ꓟꓲ ꓠꓯ ꓔꓯ ꓙꓲ ꓟ ꓚꓱ, ꓗꓪ ꓒꓳ, ꓡꓶ ꓠ, ꓟ ꓢꓯꓼ ꓕꓵꓼ ꓢꓴ ꓞꓳ ꓡꓱ ꓤ Greta Thungberg ꓚꓺ ꓟꓲꓽ (Greta Thunberg)
ꓧꓪ. ꓧꓪ ꓠꓬꓲ. ꓠꓬꓲ ꓟꓬꓱꓺ ꓓꓳꓽ ꓙꓳ ꓢꓴ ꓐꓴ ꓚꓺ ꓟꓬꓱꓽ ꓚꓱ, ꓗꓪ ꓐꓰ 2019 ꓘꓳꓼ ꓗꓪ ꓟꓵꓽ ꓘꓳꓼ ꓒꓳ, ꓡ ꓟ ꓗꓽ ꓕꓽ ꓠ, ꓟ ꓟꓬꓱ ꓗꓷ ꓟ ꓪꓴ. ꓠꓬꓲ ꓡꓯ ꓫꓴ ꓓꓽ ꓪ ꓢꓴ ꓖꓣꓰꓔꓮ ꓚꓱ, ꓥ ꓡꓳ꓿
ꓖꓣꓰꓔꓮ ꓠꓬ ꓢꓪꓰꓰꓓꓰꓰ ꓗꓴꓷꓼ ꓗꓪ ꓔꓬ ꓢꓲ ꓠꓬꓲ ꓟꓲ ꓠꓯ ꓢꓷ. ꓠꓲ, ꓢꓳꓻ ꓣꓴ ꓔꓬ ꓢꓳꓻ ꓤ ꓙꓳ ꓟ ꓕꓲ ꓣꓳ ꓥ ꓡꓳ꓿ 1990 ꓘꓳꓼ ꓛꓲ ꓡ ꓟ ꓙꓵ, ꓕꓯ ꓟꓲ ꓠꓯ ꓡ ꓞꓳ ꓮ ꓟꓬ, ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓡ ꓚꓱ, ꓮ ꓟꓬ, ꓔꓯ ꓢꓷ. ꓡꓰ ꓟ ꓥ ꓡꓳ꓿
ꓝꓮꓲ 2000 ꓘꓳꓼ ꓛꓲ ꓡ ꓟ ꓙꓵ, ꓕꓯ ꓟꓵꓽ ꓘꓳꓼ ꓒꓳ, ꓡ ꓚꓱ, ꓔꓯ ꓗꓽ ꓕꓽ ꓠ, ꓟ ꓐꓱ ꓶ ꓡ ꓞꓳ ꓕꓲ ꓣꓳ ꓡꓰ ꓟꓽ ꓞꓲ ꓡ ꓞꓳ ꓮ ꓟꓬ, ꓐꓴ ꓠꓬ ꓟꓬꓱꓽ ꓬꓰ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓮ ꓡꓲ ꓐꓰ ꓗꓽ ꓕꓽ ꓠ, ꓟ ꓟꓶ ꓬꓰ ꓠ, ꓟ ꓤ ꓟꓳ ꓠ, ꓟ ꓟꓬꓱꓽ ꓬꓰ ꓢꓴ ꓐꓴ ꓠꓬ ꓮ ꓘꓶ. ꓟꓽ ꓙꓳ ꓢꓰ꓿
ꓕꓱ ꓟ ꓔꓯ ꓢꓷ. ꓔ ꓟ ꓞꓳ ꓡꓱ ꓤ ꓖꓣꓰꓔꓮ ꓠꓬ ꓕꓱ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓔꓯ ꓗꓽ ꓕꓽ ꓠ, ꓟ ꓐꓱ ꓶ ꓬꓲ ꓚꓲ. ꓛꓬ ꓗꓪ ꓪꓴ. ꓔꓴ ꓢꓲ ꓠꓬꓲ ꓟꓬꓱꓽ ꓬꓰ ꓠ, ꓟ ꓐꓱ ꓶ ꓓꓴ ꓙ ꓞꓷ ꓗꓷꓳ꓿ ꓕꓱ ꓡꓱ ꓐꓰ ꓬꓲ ꓔꓬ ꓟ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓠꓯ, ꓗꓪ ꓙꓰ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓟ ꓟꓬꓱꓽ ꓬꓰ ꓠ, ꓟ ꓞ ꓞ ꓬꓰ ꓠ, ꓟ ꓐꓯ ꓟ. ꓖꓶ ꓗꓷ ꓟ ꓥ ꓡꓳ꓿
