ꓦ‐ꓘ, ꓢꓽ‐ꓢꓶ‐ꓠ ꓠꓬ 8 ꓦ ꓟ 4 ꓠꓬꓲ꓾ ꓠꓽ ꓠꓬꓲꓽ ꓠꓬꓲ꓾ ꓘꓴ ꓜꓲꓼ ꓞꓳ ꓔꓲꓺ ꓒ ꓐꓴ ꓔꓯ ꓠꓬꓲ ꓙ ꓡꓳ. ꓙ ꓢꓴ ꓥ ꓟ ꓙꓲꓻ ꓫꓬ ꓢꓴ John Mary Vianney ꓑꓮꓲ ꓗꓪ ꓙꓲꓻ ꓫꓬ ꓢꓴ ꓬꓳ‐ꓢꓷ ꓪꓽ ꓘꓴ ꓦꓲ (ꓦ‐ꓘ,) ꓗꓪ ꓬꓰˍ ꓟ ꓟꓲ‐ꓢ ꓔꓲꓺ ꓪꓽ ꓘꓴ ꓓꓴ ꓘꓴꓽ ꓠꓯꓸꓼ ꓗꓪ ꓓꓰꓮꓚꓳꓠ ꓬꓲ ꓫꓵꓼ ꓡꓲꓺ ꓣꓳ ꓔꓯ ꓓꓰꓮꓚꓳꓠ ꓙꓵꓽ ꓪ ꓖꓶ ꓗꓷꓳ꓿
ꓕꓱ ꓓꓰꓮꓚꓳꓠ ꓙꓵꓽ ꓪ ꓖꓶ ꓑꓮꓲꓽ ꓟꓲ‐ꓢ ꓔꓯ ꓠꓯꓼ ꓠꓯꓼ 9ꓽ00 ꓙꓵ, ꓗꓪ ꓪꓴ. ꓔꓴ ꓗꓷ ꓢꓲ ꓔꓲꓺ ꓒ ꓓꓽ Lucius Hre Kung ꓡꓰ ꓧꓳꓽ ꓪꓴ. ꓟꓳ ꓢꓲ ꓙꓵꓽ ꓪ ꓖꓶ ꓗꓷꓳ꓿ ꓬꓲ ꓪ ꓡꓲꓺ ꓣꓳ ꓟ ꓗꓪ ꓠꓬꓲꓽ ꓣꓳ ꓠꓬ ꓦ‐ꓘ, ꓢꓽ‐ꓢꓶ‐ꓠ ꓗꓪ ꓐꓰ ꓥ ꓢꓲ ꓠꓬꓲ꓾ ꓝꓮꓲ ꓠꓬꓲꓽ ꓣꓳ ꓠꓬ Little Way Missionary of St. Therese (LWMT) ꓗꓪ ꓐꓰ ꓥ ꓡꓳ꓿ ꓑꓮꓲꓽ ꓖꓳ ꓟ ꓗꓪ ꓔꓲꓺ ꓒ ꓔꓲꓺ ꓟ ꓐꓴ ꓐꓰ ꓢꓲ ꓤ ꓮ ꓙꓵꓽ 500 ꓣꓳ ꓟꓽ ꓞꓲꓺ ꓔ, ꓗꓷ ꓟ ꓥ ꓡꓳ꓾ ꓐꓰ ꓢꓷ. ꓪˍ ꓡꓳ꓿
ꓟꓲ‐ꓢ ꓘꓴꓽ ꓗꓪ ꓔꓲꓺ ꓒ ꓓꓽ Lucius ꓡꓰ ꓮ ꓟꓶ ꓑꓮꓲꓽ ꓠꓬ ꓦ‐ꓘ, ꓢꓽ‐ꓢꓶ‐ꓠ ꓐꓱ ꓶ ꓚꓺ ꓟꓲꓽ ꓒꓬꓱꓼ ꓡꓰˍ ꓟ ꓙꓵ, ꓕꓲ ꓙꓵ, ꓥ ꓟ ꓔꓯ ꓐꓯ ꓗꓷꓳ꓿ “ꓕꓱ ꓕꓲ ꓘꓳꓼ ꓠꓬ ꓦ‐ꓘ, ꓢꓽ‐ꓢꓶ‐ꓠ ꓐꓱ ꓶ ꓧꓶ. ꓕꓯ ꓟ ꓔꓯ ꓟꓽ ꓫꓱ. ꓟ ꓬꓲ ꓘꓳꓼ ꓕꓲ ꓘꓳꓼ ꓥ ꓡꓳ꓿ ꓑꓮꓲꓽ ꓕꓱ ꓟ ꓠꓬ ꓚꓺ ꓟꓲꓽ ꓕꓲ ꓟ ꓒꓬꓱꓼ ꓡꓰˍ ꓟ ꓡꓰ ꓐꓰ ꓢꓽ‐ꓢꓶ‐ꓠ ꓐꓱ ꓶ ꓥˍ ꓟꓲ ꓪꓴ‐ꓢ ꓣꓱꓽ ꓛꓰꓽ ꓕꓲ ꓟ ꓥ ꓡꓳ꓿ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓟꓲ ꓠꓯ ꓗꓪ ꓪꓴ‐ꓢ ꓗꓴꓷꓼ ꓔꓯ ꓔꓯꓺ ꓔˍ ꓟ ꓦꓲꓻ ꓓꓽ ꓟ ꓕꓲ ꓟ ꓥ ꓡꓳ꓿”
ꓬꓲ ꓡꓰ ꓟ‐ꓕꓲ 15ꓽ1‐2, 10‐14 ꓗꓪ ꓟ ꓶꓼ ꓓꓳꓽ ꓫꓱ, ꓓꓳꓽ ꓗꓪ ꓐꓰ꓾ ꓞꓳ ꓤ ꓔꓯ ꓟꓽ ꓢꓲꓽ ꓫꓬ ꓝꓲ ꓟ ꓠꓬ ꓟꓷꓽ ꓠꓷ, ꓘꓴꓽ ꓗꓪ ꓐꓰ ꓓꓵꓽ ꓡꓰˍ ꓟ ꓟꓽ ꓥ꓾ ꓠꓲ, ꓟ ꓗꓪ ꓐꓰ ꓓꓳ ꓡˍ ꓟ ꓥ ꓡꓳ” ꓐꓯˍ ꓟ ꓢꓲ ꓒ ꓬꓰ‐ꓢꓴ ꓬꓲ ꓟ. ꓖꓶ ꓘꓶꓽ ꓗꓪ ꓐꓰ ꓪꓴ‐ꓢ ꓟ. ꓟꓲꓽ ꓚꓺ ꓗꓷꓳ꓿ ꓖꓳ ꓗ ꓠꓯ. ꓙꓲꓻ ꓫꓬ ꓢꓴ John Mary Vianney ꓬꓲ ꓤꓶꓻ ꓔꓯ ꓔꓯꓺ ꓢꓲ ꓟ. ꓖꓶ ꓗꓷꓳ꓿ ꓙꓲꓻ ꓫꓬ ꓢꓴ ꓠꓬ ꓢꓷ. ꓠꓲ, ꓢꓳˍ ꓟ ꓗꓪ ꓫ. ꓓꓴ ꓮ ꓟꓬ, ꓔꓳ, ꓜꓳꓽ ꓗꓷ ꓢꓲ ꓠꓬꓲ꓾ ꓪꓴ‐ꓢ ꓟ. ꓟꓲꓽ ꓚˍ ꓟ ꓗꓪˍ ꓟꓲ ꓓꓻ ꓢꓴ ꓟꓽ ꓥ ꓥˍ ˍꓟꓲ ꓪꓴ‐ꓢ ꓔꓯ ꓮ ꓟꓬ, ꓠꓲ, ꓠꓵ ꓢꓲ꓾ ꓙ ꓣꓳ ꓠꓲ, ꓐꓰ ꓞꓳ ꓤ ꓐꓴ ꓚꓬꓴ ꓟꓶ ꓠ, ꓟ ꓐꓱ ꓶ ꓮ ꓟꓬ, ꓢꓯꓼ ꓕꓵꓼ ꓗꓷ ꓟ ꓑꓶ. ꓓꓴ ꓘꓴ ꓜꓲꓼ ꓞꓳ ꓗꓪ ꓟꓬꓱ ꓓꓳꓽ ꓙꓳˍ ꓟ ꓶꓼ ꓓꓳꓽ ꓫꓱ, ꓓꓳꓽ ꓚ ꓢꓴ ꓕꓲ ꓣꓳ ꓒꓬꓱꓼ ꓡ ꓗꓷ ꓟ ꓔꓯ ꓔꓲꓺ ꓒ ꓓꓽ ꓡꓰ ꓐꓯ ꓗꓷꓳ꓿
