ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓤꓶꓻ ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓮ ꓡꓲ ꓚꓬ, ꓔˍ ꓡ꓿ ꓢꓲ ꓒ ꓬꓰ‐ꓢꓴ ꓠꓬ ꓠꓴ ꓐꓱ ꓶ ꓮ ꓫꓵꓽ ꓥ ꓡ ꓐꓯˍ ꓟ ꓠꓬꓲ. ꓠꓬꓲ ꓣꓳ ꓓꓵꓽ ꓙꓽ ꓠꓬꓲ ꓓꓴ ꓬꓰ ꓡꓯ꓿ ꓢꓲꓽ ꓫꓬ ꓕꓳꓽ ꓶ ꓟ‐ꓕꓲ ꓕꓳꓽ ꓶ 16ꓽ13‐20 ꓗꓪ ꓛꓲ ꓣꓳ ꓠ ꓠ, ꓓꓴ ꓥꓳ꓿
ꓢꓲ-ꓢ-ꓡꓰ ꓒꓲ-ꓡꓲ-ꓒꓲ ꓟꓵꓽ ꓗꓪ ꓛꓲ ꓬꓰ ꓕꓯ꓾ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓡ-ꓞꓳ-ꓮ-ꓐꓲ ꓥꓪ ꓮꓽ ꓟ ꓥ ꓟ ꓢꓴꓻ ꓮ ꓡꓲ ꓐꓯˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓖꓳ ꓕꓯ ꓬꓲ ꓪꓽ ꓡꓰ꓾ ꓠꓴ ꓠꓬ ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓥꓳ꓾ ꓐꓯ ꓢꓴ ꓕꓲ ꓐꓱ ꓙꓳˍ ꓡꓳ꓿ ꓬꓲ-ꓡꓲ-ꓬ ꓥ ꓡꓳ꓾ ꓥ ꓠꓬ ꓬꓰ-ꓡꓲ-ꓟꓲ ꓥꓳ꓾ ꓥ ꓠꓬ ꓟꓷꓽ ꓠꓷꓹ ꓝꓸ ꓢꓴ ꓗꓪ ꓟ ꓕꓲ ꓣꓳ ꓥꓳ꓾ ꓐꓯ ꓢꓴˍ ꓟꓲ ꓕꓲ ꓐꓱ ꓙꓳˍ ꓡꓳ꓾ ꓐꓯ ꓖꓶˍ ꓡꓳ꓿
ꓬꓲ ꓡꓰ ꓬꓲ ꓪꓽ ꓔꓯ꓾ ꓖꓳ ꓡꓱ ꓥ ꓠꓬ ꓥꓪ ꓮꓽ ꓟ ꓥ ꓟ ꓠꓴ ꓪꓽ ꓡꓲꓸꓽ꓾ ꓮ ꓡꓲ ꓐꓯˍ ꓡ?꓾ ꓐꓰ ꓠ ꓠꓬꓲˍ ꓡꓳ꓿ ꓢꓲ-ꓟꓴ ꓒꓲ-ꓕꓱ ꓡꓰ ꓒꓳꓹ ꓖꓶ ꓢꓲ꓾ ꓠꓴ ꓠꓽ ꓙꓲ-ꓢꓴ ꓖꓳ ꓕꓲ ꓣꓳ ꓟ ꓥꓳ꓿ ꓢꓯꓸ ꓔꓬ ꓟ ꓪꓴ-ꓢ ꓬꓲ ꓮ ꓐꓲ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ꓿
ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ ꓬꓲ ꓔꓯ꓾ ꓬꓳ-ꓠ ꓬꓲ ꓤ ꓢꓲ-ꓟꓴꓳ꓾ ꓠꓴ ꓠꓽ ꓶꓼ ꓙꓳ ꓫꓱꓹ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓕꓱ ꓟ ꓠꓽ ꓡ ꓞꓳ ꓡꓰ ꓠꓴ ꓔꓯ ꓟꓳꓸ ꓖꓶˍ ꓟ ꓟꓽ ꓥ꓾ ꓟꓴꓽ ꓗꓪ ꓗꓪ ꓔꓬ ꓟ ꓥꓪ ꓐꓹ ꓐ ꓡꓰ ꓟꓳꓸ ꓖꓶˍ ꓟ ꓥ ꓡꓳ꓿
ꓥꓪ ꓝꓮꓲ ꓠꓴ ꓔꓯ ꓐꓯ ꓖꓶˍ ꓠꓬꓲ꓾ ꓠꓴ ꓠꓽ ꓒꓲ-ꓕꓱ ꓥꓳ꓿ ꓡꓳ ꓓꓰ ꓕꓱ ꓟ ꓕꓯꓽ ꓢꓲ ꓗꓪ ꓥꓪ ꓘꓴ ꓜꓲ ꓞꓳ ꓥꓪ ꓜꓶ ꓔ ꓬꓰˍ ꓥꓳ꓿ ꓫꓵꓻ ꓓꓴꓽ ꓬꓲ ꓪꓽ ꓠꓬꓲˍ ꓟ ꓡꓰ ꓥꓪ ꓘꓴ ꓜꓲ ꓞꓳ ꓔꓯ ꓧꓪꓸ ꓡꓰ ꓟꓽ ꓘꓴꓻ꓿ ꓥꓪ ꓠꓬ ꓟꓴꓽ ꓗꓪ ꓗꓴꓷꓼ ꓜꓳꓺ ꓜꓴꓻ ꓠꓴ ꓔꓯ ꓖꓶˍ ꓥꓳ꓿ ꓟꓲ ꓠꓯ ꓗꓪ ꓠꓴꓻ ꓡꓰ ꓞꓳꓹ ꓔ ꓟ ꓮꓸ ꓫꓵ ꓥ ꓟꓲ ꓟꓴꓽ ꓗꓪ ꓗꓪˍ ꓟꓲ ꓞꓳꓹ ꓔ ꓥꓳ꓿ ꓟꓲ ꓠꓯ ꓗꓪ ꓠꓴ ꓡꓰ ꓩꓴ ꓗꓷˍ ꓟ ꓮꓸ ꓫꓵ ꓥ ꓟꓲ꓾ ꓟꓴꓽ ꓗꓪ ꓗꓪˍ ꓟꓲ ꓩꓴ ꓗꓷˍ ꓥꓳ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓠꓬ ꓙꓲ-ꓢꓴ ꓖꓳ ꓕꓲ ꓣꓳ ꓥ ꓟ꓾ ꓮꓽ ꓟ ꓔꓯˍ ꓟꓲ ꓟꓽ ꓐꓯ ꓖꓶ ꓠꓹ ꓟ꓾ ꓬꓲ ꓡꓰ ꓛꓳꓽ ꓒꓯꓹ ꓐꓴ ꓔꓯ ꓙꓳ ꓗꓽ ꓖꓶˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓮꓽ ꓟ ꓥ ꓡ ꓐꓯˍ ꓟ ꓔꓯ ꓠꓱ. ꓐꓯ ꓢꓴ ꓮ ꓡꓲ ꓓꓵꓽ ꓙꓽ ꓔꓬ ꓡ ꓐꓰ ꓠ ꓠꓬꓲˍ ꓡꓳ꓿ ꓢꓴ ꓡꓰ ꓬꓲ ꓔꓯ ꓮ ꓡꓲ ꓐꓯ ꓔꓬ ꓐꓯˍ ꓟ ꓬꓲ ꓢꓷ. ꓠꓲ, ꓫꓵˍ ꓡꓳ꓿ ꓕꓲ ꓣꓳ ꓠꓬ ꓬꓲ ꓔꓯ ꓟꓷꓽ ꓠꓷ, ꓝ. ꓒ ꓐꓰ ꓐꓯˍ ꓡꓳ꓿ ꓕꓲ ꓐꓱ ꓟ ꓠꓬ ꓬꓲ ꓔꓯ ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓫꓵꓻ ꓢꓲ ꓝꓮꓲ ꓕꓲ ꓧꓪ, ꓢꓯ. ꓬꓲꓼ ꓡꓺꓳ ꓐꓰ ꓐꓯ ꓢꓴ ꓙꓳˍ ꓡꓳ꓿ ꓕꓲ ꓐꓱ ꓟ ꓠꓬ ꓬꓲ ꓔꓯ ꓬꓲ‐ꓡꓲ‐ꓬ ꓥ ꓐꓰ ꓐꓯˍ ꓡꓳ꓿ ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓠꓱ. ꓐꓯ ꓑ ꓫꓬ ꓐꓴ ꓮ ꓡꓲ ꓐꓯ ꓠꓲ, ꓫꓵˍ ꓐꓯ꓾ ꓬꓲ ꓝꓲ ꓓꓴ ꓐꓴ ꓬꓲ ꓔꓯ ꓮ ꓡꓲ ꓐꓯ ꓔꓬ ꓡ ꓐꓯ ꓟ ꓬꓲ ꓢꓷ. ꓠꓲ, ꓫꓵˍ ꓡꓳ꓿ ꓬꓲ ꓪ ꓠꓲ, ꓟ ꓠꓯꓸꓼ ꓗꓪ ꓮ ꓫꓵꓽ ꓙꓳˍ ꓡ ꓐꓯˍ ꓟ ꓬꓲ ꓢꓷ. ꓠꓲ, ꓫꓵˍ ꓡꓳ꓿
ꓖꓳ ꓡꓱ ꓠꓬꓲ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓠ ꓠꓬꓲˍ ꓕꓯ ꓢꓲ‐ꓟꓴ ꓒꓲ‐ꓕꓱ ꓡꓰ ꓠꓴ ꓠꓬ ꓪꓴ‐ꓢ ꓬꓲ ꓮ ꓐꓲ ꓥ ꓡꓳ꓾ ꓐꓰ ꓐꓯ ꓖꓶˍ ꓡꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓢꓲ ꓒ ꓬꓰ‐ꓢꓴ ꓠꓬ ꓚꓵ ꓚꓵ ꓢꓯ. ꓔꓬ ꓡꓳ꓿ ꓬꓲ ꓠꓬ ꓠꓬꓲ. ꓠꓬꓲ ꓠꓴ ꓐꓰ ꓥꓪ ꓐꓱ ꓶ ꓫꓵꓻ ꓙ ꓗꓷ ꓢꓲ ꓠꓬꓲ ꓢꓯꓼ ꓟꓬ ꓖꓶ ꓗꓷꓳ꓿ ꓣꓳ ꓕꓱ ꓟ ꓔꓯ ꓠꓬ ꓮ ꓡꓲ ꓗꓪ ꓐꓰ ꓣꓳ ꓢꓷ. ꓓ, ꓡ꓿ ꓕꓲ ꓐꓱ ꓟ ꓠꓬ ꓟ. ꓒ ꓟ. ꓟ ꓐꓴ ꓪꓴ‐ꓢ ꓟ. ꓟꓲꓽ ꓟ. ꓖꓶˍ ꓟ ꓑꓶ. ꓓꓴ ꓢꓷ. ꓓ, ꓡꓳ꓿ ꓕꓲ ꓐꓱ ꓟ ꓠꓬ ꓔꓲꓺ ꓒ ꓔꓲꓺ ꓟ ꓐꓴ꓾ ꓕꓲ ꓐꓱ ꓟ ꓠꓬ ꓮꓽ ꓐ ꓮ ꓟ ꓐꓴ ꓗꓪ ꓐꓰ ꓢꓷ. ꓓ, ꓡꓳ꓿ ꓕꓰ ꓡꓰ ꓢꓲ ꓒ ꓬꓰ‐ꓢꓴ ꓔꓯ ꓢꓷ. ꓚꓱ, ꓠꓱ. ꓐꓯ ꓢꓴ ꓐꓯ ꓟꓳ. ꓖꓶˍ ꓟ ꓗꓪ ꓐꓰ ꓢꓷ. ꓡˍ ꓫꓵꓽ ꓥ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓠꓺ ꓠꓬꓲ ꓘꓶ ꓕꓲ ꓠꓬꓲꓽ ꓘꓶ ꓣꓳ ꓔꓯ ꓠꓺ ꓠꓬꓲ ꓔꓬ ꓡꓳ꓿ ꓠꓴ ꓐꓱ ꓶ ꓥꓪ ꓠꓬ ꓮꓽ ꓟ ꓥ ꓡ ꓐꓯˍ ꓟ ꓠꓬꓲ. ꓠꓬꓲ ꓠꓴ ꓐꓰ ꓥꓪ ꓒꓳ, ꓖꓶ ꓡꓯ꓿ ꓢꓴ ꓡꓰ ꓐꓯ ꓟꓳ. ꓖꓶ ꓡˍ ꓟ꓾ ꓟ. ꓒ ꓡꓰ ꓐꓯ ꓟꓳ. ꓖꓶ ꓡˍ ꓟ꓾ ꓟ. ꓟ ꓡꓰ ꓐꓯ ꓟꓳ. ꓖꓶ ꓡˍ ꓟ꓾ ꓔꓲꓺ ꓒ ꓔꓲꓺ ꓟ ꓡꓰ ꓐꓯ ꓟꓳ. ꓖꓶ ꓡˍ ꓟ ꓠꓯꓸꓼ ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓮ ꓡꓲ ꓐꓰ ꓚꓬ, ꓔˍ ꓡ ꓐꓯˍ ꓟ ꓠꓬꓲ. ꓠꓬꓲ ꓒꓳ, ꓖꓶ ꓠ ꓗ, ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓔꓯ ꓠꓴ ꓚꓵ ꓚꓵ ꓠꓴ ꓤꓶꓻ ꓗꓪ ꓠꓴ ꓢꓲꓽ ꓒ꓾ ꓠꓴ ꓪ ꓔꓲ.꓾ ꓠꓴ ꓤꓶꓻ ꓗꓪ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓢꓲ ꓒ ꓥꓳ ꓐꓰ ꓠꓴ ꓚꓬ, ꓔˍ ꓠꓬ꓾ ꓬꓲ ꓔꓯ ꓘꓳ ꓣꓴ ꓔˍ ꓠꓬ ꓠꓴ ꓫ. ꓕꓱˍ ꓟ ꓠꓴ ꓬꓰˍ ꓟ ꓮ ꓙꓵꓽ ꓠꓬ ꓖꓳ ꓟ ꓔꓯ ꓡꓳ. ꓢꓲ ꓠꓴ ꓫ. ꓕꓱˍ ꓥꓳ꓾ ꓠꓴ ꓙꓰˍ ꓥꓳ꓿ ꓟꓽ ꓥ ꓥꓳ ꓐꓯˍ ꓠꓬ ꓠꓴ ꓠꓬ ꓟꓷꓽ ꓠꓷ, ꓘꓶ ꓗꓪ ꓡꓰꓽ ꓪꓴ‐ꓢ ꓔꓯ ꓙꓵꓻ ꓢꓴ꓾ ꓟ. ꓒ ꓟ. ꓟ ꓐꓯ ꓖꓶ ꓡ ꓟ ꓗꓪ ꓡꓰꓽ ꓪꓴ‐ꓢ ꓔꓯ ꓙꓵꓻ ꓢꓴ ꓕꓲ ꓣꓳˍ ꓡꓰꓽ ꓒꓬꓱꓼ ꓓ, ꓢꓰꓽ ꓥꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓠꓲ, ꓟ ꓔꓱ, ꓫꓵ ꓗꓪ ꓢꓲ ꓒ ꓬꓰ‐ꓢꓴ ꓬꓲ ꓔꓯ ꓔꓬ ꓖꓴ ꓖꓶ ꓔ ꓡ꓿ ꓬꓲ ꓠꓬ ꓚꓵ ꓚꓵ ꓟꓴ ꓡꓳ, ꓬꓰˍ ꓟ ꓢꓲ ꓒ ꓬꓲ ꓮ ꓐꓲ ꓥꓳ ꓐꓰ ꓠꓴ ꓣꓷꓠ. ꓔˍ ꓡ ꓐꓯˍ ꓟ ꓓꓵꓽ ꓙꓽ ꓠꓬꓲ ꓡꓯ꓿