ꓖꓣꓰꓔꓮ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓟꓲ ꓠꓯ ꓡ ꓞꓳ ꓐꓴ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓔꓬ ꓟ ꓚꓱ, ꓔꓯ ꓢꓳꓻ ꓦꓲꓻ ꓗꓪ ꓟ. ꓒ ꓡꓰ ꓐꓯ ꓟ. ꓖꓶ ꓗꓷ ꓟ ꓪꓴ. ꓠꓬꓲ ꓢꓷ. ꓡꓰ ꓟ ꓥ ꓡꓳ꓿
ꓖꓳ ꓕꓲ ꓙꓵ, ꓗꓪ ꓬꓲ ꓞꓲꓼ ꓠꓬ (8) ꓘꓳꓼ ꓙꓳ ꓢꓰ ꓟ ꓥ ꓡꓳ꓿ ꓖꓳ ꓗ. ꓠꓯ ꓬꓲ ꓠꓬ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓚꓱ, ꓔꓯ ꓮ ꓡꓲ ꓐꓰ ꓒꓬꓱꓼ ꓡ ꓡ ꓐꓰ ꓬꓲ ꓠꓬ ꓢꓷ. ꓠꓲ, ꓫꓵˍ ꓟ ꓪꓴ. ꓠꓬꓲ ꓕꓳ ꓶ ꓮ ꓟꓬ, ꓔꓯ ꓵꓻ ꓗꓷ ꓟ ꓥ ꓡꓳ꓿
ꓖꓳ ꓗ. ꓠꓯ ꓬꓲ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓟꓬꓱꓽ ꓔꓯ ꓬꓰ ꓠ, ꓟ ꓓꓴ ꓙ ꓗꓷꓳ꓿ ꓖꓣꓰꓔꓮ ꓠꓬ ꓟꓵꓽ ꓗꓪ ꓔꓬ ꓟ ꓧꓪꓽ ꓔꓯ ꓟꓽ ꓜ ꓠ, ꓟ ꓐꓯ ꓟ. ꓖꓶ ꓗꓷꓳ꓿
ꓬꓲ ꓡꓰ ꓬꓲ ꓐ, ꓐ ꓟ, ꓟ ꓔꓯ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓙꓰ ꓟ ꓙꓵ, ꓕꓯ ꓥ ꓟꓲ ꓐꓬꓱ ꓦꓲꓻ ꓔꓯ ꓟꓽ ꓜꓶ ꓠ, ꓟ ꓐꓯ ꓟ. ꓖꓶ ꓗꓷꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯ ꓠꓬ ꓐꓬꓱ ꓦꓲꓻ ꓗꓪ ꓐꓰ ꓓꓳ ꓡ ꓟ ꓟꓴ ꓘꓴ ꓠꓬ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓔꓯ ꓮ ꓘꓶ. ꓛꓲ ꓒꓬꓱꓼ ꓡ ꓝꓲ ꓟ ꓑꓶ. ꓓꓴ ꓥ ꓡꓳ ꓐꓰ ꓐꓯ ꓖꓶ ꓔ ꓡꓳ꓿
