ꓙꓱꓽ ꓤ ꓔꓯ ꓢꓰꓼ ꓓ_ ꓡ?
ꓙꓱꓽ ꓤ ꓔꓯ ꓢꓰꓼ ꓜ ꓟꓽ ꓓ꓾ ꓙꓱꓽ ꓤ ꓔꓯ ꓢꓰꓼ ꓠꓬ ꓟꓽ ꓧ ꓟꓽ ꓙꓲ ꓐꓰ ꓕꓱ ꓡꓱ ꓐꓯ_ ꓟ ꓙꓳ_ ꓡꓳ꓾ꓖꓳ ꓡꓱ ꓥ ꓟꓲ ꓠꓬꓲ. ꓠꓬꓲ ꓘꓴ ꓜꓲꓼ ꓞꓳ ꓙꓵꓻ ꓠꓲ, ꓒꓶ ꓚꓱ, ꓗꓪ ꓐꓰ ꓠꓬ ꓙꓱꓽ ꓤ ꓔꓯ ꓢꓰꓼ ꓓ_ ꓡ? ꓐꓰ ꓐꓯ ꓠꓬ ꓢꓰꓼ ꓓ_ ꓡꓳ꓾ꓖꓳ ꓡꓱ ꓥ ꓟꓲ ꓙꓱꓽ ꓤ ꓔꓯ ꓮ ꓫꓵ ꓑꓶ ꓓꓴ ꓢꓰꓼ ꓡ ꓐꓯ_ ꓟ ꓬꓲ ꓔꓶꓻ ꓙꓱꓼ ꓖꓳ ꓟ ꓠꓬ ꓣꓳ. ꓚꓵ_ ꓟ ꓥ ꓡꓳ꓿
ꓙꓱꓽ ꓤ ꓔꓯ ꓠꓬ ꓮ ꓡꓰ ꓕꓯ ꓢꓰꓼ ꓓ_ ꓡ ꓐꓯ ꓠꓬ꓾ ꓣꓳ ꓧꓪꓽ ꓖꓳ ꓓꓱ ꓐꓱ ꓶ ꓢꓯꓼ ꓙꓳ ꓡ ꓓꓴ ꓜ ꓓꓴ ꓠꓻ ꓑꓬ ꓔꓳ, ꓜꓳ ꓡ ꓕꓯ ꓜ ꓓꓴ ꓥ ꓠꓬ ꓞꓳ ꓤ ꓐꓱ ꓶ ꓣꓱ ꓞ, ꓕꓯ ꓜ ꓓꓴ ꓓꓳ ꓓꓴ ꓕꓱ ꓟ ꓐꓱ ꓶ ꓡꓰ ꓣꓳ ꓢꓰꓼ ꓓ_ ꓟ ꓥ ꓡꓳ꓿ꓖꓳ ꓡꓱ ꓥ ꓟꓲ ꓙꓱꓽ ꓤ ꓔꓯ ꓠꓬ ꓮ ꓔꓳ ꓢꓰꓼ ꓟꓽ ꓓ꓾ ꓮꓽ ꓔꓳ ꓠꓲ, ꓦꓯ. ꓟꓽ ꓓ꓾ ꓕꓲ ꓐꓱ ꓠꓬ ꓙꓱꓽ ꓤ ꓔꓯ ꓢꓯ. ꓢꓯ. ꓪꓴ. ꓠꓶ. ꓜ_ ꓟ꓾ ꓞꓳ ꓤ ꓠꓲ, ꓡꓶꓽ ꓐꓲ ꓡꓰ ꓠ, ꓟ꓾ ꓔꓯ ꓥꓳꓽ ꓮ. ꓤ ꓠꓬꓲꓽ ꓟ ꓔꓯ ꓔꓳ, ꓡꓯ ꓘꓳ ꓝꓲ_ ꓕꓯ ꓞꓳ ꓤ ꓠꓲ, ꓟ ꓗ, ꓛꓲ ꓓꓴ ꓬꓰ ꓟꓽ ꓓ꓾ ꓕꓱ ꓡꓱ ꓗ, ꓛꓲ ꓓꓴ ꓐꓱ ꓶ ꓙꓱꓻ ꓤ ꓠꓬꓲꓽ ꓟ ꓔꓯ ꓫꓵꓻ ꓘꓪ ꓡꓰ ꓝꓲ ꓓꓴ ꓬꓰ ꓟꓽ ꓓ꓾ ꓐꓰ ꓐꓯ ꓔ ꓟ ꓥ ꓡꓳ꓿
ꓖꓳ ꓟ ꓑꓶ ꓓꓴ ꓪꓴ‐ꓢ ꓠꓬ ꓙꓱꓽ ꓤ ꓔꓯ ꓟꓲ ꓗꓪ ꓫꓵ_ ꓟ ꓥ ꓡꓳ꓾ ꓢꓲ ꓒ ꓬꓰ‐ꓢꓴ ꓚꓲ. ꓛꓬ ꓥ ꓟꓲ ꓕꓱ ꓡꓱ ꓐꓯ ꓔ ꓟ ꓥ ꓡꓳ꓿ ꓠꓬ, ꓤ ꓠꓬꓲꓽ ꓟ ꓔꓯ ꓠꓬ ꓮ ꓐ ꓐ, ꓐ ꓠꓬ ꓠꓬꓲ ꓡꓳ. ꓔ ꓙ ꓔꓬ ꓟ ꓥ ꓡꓳ꓿ꓕꓱ ꓡꓱ ꓖꓶ ꓜ ꓔꓬ ꓟ ꓥ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓥ ꓟꓲ ꓐꓯ ꓔ ꓟ ꓑꓶ ꓓꓴ ꓠꓬꓲ. ꓠꓬꓲ ꓙꓱ: ꓤ ꓮ ꓙꓵ ꓥ ꓟꓲ ꓪꓴ‐ꓢ ꓠꓬꓲ ꓡꓳ. ꓔ ꓙ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓙꓱ ꓤ ꓔꓯ ꓠꓬ ꓞꓳ ꓤ ꓐꓱ ꓶ ꓪꓴ‐ꓢ ꓡꓰ ꓖꓶ ꓔ ꓟ ꓑꓶ ꓓꓴ ꓢꓰꓼ ꓓ_ ꓡꓳ꓾ ꓜ ꓓ_ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓮꓽ ꓔꓳ ꓬꓰ ꓟꓽ ꓓ꓾ ꓐꓰ ꓐꓯ ꓟ. ꓖꓶ ꓡ ꓥꓳ꓿
