ꓰꓴꓣꓳꓑꓰ ꓗꓪ ꓟꓵꓽ ꓮ ꓔꓳ. ꓐꓬ ꓡꓰ ꓟ ꓗꓪ ꓐꓰ ꓫ. ꓔꓬ ꓢꓴ ꓐꓴ ꓐꓱ ꓶ ꓔꓲꓺ ꓒ ꓪ ꓔꓲ ꓪꓽ ꓘꓴ ꓖꓶ_ ꓟ꓾
ꓝꓣꓮꓠꓚꓰ ꓐꓰ ꓢꓑꓮꓲꓠ ꓗꓴꓷꓼ ꓗꓪ ꓟꓵꓽ ꓮ. ꓔꓳ. ꓐꓬ ꓡꓰ ꓟ ꓑꓶ ꓓꓴ ꓫ. ꓓꓴ ꓔꓳ, ꓜꓳ ꓔꓬ ꓢꓴ ꓐꓴ ꓐꓰ ꓕꓲ ꓪꓼ ꓔꓬ ꓡꓳ꓾ ꓐꓰ ꓢꓯꓼ ꓖꓶ ꓔ ꓡꓳ꓾ ꓖꓳ ꓟ ꓡꓰ ꓐꓰ ꓖꓳ ꓗꓪ ꓬꓰ ꓙ ꓔꓳ, ꓙ ꓔꓬ ꓢꓴ ꓐꓴ ꓐꓱ ꓶ ꓥ ꓟꓲ ꓪꓽ ꓗꓴ ꓙ ꓖꓶ ꓓꓴ ꓬꓰ ꓡꓯ ꓐꓰ ꓐꓯ ꓔ ꓡꓳ꓿ ꓖꓳ ꓟ ꓡꓰ ꓐꓰ 7 ꓦ ꓟ 26 ꓠꓬꓲ ꓕꓯ ꓬꓰ_ ꓟ 6 ꓧꓪ, ꓕꓲꓽ ꓧꓪ, ꓟ ꓟꓵꓽ ꓗꓳ. ꓓꓵ ꓓꓵ ꓞꓲꓼ ꓟꓳ ꓢꓴ ꓐꓴ ꓑꓮꓲ ꓦꓬꓼ ꓠꓬꓲ ꓔꓯ ꓓꓵꓽ ꓙ ꓡꓰ ꓝꓲ ꓟ ꓥꓳ꓿
ꓝꓣꓮꓠꓚꓰ ꓗꓴꓷꓼ ꓐꓶ ꓓꓵ ꓕꓲ ꓛꓱ ꓐꓰ ꓢꓑꓮꓲꓠ ꓗꓴꓷꓼ ꓔꓲ, ꓫꓵ ꓗꓪ ꓐꓬ ꓡꓰ ꓟ ꓮ ꓔꓳ. ꓑꓶ ꓓꓴ ꓫ. ꓔꓬ ꓢꓴ ꓑ ꓫꓬ ꓐꓴ ꓔꓯ ꓚꓵ. ꓗꓷ ꓠ ꓗꓷ ꓡꓰ ꓟ ꓥꓳ꓿ ꓟꓽ ꓟꓶ ꓫꓵ ꓟ ꓙꓵ, ꓗꓪ ꓞ ꓢꓯꓼ ꓟꓬ_ ꓟ ꓐꓰ ꓟꓲ ꓦꓲꓻ ꓓꓽ ꓟ ꓙꓱꓼ ꓡ ꓟ ꓑꓶ ꓓꓴ ꓟꓵꓽ ꓮ. ꓔꓳ. ꓐꓬ ꓡꓰ ꓓꓴ ꓔꓳ, ꓜꓳ ꓡꓰ ꓟ ꓥꓳ꓿
ꓬꓲ‐ꓢ‐ꓬ 49ꓽ15 “ꓬꓲ ꓪ ꓟꓲ ꓡꓰ ꓥ ꓟꓲ ꓥꓪ ꓠꓬ ꓠꓴ ꓪ ꓔꓯ ꓟꓽ ꓠꓲ ꓡꓰ꓾” ꓐꓰ ꓐꓯ_ ꓟ ꓬꓲ. ꓕꓲ ꓟꓴ ꓗꓪ ꓐꓰ ꓕꓱ ꓕꓲꓽ ꓘꓳꓼ ꓬꓰ_ ꓟ 6 ꓧꓪ, ꓕꓲꓽ ꓧꓪ, ꓟ ꓟꓵꓽ ꓗꓳ. ꓓꓵ ꓓꓵ ꓞꓲꓼ ꓟꓳ ꓢꓴ ꓐꓴ ꓔꓯ ꓘꓴ ꓜꓲꓼ ꓞꓳ ꓗꓪ ꓐꓰ ꓬꓰ ꓖꓶ_ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿ ꓕꓱ ꓞꓲꓼ ꓟꓳ ꓢꓴ ꓐꓴ ꓠꓬ ꓘꓴ ꓜꓲꓼ ꓞꓳ ꓐꓰ ꓣꓳ ꓗꓳ, ꓡꓳ ꓐꓱ ꓶ ꓡꓯꓼ ꓫꓴꓻ ꓓꓽ ꓟ ꓕꓲꓽ ꓟ ꓥ ꓡꓳ꓾ ꓣꓳ ꓕꓲ ꓠꓲ, ꓕꓲ ꓪ ꓪꓴ‐ꓢ ꓠꓯꓼ ꓗꓪ ꓫꓱ. ꓖꓶ ꓓꓴ ꓬꓰ ꓡꓯ ꓐꓰ ꓢꓯꓼ ꓖꓶ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ “ꓒꓵꓽ ꓓꓰ ꓡꓰ ꓟ ꓬꓲ. ꓪ ꓚꓱ, ꓔꓯ ꓞꓳ ꓒꓵꓽ ꓓꓴ ꓬꓰ ꓡꓯ꓾” ꓬꓲ ꓪ ꓠꓬꓲ ꓙ ꓡꓳ. ꓙ ꓟ꓾ ꓬꓰ ꓙ ꓔꓳ, ꓙ ꓓꓴ ꓮ ꓕꓯ ꓟꓲ ꓪ ꓟꓶ ꓠ, ꓟ ꓾ ꓮ ꓙꓵ ꓢꓯꓼ ꓕꓵꓼ ꓓꓴ ꓬꓰ ꓡꓯ ꓐꓰ ꓢꓯꓼ ꓖꓽ ꓗꓷ ꓟ ꓥꓳ꓿
