ꓵꓽ ꓗ ꓟ. ꓒ ꓐꓴ ꓐꓰ ꓒ‐ꓡꓲ‐ꓢꓷ ꓐꓲ ꓔꓯ ꓕꓼˍ ꓟ (reflection)
ꓧꓪ. ꓧꓪ ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 23ꓽ27‐32 ꓝꓲ. ꓗꓪ ꓛꓲ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓡꓰ ꓠꓲ, ꓟ ꓠꓬꓲꓽ ꓔꓱ, ꓣꓱ ꓢꓴ ꓙꓵꓽ ꓗ ꓟ. ꓒ ꓐꓴˍ ꓐꓰ ꓒ‐ꓡꓲ‐ꓢꓷ ꓐꓴꓳ ꓠꓴ ꓪꓽ ꓫ. ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓠꓽ ꓕꓯ ꓢꓲ ꓗꓪ ꓡꓳ. ꓐꓲ ꓓꓴ ꓡꓰ ꓬꓰ ꓔꓬ ꓢꓲ ꓠꓬꓲ ꓠꓲ, ꓟ ꓘꓴꓽ ꓗꓪ ꓠꓬ ꓮ ꓘꓶ. ꓟꓽ ꓙꓲ ꓟ ꓡꓰ ꓬꓰ ꓔꓬ ꓟ ꓚꓱ, ꓔꓯ ꓐꓯ ꓟ. ꓖꓶ ꓔꓬ ꓟ ꓥ ꓡꓳ꓿
ꓝꓮꓲ ꓙꓵꓽ ꓗ ꓟ. ꓒ ꓐꓴ ꓐꓰ ꓒ‐ꓡꓲ‐ꓢꓷ ꓐꓴ ꓠꓬ ꓡ ꓞꓳ ꓡꓳ. ꓐꓲ ꓠ, ꓟ ꓡꓰ ꓢꓯꓼ ꓕꓵꓼ ꓢꓴ ꓔꓬ ꓟ ꓐꓰ ꓔꓱ ꓟ ꓠꓬ ꓡꓯꓼ ꓜꓳ ꓘꓴꓽ ꓗꓪ ꓙꓳ ꓟ ꓪꓴꓽ ꓔꓳ ꓡꓰ ꓐꓰ ꓡꓯ ꓜꓳ ꓔꓯ ꓡꓳ. ꓐꓲ ꓠ, ꓟ ꓫꓬ ꓢꓴ ꓐꓴ ꓡꓰ ꓐꓰ ꓔ ꓟ ꓔꓯ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓥ ꓟꓲ ꓮ ꓘꓶ. ꓛꓲ ꓤ ꓟꓳ ꓠ, ꓟ ꓟ. ꓖꓶ ꓔꓬ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓣꓳ ꓚꓲ. ꓛꓬ ꓔꓯ ꓡꓳ. ꓐꓲ ꓠ, ꓟ ꓡꓰ ꓟꓽ ꓞꓲ ꓡ ꓞꓳ ꓡꓰ ꓡꓳ. ꓟꓽ ꓟꓳ ꓓ ꓟ ꓠꓲ, ꓟ ꓘꓴꓽ ꓗꓪ ꓥ ꓟꓲ ꓡꓳ. ꓐꓲ ꓠ, ꓟ ꓢꓯꓼ ꓕꓵꓼ ꓠ, ꓟ ꓚꓱ, ꓔꓯ ꓐꓯ ꓖꓶ ꓔ ꓡꓳ꓿ ꓦꓻ ꓕꓲ ꓒꓳ, ꓗꓪ ꓢꓯꓼ ꓕꓵꓼ ꓠ, ꓟ ꓐꓱ ꓶ ꓐꓯ ꓖꓶ ꓔ ꓟ ꓥ ꓡꓳ꓿
