ꓣꓳ ꓠꓯꓼ ꓗꓪ ꓠꓯꓻ ꓞꓲ_ꓟ ꓙꓵ, ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓟꓽ ꓒꓰ, ꓗꓷ꓾
ꓔꓲꓺ ꓒ ꓪ ꓔꓲ ꓡꓰ ꓮꓠꓖꓰꓡꓴꓢ ꓪꓽ ꓘꓴ ꓙꓵ, ꓗꓪ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ “ꓢꓲ ꓒ ꓬꓰ‐ꓢꓴ ꓣꓳ ꓠꓲ, ꓟ ꓘꓴꓽ ꓠꓯꓼ ꓗꓪ ꓔꓬ ꓟ ꓠꓬ ꓮ ꓫꓵ ꓔꓯ ꓥ ꓟꓲ ꓒꓳ, ꓡꓶ. ꓖꓶ ꓐ ꓡ ꓡꓳ꓾” ꓐꓰ ꓢꓯꓼ ꓖꓶ ꓗꓷ ꓟ ꓥꓳ꓿ꓝꓮꓲ ꓟ‐ꓕꓲ 14ꓽ22‐33 ꓢꓲ ꓫꓬ ꓕꓳ ꓶ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓡꓰ “ꓟꓲꓽ ꓦꓲꓻ ꓓꓽ ꓟ ꓙꓱꓼ ꓟ ꓙꓵ, ꓗꓪ ꓬꓲ ꓛꓳꓽ ꓒꓯ, ꓐꓴ ꓠꓯꓼ ꓗꓪ ꓬꓲꓻ ꓙꓬ ꓕꓯꓽ ꓢꓲ ꓫꓱꓽ_ ꓟ ꓚꓱ,” ꓔꓯ ꓬꓲꓼ ꓠꓬꓲ. ꓟ. ꓖꓶ ꓗꓷ ꓟ ꓥꓳ꓿
“ꓕꓽ ꓙꓳꓺ”
ꓬꓲ. ꓛꓳꓽ ꓒꓯ, ꓐꓴ ꓔꓯ ꓠꓲ, ꓟ ꓢꓲ ꓡꓲ, ꓝꓲ ꓓꓴ ꓐꓰ ꓓꓵꓽ ꓙ ꓢꓲ ꓟꓳ ꓡꓰ ꓝꓲ ꓥ ꓟꓲ ꓬꓲ ꓪ ꓔꓯ ꓟꓬ ꓠꓬꓲ ꓙꓳꓺ ꓡꓰ ꓝꓲ_ ꓡꓳ꓿ ꓕꓱ ꓡꓱ ꓙꓬ ꓫ. ꓢꓲ ꓙꓳꓺ ꓧꓲ. ꓡꓰ ꓟ ꓙꓵ, ꓗꓪ ꓢꓲ ꓒ ꓬꓰ‐ꓢꓴ ꓡꓰ “ꓠꓲ, ꓪꓴꓽ ꓪꓴꓽ ꓔꓬ꓾ ꓥꓪ ꓥ ꓡꓳ꓾ꓕꓽ ꓙꓳꓺ” ꓐꓰ ꓐꓯ ꓔ ꓟ ꓥ ꓡꓳ꓿
ꓢꓲ ꓒꓽ ꓬꓲ ꓛꓲ ꓡ ꓟ ꓠꓬ ꓮ ꓙꓵ ꓔꓯ ꓒꓳ, ꓡꓶ. ꓝꓲ_ ꓡꓳ꓾ ꓢꓲ ꓫꓬ ꓢꓴ ꓒꓲ, ꓕꓱ ꓠꓬ ꓢꓲ ꓒꓽ ꓠꓯꓼ ꓗꓪ ꓙꓰ ꓕꓯ ꓬꓲꓻ ꓡꓯꓼ ꓟꓰꓼ ꓠꓯꓼ ꓗꓪ ꓙꓰ ꓕꓯ ꓟꓲ ꓦꓲ ꓓꓽ ꓟ ꓙꓱꓼ ꓟ ꓔꓯ ꓟꓳ ꓗꓷ ꓠꓬ ꓙꓳꓺ ꓡꓰ ꓠꓬꓲ ꓦꓱꓺ ꓡꓰ ꓕꓯ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓔꓯ ꓚꓬꓴ ꓙ ꓗꓷ ꓟ ꓥꓳ꓾ ꓖꓳ ꓟ ꓑꓶ ꓓꓴ ꓕꓱ ꓢꓲ ꓫꓬ ꓕꓳ ꓶ ꓝꓲ. ꓠꓬ ꓙꓳꓺ ꓠꓲ, ꓟꓽ ꓙꓳ ꓠ, ꓟ ꓐꓰ ꓢꓲ ꓒ ꓬꓰ‐ꓢꓴ ꓟꓬ ꓢꓶꓽ ꓟꓽ ꓒꓳ, ꓠ, ꓟ ꓠꓬꓲ. ꓠ. ꓠ, ꓟ ꓣꓱ ꓬꓯꓼ ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓕꓱ ꓟ ꓠꓬ ꓝꓲ ꓓꓴ ꓐꓴ ꓠꓯꓼ ꓗꓪ ꓬꓲ ꓪ ꓠꓲ, ꓟ ꓘꓴꓽ ꓗꓪ ꓐꓰ “ꓚꓵ ꓚꓵ ꓢꓲ ꓒꓽ ꓠꓬ ꓪꓴ‐ꓢ ꓤ ꓔꓲ ꓥ ꓡꓳ꓾” ꓐꓯ_ ꓟ ꓙꓵꓻ ꓠꓲ, ꓔꓯ ꓢꓷ. ꓡꓰ ꓝꓲ_ ꓟ ꓥ ꓡꓳ꓿ ꓝꓮꓲ ꓢꓲ ꓒ ꓬꓰ‐ꓢꓴ ꓡꓰ “ꓠꓴ ꓪ ꓔꓯ ꓥꓪ ꓐꓯ ꓖꓶ_ ꓠꓬꓲꓠꓴ ꓪ ꓙꓵꓻ ꓠꓲ, ꓙꓳ ꓠꓬ ꓪꓽ ꓚꓲ ꓕꓱ ꓕꓲ ꓚꓲ ꓔꓯ ꓠꓴ ꓕꓱ ꓗꓪ ꓐꓰ ꓙꓵꓺ ꓙꓰ ꓢꓲ ꓬꓲꓻ ꓡꓴꓽ ꓐꓱ ꓗꓪ ꓞꓰ ꓓꓵꓽ ꓡꓰ ꓐꓯ ꓠꓬ ꓒꓬꓱꓼ ꓡ ꓥꓳ ꓐꓰ ꓐꓯ ꓔ ꓟ ꓥ ꓡꓳ꓿
ꓠꓲ, ꓦꓶ ꓔꓬ ꓟ ꓬꓲꓻ ꓡꓯꓼ ꓟꓰꓼ ꓗꓳ, ꓡꓳ ꓗꓪ ꓢꓲ ꓒ ꓬꓰ‐ꓢꓴ ꓬꓲ ꓢꓲ ꓡꓲ, ꓟ ꓠꓬ ꓝꓲ ꓓꓴ ꓐꓴ ꓠꓯꓼ ꓗꓪ ꓛꓲ ꓬꓰ ꓟ ꓥ ꓡꓳ꓿ ꓕꓱ ꓟ ꓠꓬ ꓝꓲ ꓓꓴ ꓐꓴ ꓬꓲꓻ ꓡꓵꓽ ꓐꓱ ꓗꓪ ꓚꓵ ꓚꓵ ꓔꓳ, ꓜꓳ ꓡꓰ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓬꓲꓼ ꓠꓬꓲ. ꓐꓯ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ ꓕꓱ ꓢꓷ. ꓡꓰ ꓓꓴ ꓗꓪ ꓐꓰ ꓢꓷ. ꓡꓰ ꓓꓴ ꓠꓬꓲꓽ ꓟ ꓔꓯ ꓟ. ꓖꓶ ꓔ ꓡꓳ꓿ ꓕꓲꓽ ꓟ ꓠꓬ ꓧꓪ. ꓡꓰ ꓓꓴ ꓐꓰ ꓔꓳ, ꓜꓳ ꓡ ꓕꓯ ꓖꓶ ꓘ, ꓟ ꓠꓲ, ꓟ ꓟꓽ ꓙꓳ ꓠ, ꓟ ꓐꓰ ꓝꓮꓲ ꓕꓲꓽ ꓟ ꓠꓬ ꓫ. ꓓꓴ ꓐꓰ ꓔꓳ, ꓜꓳ ꓡ ꓕꓯ ꓚꓲ ꓛꓬ ꓢꓯꓼ ꓕꓵꓼ ꓥ ꓟꓲ ꓟꓲ ꓕꓯ ꓗꓪ ꓟꓽ ꓙꓰ ꓗ. ꓠꓯ. ꓗꓪ ꓐꓰ ꓡꓰ ꓔꓬ ꓡꓳ ꓐꓰ ꓓꓵꓽ ꓙ ꓟ ꓙꓵ, ꓠꓯꓺ ꓞꓲ_ ꓟ ꓙꓵ, ꓗꓪ ꓥ ꓟꓲ ꓚꓵ ꓚꓵ ꓠꓲ, ꓟ ꓐꓬ ꓡꓰ ꓓꓴ ꓟꓽ ꓙꓳ ꓠ, ꓟ ꓐꓯ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ “ꓮ ꓡꓰ ꓕꓲꓽ ꓙꓵ, ꓗꓪ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓟꓽ ꓒꓰ, ꓗꓷ ꓡ꓾ ꓪꓽ ꓘꓴ_ ꓟ꓾ ꓢꓰꓚꓣꓮꓟꓰꓠꓔꓴ ꓘꓳ, ꓣꓴ ꓟ ꓐꓰ ꓪꓴ‐ꓢ ꓐꓯ ꓘꓶꓽ ꓶꓼ ꓓꓳꓽ ꓫꓱ. ꓓꓳꓽ ꓠ ꓠ, ꓟ ꓗꓪ ꓐꓰ ꓣꓳ ꓤꓶꓻ ꓡꓲ ꓗꓪ ꓢꓲ ꓒꓽ ꓔꓯ ꓙꓽ ꓣꓳꓺ ꓟ ꓠꓲ, ꓟ ꓐꓰ ꓘꓳ, ꓣꓴ ꓠꓬ ꓣꓳ ꓙ ꓫꓱꓽ_ ꓟ ꓗꓪ ꓢꓲ ꓡꓲ, ꓟ꓾ ꓠꓬꓲ ꓟ ꓓꓴ ꓐꓰ ꓢꓯꓼ ꓪ ꓐꓴ ꓔꓯ ꓢꓲ ꓒ ꓠꓯꓼ ꓗꓪ ꓡꓳ. ꓟꓳ ꓪ ꓡ ꓟ ꓥ ꓡꓳ꓾” ꓐꓰ ꓐꓯ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ “ꓬꓲ ꓙꓵꓻ ꓠꓲ, ꓑꓶ ꓓꓴ ꓶ ꓤ ꓫꓱ, ꓤ ꓘꓳ, ꓣꓴ ꓟ ꓟ, ꓟ ꓟ‐ꓡꓲ ꓠꓬ ꓪꓴ‐ꓢ ꓔꓯ ꓔꓱ, ꓟ ꓙꓵꓻ ꓠꓲ, ꓐꓰ ꓡꓯꓼ ꓙꓱ_ ꓟ ꓡꓰ ꓐꓰ ꓣꓳ ꓔꓯ ꓥ ꓟꓲ ꓬꓲ ꓔꓯ ꓔꓯꓺ ꓢꓳ ꓐ ꓡ ꓠ, ꓟ ꓬꓰ ꓙ ꓡꓰ ꓝꓲ ꓐꓰ ꓪꓽ ꓘꓴ ꓖꓶ ꓢꓲ ꓬꓲ. ꓟꓶꓽ ꓢꓰꓼ ꓗꓷ ꓟ ꓥꓳ꓿
