ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓔꓯ ꓦꓻ ꓡꓱ ꓚꓱ, ꓗꓪ ꓐꓰ ꓡꓳ. ꓠꓬꓲ ꓟ (Laudatosi)
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓗꓪ ꓐꓰ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓡ ꓟ ꓚꓱ, ꓔꓯ ꓦꓻ ꓡꓱ ꓚꓱ, ꓕꓲ ꓒꓳ, ꓗꓪ ꓐꓰ ꓡꓳ. ꓠꓬꓲ ꓠ, ꓟ ꓐꓯ ꓟ ꓚꓱ, ꓗꓪ ꓐꓰ ꓐꓯ ꓟ. ꓖꓶ ꓡ ꓥ ꓡꓳ꓿
ꓠꓬꓲ. ꓠꓬꓲ ꓕꓲ ꓟꓲ ꓠꓯ ꓡꓱ ꓗꓪ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓬꓲꓻ ꓙꓬ ꓙꓵꓽ ꓡ ꓟ ꓟꓵꓽ ꓙꓴꓽ ꓙꓵ ꓡ ꓟ꓾ ꓟꓵꓽ ꓡꓶꓽ ꓡ ꓟ ꓬꓲꓻ ꓙꓬ ꓙꓵ ꓡ ꓟ ꓑꓶ. ꓓꓴ ꓡ ꓞꓳ ꓫꓵꓻ ꓡꓰ ꓟ ꓟꓶ ꓞ ꓮ ꓘꓶ. ꓞ ꓡ ꓟ ꓑꓶ.ꓓꓴ ꓡ ꓞꓳ ꓫꓵꓻ ꓡꓰ ꓓꓴ ꓙꓳ ꓟ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓒꓬꓱꓼ ꓡ ꓟ ꓫꓵꓽ ꓪꓴꓽ ꓥ ꓡꓳ꓿
ꓕꓱ ꓡꓱ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫꓵꓽ ꓪꓴꓽ ꓔꓳ, ꓜꓳ ꓡ ꓟ ꓙꓵ, ꓕꓯ ꓪꓴꓽ ꓟꓴ ꓡ ꓢꓷ. ꓠꓲ, ꓚꓱ, ꓗꓪ ꓐꓰ ꓗꓽ ꓕꓽ ꓠ, ꓟ ꓚꓱ, ꓔꓯ ꓡꓰ ꓡꓳ. ꓠꓬꓲ ꓔꓬ ꓢꓴ ꓐꓴ ꓮ ꓟꓬ, ꓙꓳ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓪꓴꓽ ꓟꓴꓽ ꓡ ꓟ ꓢꓷ. ꓠꓲ, ꓚꓱ, ꓗꓪ ꓐꓰ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓐ ꓡ ꓡ ꓐꓰ ꓠ ꓠꓬꓲ ꓓꓴ ꓙꓳ ꓡ ꓟ ꓥ ꓡꓳ꓿
