ꓟ ꓐꓰ ꓞꓳ ꓫꓸ ꓐꓴ ꓢꓯꓼ ꓔꓯ ꓠ ꓠꓹ ꓖꓶ ꓠꓹ ꓟ (Laudatosi)
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓗꓪ ꓐꓰ ꓞꓳ ꓫ. ꓐꓴ ꓢꓯꓼ ꓔꓯ ꓠ ꓠ, ꓖꓶ ꓢꓲ ꓠꓬꓲ ꓟꓲ ꓠꓯ ꓠꓬ ꓥꓴ ꓔꓬ ꓟ ꓢꓯꓼ ꓔꓯ ꓥ ꓟꓲ ꓠ ꓡꓳ. ꓖꓶ ꓠ, ꓟ ꓚꓱ, ꓗꓪ ꓐꓰ ꓐꓯ ꓟ. ꓖꓶ ꓓꓴ ꓥ ꓡꓳ꓿
ꓠꓲ, ꓠꓵ ꓟ ꓬꓲ ꓤ ꓠꓬꓲ ꓤ ꓐꓴꓽꓳ ꓮ ꓟꓶ ꓟ ꓙꓵ, ꓗꓪ ꓣꓳ ꓟꓬ‐ꓟ ꓗꓴꓷꓼ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓬꓲ ꓔꓶ. ꓮ ꓟꓬ, ꓗꓪ ꓬꓲꓻ ꓙꓬ ꓙꓵꓽ ꓔꓬ ꓟ ꓔꓯ ꓣꓳ ꓐꓴ ꓡꓳ. ꓟꓳ ꓟ ꓥ ꓡꓳ꓿ ꓝꓮꓲ ꓣꓳ ꓔꓬ ꓟ ꓟꓲ ꓠꓯ ꓥ ꓟꓲ ꓕꓲ ꓠꓬꓲ ꓕꓯ ꓢꓲ ꓕꓲ ꓠꓬꓲ ꓮ ꓘꓶ. ꓛꓲ ꓞ ꓡ ꓟ ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿
ꓕꓱ ꓡꓱ ꓗꓷ ꓡꓰ ꓟ ꓪꓴ. ꓠꓬ ꓟꓲ ꓠꓯ ꓡ ꓞꓳ ꓐꓴ ꓡꓰ ꓟꓽ ꓞꓲ ꓟꓲ ꓠꓯ ꓢꓯ. ꓔꓬ ꓟ ꓢꓯ. ꓫꓵꓽ ꓢꓯ. ꓙꓰ ꓮ ꓙꓵꓽ ꓥ ꓟꓲ ꓮ ꓘꓶ. ꓛꓲ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓔꓬ ꓡꓳ ꓐꓰ ꓑꓳꓑꓰ ꓝꓣꓮꓠꓚꓲꓢ ꓡꓰ ꓡꓮꓴꓓꓮꓔꓳꓢꓲ ꓐꓰ ꓐꓯ ꓟ ꓟꓵꓽ ꓘꓳꓼ ꓒꓳ, ꓡ ꓟ ꓕꓳ ꓶ ꓑꓷꓠ ꓗꓪ ꓐꓯ ꓖꓶ ꓔ ꓿
ꓑꓳꓑꓰ ꓝꓣꓮꓠꓚꓲꓢ ꓡꓰ ꓐꓯ ꓖꓶ ꓔ ꓟ ꓫ. ꓕꓱ ꓘꓶꓽ ꓠꓬ ꓣꓳ ꓔꓬ ꓟ ꓟꓲ ꓠꓯ ꓦꓲꓻ ꓓꓽ ꓠꓬ ꓥꓴ ꓔꓬ ꓡꓳ꓾ ꓝꓮꓲ ꓞꓳ ꓫ. ꓐꓴ ꓥꓴ ꓔꓬ ꓟ ꓢꓯꓼ ꓔꓯ ꓥ ꓟꓲ ꓠ ꓠ, ꓖꓶ ꓠ, ꓟ ꓐꓯ ꓟ. ꓖꓶ ꓔ ꓟ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓟ ꓑꓶ.ꓓꓴ ꓮ ꓘꓶ. ꓛꓲ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓢꓴ ꓐꓴ ꓠꓬ ꓞꓳ ꓫ. ꓐꓴ ꓥ ꓟꓲ ꓬꓲꓻ ꓙꓬ ꓙꓵꓽ ꓡ ꓠꓬ ꓔꓬ ꓔꓶ. ꓟꓽ ꓙꓳ꓾ ꓜ ꓓꓴ ꓓꓳ ꓓꓴ ꓟꓽ ꓙꓳ ꓮ ꓘꓶ. ꓛꓲ ꓫ. ꓔꓬ ꓢꓴ ꓐꓴ ꓥ ꓡꓳ꓿
