ꓛꓲ, ꓡ ꓟ ꓞꓳ ꓡꓱ ꓞꓳ ꓡꓯ. ꓐꓴ ꓐꓱ ꓶ ꓐꓬ ꓔꓬ ꓟ ꓦꓲꓻ ꓕꓲ ꓦꓲꓻ ꓛ ꓖꓶ ꓠꓲ, ꓫꓵˍ ꓡ ? Laudatosi
ꓧꓪ. ꓧꓪ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓗꓪ ꓐꓰ ꓛꓲ, ꓡ ꓟ ꓞꓳ ꓡꓱ ꓞꓳ ꓡꓯ. ꓐꓴ ꓐꓱ ꓶ ꓐꓬ ꓔꓬ ꓟ ꓦꓲꓻ ꓕꓲ ꓦꓲꓻ ꓛ ꓖꓶ ꓠꓲ, ꓫꓵˍ ꓡ ꓐꓯ ꓟ ꓚꓱ, ꓗꓪ ꓐꓰ ꓐꓯ ꓟ. ꓖꓶ ꓡ ꓥꓳ꓿
ꓠꓲ, ꓠꓵ ꓟ ꓛꓳꓽ ꓒꓯ, ꓐꓴ ꓣꓳ ꓤꓶꓻ ꓠꓯ, ꓗꓪ ꓛꓲ ꓡ ꓟ ꓙꓵ, ꓕꓯ ꓮ ꓘꓶ. ꓛꓲ ꓡꓳ. ꓐꓲ ꓟ ꓔꓬ ꓦꓲꓻ ꓔꓯ ꓘꓳ, ꓣꓴ ꓠꓲ, ꓫꓵˍ ꓢꓴ ꓡꓰ ꓟꓽ ꓥ ꓡ? ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓤ ꓣꓳ ꓠꓱ ꓐꓴ ꓔꓯ ꓛꓲ ꓡ ꓟ ꓙꓵ, ꓕꓯ ꓮ ꓡꓲ ꓫꓵꓽ ꓔꓬ ꓦꓲꓻ ꓔꓯ ꓖꓶ ꓠ, ꓟ ꓣꓳ ꓓꓵꓽ ꓙ ꓗꓷ ꓢꓴ ꓥ ꓟꓲ ꓙꓳ ꓥꓳ꓿
ꓑꓳꓑꓰ ꓝꓣꓮꓠꓚꓲꓢ ꓠꓬ ꓡꓮꓴꓓꓮꓔꓳꓢꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓐꓳ ꓔ ꓟ ꓕꓳ ꓶ ꓗꓪ ꓟꓲ ꓠꓯ ꓔꓯ ꓣꓳ ꓮ ꓙꓵꓽ ꓢꓴ ꓔꓬ ꓟ ꓦꓲꓻ ꓓꓽ ꓐꓰ ꓐꓯ ꓔ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓠꓬꓲ. ꓠꓬꓲ ꓣꓳ ꓐꓴ ꓣꓳ ꓤ ꓣꓳ ꓠꓱ ꓐꓴ ꓔꓯ ꓮ ꓟꓲ ꓮ ꓐꓲ ꓐꓴ ꓔꓯ ꓖꓶ ꓔ ꓠ, ꓟ ꓦꓲꓻ ꓓꓽ ꓟꓲ ꓠꓯ ꓠꓬ ꓑꓶ ꓚꓵꓽ ꓓꓽ ꓟꓲ ꓠꓯ ꓒꓬꓱꓼ ꓔꓬ ꓡꓳ ꓐꓰ ꓐꓯ ꓔ ꓡꓳ꓿
ꓖꓳ ꓡꓱ ꓥ ꓟ ꓪꓴ ꓠꓬꓲ ꓛꓲ ꓡ ꓟ ꓤ ꓠꓱ ꓐꓴ ꓮ ꓟꓲ ꓮ ꓐꓲ ꓐꓴ ꓔꓬ ꓠ, ꓟ ꓮ ꓘꓶ. ꓛꓲ ꓫ. ꓟ ꓟꓲ ꓠꓯ ꓒꓬꓱꓼ ꓔꓬ ꓡꓳ ꓐꓰ ꓐꓯ ꓔ ꓡꓳ꓿
