ꓞꓲꓼ ꓪꓴ ꓢꓴ ꓐꓴ ꓠꓬ ꓶꓻ ꓡꓲꓽ ꓓꓽ ꓟ ꓟꓽ ꓥ꓾ ꓞꓳ ꓒꓵꓽ ꓠꓲ, ꓡꓱ ꓠ, ꓟ ꓡꓯꓼ ꓫꓴꓻ ꓕꓲꓽ ꓟ ꓥ ꓡꓳ꓾
ꓢꓲ ꓒ ꓬꓰ‐ꓢꓴ ꓬꓲ ꓮ ꓑ ꓮ ꓤ ꓥ ꓟ ꓢꓲ ꓫꓬ ꓢꓴ ꓙꓳꓮꓚꓧꓲꓟ ꓐꓰ ꓮꓠꓠꓰ ꓑꓮꓲ ꓓꓳ ꓡꓰ ꓕꓯ (6) ꓧꓪ, ꓕꓲꓽ ꓧꓪ, ꓟ ꓟꓵꓽ ꓗꓳ. ꓓꓵ ꓓꓵ ꓮ ꓑ ꓮ ꓤ ꓐꓰ ꓞꓲꓼ ꓪꓴꓽ ꓢꓴ ꓐꓴ ꓑꓮꓲ ꓚꓵ. ꓟꓶ ꓓꓴ ꓔꓯ ꓬꓰ ꓗꓷ ꓟ ꓥꓳ꓿
ꓦꓮꓔꓲꓚꓮꓠ ꓗꓪ ꓐꓰ ꓝꓲꓼ ꓪꓴ ꓢꓴ ꓔꓯ ꓠꓬꓲ ꓙ ꓡꓳ. ꓙ ꓟ ꓙꓵꓽ ꓪꓴ ꓢꓴ ꓦꓲꓔꓔꓳꓣꓲꓳ ꓢꓚꓰꓡꓜꓳ ꓡꓰ ꓕꓱ ꓡꓱ ꓞꓲ ꓪꓴꓽ ꓢꓴ ꓐꓴ ꓔꓯ ꓕꓱ ꓡꓱ ꓠꓬꓲ ꓙ ꓡꓳ. ꓙ ꓟ ꓡꓰ ꓟꓽ ꓥ ꓥ꓾ ꓬꓲ ꓪ ꓐꓰ ꓠꓶꓽ ꓞ, ꓢꓲ ꓫꓱ, ꓡꓯ ꓘꓳ ꓓꓴ ꓠꓯꓼ ꓗꓪ ꓫꓬ, ꓔꓶꓻ ꓠ, ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓕꓱ ꓡꓱ ꓬꓰ ꓙ ꓟ ꓡꓰ ꓟꓽ ꓡꓳꓼ ꓣꓳ ꓙꓻ ꓡꓯ ꓘꓳ ꓓꓴ ꓔꓯ ꓫꓬ, ꓔꓶꓻ ꓓꓴ ꓬꓰ ꓡꓯ꓾ ꓐꓰ ꓐꓯ ꓔ ꓡꓳ꓾ꓪꓴ‐ꓢ ꓠꓬ ꓣꓳ ꓔꓯ ꓮ ꓕꓯ ꓟꓲ ꓟꓽ ꓟꓲ ꓡꓰ ꓟꓽ ꓒꓰ, ꓗꓷ ꓡꓰ ꓐꓯ_ ꓟ ꓔꓯ ꓙꓵꓻ ꓢꓲ ꓞꓲꓼ ꓪꓴ ꓢꓴ ꓐꓴ ꓐꓱ ꓶ ꓚꓲ. ꓛꓬ ꓢ‐ꓢꓲ‐ꓠ ꓕꓲꓽ ꓦꓲꓻ ꓢꓴ ꓐꓴ ꓗꓪ ꓐꓰ ꓟ ꓓꓵꓽ ꓙ ꓡꓳ ꓐꓯ ꓟ ꓔꓯ ꓢꓷ. ꓡꓰ ꓝꓲ_ ꓟ ꓥ ꓡꓳ꓿
