2026 ꓘꓳꓼ 8 ꓦ 11 ꓠꓬꓲ ꓕꓯ ꓬꓯꓥ‐ꓖꓳꓥ ꓡꓳ ꓒꓱ꓾ ꓲ‐ꓢꓰꓲꓠ ꓗꓪ ꓙꓳˍ ꓟ St. Peter and St. Paul ꓪꓽ ꓘꓴ ꓦꓲ ꓗꓪ ꓤ ꓟꓶ ꓤ ꓠꓬꓲꓽ ꓣꓳ ꓠꓬ Sisters of St. Vincent de Paul of Suwon ꓔꓲꓺ ꓟ ꓜꓴ ꓗꓪ ꓔꓲꓺ ꓟ ꓣꓱꓽ ꓠ, ꓟ ꓬꓲ ꓪꓴ. ꓪꓵꓼ ꓘꓶ ꓖꓶ ꓗꓷꓳ꓿

ꓑꓮꓲꓽ ꓕꓱ ꓟ ꓔꓯ ꓠꓯꓼ 10 ꓙꓵ, ꓕꓯ ꓪꓴ. ꓔꓴ ꓗꓷ ꓢꓲ ꓠꓬꓲ ꓬꓮꓥ‐ꓖꓳꓥ ꓢꓽ‐ꓢꓶ‐ꓠ ꓔꓳ, ꓙ ꓔꓲꓺ ꓒ ꓓꓽ Raymond Wai Lin Htun ꓡꓰ ꓧꓳꓽ ꓪꓴ. ꓟꓴ ꓢꓲ ꓠꓬꓲ꓾ ꓔꓲꓺ ꓒ ꓓꓽ Noel Saw Naw Aye ꓥ ꓟꓲ ꓑꓮꓲꓽ ꓗꓪ ꓔ, ꓗꓷ ꓟ ꓥ ꓡꓳ꓿ ꓖꓳ ꓟ ꓠꓯꓸꓼ ꓗꓪ ꓔꓲꓺ ꓒ ꓐꓴ꓾ ꓔꓲꓺ ꓟ ꓐꓴ꓾ ꓬꓲ ꓪ ꓕꓲ ꓦꓲ ꓢꓴ ꓐꓴ ꓐꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓕꓲ ꓪˍ ꓢꓷ. ꓙ ꓟꓳ ꓙ ꓗꓷ ꓟ ꓥ ꓡꓳ꓿

ꓑꓮꓲꓽ ꓟꓲ‐ꓢ ꓟꓽ ꓬꓰ ꓧꓶ. ꓕꓯ ꓔꓲꓺ ꓟ Maria Lydwine Hkawn Bu ꓐꓰ ꓔꓲꓺ ꓟ Maria Ephrem Eugenie  ꓐꓴ ꓬꓲ ꓪ ꓚꓺ ꓟꓲꓽ ꓐꓰ ꓔꓲꓺ ꓟ ꓤꓶꓻ ꓓꓵꓽ ꓡ ꓗꓷ ꓟ ꓚꓱ, ꓐꓴ ꓔꓯ ꓧꓶ. ꓕꓯ ꓵ ꓗꓷꓳ꓿

ꓔꓲꓺ ꓟ Maria Lydwine Hkawn Bu ꓠꓬ ꓟꓲ‐ꓚꓲ‐ꓠ ꓢꓽ‐ꓢꓶ‐ꓠ ꓗꓪ ꓐꓰ ꓥ ꓢꓲ ꓠꓬꓲ Namti ꓡꓳ ꓒꓱ ꓢꓴ ꓥ ꓡꓳ꓿ ꓝꓮꓲ ꓔꓲꓺ ꓟ Maria Ephrem Eugenie ꓠꓬ ꓡꓳꓲ‐ꓗꓮꓪ ꓢꓽ‐ꓢꓶ‐ꓠ ꓗꓪ ꓐꓰ ꓥ ꓡꓳ꓾ ꓐꓰ ꓢꓷ. ꓪˍ ꓡꓳ꓿

