ꓟꓬꓱꓽ ꓮ ꓟꓬ, ꓗꓪ ꓟꓽ ꓘꓳ, ꓣꓴ ꓢꓴ ꓥ ꓟꓲ ꓟꓲ ꓠꓯ ꓗꓪ ꓞꓳ ꓐꓳ ꓒꓽ ꓒꓬꓱꓼ ꓡ ꓢꓴ ꓚꓱ, (Jack Ma)
ꓟꓬꓱꓽ ꓧꓪ, ꓟ ꓙꓵ, ꓕꓯ ꓠꓴ ꓔꓯ ꓟꓽ ꓘꓳ, ꓣꓴ ꓢꓴ ꓙꓳ ꓗꓷ ꓡ? ꓟꓬꓱꓽ ꓧꓪ, ꓟ ꓗꓪ ꓕꓲ ꓧꓪ, ꓠꓬꓲ ꓧꓪ, ꓮ ꓟꓬ, ꓧꓪ, ꓟꓬꓱꓽ ꓧꓪ, ꓥ ꓟꓲ ꓟꓽ ꓘꓳ, ꓣꓴ ꓠꓬ ꓠꓴ ꓮ ꓡꓲ ꓬꓰ ꓓꓴ ꓙꓳ ꓡ?
ꓧꓪ. ꓧꓪ ꓠꓬꓲ. ꓠꓬꓲ ꓠꓬ ꓟꓬꓱꓽ ꓧꓪ, ꓟ ꓙꓵ, ꓕꓯ ꓟꓬꓱꓽ ꓮ ꓟꓬ, ꓗꓪ ꓐꓰ ꓟꓽ ꓘꓳ, ꓣꓴ ꓢꓴ ꓥ ꓟꓲ ꓟꓲ ꓠꓯ ꓗꓪ ꓞꓳ ꓐꓳ ꓓ ꓒꓬꓱꓼ ꓡ ꓢꓴ ꓧꓶꓽ ꓗꓴꓷꓼ ꓗꓪ ꓡꓳ ꓒ ꓓ ꓙꓮꓚꓗ ꓟꓮ ꓚꓱ, ꓔꓯ ꓐꓯ ꓟ. ꓖꓶ ꓓꓴ ꓥ ꓡꓳ꓿
ꓧꓶꓽ ꓗꓴꓷꓼ ꓗꓪ ꓡꓳ ꓑ ꓒꓽ ꓙꓮꓚꓗ ꓠꓬ ꓒꓴ ꓫꓵ ꓮ ꓟꓬ, ꓛꓲ ꓙꓳ ꓢꓴ ꓟꓲ ꓠꓯ ꓡ ꓞꓳ ꓐꓴ ꓢꓷ. ꓢꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓟꓬꓱꓽ ꓬꓰ ꓔꓴ ꓟ ꓙꓵ, ꓕꓯ ꓠꓲ, ꓫ. ꓟꓬ ꓫ. ꓓꓴ ꓮ ꓟꓬ, ꓛꓲ ꓔꓳ, ꓜꓳ ꓗꓷ ꓟ ꓥ ꓡꓳ꓿
ꓬꓲ ꓠꓬ ꓧꓶꓽ ꓗꓴꓷꓼ ꓗꓪ ꓟꓴ ꓔꓲ ꓢꓳꓻ ꓦꓲꓻ ꓗꓪ ꓓꓵ ꓠ, ꓟ ꓔꓯ ꓮ ꓟꓬ, ꓧꓪ ꓞꓳꓺ ꓡꓰ ꓢꓴ ꓥ ꓡꓳ꓿
ꓝꓮꓲ ꓬꓲ ꓠꓬ ꓧꓶꓽ ꓟꓯꓼ ꓒꓽ ꓬꓰ ꓠ, ꓟ ꓟꓬꓱꓽ ꓗꓪ ꓥ ꓟꓲ ꓬꓲ ꓠꓬ ꓮ ꓘꓶ. ꓛꓲ ꓣꓳ ꓢꓴ ꓐꓴ ꓐꓯ ꓢꓲ ꓬꓲ ꓔꓯ ꓟꓽ ꓘꓳ, ꓣꓴ
