ꓬꓲꓼ ꓤ ꓠꓬꓲ ꓤ ꓐꓴꓳ ꓮ ꓙꓵꓽ ꓢꓴ ꓧꓪ. ꓧꓪꓸꓼ꓿ ꓕꓱ ꓕꓲ ꓠꓽ ꓢꓲ ꓒ ꓦꓬꓼ ꓠꓬꓲ ꓗꓪ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓥ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓔꓯ ꓧꓶ. ꓕꓯ ꓣꓳ ꓠ ꓠ, ꓓꓴ ꓬꓰ ꓡꓯ꓿
ꓬꓰ-ꓢꓴ ꓡꓰ ꓞꓳ ꓜꓴꓻ ꓔꓯ ꓬꓲꓼ ꓙꓰ ꓝꓲ ꓔꓬ ꓕꓯ꓾ ꓬꓲ ꓠꓬ ꓞꓼ ꓐꓰ ꓛꓳꓽ ꓒꓯꓹ ꓐꓴ ꓔꓯ ꓡꓲ ꓗꓪ ꓓꓵꓽ ꓡꓰ ꓝꓲ ꓢꓲ꓾ ꓬꓲ ꓪꓽ ꓔꓯ ꓧꓶꓸ ꓕꓯ ꓖꓳ ꓐꓽ ꓢꓲ ꓗꓪ ꓙꓰ ꓝꓲˍ ꓡꓳ꓿ ꓞꓳ ꓜꓴꓻ ꓔꓯ ꓬꓲꓼ ꓙꓰ ꓝꓲ ꓗꓷ ꓠꓬ꓾ ꓬꓲ ꓠꓽ ꓬꓲ ꓕꓲ ꓣꓳˍ ꓡꓰꓽ ꓪꓽ ꓘꓴ ꓠꓹ ꓟ ꓪꓽ ꓚꓲ ꓗꓪ ꓓꓯ ꓙꓰ ꓢꓲ꓾ ꓟꓰꓻ ꓬꓰˍ ꓟꓲ ꓬꓲ ꓕꓲ ꓣꓳˍ ꓡꓰꓽ ꓖꓳ ꓗꓪ ꓔꓬ ꓡꓳ꓿ ꓖꓳ ꓡꓱ ꓥ ꓟꓲ ꓛꓳꓽ ꓒꓯꓹ ꓐꓴ ꓜꓶꓽ ꓔ ꓟ ꓡꓲ ꓠꓽ꓾ ꓬꓲꓻ ꓡꓴꓽ ꓐꓱꓻ ꓘꓶꓽ ꓗꓪ ꓐꓰ ꓶ ꓤ ꓗꓳꓹ ꓞ ꓕꓯ꓾ ꓟꓲꓽ ꓦꓲ ꓓꓶꓽ ꓡ ꓢꓲ ꓬꓲꓻ ꓡꓯꓼ ꓟꓰꓼ ꓡꓰ ꓡꓲ ꓔꓯ ꓶꓹ ꓡꓰ ꓔꓬ ꓡꓳ꓿
ꓠꓯꓼ ꓡꓲ ꓙꓵꓹ ꓛꓲ ꓗꓪ ꓬꓰ-ꓢꓴ ꓠꓬ ꓬꓲ ꓪꓽ ꓔꓬ ꓗꓪ ꓬꓲꓻ ꓡꓴꓽ ꓐꓱ ꓕꓯꓽ ꓢꓲ ꓫꓱꓽ ꓡ ꓡꓳ꓿ꓬꓲꓻ ꓡꓴꓽ ꓐꓱ ꓕꓯꓽ ꓢꓲ ꓗꓪ ꓬꓲ ꓫꓱꓽ ꓔꓬ ꓟ ꓔꓯ ꓛꓳꓽ ꓒꓯꓹ ꓐꓴ ꓟꓳꓻ ꓗꓷ ꓠꓬ ꓦꓲꓸ ꓡꓰ ꓢꓲ꓾ ꓫꓵꓻ ꓗꓴꓸ ꓫꓵ ꓦ ꓥ ꓠꓳꓹ꓾ ꓐꓯ ꓢꓲ ꓙꓳꓺ ꓠꓬꓲ ꓘꓴꓻ ꓔꓴ ꓡ ꓡꓳ꓿ ꓬꓰ-ꓢꓴ ꓠꓽ ꓞꓼ ꓐꓰ ꓬꓲ ꓪꓽ ꓔꓯ ꓫ ꓕꓱ ꓡ ꓢꓲ꓾ ꓠꓲꓹ ꓪꓴꓽ ꓪꓴꓽ ꓔꓬ꓿ ꓥꓪ ꓥ ꓡꓳ꓾ ꓕꓽ ꓙꓳ꓾ ꓐꓯ ꓖꓶˍ ꓡꓳ꓿
ꓒꓲ-ꓕꓱ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓢꓲ ꓒꓽꓳ꓾ ꓠꓴ ꓥ ꓠꓬ꓾ ꓬꓲꓻ ꓙꓬ ꓕꓯꓽ ꓢꓲ ꓫꓱꓽ ꓢꓲ ꓠꓴ ꓔꓬ ꓗꓪ ꓡ ꓠꓹ ꓟ ꓥꓪ ꓔꓯ ꓕꓵꓼ ꓪꓽ ꓖꓶ ꓡꓯ꓾ ꓐꓯˍ ꓡꓳ꓿ ꓬꓰ-ꓢꓴ ꓡꓰ꓾ ꓡꓯ꓾ ꓐꓯ ꓗꓷ ꓠꓬ꓾ ꓒꓲ-ꓕꓱ ꓠꓽ ꓡꓲ ꓗꓪ ꓐꓰ ꓬꓯꓼ ꓡꓰ ꓢꓲ꓾ ꓬꓲꓻ ꓙꓬ ꓕꓯꓽ ꓢꓲ ꓬꓰ-ꓢꓴ ꓔꓬ ꓗꓪ ꓫꓱꓽ ꓙꓰˍ ꓡꓳ꓿
ꓖꓳ ꓡꓱ ꓥ ꓟꓲ ꓟꓲꓽ ꓦꓲ ꓓꓽ ꓟ ꓙꓱꓼˍ ꓟ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓙꓳꓺ ꓡꓰ ꓠꓬꓲ ꓦꓱꓺ ꓓꓵꓽ ꓡꓰˍ ꓐꓰ ꓗꓹ ꓡꓳ꓿ ꓖꓳ ꓕꓯ ꓬꓲ ꓡꓰ꓾ ꓢꓲ ꓒꓽꓳ꓾ ꓥꓪ ꓔꓯ ꓚꓬꓴ ꓙ ꓡꓯ꓾ ꓐꓰ ꓘꓴˍ ꓡꓳ꓿ ꓬꓰ-ꓢꓴ ꓠꓬ ꓞꓼ ꓐꓰ ꓬꓲ ꓡꓯ ꓒꓯꓹ ꓛꓱ ꓓꓳ ꓡ ꓢꓲ꓾ ꓒꓲ-ꓕꓱ ꓔꓯ ꓖꓳꓻ ꓖꓶ ꓢꓲ ꓠꓬꓲ꓾ ꓙꓵꓻ ꓠꓲꓹ ꓣꓳꓺ ꓢꓴꓳ꓾ ꓮꓸ ꓫꓵ ꓪꓴꓸ ꓠꓬꓲ ꓓꓵꓽ ꓙ ꓟꓬꓽˍ ꓡ꓾ ꓐꓯˍ ꓡꓳ꓿ ꓬꓲ ꓪꓽ ꓠꓬꓲꓽ ꓣꓳ ꓡꓲ ꓗꓪ ꓓꓵꓽ ꓡꓰ ꓠꓬ ꓟꓲꓽ ꓦꓲ ꓙꓱꓼ ꓠꓽ ꓡꓰꓳ꓿ ꓡꓲ ꓗꓪ ꓔꓬ ꓢꓴ ꓠꓬ ꓬꓲ ꓔꓯ ꓪꓴꓸ ꓓꓵ ꓕꓱꓼ ꓢꓲ꓾ ꓠꓴ ꓠꓽ ꓚꓵ ꓚꓵ ꓪꓴ-ꓢ ꓮ ꓐꓲ ꓥꓳ꓾ ꓐꓯˍ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓐꓯ ꓘꓶ ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓗꓪ ꓐꓰ ꓣꓳ ꓢꓳ ꓣꓴ ꓓꓴ ꓣꓳ ꓢꓯꓼ ꓪ ꓣꓴ ꓓꓴ (4) ꓫꓵꓽ ꓔꓯ ꓣꓳ ꓡꓳ.ꓟꓳˍ ꓡꓳ꓿ ꓬꓲ ꓪꓴ. ꓕꓲ ꓫꓵꓽ ꓠꓬ ꓢꓲ ꓒ ꓬꓰ‐ꓢꓴ ꓐꓰ ꓠꓶꓽˍ ꓕꓯ ꓢꓲ ꓒ ꓬꓰ‐ꓢꓴ ꓛꓲ ꓡ ꓕꓯ ꓬꓲ ꓡꓯ ꓟꓰꓼ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼˍ ꓡꓳ꓾ ꓐꓯ ꓟ ꓣꓳ ꓢꓷ.ˍ ꓡꓳ꓿ ꓣꓳ ꓟꓳˍ ꓡꓳ꓿