ꓔꓲꓺ ꓒ ꓓꓽ ꓬꓲ ꓟ. ꓟꓲꓽ ꓚˍ ꓟ

ꓔꓲꓺ ꓒ ꓓꓽ Raymond Wai Lin Htun ꓡꓰ ꓶꓼ ꓓꓳꓽ ꓫꓱ, ꓓꓳꓽ ꓚˍ ꓟ ꓗꓪ꓾ ꓙꓲ‐ꓢꓴ ꓢꓲ ꓤ ꓮ ꓙꓵꓽ ꓠꓬ ꓖꓳ ꓓꓱꓽ ꓔꓲ,ˍ ꓟ ꓗꓪ ꓐꓰ ꓪꓴ‐ꓢ ꓔꓯ ꓡꓯ ꓙꓱ ꓢꓲ ꓞꓲꓽ ꓫꓬ ꓟꓶ ꓔ ꓢꓴ ꓐꓴ ꓥ ꓡꓳ꓾ ꓐꓰ ꓐꓯˍ ꓡꓳ꓿

ꓙꓵꓻ ꓠꓲ, ꓔꓯ ꓟꓳ. ꓪꓵꓼ ꓙꓱꓽˍ ꓐꓯ ꓟ ꓠꓬ ꓪꓴ‐ꓢ ꓔꓬ ꓗꓪ ꓚꓲ. ꓛꓬ ꓔꓯ ꓪ ꓜꓲ ꓐꓲ ꓜꓲꓼˍ ꓟ ꓚꓱ, ꓡꓰ ꓡꓯꓼ ꓙꓱˍ ꓟ ꓥ ꓢꓲ꓾ ꓦꓲ ꓟꓽ ꓧꓪ ꓟ꓾ ꓫ. ꓙꓵˍ ꓟ ꓐꓰ ꓠ ꓡꓳˍ ꓟ ꓐꓯˍ ꓟ ꓶꓼ ꓓꓳꓽ ꓫꓱ, ꓓꓳꓽ ꓕꓵꓼ ꓪ 3 ꓚꓱ, ꓔꓯ ꓖ ꓛꓳꓼˍ ꓟ ꓗꓪ ꓐꓰ ꓞꓳ ꓙꓳˍ ꓟ ꓥ ꓡꓳ꓾ ꓐꓰ ꓐꓯ ꓟ. ꓖꓶ ꓗꓷꓳ꓿

ꓙꓲ‐ꓢꓴ ꓢꓲ ꓤ ꓤꓶꓻ ꓠꓬ ꓪꓴ‐ꓢ ꓗꓴꓷꓼ ꓔꓯ ꓡ ꓞꓳ ꓮ ꓟꓬ, ꓟꓳꓻ ꓐ ꓡ ꓠ ꓢꓷ. ꓙ ꓟꓳ ꓙˍ ꓟ  ꓥ ꓡꓳ꓾ ꓐꓰ ꓔꓲꓺ ꓒ ꓓꓽ ꓡꓰ ꓐꓯˍ ꓡꓳ꓿

ꓦꓲ ꓟꓽ ꓧꓪ ꓟ ꓪꓵꓼ ꓘꓶꓽ ꓗꓪ ꓐꓰ ꓔꓲꓺ ꓟ ꓐꓴ ꓠꓬ ꓚꓲ. ꓛꓬ ꓠꓵꓻ ꓠꓲ, ꓔꓯ ꓡ ꓞꓳ ꓕꓲ ꓣꓳ ꓟꓽ ꓥ ꓠꓬ ꓡ ꓞꓳ ꓕꓲ ꓜꓴ ꓐꓱ ꓶˍ ꓡꓰꓽ ꓟꓽ ꓥ ꓥ ꓮ ꓙꓵꓽ ꓔꓯ ꓠꓲ, ꓠꓵ ꓠ, ꓟ ꓢꓮꓼ ꓕꓵꓼˍ ꓡꓳ꓿

ꓫ. ꓙꓵˍ ꓟ ꓪꓵꓼ ꓘꓶꓼ ꓗꓪ ꓐꓰ ꓚꓲ. ꓛꓬ ꓔꓯ ꓙꓳˍ ꓟ ꓮ ꓙꓵꓽ ꓕꓯꓽ ꓢꓲ ꓠꓲ, ꓒꓵꓽ ꓠꓲ, ꓡꓱꓻ ꓗꓴ. ꓠ, ꓟ ꓢꓳ ꓣꓴ ꓢꓲ ꓣꓱꓽ ꓞ, ꓔꓬ ꓢꓴ ꓐꓴ ꓐꓰ ꓚꓲ. ꓛꓬ ꓙꓳˍ ꓟ ꓔꓯ ꓢꓴ ꓔꓯ ꓐꓱ ꓖꓶ ꓢꓲ ꓠꓬꓲ꓾ ꓠꓱ. ꓐꓯ ꓢꓴ ꓐꓱ ꓶ ꓢꓯ. ꓔꓬ ꓡꓳ꓿