ꓝꓮꓲ ꓟꓲ ꓠꓯ ꓗꓪ ꓮ‐ꓤ ꓧꓪꓽ ꓪꓴꓽ ꓙꓵꓽ ꓗꓪ ꓥ ꓟꓲ ꓟꓬꓱꓽ ꓧꓪ, ꓟ ꓙꓵ, ꓕꓯ ꓡ ꓞꓳ (24) ꓧꓪ, ꓗꓷ ꓟ ꓙꓵ, ꓕꓯ ꓬꓲ ꓕꓲ ꓣꓳ ꓔꓯ ꓡꓰ ꓟꓽ ꓘꓳ, ꓣꓴ ꓟ ꓙꓳ ꓗꓷ ꓐꓰ ꓐꓯ ꓟ. ꓖꓶ ꓗꓷ ꓟ ꓥ ꓡꓳ꓿
ꓖꓳ ꓟ ꓡꓰ ꓟꓽ ꓞꓲ ꓬꓲ ꓠꓬ ꓟꓲ ꓠꓯ ꓗꓪ ꓟꓴ ꓔꓲ ꓢꓳꓻ ꓦꓲꓻ ꓗꓪ ꓮ ꓘꓶ. ꓛꓲ ꓟꓬꓱꓺ ꓓꓳꓽ ꓙꓳ ꓟ (ꓧꓮꓣꓦꓰꓢꓔ) ꓢꓳꓻ ꓦꓲꓻ ꓗꓪ ꓥ ꓟꓲ (10) ꓕꓯ ꓢꓲ ꓢꓳꓻ ꓠ, ꓟ ꓢꓯꓼ ꓕꓵꓼ ꓗꓷ ꓥ ꓟꓲ ꓬꓲ ꓔꓯ ꓟꓽ ꓘꓳ, ꓣꓴ ꓐꓰ ꓐꓯ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓬꓲ ꓢꓯꓼ ꓐ ꓟ ꓔꓯ ꓠꓲ, ꓟ ꓟꓽ ꓣꓳ ꓬꓲ ꓠꓬ ꓝꓮꓲ ꓮ ꓟꓬ, ꓢꓯꓼ ꓕꓵꓼ ꓠ ꓔꓯ ꓐꓷ ꓐꓰ ꓢꓯꓼ ꓪ ꓣꓳ ꓢꓲ ꓠꓬꓲ ꓮ ꓟꓬ, ꓛꓲ ꓢꓯꓼ ꓕꓵꓼ ꓗꓷꓳ꓿
ꓙꓮꓚꓗ ꓟꓮ ꓢꓴ ꓙ ꓫꓱ ꓠꓬꓲ ꓚꓱ, ꓒꓳ, ꓡꓶ ꓙꓰˍ ꓟ ꓚꓱ ꓔꓯ ꓡꓳ. ꓠꓬꓲ ꓓꓴ ꓬꓰ ꓡꓯ꓿
1995 ꓘꓳꓼ ꓕꓯ ꓬꓲ ꓠꓬ ꓴꓢꓮ ꓗꓴꓷꓼ ꓗꓪ ꓙꓰ ꓛꓲ ꓕꓯ ꓢꓲ ꓡꓰ ꓲꓠꓔꓰꓣꓠꓰꓔ ꓣꓱ ꓠꓬꓲ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓠꓬ ꓲꓠꓔꓰꓣꓠꓰꓔ ꓘꓴꓽ ꓗꓪ ꓐꓰ ꓶꓻ ꓤ ꓮ ꓟꓬ, ꓪꓴꓽ ꓠ, ꓟ ꓬꓲ ꓓꓴ ꓙ ꓫꓱ ꓠꓬꓲ ꓚꓳ ꓬꓲ ꓪ ꓡꓰ ꓟ ꓥ ꓡꓳ꓿
ꓖꓳ ꓕꓲ ꓙꓵ, ꓗꓪ ꓧꓶꓽ ꓗꓴꓷꓼ ꓗꓪ ꓲꓠꓔꓰꓣꓠꓰꓔ ꓠꓬ ꓮ ꓘꓶ. ꓛꓲ ꓓꓴ ꓙ ꓟꓶ ꓓꓴ ꓕꓲ ꓫꓵꓽ ꓥ ꓡꓳ꓿ ꓧꓶꓽ ꓗꓴꓷꓼ ꓗꓪ ꓡ ꓞꓳ ꓮ ꓟꓬ, ꓟꓽ ꓣꓱ ꓢꓲ ꓟ ꓪꓴ. ꓠꓬꓲ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓠꓬ ꓲꓠꓔꓰꓣꓠꓰꓔ ꓘꓴꓽꓗꓪ ꓐꓰ ꓶꓻ ꓡꓯꓼ ꓬꓰ ꓶꓻ ꓙ ꓪꓴꓽ ꓠ, ꓟ ꓚꓱ, ꓔꓯ ꓬꓲ ꓛꓳ ꓒꓯ, ꓐꓴ ꓔꓯ ꓐꓯ ꓟ. ꓖꓶ ꓗꓷ ꓟ ꓙꓵ, ꓕꓯ ꓬꓲ ꓛꓳꓽ ꓒꓯ, ꓐꓴ ꓠꓬ ꓬꓲ ꓔꓯ ꓞꓳ ꓟꓶ ꓞꓳ ꓖꓳ ꓐꓰ ꓐꓯ ꓗꓷ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓟꓲ ꓙꓮꓚꓗ ꓟꓮ ꓠꓬ ꓕꓱ ꓟ ꓠꓬ ꓶꓻ ꓡꓯ ꓮ ꓘꓶ. ꓛꓲ ꓬꓰ ꓙꓲ ꓟ ꓙꓲ ꓖꓴꓮ ꓟꓬ, ꓛꓲ ꓙꓳ ꓟ ꓐꓰ ꓡꓳ. ꓟꓳ ꓢꓴ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓮꓚꓗꓟꓮ ꓠꓬ (1999) ꓘꓳꓼ ꓕꓯ ꓬꓲ ꓛꓳꓽ ꓒꓯ, (17) ꓣꓳ ꓐꓰ ꓮꓡꓲꓐꓮꓐꓮ ꓟꓬꓱꓺ ꓟ ꓚꓳꓟꓑꓮꓠꓬ ꓔꓯ ꓒꓴ ꓖꓶ ꓢꓲ ꓠꓬꓲ ꓲꓠꓔꓰꓣꓠꓰꓔ ꓗꓪ ꓐꓰ ꓶꓻ ꓙ ꓪꓴꓽ ꓠ, ꓟ ꓢꓯꓼ ꓕꓵꓼ ꓗꓷꓳ꓿
ꓕꓱ ꓡꓰ ꓮꓡꓲꓐꓮꓐꓮ ꓚꓳꓟꓮꓑꓠꓬ ꓠꓬ ꓮ ꓟꓶ ꓟ ꓙꓵ, ꓗꓪ ꓲꓠꓔꓰꓣꓠꓰꓔ ꓘꓴꓽ ꓗꓪ ꓶꓻ ꓤ ꓪꓴꓽ ꓢꓲ ꓠꓬꓲ ꓬꓲ ꓙꓵ, ꓟꓽ ꓟꓶ ꓫꓵˍ ꓟ ꓙꓵ, ꓕꓯ ꓦꓲꓻ ꓘꓴꓽ ꓗꓪ ꓛꓲ ꓡ ꓟ ꓮ ꓘꓶ. ꓙꓲ ꓟ ꓚꓳꓟꓑꓮꓠꓬ ꓕꓲ ꓟ ꓒꓬꓱꓼ ꓔꓬ ꓟ ꓥ ꓡꓳ꓿ ꓕꓲ ꓟꓲ ꓠꓯ ꓡꓱ ꓗꓪ ꓔꓬ ꓟ ꓡ ꓞꓳ ꓐꓴ ꓥ ꓟꓲ ꓮ ꓘꓶ. ꓣꓱ ꓟ ꓑꓧꓳꓠꓰ ꓗꓪ ꓐꓰ ꓢꓽ ꓢꓽ ꓶꓻ ꓙ ꓪꓴꓽ ꓪ ꓓ ꓟ ꓮ ꓘꓶ. ꓛꓲ ꓟꓬꓱꓺ ꓓꓳꓽ ꓙꓳ ꓟ ꓚꓳꓟꓑꓮꓠꓬ ꓓ ꓥ ꓡꓳ꓿