ꓠꓬꓲ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓡ ꓟ ꓚꓱ, ꓔꓯ ꓫꓬ ꓠ, ꓟ ꓠꓬ ꓟꓲ ꓠꓯ ꓢꓷ. ꓠꓲ, ꓚꓱ, ꓗꓪ ꓐꓰ ꓢꓯꓼ ꓐ ꓡꓰ ꓟꓽ ꓞꓰ꓾ ꓟꓲ ꓠꓯ ꓡ ꓞꓳ ꓐꓴ ꓓꓴ ꓙ ꓚꓱ, ꓞꓳ ꓙꓳ ꓚꓱ, ꓗꓪ ꓙꓵꓽ ꓗꓽ ꓟꓽ ꓛꓳ ꓟ꓾ ꓟꓲ ꓠꓯ ꓡ ꓞꓳ ꓕꓲ ꓣꓳ ꓮ ꓡꓲ ꓐꓰ ꓞꓳ ꓙꓳ ꓠ, ꓟ ꓚꓱ, ꓔꓯ ꓟꓲ ꓡꓲ ꓟ ꓪꓴ. ꓠꓬꓲ ꓒꓬꓱꓼ ꓡ ꓟ ꓫꓵꓽ ꓪꓴꓽ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓒꓬꓱꓼ ꓡ ꓟ ꓫꓵꓽ ꓪꓴꓽ ꓑꓶ. ꓓꓴ ꓡ ꓞꓳ ꓧꓪꓽ ꓖꓳ ꓓꓱ ꓡꓰ ꓟꓽ ꓞꓲ ꓦꓻ ꓕꓲ ꓒꓳ, ꓗꓪ ꓥ ꓟꓲ ꓟꓽ ꓢꓲꓽ ꓫꓬ ꓡꓰ ꓟ ꓙꓳ ꓡꓰ ꓟ ꓥ ꓡꓳ꓿
ꓦꓻ ꓕꓲ ꓒꓳ, ꓗꓪ ꓐꓰ ꓡꓳ. ꓠꓬꓲ ꓓꓴ ꓬꓰ ꓡꓯ
2015 ꓘꓳꓼ ꓕꓯ ꓑꓳꓑꓰ ꓝꓣꓮꓠꓚꓲꓢ ꓡꓰ ꓟꓵꓽ ꓒꓳ, ꓡ ꓟ ꓗꓽ ꓕꓽ ꓠ, ꓟ ꓕꓳ ꓶ ꓡꓮꓴꓓꓮꓔꓳꓢꓲ ꓕꓳ ꓶ ꓔꓯ ꓐꓳ ꓖꓶ ꓗꓷ ꓟ ꓥ ꓡꓳ꓿ ꓕꓱ ꓕꓳ ꓶ ꓗꓪ ꓣꓳ ꓮ ꓙꓵꓽ ꓢꓴ ꓔꓬ ꓟ ꓟꓲ ꓠꓯ ꓦꓲꓻ ꓓꓽ ꓔꓯ ꓗꓽ ꓕꓽ ꓠ, ꓟ ꓬꓲ ꓙꓵ, ꓛꓲ ꓡꓳ ꓐꓰ ꓐꓳ ꓖꓶ ꓔ ꓟ ꓥ ꓡꓳ꓿
ꓕꓱ ꓡꓱ ꓑꓳꓑꓰ ꓝꓣꓮꓠꓚꓲꓢ ꓠꓬ ꓦꓻ ꓡꓱ ꓚꓱ, ꓗꓪ ꓦꓻ ꓕꓲ ꓒꓳ, ꓗꓪ ꓟꓵꓽ ꓘꓳꓼ ꓦꓬꓼ ꓠꓬꓲ ꓠꓬ ꓮ ꓟꓬ, ꓣꓳ ꓚꓵˍ ꓟ ꓚꓱ, ꓔꓯ ꓐꓳ ꓖꓶ ꓔ ꓟ ꓥ ꓡꓳ꓿
ꓡꓮꓴꓓꓮꓔꓳꓢꓲ ꓕꓳ ꓶ ꓗꓪ ꓟꓲ ꓠꓯ ꓠꓬ ꓣꓳ ꓮ ꓙꓵꓽ ꓢꓴ ꓔꓬ ꓟ ꓟꓲ ꓠꓯ ꓦꓲꓻ ꓓꓽ (ꓳꓴꓣ ꓚꓳꓟꓟꓳꓠ ꓧꓳꓟꓰ) ꓥ ꓡꓳ ꓐꓰ ꓐꓯ ꓔ ꓡꓳ꓿
ꓝꓮꓲ ꓟꓲ ꓠꓯ ꓠꓬ ꓒꓴ ꓫꓵ ꓧꓪ ꓠ, ꓟ ꓶꓻ ꓡꓯꓼ ꓬꓰ ꓠ, ꓟ ꓣꓱ ꓫꓵꓽ ꓟꓽ ꓥ꓾ ꓟꓲ ꓠꓯ ꓗꓪ ꓧꓪꓽ ꓫꓵꓽ ꓧꓪꓽ ꓙꓰ꓾ ꓢꓲ, ꓜꓲ ꓢꓲ, ꓟꓲ ꓐꓴ ꓐꓰ ꓟꓲ ꓠꓯ ꓡ ꓞꓳ ꓐꓴ ꓠꓬ ꓕꓲ ꓪ ꓔꓬ ꓠ, ꓟ ꓦꓲꓻ ꓓꓽ ꓕꓲ ꓦꓲꓻ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓪꓴ‐ꓢ ꓡꓰ ꓚꓰꓼ ꓔ ꓟ ꓟꓲ ꓠꓯ ꓗꓪ ꓙꓳ ꓟ ꓮ ꓙꓵꓽ ꓠꓬ ꓶꓻ ꓡꓯꓼ ꓬꓰ ꓠ, ꓟ ꓒꓴ ꓫꓵꓺ ꓧꓪ, ꓟ ꓐꓱ ꓶ ꓡꓰ ꓟꓽ ꓥ꓾ ꓝꓮꓲ ꓮ ꓟꓶ ꓟ ꓙꓵ, ꓗꓪ ꓟꓲ ꓠꓯ ꓔꓯ ꓠꓲ, ꓦꓰ ꓙꓵꓽ ꓢꓴ ꓐꓰ ꓟꓲ ꓠꓯ ꓐꓬ ꓡꓰ ꓠ, ꓛꓲ ꓶꓻ ꓡꓯꓼ ꓬꓰ ꓔꓬ ꓟ ꓔꓯ ꓤ ꓟꓳ ꓠ, ꓟ ꓐꓯ ꓔ ꓡꓳ꓿