ꓥꓪ ꓠꓬ ꓠꓴ ꓔꓯ ꓮ ꓕꓯ ꓟꓲ ꓟꓽ ꓟꓲ ꓡꓰ (ꓬꓲ‐ꓢ‐ꓬ 49ꓽ15) ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓢꓲꓺ ꓔ ꓟ ꓢꓲ ꓫꓬ ꓕꓳ ꓶ ꓝꓲ. ꓗꓪ ꓐꓰ ꓢꓚꓰꓡꓜꓳ ꓡꓰ ꓣꓳ ꓗꓳ, ꓡꓳ ꓗꓪ ꓔꓬ ꓢꓴ ꓐꓴ ꓗꓪ ꓐꓰ ꓡ ꓞꓳ ꓐꓴ ꓔꓯ ꓒꓰ, ꓗꓷ ꓟ ꓡꓲꓽ ꓒꓰꓼ ꓔꓯ ꓟꓽ ꓣꓱ ꓠ, ꓟ ꓐꓰ ꓟꓬ ꓠꓬꓲ ꓠꓬ ꓕꓲꓽ ꓣꓳ ꓕꓵꓼ ꓡꓰ ꓓꓵꓽ ꓙ ꓡꓰ ꓝꓲ_ ꓟ꓾ ꓞ ꓝꓲ. ꓕꓯ ꓞꓲꓼ ꓪꓴ ꓢꓴ ꓐꓴ ꓠꓯꓼ ꓗꓪ ꓙꓰ ꓢꓲ ꓢꓯꓼ ꓖꓶ ꓠ, ꓟ ꓐꓯ ꓔ ꓡꓳ꓿
ꓰꓴꓣꓳꓑꓰ ꓐꓰ ꓠꓱ. ꓐꓯꓼ ꓗꓴꓷꓼ ꓗꓪ ꓮ ꓟꓶ ꓤꓶꓻ ꓐꓰ ꓠꓬꓲꓽ ꓗꓳ. ꓚ. ꓗꓪ ꓫꓱ, ꓡꓯ ꓘˍ_ ꓟ꓾ ꓬꓲ. ꓚꓱ, ꓐꓰ ꓕꓲꓽ ꓝ. ꓞꓳ ꓡꓱ ꓐꓴ ꓐꓰ ꓞꓲꓼ ꓪꓴ ꓢꓴ ꓮ ꓑ ꓮ ꓤ ꓐꓴ ꓔꓯ ꓕꓲꓽ ꓪ ꓪꓽ ꓘꓴ ꓟ꓾ ꓙ ꓡꓯ ꓘꓳ_ ꓟ꓾ ꓬꓲ ꓪ ꓐꓰ ꓕꓲꓽ ꓪ ꓔꓬ ꓟ ꓔꓯ ꓬꓰ ꓖꓶ ꓟ ꓥ ꓡꓳ꓿
ꓞꓲꓼ ꓪꓴꓽ ꓢꓴ ꓐꓴ ꓤꓶꓻ ꓠꓬ ꓦ ꓕꓲꓽ ꓒꓳ, ꓗꓪ ꓥ ꓟꓲ ꓠꓽ ꓡꓰ ꓟ ꓟꓽ ꓥ꓾ ꓞꓲꓼ ꓪꓴꓽ ꓢꓴ ꓐꓴ ꓠꓬ ꓚꓲ. ꓛꓬ ꓤꓶꓻ ꓙꓵꓽ ꓪ ꓔꓯ ꓝ. ꓢꓲ ꓟꓯꓻ ꓠ, ꓟ ꓐꓰ ꓟꓲ ꓠꓯ ꓢꓲ ꓡꓲ, ꓠ, ꓟ ꓐꓱ ꓶ ꓟꓽ ꓠꓽ ꓠꓽ ꓪꓽ ꓘꓴ ꓖꓶ ꓠ, ꓟ ꓥ ꓡꓳ ꓐꓰ ꓔꓲꓺ ꓒ ꓪ ꓔꓲ ꓐꓯ ꓘꓶꓽ ꓔꓯ ꓬꓲꓼ ꓠꓬꓲ. ꓢꓯꓼ ꓖꓶ ꓔ ꓡꓳ꓿