ꓠ ꓡꓳ.ˍ ꓟ ꓪꓵꓼ ꓘꓶꓽ ꓗꓪ ꓐꓰ ꓜꓴ ꓗꓪ ꓧꓳꓽ ꓣꓱꓽ ꓢꓴ ꓐꓴ ꓡꓰ ꓟ. ꓖꓶ ꓡˍ ꓟ ꓔꓯ ꓦ ꓡꓱ ꓐꓳ ꓐꓳˍ ꓡꓰꓽ ꓛꓳ ꓫꓱꓽ ꓢꓲ ꓪꓴ‐ꓢ ꓠꓲ, ꓡꓶ ꓔꓯ ꓛꓳ ꓠ, ꓟ ꓢꓯꓼ ꓕꓵꓼˍ ꓡꓳ꓿

ꓧꓷ, ꓚ ꓢꓲ ꓐꓯˍ ꓠꓬ ꓔꓲꓺ ꓟ ꓤꓶꓻ ꓐꓯˍ ꓟ ꓠꓬ ꓚꓲ. ꓛꓬ ꓕꓲ ꓤꓶꓻ ꓡꓱꓸꓼ ꓔꓯ ꓪꓴ‐ꓢ ꓔꓬ ꓗꓪ ꓡꓯꓼ ꓙꓱ ꓢꓲ ꓠꓵꓻ ꓠꓲ,꓾ ꓐꓱ ꓖꓶˍ ꓟ ꓐꓰ ꓠ ꓡꓳ.ˍ ꓟ ꓗꓪ ꓐꓰ ꓠꓱ. ꓐꓯ ꓢꓴ ꓐꓱ ꓶ ꓢꓯꓼ ꓔꓬˍ ꓟ ꓥ ꓡꓳ꓿

ꓔꓲꓺ ꓒ ꓓꓽ ꓠꓬ ꓶꓼ ꓓꓳꓽ ꓫꓱ, ꓓꓳꓽ ꓕꓳꓽ ꓶ ꓗꓪ ꓟ ꓤ ꓠꓱ ꓤ ꓐꓴ ꓔꓯ ꓖꓴ ꓢꓲ ꓔꓲꓺ ꓟ ꓠꓬꓲꓽ ꓣꓳ ꓔꓯ ꓢꓲꓽ ꓫꓬˍ ꓟ꓾ ꓙ ꓣꓳˍ ꓟ꓾ ꓠꓲ, ꓟ ꓒꓴˍ ꓟ ꓔꓯ ꓮ ꓕꓯ ꓟꓲ ꓣꓱꓽ ꓬꓰ ꓠ, ꓟ ꓢꓯꓼ ꓖꓶ ꓗꓷꓳ꓿

ꓖꓳ ꓟ ꓡꓰꓽ ꓟꓽ ꓞꓲꓺ ꓪꓴ‐ꓢ ꓡꓰ ꓟꓬꓽ ꓠꓬꓲ ꓠꓬꓲ ꓙ ꓟꓳ ꓙ ꓖꓶˍ ꓟ (Divine Providence) ꓔꓯ ꓒ ꓐꓲꓸꓼ ꓙꓵꓻ ꓠ, ꓟˍ ꓟꓲ ꓬꓲꓼ ꓠꓬꓲ. ꓖꓶ ꓗꓷꓳ꓿ ꓟꓲ ꓠꓯ ꓚꓱ, ꓙꓳˍ ꓟ ꓡꓰ ꓪꓴꓽ ꓓꓰ ꓢꓴ ꓒꓬꓱꓼ ꓠ, ꓟ ꓟꓽ ꓢꓯꓼ ꓕꓵꓼ ꓕꓵꓼ꓾ ꓚꓲ. ꓛꓬ ꓬꓰ ꓔˍ ꓟ ꓙꓵꓻ ꓠꓲ, ꓪꓵꓼ ꓘꓶ ꓔꓯ ꓦ ꓡꓱ ꓐꓳ ꓐꓳˍ ꓡꓰꓽ ꓛꓳ ꓫꓱꓽˍ ꓟ ꓗꓪ ꓐꓰ ꓡꓰꓽ ꓚꓵ ꓚꓵ ꓟ ꓪꓴꓽ ꓓꓰˍ ꓟ ꓔꓯ ꓟꓶ ꓐ ꓡˍ ꓡꓳ꓾ ꓐꓰ ꓔꓲꓺ ꓒ ꓓꓽ ꓡꓰ ꓕꓵꓼ ꓪ ꓖꓶ ꓗꓷꓳ꓿