ꓟꓲ ꓠꓯ ꓟꓵꓽ ꓘꓳꓼ ꓒꓳ, ꓡꓰ ꓗꓪ ꓛꓲ ꓬꓰ ꓟ ꓚꓱ, ꓮ ꓙꓵꓽ ꓔꓯ ꓗꓽ ꓕꓽ ꓠ, ꓟ ꓐꓯ ꓖꓶ ꓔ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓠꓬ ꓟꓲ ꓠꓯ ꓡ ꓞꓳ ꓐꓴ ꓔꓯ ꓫ. ꓡꓰ ꓝꓲ ꓟ ꓚꓱ, ꓥ ꓡꓳ꓿ ꓝꓮꓲ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫꓵꓽ ꓪꓴꓽ ꓔꓳ, ꓜꓳ ꓡ ꓟ ꓙꓵ, ꓔꓯ ꓞꓳ ꓫ. ꓐꓴ ꓠꓬ ꓧꓶ. ꓕꓯ ꓔꓳ, ꓜꓳ ꓡꓰ ꓢꓲ ꓮ ꓘꓶ. ꓛꓲ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓡꓰ ꓢꓴ ꓐꓴ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓟꓲ ꓠꓯ ꓡ ꓞꓳ ꓐꓴ ꓟꓲ ꓠꓯ ꓔꓯ ꓠꓲ, ꓠꓵ ꓐꓯ ꓟ ꓠꓬ ꓟꓲ ꓠꓯ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓚꓱ, ꓮ ꓙꓵꓽ ꓔꓯ ꓗꓽ ꓕꓽ ꓠ, ꓟ ꓬꓲ ꓙꓵ, ꓛꓲ ꓡ ꓟ ꓥ ꓡꓳ꓿
ꓕꓱ ꓡꓰ ꓟꓽ ꓥ ꓠꓬ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓟꓬꓱꓺ
ꓔꓯ ꓬꓰ ꓔꓬ ꓟ ꓠꓬ ꓟꓲ ꓠꓯ ꓡ ꓞꓳ ꓐꓴ ꓔꓯ ꓮ ꓟꓬ, ꓫ. ꓡꓰ ꓝꓲ꓾ ꓟ ꓫꓵꓻ ꓡꓰ ꓝꓲ ꓟ ꓟꓬꓱꓽ ꓔꓯ ꓬꓰ ꓔꓬ ꓢꓴ ꓥ ꓟ ꓚꓱ, ꓔꓯ ꓓꓴ ꓙ ꓧꓪ ꓛꓲ ꓠ, ꓟ ꓐꓯ ꓖꓶ ꓔ ꓡꓳ꓿
ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓦꓻ ꓡꓱ ꓚꓱ, ꓗꓪ ꓠꓵꓻ ꓠꓲ, ꓠꓬ ꓮ ꓘꓶ. ꓛꓲ ꓣꓳ ꓚꓵ ꓟ ꓥ ꓡꓳ꓿ ꓠꓵꓻ ꓠꓲ, ꓣꓱ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓚꓱ, ꓔꓯ ꓗꓽ ꓕꓽ ꓓꓴ ꓬꓰ ꓡꓯ꓿