ꓬꓲ ꓝꓲ ꓓꓴ ꓐꓴ ꓠꓬ ꓡꓲ ꓕꓯꓽ ꓢꓲ ꓗꓪ ꓐꓰ ꓙꓰ ꓔꓬ ꓕꓯ ꓟꓲꓽ ꓦꓲ ꓕꓳꓽ ꓥꓳꓽ ꓚꓵ ꓚꓵ ꓙꓱꓼ ꓡˍ ꓡꓳ꓿ ꓬꓲ ꓪ ꓡꓲ ꓔꓯ ꓷ, ꓡꓵ ꓡꓰˍ ꓡꓳ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓙ ꓖꓴ ꓫꓱꓽ ꓡˍ ꓡꓳ꓾ ꓐꓰ ꓡꓳ. ꓟꓳˍ ꓡꓳ꓿ ꓖꓳ ꓟˍ ꓡꓰ ꓐꓰ ꓟ. ꓟꓲꓽ ꓬꓲ ꓪꓴ. ꓕꓲ ꓔꓳ, ꓥ ꓟ 1 ꓪ ꓔꓲ. ꓕꓳꓽ ꓶ 19ꓽ9, 11‐13 ꓗꓪ ꓣꓳ ꓡꓳ. ꓟꓳˍ ꓟ ꓠꓬ꓾ ꓟꓷꓽ ꓠꓷ, ꓟ ꓬꓲ‐ꓡꓲ‐ꓬ ꓠꓬ ꓭ. ꓘꓴ ꓕꓲ ꓟ ꓗꓪ ꓔꓬ ꓕꓯ ꓪꓴ‐ꓢ ꓠꓬ ꓬꓲ ꓔꓯ ꓓꓳ ꓡ ꓝꓲˍ ꓡꓳ꓿ ꓧꓶ. ꓕꓯ ꓟꓲꓽ ꓦꓲ ꓓꓽ ꓟ ꓙꓱꓼˍ ꓡꓳ꓿ ꓟꓲꓽ ꓦꓲ ꓓꓽ ꓠꓯꓸꓼ ꓘꓴꓽ ꓗꓪ ꓪꓴ‐ꓢ ꓟꓽ ꓔꓬ꓿
ꓝꓮꓲ ꓟꓵꓽ ꓓꓵ ꓡˍ ꓡꓳ꓿ ꓟꓵꓽ ꓓꓵˍ ꓟ ꓘꓴꓽ ꓗꓪ ꓥˍ ꓟꓲ ꓪꓴ‐ ꓢ ꓟꓽ ꓔꓬ꓿ ꓝꓮꓲ ꓮ ꓔꓳ. ꓐꓬ ꓠꓬꓲ ꓞ ꓠꓬꓲ ꓬꓲ ꓢꓯꓼ ꓑ ꓙꓽˍ ꓡꓳ꓾ ꓬꓲ ꓟꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓖꓳ ꓟ ꓠꓯꓸꓼ ꓗꓪ ꓥ ꓟꓲ ꓪꓴ‐ꓢ ꓟꓽ ꓔꓬ꓿ ꓪꓴ‐ꓢ ꓠꓬ ꓟꓲꓽ ꓦꓲ ꓤ ꓒꓲ ꓒꓲ, ꓗꓪ ꓬꓲ ꓢꓯꓼ ꓠꓴꓽ ꓠꓴꓽˍ ꓐꓰ ꓓꓳ ꓡˍ ꓟ ꓔꓯ ꓣꓳ ꓑ ꓙꓽˍ ꓡꓳ꓿ ꓖꓳ ꓡꓱ ꓠꓬꓲ ꓪꓴ‐ꓢ ꓐꓰ ꓠꓶꓽ ꓡꓺꓳ ꓐꓰ ꓣꓳ ꓢꓷ. ꓪ ꓓˍ ꓟ ꓠꓬ ꓟꓲꓽ ꓦꓲ ꓕꓳꓽ ꓥꓳꓽ ꓓꓽ ꓟ ꓙꓱꓼˍ ꓡꓳ꓿ ꓮ ꓔꓳ. ꓐꓬ ꓠꓬꓲ ꓕꓱ ꓡꓱ ꓐꓰ ꓗ, ꓡꓳ꓾ ꓐꓯ ꓟ ꓣꓳ ꓡꓳ. ꓟꓳˍ ꓡꓳ꓿
ꓠꓬꓲ. ꓠꓬꓲ ꓶꓼ ꓓꓳꓽ ꓫꓱ, ꓓꓳꓽ ꓗꓪ ꓥˍꓟꓲ ꓢꓲ ꓒ ꓬꓰ‐ꓢꓴ ꓬꓲ ꓪ ꓔꓯ ꓛꓲ ꓡ ꓕꓯ ꓬꓲ ꓪ ꓡꓲ ꓠꓬ ꓮ ꓘꓶ. ꓷ, ꓡꓵˍ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓤꓶꓻ ꓗꓪ ꓠꓲ, ꓫ. ꓟꓬ ꓫ. ꓓꓴ ꓮ ꓘꓶ. ꓔꓳ, ꓜꓳꓽ ꓡˍ ꓕꓯ ꓬꓲꓻ ꓡꓯ ꓟꓰꓼ ꓔꓯ ꓫꓱ.