ꓖꓳ ꓡꓱ ꓪꓵꓼ ꓘꓶꓽ ꓖꓶˍ ꓟ ꓙꓵ,

ꓶꓼ ꓓꓳꓽ ꓫꓱ, ꓓꓳꓽ ꓙꓵ, ꓓꓳ ꓡꓰ ꓗ ꓠꓯ. Novice Mistress ꓔꓲꓺ ꓟ ꓠꓬꓲꓽ ꓣꓳ ꓔꓯ ꓟꓲꓽ ꓙꓬ ꓢꓲ ꓗꓪ ꓘꓴ ꓔꓯ, ꓡˍ ꓡꓳ꓿ ꓬꓲ ꓠꓬꓲꓽ ꓣꓳ ꓡꓰ ꓔꓲꓺ ꓟ ꓜꓴ ꓗꓪ ꓟ ꓙꓵꓽ ꓗ ꓐꓰ ꓜꓴ ꓞꓳ ꓙꓳ ꓚꓰ, ꓙꓳˍ ꓟ ꓡꓰꓽ ꓛꓳ ꓫꓱꓽ ꓠ, ꓟ ꓙꓽ ꓖꓶ ꓓꓳ ꓡꓰꓳ꓾ ꓐꓰ ꓐꓯ ꓗꓷꓳ꓿  ꓖꓳ ꓗ ꓠꓯ. ꓬꓲ ꓪ ꓜꓴ ꓗꓪ ꓟ ꓬꓲ ꓙꓵꓽ Superior General ꓗꓪ ꓐꓰˍ ꓟꓲ ꓕꓲ ꓘꓳꓼ ꓪꓵꓼ ꓘꓶ ꓔꓯ ꓬꓰ ꓝꓲ ꓠ, ꓟ ꓓꓰꓽ ꓗꓷꓳ꓿

ꓖꓳ ꓗ ꓠꓯ. ꓔꓲꓺ ꓟ ꓤ ꓠꓬꓲꓽ ꓣꓳ ꓠꓬ ꓪꓴ‐ꓢ꓾ ꓬꓲ ꓪ ꓔꓯ ꓙꓵꓽ ꓢꓴ ꓟꓴ ꓢꓴ ꓐꓰ ꓢꓲ ꓤ ꓐꓴ ꓟꓲꓽ ꓙꓬ ꓗꓪ ꓦꓲꓻ ꓟꓽ ꓧꓪ ꓟ (Chastity)꓾ ꓫ. ꓙꓵˍ ꓟ (Poverty)꓾ ꓠ ꓡꓳ.ˍ ꓟ (Obedience)꓾ ꓐꓯˍ ꓟ ꓪꓵꓼ ꓘꓶꓼ ꓖꓶ ꓗꓷꓳ꓿

ꓪꓵꓼ ꓘꓶ ꓖꓳ ꓟ ꓗꓪ ꓐꓰ ꓬꓲ ꓪ ꓠꓬ ꓙꓲ‐ꓢꓴ ꓗ ꓠꓯ. ꓒꓵꓽˍ ꓟ ꓚꓱ, ꓗꓪ ꓐꓰ ꓛꓳ ꓠ, ꓟ ꓐꓰ ꓪꓴ‐ꓢ ꓗꓴꓷꓼ ꓐꓱ ꓶ ꓢꓷ. ꓙꓳ ꓟꓳ ꓙ ꓢꓴ ꓒꓬꓱꓼ ꓡ ꓠ, ꓟ ꓬꓲ ꓪ ꓤꓶꓻ ꓔꓯ ꓡꓯꓼ ꓙꓱ ꓗꓷꓳ꓿