ꓪꓴ‐ꓢ ꓡꓰ ꓚꓰꓼ ꓔ ꓟ ꓢꓯ. ꓫꓵꓽ ꓢꓯ. ꓙꓵꓽ ꓢꓲ, ꓜꓲ ꓡꓳ ꓜꓲ, ꓑꓶ ꓓꓲ ꓡꓯ ꓓꓲ ꓟꓲ ꓠꓯ ꓗꓪ ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓔꓯ ꓠꓲ, ꓠꓵ ꓓꓴ ꓬꓰ ꓡꓯ꓿
ꓠꓬꓲ.ꓠꓬꓲ ꓞꓳ ꓡꓱ ꓞꓳ ꓡꓯ. ꓐꓴ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓚꓱ, ꓔꓯ ꓗꓽ ꓕꓽ ꓠ, ꓟ ꓚꓱ, ꓔꓯ ꓮ ꓡꓲ ꓬꓰ ꓠꓯˍ ꓟ
ꓞꓳ ꓡꓱ ꓞꓳ ꓡꓯ ꓐꓴ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓔꓯ ꓢꓷ. ꓠꓲ, ꓚꓱ, ꓗꓪ ꓐꓰ ꓥ ꓟꓲ ꓝꓮꓲ ꓚꓲ. ꓛꓬ ꓞꓳ ꓙꓳ ꓚꓱ, ꓐꓰ ꓥ ꓟꓲ ꓡꓯ ꓔꓲ ꓟꓬꓱꓽ ꓬꓰ ꓠ, ꓟ ꓥ ꓡꓳ꓿
ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓟ ꓚꓱ, ꓗꓪ ꓙꓲ ꓟ ꓟꓵꓽ ꓘꓳꓼ ꓒꓬꓱꓼ ꓡ ꓝꓲ ꓟ ꓚꓱ, ꓗꓪ ꓞꓳ ꓙꓳ ꓠ, ꓟ
ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓔꓯ ꓠꓲ, ꓠꓵ ꓠ, ꓟ
ꓡ ꓞꓳ ꓔꓯ ꓞꓳ ꓒꓵꓽ ꓚꓱ, ꓗꓪ ꓞꓳ ꓙꓳ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓚꓱ, ꓔꓯ ꓤ ꓟꓳ ꓠ, ꓟ ꓥ ꓡꓳ꓿
ꓟꓲ ꓠꓯ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓔꓯ ꓗꓽ ꓕꓽ ꓟ ꓠꓬ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓙꓲ ꓡ ꓝꓲ ꓠ, ꓟ ꓐꓱ ꓶ ꓗꓽ ꓕꓽ ꓟ ꓡꓰ ꓟꓽ ꓥ꓾ ꓛꓲ ꓡ ꓣꓳ ꓮ ꓟꓲ ꓮ ꓐꓲ ꓐꓴ ꓔꓬ ꓤꓶꓻ ꓗꓪ ꓗ, ꓛꓲ ꓢꓲ ꓡꓲ ꓔꓬ ꓟꓶ ꓠ, ꓟ ꓐꓱ ꓶ ꓟꓬꓱꓽ ꓬꓰ ꓟ ꓚꓱ, ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓝꓲ ꓚꓱ, ꓮ ꓙꓵꓽ ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