ˍ ꓟ ꓣꓳ ꓠꓲ, ꓫ. ꓓꓴ꓾ ꓣꓳ ꓟꓬ ꓑꓬ ꓓꓴ꓾ ꓥ ꓠꓬ ꓕꓲ ꓫꓵꓽ ꓫꓵꓽ ꓣꓳ ꓤꓶꓻ ꓗꓪ ꓔꓳ, ꓜꓳꓽ ꓡˍ ꓕꓯ ꓣꓳ ꓤꓶꓻ ꓗꓪ ꓠꓲ, ꓫ. ꓟꓬ ꓫ ꓓꓴ ꓔꓳ, ꓜꓳꓽ ꓡˍ ꓕꓯ ꓣꓳ ꓠꓬ ꓪꓴ‐ꓢ ꓒ ꓕꓲ ꓗꓪ ꓔꓬ ꓡꓳ ꓐꓯˍ ꓟ ꓬꓲ ꓪꓴ. ꓕꓲ ꓫꓵꓽ ꓣꓳ ꓔꓯ ꓢꓷ. ꓡꓰ ꓝꓲˍ ꓟ ꓥ ꓡꓳ꓿ ꓮ ꓫꓵꓽ ꓪꓴ. ꓠꓬꓲ ꓥ ꓡ ꓐꓯ ꓠꓬ ꓪꓴ‐ꓢ ꓐꓰ ꓠꓶꓽ ꓢꓴ ꓠꓬ ꓫ. ꓙꓵ ꓟꓷꓼ ꓙꓵˍ ꓟ ꓟꓲꓽ ꓦꓲ ꓕꓳꓽ ꓥꓳꓽ ꓖꓳ ꓟ ꓠꓬ ꓮ ꓕꓯ ꓥ ꓟꓲ ꓙꓳ ꓗꓴ.ˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓪꓴ‐ꓢ ꓠꓬ ꓬꓲ ꓛꓲ ꓡ ꓟ ꓑꓶ. ꓓꓴ ꓬꓲ ꓠꓬ ꓚꓬꓴ ꓙˍ ꓡꓳ꓾ ꓐꓯ ꓟ ꓣꓳ ꓢꓷ. ꓠ ꓗ, ꓡꓳ꓿
ꓝꓮꓲ ꓠꓬꓲꓽ ꓫꓵꓽ ꓕꓲ ꓫꓵꓽ ꓟ ꓠꓬ ꓪꓴ‐ꓢ ꓠꓬ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓥ ꓡꓳ꓾ ꓐꓯˍ ꓟ ꓣꓳ ꓔꓯ ꓢꓷ. ꓡꓰ ꓝꓲˍ ꓡꓳ꓿ ꓠꓬꓲ. ꓠꓬꓲ ꓶꓼ ꓓꓳꓽ ꓫꓱ, ꓓꓳꓽ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓟꓲꓽ ꓦꓲ ꓕꓳꓽ ꓥꓳꓽ ꓔꓯ ꓥˍ ꓟꓲ ꓬꓲ ꓡꓰ ꓠꓽ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲ ꓬꓲ ꓚꓲ. ꓛꓬ ꓥ ꓟꓲ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓙ ꓖꓴ ꓫꓱꓽˍ ꓡꓳ꓿ ꓕꓱ ꓟ ꓠꓬ ꓬꓲ ꓪꓽ ꓠꓬꓲˍ ꓟ ꓥ ꓡꓳ꓿ ꓟꓲ ꓠꓯ ꓕꓱ ꓟ ꓗꓪ ꓮ ꓫꓵꓽˍ ꓟꓲ ꓬꓲ ꓐꓯ ꓘꓶ ꓠ ꓠ, ꓡꓳ꓿ ꓟꓲ ꓠꓯ ꓕꓱ ꓟ ꓗꓪ ꓢꓯ. ꓫꓵꓽ ꓢꓯ. ꓙꓰꓽ ꓣꓱꓽ ꓫꓵꓽ ꓣꓱꓽ ꓙꓰꓽ ꓮ ꓙꓵꓽ ꓬꓲ ꓐꓯ ꓘꓶ ꓕꓲ ꓘꓶ ꓗꓪ ꓡꓰꓽ ꓒꓬꓱꓼ ꓡˍ ꓡꓳ꓿ ꓟꓲ ꓠꓯ ꓕꓱ ꓟ ꓗꓪ ꓬꓲ ꓬꓰ ꓟꓽ ꓐ ꓡ ꓫꓵꓽ ꓮ ꓫꓵꓽˍ ꓟꓲ ꓟꓽ ꓙꓳ꓾ ꓐꓯ ꓟ ꓣꓳ ꓢꓯꓼ ꓪ ꓣꓴ ꓓꓴ ꓠꓬꓲꓽ ꓫꓵꓽ ꓕꓲ ꓫꓵꓽ ꓟ ꓥ ꓡꓳ꓿ꓢꓲ ꓒ ꓬꓰ‐ꓢꓴ ꓔꓯ ꓙꓵˍ ꓕꓯ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓬꓲ ꓡꓰ ꓮ ꓫꓵꓽ ꓥˍ ꓟꓲ ꓬꓰ ꓐ ꓡˍ ꓟ ꓑꓶ. ꓓꓴ ꓬꓲ ꓪꓵꓼ ꓘꓶ ꓖꓶ ꓐ ꓡˍ ꓡꓳ ꓐꓯˍ ꓟ ꓣꓳ ꓙꓵꓻ ꓡꓯ꓿
ꓢ ꓫꓵꓽ ꓕꓲ ꓫꓵꓽ ꓟ ꓠꓬ ꓒꓲ‐ꓕꓱ ꓠꓬ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓙ ꓖꓴ ꓫꓱꓽˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓡꓳ.ˍ ꓕꓯ ꓣꓳ ꓠꓬ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓙ ꓖꓴ ꓫꓱꓽ ꓐ ꓡˍ ꓥꓳ ꓐꓯˍ ꓟ ꓣꓳ ꓔꓯ ꓢꓷ. ꓡꓰ ꓝꓲˍ ꓟ ꓥ ꓡꓳ꓿ ꓬꓲꓻ ꓙꓬ ꓐꓰ ꓐꓯ ꓟ ꓠꓬ ꓣꓳ ꓮ ꓟꓶ ꓓꓳꓻ ꓔꓬ ꓟ ꓬꓲꓻ ꓙꓬ ꓔꓯ ꓐꓯˍ ꓟ ꓟꓽ ꓥ ꓥ ꓐꓰ ꓣꓳ ꓞꓳ ꓙꓳ ꓔꓬ ꓟ ꓦꓬꓼ ꓠꓬꓲ ꓠꓲ, ꓫ ꓟꓬ ꓫ ꓓꓴ ꓘꓶꓻ ꓡꓶ ꓓꓴ ꓢꓯꓼ ꓐ ꓪꓴꓽ ꓧꓶ ꓓꓴ ꓕꓱ ꓡꓱ ꓫꓵꓼ ꓔꓳ, ꓜꓳꓽ ꓡ ꓕꓯ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓒꓬꓱꓽ ꓔꓯˍ ꓡꓰꓽ ꓡꓳ. ꓠꓬꓲˍ ꓕꓯ ꓠꓬ ꓣꓳ ꓠꓬ ꓮ ꓡꓲ ꓥˍ ꓟꓲ ꓟꓽ ꓦꓱ ꓓꓵꓽ ꓙꓰ꓾ ꓟꓽ ꓠꓬꓲ. ꓓꓵꓽ ꓙꓰ꓿ ꓖꓳ ꓡꓱ ꓐꓯ ꓥ ꓟꓲ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓒꓬꓱꓽ ꓔꓯ ꓟꓽ ꓡꓳ. ꓡꓳ. ꓐꓰ ꓠꓱ. ꓐꓯ ꓔꓯ ꓡꓳ. ꓠꓬꓲ꓾ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼˍ ꓟ ꓔꓯ ꓡꓳ. ꓠꓬꓲˍ ꓕꓯ ꓠꓬ ꓒꓲ‐ꓕꓱˍ ꓡꓰ ꓐꓰ ꓣꓳ ꓥˍ ꓟꓲ ꓔꓳ, ꓜꓳꓽ ꓡꓰˍ ꓥꓳ꓿ ꓬꓳ. ꓚꓰꓽˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓒꓬꓱꓽ ꓟꓬ ꓔꓯˍ ꓡꓰꓽ ꓡꓳ. ꓢꓲ ꓞꓳ ꓙꓳ ꓠ, ꓟ ꓥ ꓡꓳ꓿ ꓮ ꓡꓲ ꓫꓵꓽ ꓔꓳ, ꓜꓳꓽ ꓡ ꓥ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓡꓳ.꓾ ꓬꓲ ꓔꓯ ꓙꓵꓻ꓾ ꓐꓯˍ ꓟ ꓣꓳ ꓔꓯ ꓢꓯꓼ ꓪ ꓖꓶ ꓡˍ ꓡꓳ꓿
ꓝꓮꓲ ꓡꓲ ꓫꓵꓽ ꓕꓲ ꓫꓵꓽ ꓟ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓒꓲ‐ꓕꓱ ꓔꓯ ꓙꓵꓻ ꓠꓲ, ꓣꓳꓺ ꓢꓴꓳ ꓮ ꓫꓵꓽ ꓪꓴ. ꓠꓬꓲ ꓓꓵꓽ ꓙꓽ ꓟꓬꓽˍ ꓡ ꓐꓯ ꓢꓲ ꓬꓲ ꓔꓯ ꓚꓬꓴˍ ꓟ ꓔꓯ ꓣꓳ ꓡꓳ. ꓟꓳˍ ꓡꓳ꓿ ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓣꓳ ꓦꓱ, ꓓꓵꓽ ꓙꓰ ꓕꓯ꓾ ꓣꓳ ꓟꓽ ꓗꓴ. ꓕꓯ꓾ ꓟꓽ ꓢꓷ. ꓕꓯ ꓠꓬꓲ. ꓠꓬꓲ ꓒꓲ‐ꓕꓱˍ ꓡꓰ ꓐꓰ ꓢꓲꓺ ꓒꓽꓳ꓾ ꓥꓪ ꓔꓯ ꓚꓬꓴ ꓙ ꓡꓯ꓾ ꓐꓰ ꓐꓯ ꓠ ꓔˍ ꓡꓳ꓿ ꓒꓲ‐ꓕꓱ ꓠꓬ ꓬꓲꓻ ꓙꓬ ꓗꓪ ꓦꓱ ꓓꓵꓽ ꓡꓰˍ ꓕꓯ ꓢꓲ ꓒ ꓬꓰ‐ꓢꓴ ꓔꓯ ꓘꓴ ꓓꓰꓽˍ ꓡꓳ꓿ ꓚꓬꓴ. ꓙ ꓡꓯ ꓐꓰ ꓐꓯˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓤꓶ ꓗꓪ ꓠꓴ ꓧꓪ. ꓟꓽ ꓘꓴ ꓫꓵꓽ꓾ ꓠꓴ ꓟꓯꓻ ꓟꓽ ꓘꓴ ꓫꓵꓽ ꓶꓻ꓾ ꓝꓮꓲ ꓠꓴ ꓔꓳ, ꓜꓳꓽ ꓟꓽ ꓘꓴ ꓘꓽ ꓡ. ꓟꓽ ꓐ ꓡ ꓫꓵꓽ ꓶꓻ ꓕꓲ ꓫꓵꓽ ꓫꓵꓽ ꓙꓳˍ ꓠꓬ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓗꓪ ꓐꓰ ꓠꓴ ꓔꓯ ꓬꓲ ꓔꓯ ꓘꓴ ꓓꓰꓽ ꓠ, ꓟ ꓐꓱ ꓶ ꓬꓲ ꓠꓲ, ꓫꓵˍ ꓡꓳ꓿ ꓥꓪ ꓔꓯ ꓚꓬꓴ ꓙ ꓡꓯ ꓢꓲꓺ ꓒꓽꓳ ꓐꓰ ꓐꓯ꓿ ꓖꓳ ꓡꓱ ꓬꓰˍ ꓠꓬ ꓣꓳ ꓙꓵꓻ ꓠꓲ, ꓗꓪ ꓐꓰ ꓞꓳ ꓙꓳˍ ꓟ ꓕꓲ ꓡꓰ, ꓐꓰ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓐꓯˍ ꓟ ꓡꓰ ꓐꓰ ꓙꓵꓻ ꓠꓲ, ꓣꓳ ꓢꓴ ꓞꓳ ꓤ ꓟꓽ ꓥ ꓥ ꓐꓰ ꓙꓵꓻ ꓠꓲ, ꓪꓴꓽ ꓢꓴ ꓞꓳ ꓤ ꓒꓬꓱꓼ ꓡ ꓢꓲ ꓠꓬꓲ ꓣꓳ ꓔꓯ ꓠꓬꓲ. ꓞ, ꓔꓬ ꓟ ꓣꓳ ꓔꓯ ꓦꓱꓻ ꓡꓰ ꓝꓲˍ ꓟ ꓬꓲꓻ ꓙꓬ ꓗꓪ ꓐꓰ ꓓꓳ ꓐ ꓡ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓐꓰ ꓕꓲ ꓪˍ ꓔꓬ ꓟꓶˍ ꓥꓳ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓕꓯ ꓥ ꓟꓲ ꓫ ꓙꓵ ꓟꓷꓼ ꓙꓵ ꓓꓴ ꓔꓳ, ꓜꓳꓽˍ ꓕꓯ ꓢꓲ ꓒ ꓬꓰ‐ꓢꓴ ꓐꓰ ꓒ ꓕꓲ ꓔꓬ ꓟ ꓔꓯ ꓢꓷ.꓿ ꓝꓮꓲ ꓢꓲ ꓒ ꓬꓰ‐ꓢꓴ ꓠꓬ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓐꓯˍ ꓟ ꓔꓯ ꓙꓵꓻ꓿ ꓕꓱ ꓟ ꓡꓰꓽ ꓟꓽ ꓞꓲ ꓬꓲˍ ꓐꓰ ꓕꓲ ꓡꓰ, ꓞꓳ ꓙꓳˍ ꓠꓬ ꓣꓳ ꓠꓬ ꓟꓲ ꓠꓯ ꓕꓱ ꓟ ꓗꓪ ꓙꓳꓻ ꓢꓻˍ ꓟ ꓟꓶ ꓢꓲ ꓠꓬꓲ ꓣꓳ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶˍ ꓥꓳ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿
