ꓣꓳ ꓙꓵꓻ ꓟ ꓘꓴꓽ ꓠꓯꓼ ꓗꓪ ꓡꓰ ꓐꓲ. ꓞ, ꓢꓲ ꓟꓽ ꓔꓬ ꓔꓬ꓾ ꓢꓲ ꓒ ꓬꓰ‐ꓢꓴ ꓠꓯꓼ ꓗꓪ ꓒꓴ ꓒꓴ ꓡꓯꓽ ꓡꓯꓽ ꓐꓰ ꓗ. ꓘꓶꓽ ꓒꓴ ꓓꓴ ꓬꓰ ꓡꓯ꓾
8 ꓦ 23 ꓠꓬꓲ ꓠꓽ ꓦꓬꓼ ꓠꓬꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵ, ꓗꓪ ꓙꓲ‐ꓢꓴ ꓢꓲ ꓤ ꓐꓴ ꓔꓯ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓣꓳ ꓤꓶꓻ ꓐꓰ ꓟꓲ ꓠꓯ ꓔꓯ ꓒꓳ, ꓡꓶ. ꓠ, ꓟ ꓐꓱ ꓶ ꓢꓲ ꓒ ꓬꓰ‐ꓢꓴ ꓐꓰ ꓙꓻ ꓡꓯꓽ ꓘꓳ ꓟ ꓔꓯ ꓕꓲꓽ ꓠꓬꓲ ꓡꓲ ꓕꓲ ꓠꓬꓲ ꓗꓪ ꓬꓲ. ꓫꓵꓼ ꓫꓬ, ꓔꓶꓻ ꓠ, ꓟ ꓢꓯꓼ ꓖꓶ ꓔ ꓡꓳ꓿
ꓣꓳ ꓚꓲ. ꓛꓬ ꓙꓵꓻ ꓟ ꓐꓰ ꓘꓴ ꓜꓲꓼ ꓞꓳ ꓟ. ꓖꓶ ꓙꓵꓻ ꓠꓲ, ꓚꓱ, ꓔꓯ ꓡꓰ ꓟꓽ ꓔꓬ ꓢꓲ ꓒ ꓬꓰ‐ꓢꓴ ꓐꓰ ꓔꓱ, ꓟ ꓙꓻ ꓡꓯ ꓘꓳ ꓓꓴ ꓪ ꓠ, ꓟ ꓒꓴ ꓒꓴ ꓡꓯ ꓡꓯ ꓐꓰ ꓗ. ꓘꓶꓽ ꓒꓴ ꓔ ꓓꓴ ꓬꓰ ꓡꓯ꓾ ꓐꓰ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓢꓯꓼ ꓖꓶ ꓗꓷ ꓟ ꓥꓳ꓿
ꓣꓳ ꓑ ꓙ ꓠꓬꓲ ꓢꓷ. ꓟ ꓗꓪ ꓐꓰ ꓡꓰ ꓟꓽ ꓔꓬ ꓠ, ꓟ꓾ ꓙꓲ‐ꓢꓴ ꓢꓲ ꓤ ꓙꓵꓻ ꓠꓲ, ꓚꓱ, ꓔꓯ ꓟꓳ. ꓣꓳ ꓑ ꓙ ꓢꓷ. ꓔ ꓟ (ꓥ ꓠꓬ) ꓕꓲ ꓝ. ꓐꓰ ꓕꓲ ꓝ. ꓙꓻ ꓡꓯ ꓘꓳ ꓡ ꓟ ꓗꓪ ꓐꓰ ꓡꓰ ꓐꓲ. ꓞ, ꓢꓲ ꓟꓽ ꓔꓬ ꓔꓬ꓾ ꓢꓲ ꓒ ꓬꓰ‐ꓢꓴ ꓐꓰ ꓠꓶꓽ ꓞ, ꓟ ꓙ ꓡꓯ ꓘꓳ ꓫꓱ, ꓡꓯ ꓘꓳ ꓟ ꓗꓪ ꓐꓰ ꓕꓲ ꓝ. ꓢꓳꓺ ꓣꓴ ꓠ, ꓟ ꓘꓴ ꓔ ꓡꓳ꓿