ꓖꓳ ꓟ ꓠꓬ ꓣꓳ ꓮ ꓙꓵꓽ ꓢꓴ ꓐꓱ ꓶ ꓠꓲ, ꓟ ꓟꓽ ꓢꓽ ꓓꓴ ꓓꓽ ꓟ ꓫꓵꓽ ꓪꓴꓽ ꓕꓲ ꓟ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓟꓵꓽ ꓡꓶꓽ꓾ ꓬꓲꓻ ꓙꓬ ꓙꓵꓽ ꓟꓵꓽ ꓙꓴꓽ ꓙꓵˍ ꓟꓲꓽ ꓦꓲꓻ ꓕꓳꓽ ꓥꓳꓽ ꓙꓱ꓾ ꓝꓮꓲ ꓟꓲ ꓠꓯ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓮ ꓘꓶ. ꓛꓲ ꓞ ꓡ ꓟ ꓥ ꓡꓳ꓿
ꓑꓡꓮꓢꓔꓲꓚ ꓡꓰ ꓟꓲ ꓠꓯ ꓔꓯ ꓟꓽ ꓢꓲꓽ ꓫꓬ ꓡꓰ ꓝꓲ꓾ ꓟ ꓢꓲ, ꓠꓯ ꓗꓪ ꓢꓲ, ꓜꓲ ꓡꓳ ꓜꓲ, ꓟꓽ ꓙꓳ ꓗꓷ ꓡꓰ ꓟ꓾ ꓕꓱ ꓡꓰ ꓗꓷ ꓡꓰ ꓔꓬ ꓟ ꓠꓬ ꓠꓱ. ꓐꓯꓼ ꓟꓲ ꓠꓯ ꓗꓪ ꓒꓬꓱꓼ ꓔꓬ ꓟ ꓫꓵꓽ ꓪꓴꓽ ꓟꓽ ꓥ꓿ ꓖꓳ ꓒ ꓕꓲ ꓗꓪ ꓒꓬꓱꓼ ꓔꓬ ꓟ ꓫꓵꓽ ꓪꓴꓽ ꓥ ꓡꓳ꓿
ꓕꓱ ꓡꓰ ꓗꓷ ꓡꓰ ꓟ ꓠꓬ ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓲ. ꓦꓰ ꓙꓵˍ ꓟ꓾ ꓓꓴꓽ ꓙ ꓟꓽ ꓗꓴ. ꓗꓷ ꓡꓰ ꓟ ꓑꓶ. ꓓꓴ ꓟꓵꓽ ꓘꓳꓼ ꓒꓳ,ꓡ ꓟ ꓫꓵꓽ ꓪꓴꓽ ꓒꓬꓱꓼ ꓡ ꓟ ꓥ ꓡꓳ꓿
ꓥꓪ. ꓕꓲ ꓣꓳ ꓡꓰ ꓑꓶ. ꓚꓵꓽ ꓡꓳ ꓠꓬꓲ ꓮ ꓫꓵꓽ ꓥ ꓟꓲ ꓟꓽ ꓛꓵꓽ ꓐꓰ ꓓꓵ ꓙ ꓗꓴ ꓢꓴ ꓮ ꓟꓬ, ꓔꓬ ꓟ ꓥ ꓡꓳ꓿ ꓥꓪ ꓕꓲ ꓣꓳ ꓑꓡꓮꓢꓔꓲꓚ ꓔꓯ ꓮ ꓟꓬ, ꓣꓱ ꓠꓬ ꓮ ꓫꓵꓽ ꓡꓰ ꓟꓽ ꓛꓵꓽ ꓐꓰ ꓓꓴꓽ ꓟ꓾ ꓕꓱ ꓡꓰ ꓐꓰ ꓓꓴꓽ ꓙ ꓟ꓾ ꓟꓲ ꓠꓯ ꓡ ꓞꓳ ꓐꓴ ꓠꓬ ꓞꓳ ꓙꓳ ꓚꓱ, ꓗꓪ ꓥꓳꓽ ꓡꓰ ꓚꓱ, ꓗꓪ ꓐꓰ ꓞꓳ ꓙꓳ ꓢꓯ. ꓔꓬ ꓟ ꓪꓴ. ꓠꓬꓲ ꓟꓲ ꓠꓯ ꓦꓲꓻ ꓓꓽ ꓠꓬ ꓢꓯꓼ ꓦꓻ ꓠ, ꓟ ꓮ ꓘꓶ. ꓫ. ꓔꓬ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓐꓴ ꓔꓳ, ꓜꓳ ꓟ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓮ ꓘꓶ. ꓞ ꓡ ꓟ ꓬꓲꓻ ꓙꓬ ꓮ ꓟꓬ, ꓙꓵꓽ ꓡ ꓟ ꓔꓯ ꓔꓳ, ꓜꓳ ꓔꓬ ꓟ ꓠꓬ ꓬꓲ. ꓪꓴ. ꓡꓰ ꓙꓳ ꓢꓲ ꓟ ꓥ ꓡꓳ꓿