ꓖꓣꓰꓔꓮ ꓐ, ꓐ ꓢꓲ ꓟ, ꓟ ꓠꓬ ꓟꓽ ꓠꓽ ꓠꓽ ꓖꓳ ꓡꓱ ꓥ ꓟꓲ ꓖꓣꓰꓔꓮ ꓠꓬ ꓠꓲ, ꓟ ꓟꓽ ꓐꓬ ꓡꓰ ꓟ ꓥꓡꓳ꓿
ꓖꓣꓰꓔꓮ ꓠꓬ ꓬꓲ ꓔꓬ ꓟ ꓗꓴꓷꓼ ꓗꓪ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓙ ꓫꓱ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓝꓲˍ ꓟ ꓚꓱ, ꓔꓯ ꓗꓽ ꓕꓽ ꓠ,ꓟ ꓐꓱ ꓶ ꓮ ꓡꓲ ꓐꓰ ꓟꓬꓱꓽ ꓬꓰ ꓠ, ꓟ ꓔꓯ ꓚꓺ ꓟ. ꓖꓶ ꓗꓷ ꓟ ꓥ ꓡꓳ꓿ ꓕꓱ ꓟ ꓔꓯ ꓢꓷ. ꓡꓰ ꓟ ꓪꓴ. ꓠꓬꓲ ꓬꓲ ꓐ, ꓐ ꓟ, ꓟ ꓠꓬ ꓬꓲ ꓡꓰ ꓐꓯ ꓟ ꓚꓱ, ꓔꓯ ꓠ ꓠ, ꓖꓶ ꓗꓷ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓠꓬ ꓮ ꓘꓶ. ꓢꓯꓼ ꓪ ꓪ ꓡꓰ ꓟ ꓥ ꓡꓳ꓿ ꓝꓮꓲ ꓢꓳꓻ ꓦꓲꓻ ꓗꓪ ꓐꓰ ꓟ. ꓒ ꓥ ꓟꓲ ꓙꓳ ꓟ ꓮ ꓙꓵꓽ ꓠꓬ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓚꓱ, ꓔꓯ ꓗꓽ ꓕꓽ ꓠ, ꓟ ꓟꓬꓱꓽ ꓬꓰ ꓠ, ꓟ ꓐꓱ ꓶ ꓶꓻ ꓙꓳ ꓡꓳ ꓐꓰ ꓐꓯ ꓟ ꓔꓯ ꓐ ꓙ ꓗꓷ ꓟ ꓕꓯ ꓮ ꓘꓶ. ꓢꓯꓼ ꓪ ꓪ ꓡꓰ ꓟ ꓥ ꓡꓳ꓿
ꓖꓳ ꓗ. ꓠꓯ ꓖꓣꓰꓔꓮ (2018) ꓘꓳꓼ ꓕꓯ ꓬꓲ ꓢꓳꓻ ꓔꓬ ꓟ ꓢꓳꓻ ꓦꓲꓻ ꓗꓪ ꓟꓽ ꓙꓰ ꓙꓰ ꓬꓲ ꓠꓬ ꓬꓲ ꓔꓬ ꓟ ꓢꓪꓰꓰꓓꓰꓰ ꓗꓴꓷꓼ ꓙꓵꓽ ꓢꓴ ꓢꓲꓽ ꓒ ꓐꓴ ꓔꓬ ꓟ ꓔꓶ. ꓗꓪ ꓙꓰ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓗꓽ ꓕꓽ ꓟ ꓟꓬꓱꓽ ꓔꓴ ꓠ, ꓟ ꓕꓳ ꓶ ꓐꓳ ꓢꓲ ꓠꓬꓲ ꓐꓯ ꓟ. ꓖꓶ ꓙꓰꓳ꓿
ꓖꓳ ꓡꓱ ꓥ ꓟꓲ ꓗꓴꓷꓼ ꓙꓵꓽ ꓢꓴ ꓢꓲꓽ ꓒ ꓐꓴ ꓠꓬ ꓬꓲ ꓐꓯ ꓘꓶꓽ ꓔꓯ ꓟ. ꓠꓽ ꓠꓽ꓿ ꓕꓱ ꓡꓰ ꓐꓰ ꓖꓣꓰꓔꓮ ꓠꓬ ꓗꓴꓷꓼ ꓙꓵꓽ ꓢꓴ ꓢꓲꓽ ꓒ ꓐꓴ ꓔꓬ ꓟ ꓔꓶ. ꓗꓪ ꓙꓰ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓟ ꓟꓬꓱꓽ ꓬꓰ ꓠ, ꓟ ꓐꓱ ꓶ ꓕꓳ ꓶ ꓐꓳ ꓢꓲ ꓠꓬꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓡ ꓗꓷ ꓟ ꓙꓵ, ꓕꓯ ꓡ ꓞꓳ ꓮ ꓟꓬ, ꓥꓟꓲ ꓬꓲ ꓔꓯ ꓢꓷ. ꓡꓰ ꓟ ꓥꓡꓳ꓿
ꓕꓱ ꓡꓰ ꓖꓣꓰꓔꓮ ꓔꓯ ꓡ ꓞꓳ ꓮ ꓟꓬ, ꓢꓷ. ꓡꓰ ꓟ ꓪꓴ. ꓠꓬꓲ ꓬꓲ ꓐꓰ ꓕꓲ ꓪ ꓢꓳꓻ ꓦꓲꓻ ꓗꓪ ꓐꓰ ꓙꓳ ꓟ ꓮ ꓟꓬ, ꓥ ꓟꓲ ꓬꓲ ꓐꓰ ꓔ ꓡ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓔꓬ ꓟ ꓟꓬꓱꓽ ꓔꓯ ꓠꓽ ꓟ ꓟꓬꓱꓽ ꓬꓰ ꓠ, ꓟ ꓐꓯ ꓟ. ꓖꓶ ꓗꓷ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ(2018) ꓘꓳꓼ ꓕꓯ ꓢꓪꓰꓰꓓꓰꓠ ꓗꓴꓷꓼ ꓘꓴꓽ ꓗꓪ (270) ꓢꓳꓻ ꓦꓲꓻ ꓙꓳ ꓟ ꓐꓴ ꓠꓬ ꓖꓣꓰꓔꓮ ꓐꓰ ꓕꓲ ꓪ ꓔ ꓡ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓝꓲ ꓔꓯ ꓠꓽ ꓠ, ꓟ ꓢꓲꓽ ꓒ ꓐꓴ ꓔꓯ ꓐꓯ ꓟ. ꓖꓶ ꓗꓷꓳ꓿
2019 ꓘꓳꓼ ꓗꓪ ꓡ ꓞꓳ (400000) ꓣꓳ ꓠꓬ ꓖꓣꓰꓔꓮ ꓐꓰ ꓕꓲ ꓪ ꓔ ꓢꓲ ꓠꓬꓲ ꓟꓬꓱꓽ ꓬꓰ ꓙꓰ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓷ. ꓠꓲ, ꓙꓳ ꓢꓴ ꓥ ꓟꓲ ꓮ ꓟꓬ, ꓔ ꓡ ꓢꓲ ꓠꓬꓲ ꓕꓲ ꓟꓲ ꓠꓯ ꓡꓱ ꓗꓪ ꓔꓬ ꓟ ꓗꓴꓷꓼ ꓙꓵꓽ ꓢꓴ ꓢꓲꓽ ꓒ ꓐꓴ ꓠꓬ ꓖꓣꓰꓔꓮ ꓐꓰ ꓢꓳꓻ ꓟ ꓐꓴ ꓢꓯꓼ ꓔꓯ ꓠ ꓠ, ꓗꓷ ꓟ ꓥ ꓡꓳ꓿
ꓗꓴꓷꓼ ꓙꓵꓽ ꓢꓴ ꓢꓲꓽ ꓒ ꓐꓴ ꓠꓬ ꓞꓳ ꓡꓱ ꓐꓴ ꓠꓬ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓕꓯ ꓘꓳ, ꓣꓴ ꓠ, ꓟ ꓢꓯꓼ ꓕꓵꓼ ꓔꓬ ꓥ ꓟꓲ ꓢꓲꓽ ꓒ ꓐꓴ ꓠꓬ ꓟꓬꓱꓽ ꓬꓰ ꓠ, ꓟ ꓮ ꓘꓶ. ꓟꓽ ꓓꓴ ꓙ ꓗꓷ ꓟꓪꓴ. ꓠꓬꓲ ꓥꓳꓽ ꓡꓰ ꓟ ꓚꓱ, ꓔꓯ ꓫ. ꓕꓱ ꓗꓷꓳ꓿
