ꓬꓲꓼ ꓤ ꓠꓬꓲ ꓤ ꓐꓴꓳ ꓕꓱ ꓕꓲ ꓠꓽ ꓗꓪ ꓠꓬ ꓣꓳ ꓒꓵꓽ ꓶ ꓚꓵ ꓐꓯˍ ꓟ ꓬꓲ ꓕꓲꓽ ꓟꓴꓽ ꓗꓪ ꓐꓰ ꓦ ꓢꓯꓼ ꓪ ꓣꓴ ꓓꓴ ꓬꓰ ꓡꓯ꓿ ꓢ. ꓠꓯ (17)ꓠꓽ ꓠꓽ ꓦꓬꓼ ꓠꓬꓲ ꓗꓪ ꓣꓳ ꓵ ꓠ ꓔˍ ꓟ ꓢꓲꓽ ꓫꓬ ꓕꓳꓽ ꓶ ꓠꓬ (ꓟ‐ꓕꓲ꓿ 13ꓽ44‐52) ꓥ ꓡꓳ꓿ ꓢꓲꓽ ꓫꓬ ꓕꓳꓽ ꓶ 3 ꓝꓲ. ꓔꓯ ꓧꓶ. ꓕꓯ ꓵ ꓟ. ꓖꓶˍ ꓥꓳ꓿
ꓟꓴ ꓗꓪ ꓗꓴꓷꓼ ꓠꓬ꓾ ꓦ ꓟꓲ ꓕꓲ ꓡꓯꓼ ꓗꓪ ꓚꓵ ꓞ, ꓟ ꓒꓵꓽ ꓶˍ ꓡꓰ ꓐꓰ ꓗ, ꓡꓳ꓿ ꓡ ꓞꓳ ꓕꓲ ꓣꓳ ꓡꓰ ꓒꓵꓽ ꓶꓽ ꓖꓳ ꓟ ꓧꓪ ꓟꓳꓻ ꓗꓷ ꓠꓬ ꓚꓵ ꓗꓷ ꓢꓲ꓾ ꓗ, ꓛꓲ ꓠꓬꓲ ꓬꓲꓼ ꓙꓰ ꓢꓲ ꓬꓲ ꓙꓳˍ ꓟ ꓮ ꓙꓵꓽ ꓪꓴꓽ ꓗꓷ ꓢꓲ ꓠꓬꓲ꓾ ꓦ ꓟꓲ ꓖꓳ ꓕꓲ ꓡꓯꓼ ꓟ ꓪꓴꓻˍ ꓡꓳ꓿ ꓝꓮꓲ ꓟꓴ ꓗꓪ ꓗꓴꓷꓼ ꓠꓬ꓾ ꓙꓲꓻˍ ꓟ ꓡꓳ ꓒꓴ ꓡ. ꓢꓶꓽ ꓧꓪˍ ꓟ ꓶ ꓡꓯꓼ ꓟꓴ ꓢꓴ ꓕꓲ ꓣꓳˍ ꓡꓰ ꓐꓰ ꓗ, ꓡꓳ꓿ ꓮ ꓘꓶ. ꓒꓵꓽˍ ꓟ ꓡꓳ ꓒꓴ ꓡꓴ. ꓢꓶꓽ ꓕꓲ ꓢꓶꓽ ꓧꓪ ꓟꓳꓻ ꓗꓷ ꓠꓬ꓾ ꓬꓲ ꓙꓳˍ ꓟ ꓮ ꓙꓵꓽ ꓪꓴꓽ ꓗꓷ ꓢꓲ ꓡꓳ ꓒꓴ ꓡꓴ. ꓢꓶꓽ ꓖꓳ ꓕꓲ ꓢꓶꓽ ꓟ ꓪꓴꓻˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓒꓵꓽ ꓶ ꓔꓯ ꓧꓪ ꓟꓶˍ ꓟ ꓔꓯꓺ ꓥꓳꓽ ꓠꓬꓲꓽ ꓟ ꓣꓳ ꓑ ꓙꓽ ꓗꓷꓳ꓿ ꓮ ꓠꓱ ꓕꓯ ꓦꓬꓼ ꓠꓬꓲ ꓗꓪ ꓠꓬ ꓣꓳ ꓮ ꓘꓶ. ꓒꓵꓽˍ ꓟ ꓒꓴ ꓤ ꓫꓵ ꓤ꓾ ꓒꓴ ꓘꓴ. ꓫꓵ ꓘꓴ. ꓔꓯ ꓠꓬ ꓦꓲ ꓗꓪ ꓟꓽ ꓫ ꓫ ꓐꓰ ꓟꓲ ꓠꓯ ꓬꓲ ꓘꓶꓽ ꓗꓪ ꓚꓴ. ꓢꓲ ꓠꓬꓲ ꓚꓵˍ ꓟ ꓬꓲ ꓡꓲꓽ ꓙꓳˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓮ ꓟꓶ ꓟ ꓦꓬꓼ ꓠꓬꓲ ꓡꓰ ꓟꓽ ꓥ ꓟ ꓑꓶ. ꓓꓴ ꓞꓳ ꓘꓴꓽ ꓟꓬꓽˍ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲ ꓟꓯꓼ ꓓꓶꓽ ꓡꓯ ꓘꓳ ꓢꓰꓼ ꓡꓯ ꓘꓳ ꓟ ꓑꓶ. ꓓꓴ ꓦꓲ ꓐꓯˍ ꓟ ꓠꓬ ꓒꓴ ꓫꓵ ꓫ ꓙꓲˍ ꓟ ꓟꓽ ꓥ꓿ ꓚꓲ. ꓛꓬ ꓐꓱ ꓘꓴꓽ ꓗꓪ ꓚꓵˍ ꓟ ꓔꓯ ꓡꓰꓽ ꓬꓰ ꓔꓬ ꓡꓳ꓿
ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓔꓯ ꓥꓳꓽ ꓗꓪ ꓡ ꓞꓳ ꓕꓲ ꓣꓳ ꓠꓬ ꓐꓱ ꓡꓯꓼ ꓗꓪ ꓢꓴ ꓡꓰ ꓚꓵ ꓔ ꓟ ꓒꓵꓽ ꓶ ꓔꓯ ꓟꓳˍ ꓡꓳ꓿ ꓔꓳ, ꓜꓳꓽˍ ꓡꓳ꓾ ꓐꓰ ꓐꓳ ꓔ ꓡꓳ꓿ ꓖꓳ ꓟ ꓔꓯ ꓟꓳˍ ꓔꓯ ꓬꓲ ꓠꓬ ꓚꓵ ꓗꓷ ꓢꓲ ꓠꓬꓲ ꓬꓲ ꓔꓯ ꓙꓳˍ ꓟ ꓮ ꓙꓵꓽ ꓔꓯ ꓬꓲ ꓪꓴꓽ ꓗꓷ ꓢꓲ ꓟꓲ ꓠꓯ ꓖꓳ ꓕꓲ ꓡꓯꓼ ꓟ ꓔꓯ ꓪꓴꓻˍ ꓡꓳ꓾ ꓐꓰ ꓐꓯ ꓔ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓬꓲ ꓠꓬ ꓚꓵ ꓚꓵ ꓒꓵꓽˍ ꓟ ꓒꓵꓽ ꓶ ꓔꓯ ꓬꓲ ꓟꓳꓻ ꓡꓰꓳ꓿ ꓖꓳ ꓟꓲ ꓠꓯ ꓕꓲ ꓡꓯꓼ ꓟ ꓘꓴꓽ ꓗꓪ ꓙꓳˍ ꓟ ꓒꓵꓽ ꓶ ꓠꓬ ꓬꓲ ꓔꓯ ꓙꓳˍ ꓟ ꓮ ꓙꓵꓽ ꓕꓯꓽ ꓢꓲ ꓮ ꓟꓬ, ꓒꓵꓽˍ ꓟ ꓑꓶ. ꓓꓴ ꓬꓲ ꓔꓯ ꓙꓳˍ ꓟ ꓮ ꓙꓵꓽ ꓔꓯ ꓬꓲ ꓪꓴꓽ ꓗꓷˍ ꓡꓳ꓿ ꓮ ꓫꓵꓽ ꓥ ꓟꓲ ꓬꓲ ꓔꓯ ꓙꓳˍ ꓟ ꓥ ꓕ ꓑꓳꓸꓼ ꓟ ꓖꓶ ꓗꓷ ꓐ ꓡˍ ꓗꓪ ꓛꓲ ꓟꓲ ꓠꓯ ꓖꓳ ꓕꓲ ꓡꓯꓼ ꓟ ꓖꓳ ꓡꓰ ꓒꓵꓽˍ ꓟ ꓥ ꓡꓳ꓿ ꓮ ꓫꓵꓽ ꓔꓯ ꓥ ꓟꓲ ꓬꓲ ꓠꓬ ꓖꓶ ꓐ ꓡˍ ꓡꓳ꓿