ꓮ ꓟꓶ ꓟ ꓙꓵ, ꓗꓪ ꓢꓯ. ꓔꓬ ꓟ ꓟꓲ ꓠꓯ ꓡ ꓞꓳ ꓐꓴ ꓞꓳ ꓙꓳ ꓚꓱ, ꓗꓪ ꓙꓲ ꓟ ꓚꓱ, ꓗꓪ ꓟꓽ ꓞꓳ ꓙꓳ ꓠꓬ ꓛꓲ ꓡ ꓟ ꓮ ꓟꓲ ꓮ ꓐꓲ ꓐꓴ ꓣꓳ ꓤ ꓣꓳ ꓠꓱ ꓐꓴ ꓓꓳ ꓠ, ꓟ ꓬꓲꓻ ꓙꓬ꓾ ꓙꓲ ꓟ ꓟꓲ ꓦꓲꓻ꓾ ꓮ ꓘꓶ. ꓛꓲ ꓡꓳ. ꓐꓲ ꓟ ꓢꓲ, ꓜꓲ ꓡꓳ ꓜꓲ ꓠꓬ ꓟꓽ ꓙꓳ ꓗꓷ ꓡꓰ ꓡ ꓓꓴ ꓥ ꓡꓳ꓿
ꓕꓱ ꓡꓰ ꓐꓰ ꓗꓳ. ꓗꓷ ꓟ ꓙꓵ, ꓕꓯ ꓣꓳ ꓮ ꓒꓴ ꓮ ꓑ ꓐꓴ ꓡꓰ ꓗꓽ ꓕꓽ ꓔ ꓟ ꓮ ꓘꓶ. ꓗ, ꓛꓲ ꓣꓳ ꓟꓵꓽ ꓣꓳ ꓡꓳ ꓠꓬ ꓚꓺ ꓟꓲꓽ ꓕꓳ ꓶ ꓗꓪ ꓡꓰ ꓑ ꓙ ꓪ ꓡ ꓓꓴ ꓥ ꓡꓳ꓿
ꓣꓳ ꓤ ꓣꓳ ꓠꓱ ꓐꓴ ꓠꓬ ꓐꓬ ꓔꓬ ꓟ ꓦꓲꓻ ꓘꓴꓽ ꓡꓰ ꓡꓴ ꓔꓬ ꓢꓴ ꓐꓴ ꓒꓬꓱ ꓡ ꓓꓴ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓥꓳꓽ ꓡꓳ ꓓꓴ ꓔꓯ ꓮ ꓡꓲ ꓐꓰ ꓬꓰ ꓠꓯ, ꓡ ꓐꓯ ꓠꓬ
ꓖꓳ ꓡꓱ ꓠꓬ ꓣꓳ ꓐꓴ ꓟꓵꓽ ꓘꓳꓼ ꓒꓳ, ꓔꓬ ꓟ ꓔꓯ ꓕꓱ ꓡꓰ ꓐꓰ ꓡꓰ ꓡꓳ. ꓠꓬꓲ ꓢꓴ ꓒꓬꓱꓼ ꓠꓲ, ꓫꓵˍ ꓡ?
ꓣꓳ ꓞꓳ ꓡꓱ ꓞꓳ ꓡꓯ. ꓐꓴ ꓠꓬ ꓟꓵꓽ ꓘꓳꓼ ꓒꓳ, ꓡ ꓗꓽ ꓕꓽ ꓠ, ꓟ ꓢꓯꓼ ꓪ ꓮ ꓘꓶ. ꓙꓳ ꓢꓴ ꓐꓴ ꓥ ꓡꓳ꓿ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓟ ꓟꓬꓱꓽ ꓗꓪ ꓢꓯꓼ ꓕꓵꓼ ꓢꓲ ꓠꓬꓲ ꓬꓰ ꓓꓴ ꓬꓰ ꓡꓯ꓿
ꓑꓳꓑꓰ ꓝꓣꓮꓠꓚꓲꓢ ꓡꓰ ꓡꓮꓴꓓꓮ ꓔꓳ ꓢꓲ ꓕꓳ ꓶ ꓗꓪ ꓠꓴ ꓥꓪ ꓔꓯ ꓮ ꓡꓲ ꓐꓰ ꓓꓰꓽ ꓔ ꓥ ꓐꓯ ꓠꓬ ꓰꓚꓳꓡꓳꓖꓲꓚꓮꓡ ꓚꓳꓠꓦꓰꓣꓢꓲꓳꓠ ꓐꓯ ꓟ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓔꓯ ꓠꓲ, ꓟ ꓡꓶꓽ ꓢꓲ ꓠꓬꓲ ꓙꓲ ꓟ ꓚꓱ, ꓗꓪ ꓞꓳ ꓙꓳ ꓠ, ꓟ ꓐꓯ ꓖꓶ ꓔ ꓟ ꓥ ꓡꓳ꓿
ꓣꓳ ꓬꓰ ꓠ ,ꓟ ꓟꓬꓱꓽ ꓠꓬ ꓮ ꓘꓶ. ꓫ. ꓟ ꓟꓬꓱꓽ ꓟꓽ ꓥ꓾
ꓪꓴ‐ꓢ ꓔꓯ ꓙꓵꓻ ꓠꓬ ꓪꓴ‐ꓢ ꓡꓰ ꓚꓰꓼ ꓔ ꓟ ꓔꓯ ꓠꓲ, ꓠꓵ ꓠ ,ꓟ ꓥ ꓡꓳ꓿
ꓙꓲ ꓟ ꓚꓱ, ꓗꓪ ꓓꓴ ꓙ ꓒꓳ, ꓡꓶꓽ ꓟ ꓠꓬ ꓠꓴ ꓥꓪ ꓗꓪ ꓐꓰ ꓪꓴ. ꓔꓴ ꓠ, ꓟ ꓥ ꓡꓳ꓿ ꓟꓲ ꓠꓯ ꓔꓯ ꓙꓲ ꓟ ꓚꓱ, ꓗꓪ ꓒꓳ, ꓡꓶꓽ ꓟꓲ ꓠꓯ ꓔꓯ ꓠꓲ, ꓠꓵ ꓓꓴ ꓬꓰ ꓡꓯ꓿ ꓛꓲ ꓡ ꓟ ꓣꓳ ꓟꓲ ꓠꓯ ꓔꓯ ꓚꓬꓴ ꓠ, ꓟ ꓟꓬꓱꓽ ꓬꓰ ꓡꓯ꓿ ꓮ ꓙꓵꓽ ꓢꓴ ꓔꓯ ꓮ ꓘꓶ. ꓫ. ꓟꓳ ꓪ꓿
ꓠ, ꓟ ꓠꓴ ꓥꓪ ꓗꓪ ꓐꓰ ꓪꓴ. ꓔꓴ ꓢꓲ ꓠꓬꓲ ꓒꓳ, ꓡꓶꓽ ꓠ, ꓟ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓚꓱ, ꓗꓪ ꓙꓲ ꓟ ꓚꓱ, ꓗꓪ ꓙꓳ ꓫꓱ, ꓠ, ꓟ ꓡꓰ ꓥ ꓡꓳ꓿
1 ꓠꓬ ꓑꓡꓮꓢꓔꓲꓚ ꓮ ꓟꓬ, ꓣꓱ ꓟ ꓔꓯ ꓤ ꓟꓳ ꓠ ,ꓟ
2 ꓠꓬ ꓑꓶ ꓚꓵꓽ ꓑꓶ ꓟꓲ ꓔꓯ ꓬꓲ ꓫꓵꓽ ꓫꓵꓽ ꓘꓶꓽ ꓔ ꓠ, ꓟ
3 ꓠꓬ ꓢꓲ, ꓜꓲ ꓡꓳ ꓜꓲ ꓮ ꓟꓬ, ꓔꓶ ꓠ, ꓟ ꓥ ꓡꓳ꓿ ꓮ ꓔꓳ ꓙ ꓔꓯ ꓣꓱ ꓟꓽ ꓬꓯ ꓠꓬ ꓑꓲ. ꓔ ꓠ, ꓟꓥ ꓡꓳ꓿
ꓕꓱ ꓡꓰ ꓣꓳ ꓓꓲ ꓟ ꓟꓬꓱꓽ ꓔꓯ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓰ ꓠꓬ ꓙꓲ ꓟ ꓟꓵꓽ ꓘꓳꓼ ꓔꓯ ꓒꓬꓱꓼ ꓡ ꓝꓲ ꓐ ꓡ ꓟ ꓥ ꓡꓳ꓿
ꓛꓲ ꓡ ꓟ ꓤꓶꓻ ꓠꓯ, ꓗꓪ ꓣꓳ ꓤ ꓣꓳ ꓠꓱ ꓣꓳ ꓮ ꓟꓲ ꓮ ꓐꓲ ꓐꓴ ꓔꓯ ꓣꓳ ꓡꓰ ꓛ ꓖꓶ ꓠ, ꓟ ꓦꓲꓻ ꓓꓽ ꓟꓲ ꓠꓯ ꓗꓪ ꓮ ꓘꓶ. ꓛꓲ ꓙꓳꓺ ꓟ ꓟꓲ ꓠꓯ ꓦꓲꓻ ꓓꓽ ꓟꓽ ꓒꓬꓱꓼ ꓠ, ꓟ ꓗ, ꓛꓲ ꓢꓲ ꓡꓲ ꓟ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓖꓶ ꓐ ꓡ ꓠ, ꓟ ꓣꓳ ꓢꓯꓼ ꓕꓵꓼ ꓠ, ꓟ ꓥ ꓡꓳ꓿
ꓠꓴ ꓥꓪ
ꓥ ꓡꓳ꓿