ꓕꓱ ꓡꓰ ꓐꓰ ꓖꓣꓰꓔꓮ ꓠꓬ ꓬꓲ ꓓꓴ ꓙ ꓟ ꓙꓲ ꓟ ꓟꓬꓱꓽ ꓔꓯ ꓑꓶ. ꓑꓶ. ꓬꓰ ꓗꓷ ꓟ ꓪꓴ. ꓠꓬꓲ ꓬꓲ ꓗ. ꓠꓯ ꓢꓲ ꓗꓪ ꓛꓳꓽ ꓢꓴ ꓐꓴ ꓮ ꓟꓬ, ꓙꓳ ꓡ ꓟ ꓡꓰ ꓟꓽ ꓛꓲ ꓬꓲ ꓠꓬ ꓙꓲ ꓟ ꓟꓬꓱꓽ ꓔꓯ ꓬꓰ ꓐ ꓡ ꓢꓴ ꓞꓳ ꓡꓱ ꓞꓳ ꓡꓯ. ꓕꓲ ꓣꓳ ꓒꓬꓱꓼ ꓡ ꓟ ꓥ ꓡꓳ꓿
ꓠꓲ, ꓠꓵ ꓟ ꓞꓳ ꓡꓱ ꓞꓳ ꓡꓯ. ꓐꓴ ꓠꓬꓲ. ꓠꓬꓲ ꓣꓳ ꓔꓬ ꓟ ꓟꓬ‐ꓟ ꓗꓴꓷꓼ ꓘꓴꓽ ꓗꓪ ꓥ ꓟꓲ ꓟꓵꓽ ꓘꓳꓼ ꓒꓳ, ꓔꓬ ꓟ ꓣꓳ ꓮ ꓟꓬ, ꓔꓳ, ꓜꓳ ꓗꓷ ꓟ ꓥ ꓡꓳ꓿ ꓬꓲꓻ ꓙꓬ ꓙꓵꓽ ꓟꓶ ꓡ ꓟ ꓑꓶ. ꓓꓴ ꓮ ꓘꓶ. ꓛꓲ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓗꓷ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓟꓬ‐ꓟ ꓗꓴꓷꓼ ꓗꓪ ꓮ ꓘꓶ. ꓣꓳ ꓚꓵ ꓲꓬꓮꓪꓮꓓꓓꓬ ꓬꓲꓻ ꓙꓬ ꓔꓯ ꓥ ꓟꓲ ꓟꓽ ꓢꓲꓽ ꓫꓬ ꓗꓷ ꓡꓰ ꓝꓲ ꓟ꓾ ꓢꓲ, ꓠꓯ, ꓗꓪ ꓢꓲ, ꓜꓲ ꓡꓳ ꓜꓲ ꓟꓽ ꓙꓳ ꓗꓷ ꓡꓰ ꓝꓲ ꓟ ꓪꓴ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓒꓬꓱꓼ ꓡ ꓝꓲ ꓟ ꓥ ꓡꓳ꓿
ꓠꓴ ꓥꓪ ꓗꓪ ꓐꓰ ꓪꓴ. ꓔꓴ ꓢꓲꓠꓬꓲ ꓑꓶ ꓛꓵꓽ ꓔꓯ ꓮ ꓔꓳ ꓔꓳ ꓡꓳ. ꓟ ꓔꓯ ꓤ ꓟꓳ ꓓꓴ ꓬꓰ ꓡꓯ꓿
ꓑꓡꓮꓢꓔꓲꓚ ꓣꓱ ꓟ ꓔꓯ ꓤ ꓟꓳ ꓓꓴ ꓬꓰ ꓡꓯ꓿
ꓢꓲ, ꓜꓲ ꓮ ꓟꓬ, ꓔꓶ ꓪ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓥꓪ ꓠꓬ ꓞꓲ ꓣꓳ ꓢꓰ ꓡꓳ ꓟꓽ ꓓꓴ ꓙ ꓙ ꓙꓲ ꓟ ꓚꓱ, ꓗꓪ ꓢꓯꓼ ꓕꓵꓼ ꓡꓯ꓿ ꓙꓲ ꓟ ꓟꓵꓽ ꓘꓳꓼ ꓘꓳ, ꓣꓴ ꓪ ꓠ, ꓟ ꓢꓯꓼ ꓕꓵꓼ ꓡꓯ꓿
