ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ‐ꓢ ꓗꓴꓷꓼ ꓠꓬ ꓞꓳ ꓤ ꓢꓯꓼ ꓪ ꓗꓪ ꓐꓰ ꓟꓶ ꓓ, ꓟ ꓟꓽ ꓥ ꓥ꓾ ꓪꓴ‐ꓢ ꓣꓱꓽ ꓛꓰꓽ ꓗꓪ ꓐꓰ ꓡꓰꓽ ꓟꓶ ꓓ, ꓟ ꓡꓯꓼ ꓫꓴ ꓥ ꓡꓳ꓿ ꓬꓰ‐ꓢꓴ ꓗ ꓠꓯ. ꓛꓳ ꓠ, ꓟ ꓐꓱ ꓶ ꓚꓲ. ꓛꓬ ꓡꓰ ꓡꓳ ꓩꓴ ꓗꓷ ꓟ ꓮ ꓙꓵꓽ ꓔꓯ ꓪꓴ‐ꓢ ꓡꓰ ꓕꓲ ꓦꓬ ꓝ. ꓟꓽ ꓞꓲ ꓝꓮꓲ ꓖꓶ ꓡ ꓢꓲ꓾ ꓡꓳ, ꓬꓰˍ ꓟ ꓗꓪ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓐꓰ ꓐꓯˍ ꓟ ꓒꓵꓽ ꓓꓰ ꓡꓰˍ ꓟ ꓡꓯꓼ ꓫꓴ ꓖꓶˍ ꓥꓳ꓾ ꓐꓰ ꓬꓰ‐ꓢꓴ ꓡꓰ ꓙ ꓟꓳ ꓘꓶꓽ ꓖꓶ ꓔˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓢꓯꓼ ꓪ ꓣꓴ ꓓꓴ ꓬꓰ ꓡꓯ꓿
ꓕꓱ ꓟ ꓔꓯ ꓐꓯ ꓟ. ꓖꓶ ꓔˍ ꓟ ꓢꓲꓽ ꓫꓬ ꓕꓳ ꓶꓽ ꓝꓲ. ꓠꓬ (ꓟ‐ꓕꓲ꓿ 19ꓽ23‐30) ꓥ ꓡꓳ꓿
ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓮ ꓘꓶ. ꓒꓵꓽˍ ꓟ ꓪꓴ‐ꓢ ꓬꓲ ꓗꓴꓷꓼ ꓟ. ꓟꓲꓽ ꓬꓲ. ꓬꓲ ꓢꓲ ꓔꓯ ꓙꓽ ꓜꓲꓼ ꓠ, ꓟ ꓣꓳ ꓔꓯ ꓘꓴ ꓔꓬ ꓡꓳ꓿ ꓪꓴ‐ꓢ ꓗꓴꓷꓼ ꓔꓯ ꓣꓳ ꓟꓲ ꓠꓯ ꓞꓳ ꓤ ꓢꓯꓼ ꓪ ꓗꓪ ꓐꓰ ꓟꓶ ꓠ, ꓟ ꓟꓽ ꓢꓻ ꓐꓯˍ ꓟ ꓔꓯ ꓢꓲ ꓒ ꓬꓰ‐ꓢꓴ ꓡꓰ꓾ ꓡꓳꓽ ꓕꓳ ꓕꓲ ꓟ ꓪꓳꓼ ꓠ ꓗ ꓗꓪ ꓓꓵꓽ ꓡꓰ ꓠ, ꓟ ꓢꓶ. ꓟꓽ ꓞꓲ ꓞꓳ ꓐꓳ ꓕꓲ ꓣꓳ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓠ, ꓟ ꓫˍ ꓡꓳ꓾ ꓐꓰ ꓔꓯꓺ ꓥꓳꓽ ꓡꓰ ꓐꓯ ꓟ. ꓖꓶ ꓔˍ ꓡꓳ꓿
ꓕꓱ ꓗꓪ ꓞꓳ ꓐꓳ ꓐꓯˍ ꓟ ꓠꓬ ꓒꓵ ꓫꓵ꓾ ꓦꓲ꓾ ꓦ ꓓꓴꓽ꓾ ꓐꓳ ꓶ ꓕꓱ ꓡꓱ ꓫꓵꓽ ꓔꓯˍ ꓡꓰꓽ ꓐꓯˍ ꓟ ꓟꓽ ꓥ꓿ ꓣꓳ ꓔꓯ ꓙꓳˍ ꓟ ꓣꓳ ꓓꓻˍ ꓟ꓾ ꓣꓳ ꓗꓴ.ˍ ꓟ꓾ ꓢꓷ. ꓠꓲ,꓾ ꓚꓲ. ꓛꓬ ꓚꓳꓽ ꓚꓲ. ꓛꓬ ꓦ ꓡꓱ ꓐꓳˍ ꓟ ꓕꓱ ꓡꓱ ꓫꓵꓽ ꓥˍ ꓟꓲ ꓪꓴ‐ꓢ ꓔꓯ ꓠꓶꓽ ꓙꓰ ꓠ, ꓟ ꓐꓱ ꓶ ꓗꓽ ꓕ. ꓓꓴ ꓒꓬꓱꓼ ꓡ ꓗꓴ.ˍ ꓡꓳ꓿
ꓝꓮꓲ ꓪꓴ‐ꓢ ꓗꓴꓷꓼ ꓗꓪ ꓠꓬ꓾ ꓢꓲ ꓒ ꓬꓰ‐ꓢꓴ ꓗ ꓠꓯ. ꓛꓳ ꓠ, ꓟ ꓐꓱ ꓶ ꓣꓳ ꓮ ꓫꓵꓽ ꓡꓳ ꓩꓴ ꓗꓷˍ ꓥ ꓟꓲ ꓖꓳ ꓟ ꓕꓯꓽ ꓢꓲ “ꓕꓲ ꓦꓬ ꓝ. ꓟꓶˍ ꓥꓳ” ꓐꓰ ꓙ ꓟꓳ ꓘꓶꓽ ꓖꓶ ꓔˍ ꓟ ꓙꓳˍ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲꓺ ꓒꓵꓽ ꓓꓰ ꓡꓰˍ ꓟ ꓪꓴꓽ ꓓꓰ ꓡꓰˍ ꓟ ꓡꓯꓼ ꓫꓴ ꓥ ꓟ “ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ” ꓔꓯ ꓥˍ ꓟꓲ ꓣꓳ ꓟꓶˍ ꓟ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓐꓱ ꓶ ꓣꓳ ꓮ ꓡꓲ ꓟꓬ ꓞꓲ ꓔꓲꓺ ꓖꓶ ꓗꓷ ꓠꓬ꓾ ꓪꓴ‐ꓢ ꓗꓪ ꓐꓰ ꓣꓱꓽ ꓛꓰꓽ ꓐꓰ ꓶꓼ ꓤ ꓫꓱ, ꓤ ꓠꓬ ꓪ ꓜꓲ ꓘꓳ ꓣꓴ ꓟꓶˍ ꓟ ꓥ ꓡꓳ꓿ ꓟꓬꓽ ꓠꓬꓲ ꓠꓬ ꓣꓳ ꓔꓯ ꓙꓳˍ ꓟ ꓔꓯˍ ꓡꓰꓽ ꓠꓲ, ꓥꓳˍ ꓟ ꓔꓯ ꓟꓽ ꓬꓰ ꓬꓰ꓾ ꓢꓲ ꓒ ꓬꓰ‐ꓢꓴ ꓔꓯ ꓕꓲ ꓖꓳ ꓓꓱꓽ ꓕꓲ ꓙꓽ ꓠꓲ, ꓡꓱꓸꓼ ꓙꓵꓻ ꓢꓲ꓾ ꓬꓲ ꓗ ꓠꓯ. ꓢꓲ ꓗꓪ ꓔꓱ, ꓔꓱ, ꓚꓵ ꓚꓵ ꓡꓰꓽ ꓖꓼ ꓛꓳ ꓠ, ꓟ ꓥ ꓡꓳ꓾ ꓐꓰ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓥ ꓡꓳ꓿
