓬ‐ꓟ ꓗꓴꓷꓼ ꓢꓲ ꓡꓲ, ꓟ ꓟꓶ ꓡꓰ ꓝꓲ ꓡꓯ꓾”