ꓟꓴ ꓗꓪ ꓗꓪ ꓔꓬ ꓟ ꓐ, ꓐ ꓬꓲ ꓠꓲ, ꓡꓶꓽ ꓛꓳ ꓢꓴˍ ꓡꓰꓽ ꓬꓲ ꓠꓬꓲ ꓤ꓾ ꓬꓲ ꓠꓬꓲ ꓟ ꓐꓰ ꓬꓲ ꓟ, ꓟ ꓥ ꓡꓳ꓾ ꓐꓰ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓟ‐ꓕꓲ 12ꓽ46‐50 ꓥ ꓡꓳ꓿
ꓪꓴ‐ꓢ ꓠꓲ, ꓡꓶ ꓔꓯ ꓛꓳ ꓢꓴ ꓐꓯˍ ꓟ ꓠꓬ꓾ ꓪꓴ‐ꓢ ꓔꓯ ꓠ ꓡꓳ.ˍ ꓟ ꓥ ꓡꓳ꓾ ꓐꓯ ꓟ ꓔꓯ ꓢꓷ. ꓔ ꓠ ꓗ, ꓡꓳ꓿ ꓖꓳ ꓟˍ ꓡꓰ ꓐꓰ ꓪꓴ‐ꓢ ꓔꓯ ꓠ ꓡꓳˍ ꓟ ꓗꓪ ꓐꓰ ꓡꓰꓽ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓠꓬ ꓙꓵꓻ ꓠꓲ, ꓠꓯꓸꓼ ꓗꓪ ꓪꓴꓽ ꓡ ꓟꓴ ꓡˍ ꓟ ꓥꓳ꓿ ꓖꓳ ꓟ ꓑꓶ. ꓓꓴ ꓪꓴ‐ꓢ ꓬꓲ ꓕꓲ ꓦꓲ ꓢꓴ ꓒꓬꓱꓼ ꓡꓰ ꓠ, ꓟ ꓠꓬ ꓬꓲ ꓫꓵꓽ ꓬꓲ ꓧꓪ ꓜꓳꓽˍ ꓟ ꓑꓶ. ꓓꓴ ꓟꓽ ꓥ ꓥ ꓐꓰ ꓪꓴ‐ꓢ ꓬꓲ ꓠꓲ, ꓡꓶ ꓔꓯ ꓠ ꓡꓳ. ꓛꓳ ꓫꓱꓽˍ ꓟ ꓗꓪ ꓐꓰ ꓡꓰꓽ ꓒꓬꓱꓼ ꓡˍ ꓟ ꓥ ꓡꓳ꓾ ꓐꓯˍ ꓟ ꓔꓯ ꓣꓳ ꓢꓷ. ꓠ ꓗ, ꓡꓳ꓿ ꓖꓳ ꓟ ꓑꓶ. ꓓꓴ ꓣꓳ ꓠꓬ ꓟꓷꓽ ꓠꓷ, ꓘꓶꓽ ꓗꓪ ꓐꓰ ꓣꓳ ꓙꓵꓻ ꓠꓲ, ꓔꓯ ꓣꓷꓠ.ˍ ꓟ ꓗꓪ ꓐꓰ ꓡꓰꓽ ꓟꓽ ꓥ ꓥ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟ ꓣꓳ ꓤꓶ ꓠꓯꓸꓼ ꓗꓪ ꓪꓴ‐ꓢ ꓐꓯ ꓘꓶꓽ ꓙꓳˍ ꓟ ꓡꓰ ꓛꓳ ꓫꓱꓽ ꓠ, ꓟ ꓮ ꓕꓯ ꓟꓲ ꓢꓯꓼ ꓕꓵꓼ ꓠ ꓗ, ꓡꓳ꓿
ꓖꓳ ꓟ ꓡꓰꓽ ꓟꓽ ꓞꓲ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓡꓰ ꓣꓳ ꓔꓯ ꓚꓲ. ꓛꓬ ꓚꓳꓽ ꓚꓲ. ꓛꓬ ꓔꓱ, ꓕ ꓠꓬꓲ ꓠ, ꓟ ꓘꓴ ꓔꓬ ꓡꓳ꓿ ꓣꓳ ꓓꓵꓽ ꓙꓽˍ ꓟ꓾ ꓣꓳ ꓫ. ꓕꓱˍ ꓟ ꓐꓰ ꓣꓳ ꓛꓳ ꓫꓱꓽ ꓣꓱꓽ ꓬꓰ ꓔꓬ ꓟ ꓠꓬ ꓪꓴ‐ꓢ ꓠꓲ, ꓡꓶ ꓠꓯꓸꓼ ꓗꓪ ꓣꓱꓽ ꓬꓰ ꓔꓬ ꓡ꓾ ꓟꓽ ꓥ ꓠꓬ ꓚꓲ. ꓛꓬ ꓠꓲ, ꓡꓶ ꓗꓪ ꓡꓰꓽ ꓛꓳ ꓫꓱꓽ ꓔꓬ ꓡ ꓐꓯˍ ꓟ ꓔꓯ ꓔꓱ, ꓕ ꓠꓬꓲ ꓠ ꓗ, ꓡꓳ꓾ ꓚꓬ, ꓠꓬꓲ ꓟ ꓗ, ꓡꓳ꓿
ꓪꓴ‐ꓢ ꓠꓲ, ꓡꓶ ꓔꓯ ꓬꓲ ꓪꓴ. ꓗꓶ ꓔˍ ꓢꓲ ꓞꓳ ꓙꓳ ꓢꓯ. ꓔꓬ ꓢꓴ ꓠꓬ ꓪꓴ‐ꓢ ꓬꓲ ꓕꓲ ꓦꓲ ꓢꓴ ꓡꓰ ꓐꓰ ꓞꓳ ꓙꓳ ꓔꓬ ꓪˍ ꓟ ꓠꓲ, ꓒꓴ ꓗ, ꓛꓲ ꓓꓴ ꓐꓰ ꓶꓼ ꓤ ꓫꓱ, ꓤ ꓔꓯ ꓘꓳ ꓣꓴ ꓪˍ ꓥ ꓡꓳ꓾ ꓐꓰ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓢꓯꓼ ꓪ ꓖꓶ ꓡ ꓔꓬ ꓡꓳ꓿