ꓟꓲ ꓠꓯ ꓠꓬ ꓞꓳ ꓫ. ꓐꓴ ꓐꓰ ꓮ ꓡꓲ ꓐꓰ ꓙ ꓡꓯꓽ ꓘꓳ, ꓔꓬ ꓡꓳ ꓐꓯ ꓟ. ꓚꓱ, ꓔꓯ ꓣꓳ ꓐꓴ ꓡꓳ. ꓠꓬꓲ ꓓꓴ ꓬꓰ ꓡꓯ꓿ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓐꓬ ꓡꓰ ꓟ ꓠꓬ ꓞꓳ ꓫ. ꓐꓴ ꓐꓰ ꓮ ꓫꓵꓽ ꓗꓳ ꓙꓰ ꓙꓳ ꓡ? ꓐꓰ ꓐꓯ ꓢꓴ ꓟꓲ ꓙꓳ ꓟ ꓥꓡꓳ꓿
ꓚꓵ ꓚꓵ ꓐꓯ ꓠꓬ ꓟꓲ ꓠꓯ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫ. ꓓꓴ ꓟꓷ ꓓꓴ ꓮ ꓘꓶ. ꓔꓳ, ꓜꓳ ꓔꓬ ꓢꓴ ꓐꓴ ꓠꓬ ꓞꓳ ꓫ. ꓐꓴ ꓥ ꓡꓳ꓿
ꓬꓲ ꓪ ꓠꓬ ꓟꓵ ꓘꓳꓼ ꓒꓳ,ꓡ ꓟ ꓑꓶ. ꓓꓴ ꓬꓲꓻ ꓙꓬ ꓙꓵꓽ꓾ ꓟꓵꓽ ꓡꓶꓽ꓾ ꓟꓵꓽ ꓙꓴꓽ ꓙꓵ꓾ ꓕꓱ ꓡꓰ ꓫꓵꓽ ꓔꓳ, ꓜꓳ ꓡ ꓔꓯ ꓗꓽ ꓕꓽ ꓠ, ꓟ ꓒꓴ ꓫꓵꓽ ꓙꓳ ꓟ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓫ. ꓓꓴ ꓔꓯ ꓮ ꓟꓬ, ꓛꓲ ꓔꓳ, ꓜꓳ ꓡꓰ ꓢꓴ ꓐꓴ ꓥ ꓡꓳ꓿
ꓔꓯꓺ ꓥꓳꓽ ꓐꓯ ꓠꓬ ꓬꓲꓻ ꓙꓬ ꓙꓵꓽ ꓢꓲ ꓫ. ꓓꓴ ꓔꓳ, ꓜꓳ ꓔꓬ ꓕꓯ ꓒꓴ ꓙꓳ ꓢꓴ ꓐꓴ ꓔꓯ ꓫ. ꓓꓴ ꓓꓳ ꓓꓴ ꓪꓴꓽ ꓜ ꓓꓴ ꓙꓳ ꓡꓳ꓿ ꓖꓳ ꓡꓱ ꓥ ꓟꓲ ꓞꓳ ꓫ. ꓐꓴ ꓠꓬ ꓜ ꓓꓴ ꓓꓳ ꓓꓴ ꓮ ꓘꓶ. ꓛꓲ ꓫ. ꓔꓬ ꓟ ꓥ ꓡꓳ꓿ ꓔꓬ ꓔꓶ. ꓫ. ꓫ ꓓꓴ ꓟꓷ ꓓꓴ ꓔꓳ,ꓜꓳ ꓟ ꓠꓬ ꓮ ꓟꓬ, ꓛꓲ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫ. ꓓꓴ ꓔꓳ, ꓜꓳ ꓟ ꓠꓬ ꓞꓳ ꓐꓳ ꓞꓳ ꓫ. ꓐꓴ ꓠꓯ, ꓗꓪ ꓔꓳ, ꓜꓳ ꓟ ꓠꓬ ꓮ ꓘꓶ. ꓛꓲ ꓟꓽ ꓪ ꓡꓯꓽ ꓘꓳ, ꓟ ꓥ ꓡꓳ꓿
ꓜ ꓔꓶ ꓜ ꓔꓶ ꓓꓳ ꓢꓴ ꓐꓴ ꓥ ꓟꓲ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓮ ꓫꓵꓽ ꓥ ꓟꓲ ꓔꓶ ꓜ ꓟꓽ ꓙꓲ ꓗꓷ ꓡꓰ ꓟ ꓥ ꓡꓳ꓿ ꓖꓳ ꓡꓱ ꓒꓬꓱꓼ ꓡ ꓠꓬ ꓞꓳ ꓫ. ꓐꓴ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓫ. ꓔ ꓟ ꓕꓯ ꓢꓲ ꓫ. ꓡ ꓟ ꓥ ꓡꓳ꓿