ꓠꓴ ꓟꓷꓽ ꓠꓷ, ꓘꓶ ꓗꓪ ꓐꓰ ꓪꓴ‐ꓢ ꓔꓯ ꓙꓵꓻˍ ꓥꓳ ꓐꓯ ꓥ ꓟꓲ ꓠꓴ ꓛꓳ ꓫꓱꓽˍ ꓟ ꓠꓬ ꓧꓶ. ꓧꓶ. ꓫꓵ ꓛꓳ ꓫꓱꓽ ꓙꓰˍ ꓥꓳ ꓐꓯˍ ꓠꓬ ꓠꓴ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓘꓳ ꓣꓴ ꓟꓽ ꓟꓶ ꓡꓰ ꓢꓰꓽ꓿ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓴ ꓥꓪ ꓔꓯ ꓠꓺ ꓠꓬꓲ ꓔꓬ ꓡꓳ꓿ ꓠꓴ ꓐꓱ ꓶ ꓥꓪ ꓮꓽ ꓟ ꓥ ꓡ꓾ ꓐꓰ ꓠꓺ ꓠꓬꓲ ꓔꓬ ꓡꓳ꓿ ꓣꓳ ꓤꓶꓻ ꓗꓪ ꓣꓳ ꓫ. ꓕꓱˍ ꓟ ꓛꓳ ꓫꓱꓽˍ ꓟ ꓮ ꓙꓵꓽ ꓮ ꓡꓲ ꓔꓯ ꓛꓱꓽ ꓟꓳ. ꓓ, ꓡ ꓐꓯˍ ꓟ ꓔꓯ ꓡꓳ. ꓢꓲ ꓠꓬꓲ ꓣꓳ ꓢꓲ ꓒ ꓬꓰ‐ꓢꓴ ꓔꓯ ꓮ ꓡꓲ ꓗꓪ ꓬꓲ ꓕꓲ. ꓮ ꓡꓲ ꓗꓪ ꓚꓬ, ꓔˍ ꓖꓶˍ ꓡ ꓐꓯ ꓟ ꓣꓳ ꓢꓷ. ꓓ, ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓪꓴ‐ꓢ ꓔꓯ ꓡꓰꓽ ꓔꓬ ꓖꓴ ꓖꓶ ꓢꓲ ꓠꓬꓲ ꓚꓵ ꓚꓵ ꓢꓲ ꓒ ꓬꓰ‐ꓢꓴ ꓠꓬ ꓠꓱ. ꓐꓯ ꓢꓴ ꓐꓱ ꓟꓳ. ꓖꓶˍ ꓟ ꓑꓶ. ꓓꓴ ꓟꓽ ꓥ ꓥ ꓥꓪ ꓚꓲ. ꓛꓬ ꓡꓰ ꓔꓳ, ꓜꓳꓽ ꓢꓲ꓾ ꓥꓪ ꓚꓲ. ꓛꓬ ꓡꓰ ꓬꓲ ꓣꓱꓽ ꓛꓰꓽ ꓔꓯ ꓬꓲ ꓠꓵꓻ ꓠꓲ, ꓔꓯ ꓘꓳ ꓣꓴ ꓟꓶ ꓢꓲ ꓠꓬꓲ ꓚꓵ ꓚꓵ ꓢꓲ ꓒ ꓬꓰ‐ꓢꓴ ꓠꓬ ꓥꓪ ꓐꓱ ꓶ ꓪꓴ‐ꓢ ꓥꓳ꓾ ꓚꓬꓴ. ꓢꓲ ꓒ ꓥꓳ ꓐꓰ ꓣꓷꓠ. ꓐ ꓡ ꓠ, ꓟ ꓐꓱ ꓶ ꓣꓳ ꓢꓯꓼ ꓕꓵꓼ ꓙꓰ ꓓꓴ ꓬꓰ ꓡꓯ꓿