ꓠꓬꓲ. ꓠꓬꓲ ꓞꓳ ꓡꓱ ꓐꓴ ꓔꓯ ꓙꓮꓚꓗ ꓟꓮ ꓚꓺ ꓟꓲꓽ ꓗꓪ ꓐꓰ ꓟ. ꓖꓶ ꓡ ꓟ ꓠꓬ ꓟꓬꓱꓽ ꓧꓪ ꓟ ꓙꓵ, ꓕꓯ ꓟꓽ ꓘꓳ, ꓣꓴ ꓢꓴ ꓠꓬ ꓠꓴ ꓕꓲ ꓣꓳ ꓡꓰ ꓟꓽ ꓥ ꓐꓰ ꓝꓮꓲ ꓮ ꓘꓶ. ꓛꓲ ꓙꓲ ꓟ ꓙ ꓖꓴ ꓠꓬ ꓠꓴ ꓔꓯ ꓡꓳ. ꓔꓬ ꓟ ꓚꓱ, ꓔꓯ ꓟꓽ ꓠꓽ ꓠꓽ ꓡꓰ ꓢꓯꓼ ꓕꓵꓼ ꓠ,ꓟ ꓣꓳ ꓚꓵˍ ꓟ ꓥ ꓡꓳ꓿
ꓝꓮꓲ ꓓꓴ ꓙ ꓫꓪ ꓠꓬꓲ ꓚꓱ, ꓗꓪ ꓥ ꓟꓲ ꓠꓱꓼ ꓐꓯꓼ ꓢꓴ ꓟꓽ ꓓꓴ ꓙ ꓔ ꓟ ꓚꓱ, ꓗꓪ ꓐꓰ ꓛꓲ ꓡ ꓟ ꓙꓵ, ꓕꓯ ꓙꓲ ꓟ ꓟꓬꓱꓽ ꓬꓰ ꓐ ꓡ ꓢꓴ ꓒꓬꓱꓼ ꓠ, ꓟ ꓙ ꓖꓶ ꓠ, ꓟ
ꓮ ꓕꓯ ꓥ ꓟꓲ ꓮ ꓡꓲ ꓫꓵꓽ ꓫꓵꓽ ꓪꓴꓽ ꓙꓳ ꓥ ꓟꓲ ꓠꓲ, ꓟ ꓟꓽ ꓐꓬ ꓡꓰ ꓢꓯꓼ ꓕꓵꓼ ꓠ, ꓟ ꓐꓯ ꓟ. ꓖꓶ ꓔ ꓟ ꓥ ꓡꓳ꓿
ꓣꓳ ꓤꓶꓻ ꓗꓪ ꓮ ꓘꓶ. ꓫ. ꓔ ꓟ ꓙꓵ, ꓠꓬꓲ ꓟꓳ ꓓꓴ ꓟꓽ ꓟꓳ ꓠ, ꓟ ꓫ. ꓓꓴ ꓔꓳ, ꓜꓳ ꓟ ꓙꓵ, ꓕꓯ ꓠꓲ, ꓟ ꓟꓽ ꓐꓬ ꓡꓰ ꓝꓮꓲ ꓮ ꓘꓶ. ꓛꓲ ꓢꓯꓼ ꓕꓵꓼ ꓠ, ꓟ ꓙꓮꓚꓗ ꓟꓮ ꓡꓰ ꓢꓯꓼ ꓖꓶ ꓔꓬ ꓟ ꓥ ꓡꓡ꓿
ꓫ ꓓꓴ ꓟꓷ ꓓꓴ ꓔꓳ, ꓜꓳ ꓡ ꓥ ꓟꓲ ꓠꓲ, ꓟ ꓟꓽ ꓐꓬ ꓡꓰ ꓣꓳ ꓓꓴ ꓙ ꓙꓲ ꓟ ꓚꓱ, ꓗꓪ ꓟꓽ ꓠꓽ ꓠꓽ ꓢꓯꓼ ꓕꓵꓼ ꓠ, ꓟ ꓥ ꓡꓳ꓿ ꓕꓱ ꓡꓱ ꓐꓰ ꓣꓳ ꓓꓴ ꓙ ꓔ ꓟ ꓔꓶꓻ ꓙꓱ ꓗꓪ ꓟꓽ ꓛꓲ ꓕ ꓐꓳ ꓮ ꓘꓶ. ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