ꓣꓳ ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓴ‐ꓢ ꓔꓯ ꓪꓽ ꓘꓴ ꓥ ꓟꓲ ꓣꓳ ꓠꓲ, ꓟ ꓘꓴꓽ ꓗꓪ ꓢꓴ ꓔꓯ ꓠꓲ, ꓜꓳ ꓢꓴ ꓔꓯ ꓟꓽ ꓙꓲ ꓟ ꓚꓱ, ꓔꓯ ꓬꓰ ꓖꓶ ꓠ, ꓟ ꓓꓴ ꓙ ꓔꓬ ꓢꓴ ꓥ ꓐꓯ ꓠꓬ ꓡꓯꓼ ꓜꓳ ꓔꓯ ꓠꓲ, ꓠꓯꓻ ꓦꓰ ꓢꓲ ꓠꓬꓲ ꓡꓯꓼ ꓜꓳ ꓘꓴꓽ ꓗꓪ ꓪꓴꓽ ꓔꓳ ꓡꓰ ꓐꓰ ꓔ ꓟ ꓚꓱ, ꓔꓯ ꓤ ꓟꓳ ꓠ, ꓟ ꓐꓯ ꓖꓶ ꓔ ꓡꓳ꓿
ꓪꓴ‐ꓢ ꓠꓬ ꓬꓲ ꓐ ꓢꓲ ꓗꓪ ꓣꓳ ꓒꓬꓱ ꓔꓯ ꓡꓳ. ꓠꓬꓲ ꓟ ꓪꓴ‐ꓢ ꓟꓽ ꓥ ꓣꓳ ꓠꓲ, ꓟ ꓣꓳ ꓦꓻ ꓕꓲ ꓒꓳ, ꓔꓯ ꓡꓳ. ꓠꓬꓲ ꓢꓴ ꓪꓴ‐ꓢ ꓥ ꓡꓳ꓿
ꓣꓳ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓡꓰ ꓔꓱ ꓚꓵ ꓟ ꓓꓴ ꓙ ꓒꓳ ꓡꓶꓽ ꓠ, ꓟ ꓐꓱ ꓶ ꓬꓲ ꓠꓯ, ꓗꓪ ꓡ ꓠ, ꓟ ꓐꓱ ꓶ ꓘꓴꓽ ꓔꓬ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓪꓴ‐ꓢ ꓠꓲ, ꓠꓵ ꓢꓲ ꓠꓬꓲ ꓣꓳ ꓝꓴꓲ ꓔꓯ ꓭ ꓟ ꓙꓵ, ꓕꓯ ꓔꓱ ꓚꓵˍ ꓟ ꓓꓴ ꓙ ꓒꓳ, ꓡꓶꓽ ꓠ, ꓟ ꓣꓳ ꓚꓵˍ ꓟ ꓚꓱ, ꓔꓯ ꓐꓯ ꓖꓶ ꓔ ꓡꓳ꓿
ꓙꓵꓽ ꓗ ꓟ. ꓒ ꓐꓴ ꓐꓰ ꓒ‐ꓡꓲ‐ꓢꓷ ꓐꓴ ꓠꓴ ꓪꓽ ꓠꓬ ꓫ. ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓠꓽ ꓠꓴ ꓪ ꓒꓵꓽ ꓒ ꓐꓴ ꓡꓰ ꓢꓰꓼ ꓗꓷ ꓟ ꓟꓷ ꓠꓷ, ꓝ. ꓢꓴ ꓐꓴˍ ꓐꓰ ꓙꓲ ꓫꓬ ꓢꓴ ꓐꓴ ꓡꓱꓼ ꓜꓴ ꓫꓬ, ꓜꓶ ꓠꓬꓲ꓾ ꓐꓲꓻ ꓫꓴꓽ ꓠꓬꓲ ꓬꓰ ꓢꓲ꓾ ꓒꓵ ꓒ ꓐꓴ ꓦꓬꓼ ꓠꓬꓲ ꓗꓪ ꓣꓳ ꓣꓬ ꓚꓰꓼ ꓐꓛ ꓠꓬ ꓟꓷ ꓠꓷ ꓝ. ꓢꓴ ꓐꓴ ꓔꓯ ꓢꓰꓼ ꓟ ꓗꓪ ꓬꓲ ꓪ ꓔꓯ ꓣꓳ ꓟꓽ ꓔ ꓡꓳ ꓫꓵꓽ ꓥꓳ ꓐꓯˍ ꓡꓳ꓿
ꓔꓱ, ꓚꓵˍ ꓟ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓽ ꓗꓽ ꓒ ꓟ. ꓒ ꓐꓴ ꓐꓰ ꓒ‐ꓡꓲ‐ꓢꓷ ꓐꓴ ꓠꓬ ꓟ ꓽ ꓘꓳ, ꓣꓴ ꓬꓲ ꓪ ꓠꓬ ꓬꓲ ꓔꓯ ꓗ ꓓꓳ ꓠ, ꓟ ꓢꓯꓼ ꓕꓵꓼ ꓔꓬ ꓟ ꓥꓡꓳ꓿
ꓣꓳ ꓤꓶꓻ ꓠꓯ, ꓗꓪ ꓠꓴ ꓥꓳꓽ ꓡꓰ ꓟ ꓛꓬ ꓡꓰ ꓟ ꓔꓯ ꓡꓳ. ꓟꓳ ꓟ ꓙꓵ, ꓕꓯ ꓢꓴ ꓝꓴꓲ ꓔꓯ ꓡꓰ ꓡꓳ. ꓟꓳ ꓟ ꓣꓳ ꓬꓰ ꓛꓬ ꓡꓰ ꓟ ꓝꓴꓲ ꓔꓯ ꓡꓳ. ꓟꓳ ꓢꓴ ꓐꓴ ꓒꓬꓱꓼ ꓠ, ꓟ ꓝꓮꓲ ꓣꓳ ꓠꓲ, ꓟ ꓗꓪ ꓢꓲꓺ ꓒ ꓔꓯ ꓘꓳ, ꓣꓴ ꓢꓲ ꓠꓬꓲ ꓦꓻ ꓕꓲ ꓒꓳ, ꓗꓪ ꓪꓴꓽ ꓟꓴ ꓡ ꓠ, ꓟ ꓢꓯꓼ ꓕꓵ ꓠ, ꓟ ꓐꓯ ꓖꓶ ꓔ ꓡꓳ꓿
ꓠꓬꓲ. ꓠꓬꓲ ꓣꓳ ꓠꓲ, ꓟ ꓔꓯ ꓛꓬ ꓡꓰ ꓟ ꓥꓳꓽ ꓡꓰ ꓟ ꓚꓱ, ꓔꓯ ꓡꓳ. ꓟꓳ ꓢꓷ. ꓢꓲ ꓠꓬꓲ ꓢꓲꓺ ꓒ ꓠꓯ, ꓗꓪ ꓬꓯꓼ ꓡ ꓢꓴ ꓔꓱ, ꓚꓵˍ ꓟ ꓓꓴ ꓙ ꓒꓳ ꓡꓶꓽ ꓡ ꓢꓴ ꓒꓬꓱꓼ ꓠ, ꓟ ꓐꓯ ꓖꓶ ꓔ ꓡꓳ꓿
ꓣꓳ ꓤꓶꓻ ꓠꓯ, ꓗꓪ ꓢꓴ ꓡꓳ. ꓟꓳ ꓠ, ꓟ ꓐꓱ ꓶ ꓡꓰ ꓢꓯꓼ ꓕꓵꓼ ꓔꓬ ꓢꓴ ꓒꓬꓱꓼ ꓔꓬ ꓡ? ꓣꓳ ꓠꓲ, ꓟ ꓗꓪ ꓔꓱ ꓚꓵ ꓟ ꓠꓵꓻ ꓠꓲ, ꓙꓳ ꓠ, ꓟ ꓢꓯꓼ ꓕꓵꓼ ꓠ, ꓟ ꓬꓰ ꓡꓯ꓿ ꓢꓲꓺ ꓒ ꓔꓯ ꓣꓳ ꓠꓲ, ꓟ ꓬꓲ ꓔꓶ ꓖꓶ ꓡꓯ꓿ ꓫ. ꓟꓳ ꓪ꓿