ꓮ ꓙꓵ ꓔꓯ ꓢꓷ. ꓡꓰꓳ ꓐꓰ ꓟꓽ ꓓꓵꓽ ꓙ ꓠ, ꓟ꓾ “ꓥꓪ ꓮꓽ ꓟ ꓥ ꓟ ꓠꓴ ꓪ ꓠꓬ ꓮ ꓡꓲ ꓐꓰ ꓐꓯ_ ꓡ?” ꓐꓯ_ ꓟ ꓢꓲ ꓒ ꓬꓰ‐ꓢꓴ ꓠ ꓠꓬꓲ ꓘꓶꓽ ꓔꓯ ꓓꓵꓽ ꓙ ꓢꓲ ꓙꓵꓻ ꓠꓲ, ꓔꓯ ꓕꓱ ꓟ ꓠꓬ ꓬꓲ. ꓡꓲꓽ ꓕꓲꓽ ꓟ ꓡꓰ ꓥꓳ ꓐꓰ ꓟꓽ ꓓꓵ ꓙ꓾ ꓪꓴ‐ꓢ ꓐꓯ ꓘꓶꓽ ꓶꓼ ꓓꓳ ꓫꓱ, ꓓꓳ ꓔꓯ ꓮ ꓕꓯ ꓟꓲ ꓧꓪ ꓠ, ꓟ ꓙ ꓜꓲꓼ ꓠ, ꓟ ꓣꓱ ꓬꓯꓼ_ ꓡꓳ꓿
ꓙ ꓖꓴ ꓫꓵꓼ ꓐꓰ ꓛꓳ ꓫꓱꓽ ꓠ, ꓟ꓾ ꓢꓲ ꓒ ꓬꓰ‐ꓢꓴ ꓐꓰ ꓙ ꓡꓯ ꓘꓳ ꓟ ꓔꓯ ꓬꓲ. ꓫꓵꓼ ꓒꓬꓱꓼ ꓡꓰ ꓠ ꓟ ꓠꓬ ꓣꓳ ꓕꓲꓽ ꓣꓳ ꓤꓶꓻ ꓗꓪ ꓥ ꓟꓲ ꓢ‐ꓢꓲ‐ꓠ ꓚꓱ, ꓗꓪ ꓥ ꓟꓲ ꓣꓳ ꓟꓽ ꓓꓵꓽ ꓙ_ ꓟ ꓬꓲ. ꓚꓱ, ꓫꓵꓼ ꓐꓰ ꓢꓲꓺ ꓣꓴ ꓠ, ꓟ ꓛꓳ ꓫꓱꓽ ꓠ, ꓟ ꓶꓽ ꓓꓰ ꓐ ꓡ ꓟ ꓔꓯ ꓐꓯ ꓔ ꓡꓳ꓿
ꓕꓲ ꓠꓬꓲ ꓡꓲ ꓕꓲ ꓠꓬꓲ ꓔꓳ, ꓜꓳ ꓡ ꓟ ꓠꓻ ꓓꓴ ꓐꓰ ꓣꓱ ꓬꓯꓼ ꓟ ꓔꓯ ꓬꓰ ꓙ ꓟ ꓢꓲ ꓒ ꓬꓰ‐ꓢꓴ ꓠꓬ ꓚꓺ ꓟꓲꓽ ꓗꓪ ꓟ ꓕꓲꓽ ꓣꓳ ꓡꓰ ꓟꓽ ꓥ꓾ ꓚꓲ. ꓛꓬ ꓤꓶꓻ ꓔꓯ ꓒꓳ, ꓡꓶ. ꓖꓶ ꓐ ꓡ ꓟ ꓕꓲꓽ ꓣꓳ ꓟ ꓪꓴ‐ꓢ ꓤ ꓔꓲ ꓥ ꓟ ꓔꓯ ꓧꓪ ꓟꓳ ꓐ ꓡ ꓝꓲ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓗꓷ ꓟ ꓥꓳ꓿
