ꓟ‐ꓕ ꓐꓰ ꓟ‐ꓡꓲ (Daily reflection)
ꓧꓪ. ꓧꓪ ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 10ꓽ 38‐42 ꓝꓲ ꓗꓪ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓐꓰ ꓟ‐ꓕ ꓐꓰ ꓟ‐ꓡꓲ ꓫ. ꓕꓱ ꓡꓯ ꓘꓳ, ꓟ ꓚꓱ, ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓠꓬ ꓟ‐ꓕ ꓐꓰ ꓟ‐ꓡꓲ ꓚꓱ, ꓔꓯ ꓮ ꓡꓲ ꓐꓰ ꓔꓯ ꓢꓳꓻ ꓠ, ꓟ ꓟ. ꓖꓶ ꓔꓬ ꓟ ꓥꓡꓳ꓿
ꓟ‐ꓕ ꓤꓶꓻ ꓠꓯ, ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓬꓱꓽ ꓬꓰ ꓢꓲ ꓠꓬꓲ ꓞꓳ ꓙꓳ ꓢꓴ ꓥ ꓡꓳ ꓐꓰ ꓬꓲ ꓠꓬ ꓢꓴ ꓔꓯ ꓮ ꓘꓶ. ꓛꓲ ꓬꓰ ꓙ ꓢꓴ ꓥꓡꓳ꓿ ꓖꓳ ꓡꓱ ꓥ ꓟꓲ ꓟ‐ꓡꓲ ꓠꓬ ꓢꓲꓺ ꓒ ꓟꓲ ꓙꓬ ꓗꓪ ꓡ ꓢꓲ ꓠꓬꓲ ꓢꓲꓺ ꓒ ꓐꓯ ꓘꓶꓽ ꓔꓯ ꓠ ꓠ, ꓢꓴ ꓪꓽ ꓘꓴ ꓟ ꓢꓴ ꓐꓰ ꓡꓳ. ꓟꓳ ꓓꓽ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓟ‐ꓕ ꓔꓯ ꓢꓴ ꓔꓯ ꓬꓰ ꓙ ꓔ ꓙ ꓟ ꓟꓬꓱꓽ ꓬꓰ ꓔꓬ ꓟ ꓪꓴ. ꓠꓬꓲ ꓬꓲ ꓔꓯ ꓟꓽ ꓙꓲ ꓟ ꓐꓰ ꓟꓽ ꓐꓯ ꓔ ꓥ ꓟꓲ ꓬꓲ ꓔꓯ ꓮ ꓘꓶ. ꓛꓲ ꓙ ꓫ. ꓟ ꓠꓲ, ꓟ ꓫ. ꓔ ꓟ ꓔꓯ ꓖꓳ ꓡꓱ ꓟꓽ ꓬꓰ ꓠ ,ꓟ ꓐꓯ ꓖꓶ ꓔ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓬꓲ ꓠꓬ ꓬꓲ ꓪ ꓦꓲꓻ ꓗꓪ ꓡ ꓟ ꓢꓲꓺ ꓒ ꓬꓰ‐ꓢꓴ ꓔꓯ ꓜ ꓓꓴ ꓓꓳ ꓓꓴ ꓙ ꓖꓶ ꓔ ꓟ ꓗꓪ ꓡꓰ ꓬꓰ ꓗꓷ ꓟ ꓔꓯ ꓡꓳ. ꓟꓳ ꓟ ꓥ ꓡꓳ꓿
ꓢꓲꓽ ꓫꓬ ꓢꓴ ꓐꓴ ꓡꓰ ꓐꓯ ꓔ ꓟ ꓐꓯ ꓘꓶ. ꓙꓳ ꓡꓳ ꓠꓴ ꓥꓪ ꓠꓬ ꓪꓴ‐ꓢ ꓐꓱ ꓶ ꓟꓬꓱꓽ ꓮ ꓟꓬ, ꓛꓲ ꓢꓯꓼ ꓕꓵꓼ ꓗꓷ ꓥ ꓟꓲ ꓦꓻ ꓕꓲ ꓒꓳ, ꓗꓪ ꓪꓴ‐ꓢ ꓐꓰ ꓙꓻ ꓡꓯꓽ ꓘꓳ, ꓟ ꓪꓽ ꓘꓴ ꓟ ꓟꓽ ꓙꓳ ꓠꓬ ꓙꓲ ꓖꓴ ꓟꓽ ꓙꓳ ꓟ ꓚꓱ, ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓬꓱꓽ ꓟꓽ ꓬꓰ ꓢꓰ ꓕꓯ ꓪꓽ ꓘꓴ ꓠꓯ, ꓗꓪ ꓪꓽ ꓘꓴ ꓟ ꓗꓪ ꓐꓰ ꓪꓴ. ꓔꓵ ꓠ, ꓟ ꓐꓯ ꓟ. ꓖꓶ ꓔ ꓟ ꓥ ꓡꓳ꓿
ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓬꓲ ꓞꓳ ꓙꓳ ꓚꓱ, ꓗꓪ ꓟ‐ꓕ ꓐꓰ ꓟ‐ꓡꓲ ꓔꓯ ꓥꓳꓽ ꓔꓯ ꓣꓳ ꓔꓯꓺ ꓣꓳ ꓠ, ꓟ ꓥ ꓡꓳ꓿
ꓢꓲ.ꓲꓖꓠꓮꓔꓲꓴꓢ ꓳꓝ ꓡꓳꓬꓳꓡꓮ ꓡꓰ ꓐꓯ ꓔ ꓟ ꓠꓬ ꓟꓬꓱꓽ ꓬꓰ ꓟ ꓠꓬ ꓪꓽ ꓘꓴ ꓟ ꓥ ꓡꓳ ꓐꓰ ꓐꓯ ꓖꓶ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓟꓬꓱꓽ ꓖꓳ ꓡꓱ ꓬꓰ ꓖꓳ ꓡꓱ ꓪꓽ ꓘꓴ ꓠ, ꓟ ꓐꓯ ꓖꓶ ꓔ ꓟ ꓥ ꓡꓳ꓿
ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓟ ꓙꓵ, ꓕꓯ ꓟꓬꓱꓽ ꓬꓰ ꓡꓳ ꓬꓰ ꓟ ꓗꓪ ꓙꓵ, ꓕꓯ ꓟ‐ꓕ ꓡꓰ ꓐꓰ ꓓꓴ ꓙ ꓟꓬ ꓓꓴ ꓟꓽ ꓙꓳ ꓠ, ꓟ ꓢꓲꓺ ꓒ ꓔꓯ ꓣꓳ ꓠꓲ, ꓟ ꓠꓯ, ꓗꓪ ꓓꓵ ꓡ ꓠ, ꓟ ꓘꓴ ꓓꓴ ꓬꓰ ꓡꓯ꓿ ꓟ‐ꓡꓲ ꓡꓰ ꓐꓰ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓓꓴ ꓬꓰ ꓡꓯ꓿
ꓢꓲ, ꓡꓲ ꓐꓰ ꓔ ꓟ ꓔꓶ. ꓗꓪ ꓙꓰ ꓢꓲ ꓠꓬꓲ ꓢꓲꓺ ꓒ ꓡꓰ ꓣꓳ ꓔꓯ ꓮ ꓫꓵꓽ ꓐꓯ ꓔꓬ ꓟ ꓚꓱ, ꓔꓯ ꓠ ꓠ, ꓓꓴ ꓬꓰ ꓡꓯ꓿ ꓠꓬꓲ. ꓠꓬꓲ ꓟ ꓦꓬꓼ ꓠꓬꓲ ꓗꓪ ꓣꓳ ꓔꓯ ꓢꓲꓺ ꓒ ꓐꓰ ꓧ, ꓙꓰ ꓝꓲ ꓟ ꓑꓧꓳꓠꓰ꓾ ꓚꓳꓟꓑꓴꓔꓰꓣ ꓣꓱ ꓟ ꓔꓯ ꓤ ꓟꓳ ꓢꓲ ꓠꓬꓲ ꓢꓲꓺ ꓒ ꓐꓯ ꓘꓶ ꓔꓯ ꓠ ꓠ ꓓꓴ ꓬꓰ ꓡꓯ꓿
ꓝꓮꓲ ꓢꓴ ꓔꓯ ꓟꓽ ꓙꓲ ꓐꓯ ꓟ ꓢꓴ ꓔꓯ ꓫꓵꓽ ꓘꓶꓽ ꓟ ꓚꓱ, ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓣꓳ ꓔꓬ ꓟ ꓔꓶ. ꓗꓪ ꓣꓳ ꓡꓰ ꓐꓰ ꓢꓴ ꓥ ꓟꓲ ꓙꓲ ꓟ ꓟꓬꓱꓽ ꓗꓪ ꓟꓽ ꓢꓯꓼ ꓕꓵꓼ ꓟ ꓔꓯ ꓡꓳ. ꓟꓳ ꓔꓯ ꓢꓴ ꓔꓯ ꓝꓴꓲ ꓟꓽ ꓧꓪ ꓠ, ꓟ ꓐꓯ ꓖꓶ ꓔ ꓡꓳ꓿
ꓠꓬꓲ. ꓠꓬꓲ ꓣꓳ ꓔꓯ ꓟꓬꓱꓽ ꓮ ꓟꓬ, ꓛꓲ ꓬꓰ ꓟ ꓔꓯ ꓢꓲ ꓢꓲꓺ ꓒ ꓐꓰ ꓕꓲ ꓪ ꓔꓬ ꓠ, ꓟ ꓢꓲꓺ ꓒ ꓔꓯ ꓙ ꓡꓯꓽ ꓘꓳ, ꓠ, ꓟ ꓐꓯ ꓖꓶ ꓔ ꓡꓳ꓿
ꓪꓴ‐ꓢ ꓔꓯ ꓬꓲ ꓙꓵ, ꓖꓶ ꓕꓯ ꓢꓲ ꓠꓬꓲ ꓬꓲ ꓗꓪ ꓣꓳ ꓔꓯ ꓠꓵꓻ ꓠꓲ, ꓖꓶ ꓟ ꓥ ꓡꓳ꓿ ꓝꓮꓲ ꓔꓱ ꓚꓵ, ꓟ ꓠꓵꓻ ꓠꓲ, ꓐꓰ ꓢꓯꓼ ꓪ ꓘꓳ, ꓣꓴ ꓪ ꓓꓴ ꓥꓳ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