ꓡꓮꓴꓓꓮꓔꓳ ꓢꓲ ꓕꓳ ꓶ ꓗꓪ ꓐꓰ ꓣꓳ ꓔꓯ ꓮ ꓡꓲ ꓐꓰ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓟꓬꓱꓽ ꓢꓯꓼ ꓕꓵꓼ ꓠ, ꓟ ꓐꓯ ꓖꓶ ꓔ ꓥ ꓐꓯ ꓠꓬ ꓣꓳ ꓔꓬ ꓟ ꓟꓲ ꓠꓯ ꓦꓲꓻ ꓓꓽ ꓠꓬ ꓣꓳ ꓐꓴ ꓮ ꓙꓵꓽ ꓢꓴ ꓖꓪ ꓫꓵꓽ ꓟ ꓙꓵꓽ ꓟ ꓦꓲꓻ ꓓꓽ ꓥ ꓡꓳ꓿ ꓫꓵ ꓮ ꓟꓬ, ꓚꓴ, ꓟ꓾ ꓢꓲ, ꓜꓲ ꓘꓶ ꓢꓲ ꓠꓬꓲ ꓝꓮꓲ ꓟꓽ ꓔꓶ. ꓖꓶ ꓟ꓾
ꓖꓳ ꓡꓱ ꓥ ꓟꓲ ꓮ ꓟꓶ ꓟ ꓙꓵ, ꓗꓪ ꓣꓳ ꓐꓴ ꓟꓲ ꓠꓯ ꓔꓯ ꓠꓽ ꓡꓰ ꓝꓲ ꓟ ꓫ. ꓓꓴ ꓔꓳ, ꓜꓳ ꓡꓰ ꓝꓲ ꓟ ꓠꓬ ꓑꓡꓮꓢꓔꓲꓚ ꓮ ꓟꓬ, ꓣꓱ ꓟ꓾ ꓬꓲꓻ ꓙꓬ ꓔꓯ ꓮ ꓔꓳ ꓗꓷ ꓡꓰ ꓝꓲˍ ꓟ꓾ ꓫ. ꓓꓴ ꓓꓳ ꓓꓴ ꓔꓯ ꓮ ꓔꓳ ꓡꓳ ꓗꓷ ꓟ꓾ ꓕꓲ ꓧꓪ, ꓣꓱ ꓫꓵꓽ ꓣꓱ ꓙꓵꓽ ꓔꓯ ꓮ ꓟꓬ, ꓣꓱ ꓟ ꓕꓱ ꓡꓰ ꓫꓵꓽ ꓐꓴ ꓠꓬ ꓟꓲ ꓠꓯ ꓔꓯ ꓠꓻ ꓒꓬ ꓓꓴ ꓔꓳ, ꓜꓳ ꓡꓰ ꓝꓲ ꓟ ꓡꓰ ꓟꓽ ꓞꓲ ꓜ ꓓꓴ ꓓꓳ ꓓꓴ ꓟꓽ ꓙꓳ ꓢꓴ ꓐꓴ ꓞꓳ ꓫ. ꓐꓴ ꓔꓯ ꓫ. ꓔ ꓟ ꓕꓯ ꓢꓲ ꓫ. ꓡꓰ ꓝꓲ ꓟ ꓒꓬꓱꓼ ꓡ ꓝꓲ ꓟ ꓥ ꓡꓳ꓿
ꓖꓳ ꓡꓱ ꓠꓬ ꓣꓳ ꓞꓳ ꓡꓱ ꓞꓳ ꓡꓯ. ꓐꓴ ꓮ ꓡꓲ ꓐꓰ ꓬꓰ ꓠꓯ, ꓡ ꓐꓯ ꓠꓬ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓚꓱ, ꓗꓪ ꓣꓳ ꓪ ꓠꓲ, ꓫꓵˍ ꓟ ꓐꓰ ꓣꓱ ꓬꓯꓼ ꓟ ꓢꓲ, ꓖꓴ ꓠ, ꓟ꓾
ꓕꓲ ꓧꓪ, ꓣꓱ ꓑꓡꓮꓢꓔꓲꓚ ꓔꓯ ꓤ ꓟꓳ ꓠ, ꓟ꓾ ꓢꓲ, ꓜꓲ ꓔꓯ ꓮ ꓟꓬ, ꓔꓶ ꓠ, ꓟ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓔꓯ ꓒꓬꓱꓼ ꓡ ꓝꓲ ꓟ ꓚꓱ, ꓔꓯ ꓢꓳꓚꓮꓲꓡ ꓟꓰꓓꓲꓮ ꓗꓪ ꓐꓰ ꓛꓳ ꓒꓯ, ꓐꓴ ꓔꓯ ꓥ ꓟꓲ ꓟ. ꓖꓶ ꓓꓴ ꓬꓰ ꓡꓯ꓿ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓔꓯ ꓒꓬꓱꓼ ꓡ ꓝꓲ ꓟ ꓚꓱ, ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