ꓜꓴ ꓗꓪ ꓙꓵꓼ ꓪ ꓙꓳ ꓢꓴ ꓢꓯꓼ ꓖꓶ ꓘꓶꓽ

ꓖꓴ ꓟꓶ. ꓗꓳ‐ꓣꓲ‐ꓬ ꓗꓪ ꓐꓰ ꓡˍ ꓟ Sisters of St. Vincent de Paul of Suwon ꓜꓴ ꓗꓪ ꓐꓰ ꓔꓲꓺ ꓟ ꓜꓴ ꓗꓪ ꓟꓽ ꓓ ꓪꓴꓽ ꓢꓴ ꓔꓲꓺ ꓟ Alfonsa ꓡꓰ ꓘꓶ ꓒꓴ ꓘꓶꓽ ꓫ. ꓕꓱˍ ꓟ ꓗꓪ Sr. Ephrem ꓐꓰ Sr. Lydwine ꓐꓴ ꓪꓵꓼ ꓘꓶ ꓖꓶˍ ꓟ ꓔꓯ ꓟꓳꓻ ꓪ ꓡꓰ ꓠꓬꓲ ꓠꓲ, ꓒꓴ ꓔꓬ ꓡꓳ꓿

ꓬꓲ ꓪ ꓖꓶ ꓔ ꓟ ꓪꓵꓼ ꓘꓶ ꓠꓬ ꓚꓲ. ꓛꓬ ꓕꓲ ꓤꓶꓻ ꓡꓱꓸꓼ ꓔꓯ ꓪꓴ‐ꓢ ꓔꓯ ꓡꓯꓼ ꓙꓱ ꓖꓶˍ ꓟ ꓥ ꓟ ꓔꓯ ꓐꓯ ꓟ. ꓖꓶ ꓗꓷꓳ꓿ ꓖꓳ ꓟ ꓡꓰꓽ ꓟꓽ ꓞꓲ St. Vincent de Paul ꓬꓲ ꓫꓱ. ꓤ ꓗꓴ.ˍ ꓟ ꓠꓲ, ꓟ ꓗꓪ ꓐꓰ ꓫ. ꓢꓴ ꓐꓴ꓾ ꓠꓻ ꓔꓬ ꓢꓴ ꓐꓴ꓾ ꓢꓯꓼ ꓐꓽ ꓢꓴ ꓐꓴ ꓐꓰ ꓞꓳ ꓤ ꓗꓳ ꓡꓳ ꓗꓪ ꓐꓰ ꓡꓳ ꓔˍ ꓟ ꓟꓶ ꓢꓴ ꓐꓴ ꓔꓯ ꓐ ꓡˍ ꓗꓪ ꓛꓲ ꓬꓰ ꓙ ꓣꓱꓽ ꓙ ꓠ, ꓟ ꓢꓯꓼ ꓖꓶ ꓗꓷꓳ꓿

ꓖꓳ ꓗ ꓠꓯ. ꓟ‐ꓕꓲ 25ꓽ40 ꓔꓯ ꓖꓴ ꓢꓲ ꓢꓲ ꓒ ꓬꓰ‐ꓢꓴ ꓟ. ꓖꓶ ꓔˍ ꓟ “ꓣꓳ ꓢꓴ ꓬꓲꓼ ꓤ ꓠꓬꓲ ꓤ ꓐꓴ ꓠꓯꓸꓼ ꓗꓪ ꓕꓲ ꓣꓳ ꓔꓯ ꓬꓰ ꓙ ꓖꓶˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓬꓰ ꓙˍ ꓟ ꓥ ꓡꓳ” ꓐꓯˍ ꓟ ꓔꓯ ꓓꓵꓽ ꓙ ꓟꓶ ꓝꓲˍ ꓡꓳ꓿

ꓪꓴ‐ꓢ ꓠꓬ ꓔꓲꓺ ꓟ ꓠꓬꓲꓽ ꓣꓳ ꓔꓯ ꓘꓴˍ ꓟ ꓗꓪ ꓢꓯꓼ ꓪ ꓖꓶ ꓢꓲ ꓙ ꓖꓴ ꓟ. ꓖꓶˍ ꓥꓳ ꓐꓰ ꓙꓵˍ ꓡꓳ꓿ ꓟꓬ‐ꓟ ꓗꓴꓷꓼ ꓗꓪ ꓙꓳˍ ꓟ ꓜꓴ ꓪꓴ‐ꓢ ꓟꓬꓱꓽ ꓐꓬꓱꓽ ꓘꓶ ꓐꓱ ꓶ ꓝ. ꓢꓲ ꓬꓰ ꓙ ꓔꓳ, ꓙ ꓖꓶ ꓠ, ꓟˍ ꓟꓲ ꓐꓯ ꓖꓶ ꓗꓷꓳ꓿

By RVA Sgaw Karen Service