ꓖꓳ ꓟ ꓡꓰꓽ ꓟꓽ ꓞꓲ ꓔꓲꓺ ꓒ ꓙꓵꓽ ꓪ ꓟꓶ ꓡꓰ ꓗꓷ ꓢꓴ ꓐꓴ ꓔꓯ ꓙꓲꓻ ꓫꓬ ꓢꓴ John Mary Vianney ꓡꓰ ꓐꓰ ꓢꓲꓽ ꓫꓬˍ ꓟ꓾ ꓠꓵꓻ ꓠꓲ, ꓗꓪ ꓐꓰ ꓪꓴ‐ꓢ ꓬꓲ ꓑ ꓫꓬ ꓐꓴ ꓔꓯ ꓙ ꓖꓴ ꓟ. ꓖꓶ ꓠ, ꓟ꓾ ꓟ. ꓖꓶ ꓑꓱ ꓖꓶ ꓠ, ꓟ ꓐꓰ ꓚꓲ. ꓛꓬ ꓢꓯꓼ ꓕꓵꓼ ꓔˍ ꓟ ꓔꓯ ꓞꓳ ꓤ ꓐꓴ ꓡꓰ ꓟꓽ ꓒꓵꓽ ꓟꓽ ꓚꓬ, ꓬꓰˍ ꓟ ꓬꓲ ꓙꓵ, ꓗꓪ ꓥˍ ꓟꓲ ꓪꓴ‐ꓢ ꓐꓰ ꓘꓴ ꓜꓲꓼ ꓞꓳ ꓔꓯ ꓝ. ꓢꓲ ꓟꓬꓱꓽ ꓬꓰ ꓠ, ꓟ ꓕꓵꓼ ꓪ ꓖꓶ ꓗꓷꓳ꓿
Little Way Missionary of St. Therese (LWMT) ꓗꓪ ꓟ ꓔꓲꓺ ꓒ Peter Shjreh(ꓙꓲꓻ ꓫꓬ ꓢꓴ ꓬꓳ‐ꓢꓷ ꓪꓽ ꓘꓴ ꓦꓲ ꓗꓪ ꓔꓳ, ꓙ ꓔꓲꓺ ꓒ) ꓡꓰ ꓦ‐ꓘ, ꓢꓽ‐ꓢꓶ‐ꓠ ꓔꓯ ꓫ. ꓟꓳ ꓘꓶ ꓫ. ꓕꓱ ꓗꓷꓳ꓿
“ꓦ‐ꓘ, ꓢꓽ‐ꓢꓶ‐ꓠ ꓗꓪ ꓙꓵꓽ ꓪ ꓖꓶˍ ꓟ ꓔꓲꓺ ꓒ ꓓꓽ ꓔꓯ ꓫ. ꓟꓳˍ ꓡꓳ꓿ ꓔꓲꓺ ꓒ ꓓꓽ ꓐꓯ ꓗꓷ ꓟ ꓡꓰ ꓠꓬꓲ. ꓠꓬꓲ ꓠꓬ ꓪꓴ‐ꓢ ꓬꓲ ꓣꓱꓽ ꓛꓰꓽ ꓐꓰ ꓶꓼ ꓤ ꓫꓱ, ꓤ ꓕꓲ ꓟ ꓥ ꓡꓳ꓿ ꓣꓳ ꓠꓬ ꓘꓴ ꓜꓲꓼ ꓞꓳ ꓗꓪ ꓪꓴ‐ꓢ ꓟꓬꓱꓽ ꓬꓲ ꓪꓴ. ꓟꓬꓱꓽ ꓬꓰ ꓪꓴ. ꓔꓴˍ ꓟ ꓘꓳꓼ ꓥ ꓟ ꓑꓶ. ꓓꓴ ꓪ ꓜꓲ ꓗ, ꓛꓲꓽˍ ꓡꓳ꓿ ꓕꓱ ꓗꓪ ꓔꓬ ꓟ ꓑ ꓫꓬ ꓐꓴ ꓐꓰ ꓕꓲ ꓪˍ ꓪꓴ‐ꓢ ꓟꓬꓱꓽ ꓔꓯ ꓝ. ꓢꓲ ꓢꓯꓼ ꓕꓵꓼ ꓐ ꓡ ꓠ, ꓟ ꓥꓳ ꓡꓳ. ꓔꓬ ꓡꓳ” ꓐꓰ ꓐꓯ ꓗꓷꓳ꓿
ꓓꓰꓮꓚꓳꓠ ꓙꓵꓽ ꓪ ꓟꓶ ꓡꓰ ꓟ ꓡꓲꓺ ꓣꓳ ꓘꓴꓽ ꓠꓯꓸꓼ ꓗꓪ ꓐꓰ ꓓꓰꓮꓚꓳꓠ ꓝꓣꓮꓠꓚꓲꓢ ꓥˍ ꓟꓲ ꓬꓰ ꓙ ꓡ ꓢꓴ ꓐꓴ ꓙꓵꓻ ꓢꓴ ꓐꓴ ꓔꓯ ꓫ. ꓟꓳ ꓘꓶꓽ ꓫ. ꓕꓱ ꓗꓷꓳ꓿
