ꓟꓯꓼ ꓢꓰꓼ ꓡꓯ ꓘꓳ ꓓꓴ ꓗꓳ, ꓡꓳ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓠꓬ ꓥꓳ ꓡꓳ. ꓓꓴ ꓥ ꓡꓳ꓾
ꓢꓲ ꓒ ꓬꓰ‐ꓢꓴ ꓬꓲ. ꓕꓲꓽ ꓣꓳ ꓡꓰ ꓣꓳ ꓓꓵꓽ ꓙ ꓫ. ꓓꓴ ꓫ. ꓙꓵ ꓟꓷꓼ ꓙꓵ ꓓꓴ ꓶꓻ ꓡꓰꓽ ꓓꓽ ꓟ ꓔꓯ ꓪꓴꓽ ꓧꓶ ꓠꓽ ꓡꓰ ꓝꓲ ꓐ ꓡ ꓢꓲ ꓢꓲ ꓒꓽ ꓬꓲ ꓠꓵꓻ ꓠꓲ, ꓔꓯ ꓣꓳ ꓙꓽ ꓣꓳꓺ_ ꓟ ꓠꓲ, ꓟ ꓗꓪ ꓐꓰ ꓡꓰ ꓟꓳ ꓪ ꓓ_ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓮꓠꓖꓰꓡꓴꓢ ꓪꓽ ꓘꓴ ꓙꓵ, ꓕꓯ ꓐꓯ ꓔ ꓡꓳ꓿
ꓛꓳ ꓑ. ꓗꓷ ꓡꓰ ꓟ ꓘꓴꓽ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓡꓲ, ꓙꓰ ꓖꓶ ꓡꓳ꓾ ꓟꓯꓼ ꓢꓰꓼ ꓡꓯ ꓘꓳ ꓓꓴ ꓗꓳ, ꓡꓳ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓠꓬ ꓥꓳ ꓡꓳ. ꓓꓴ ꓥ ꓡꓳ꓾ꓟꓽ ꓙꓲ_ ꓟ ꓬꓰ ꓟ ꓙꓵ, ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓖꓽ ꓖꓶ_ ꓡꓳ꓾ ꓐꓰ ꓐꓯ ꓔ ꓡꓳ꓿
ꓕꓱ ꓟ ꓠꓬ ꓔꓱ, ꓟ ꓥ ꓢꓲ ꓬꓲ. ꓛꓳꓽ ꓒꓯ, ꓐꓴ ꓡꓰ ꓐꓰ ꓕꓲꓽ ꓠꓲ, ꓕꓲ ꓪꓼ ꓛꓳꓽ ꓫꓱꓽ ꓠꓲ, ꓫꓵ ꓟ ꓬꓲ. ꓚꓱ, ꓟꓲ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓤ ꓔꓲ. ꓕꓲꓽ ꓣꓳ ꓡꓰ ꓐꓰ ꓣꓳ ꓬꓲꓼ ꓠꓬꓲ ꓤ ꓕꓲ ꓣꓳ ꓡꓰ ꓐꓰ ꓕꓱ ꓟ ꓔꓯ ꓟ. ꓖꓶ ꓔ ꓡꓳ꓿ ꓢꓲ‐ꓫꓬ‐ꓟ‐ꓦ ꓢꓯꓼ ꓪ ꓗꓪ ꓐꓰ ꓢꓲ ꓒ ꓠꓬ ꓪꓴ‐ꓢ ꓐꓰ ꓟꓲ ꓠꓯ ꓞꓳ ꓫꓵ ꓬꓲ. ꓔꓱ, ꓟ ꓔꓯ ꓘꓴ ꓜꓲꓼ ꓞꓳ ꓠꓯꓼ ꓗꓪ ꓟ. ꓖꓶ ꓗꓷ ꓟ ꓥꓳ꓿
ꓣꓳ ꓟꓯꓻ ꓔꓬ ꓟ ꓡꓯꓼ ꓐꓳ ꓔꓶ. ꓓꓴ ꓠꓬ ꓢꓻ ꓢꓲ ꓟꓽ ꓡꓲ_ ꓟ ꓠꓬ ꓢꓲ ꓒ ꓠꓬ ꓣꓳ ꓐꓰ ꓕꓲ ꓪ ꓟꓯꓻ ꓙ ꓢꓲ ꓣꓳ ꓔꓯ ꓮ ꓕꓯ ꓟꓲ ꓕꓲꓽ ꓣꓳ ꓕꓵꓼ ꓟꓽ ꓒꓰ, ꓗꓷ ꓟ ꓑꓶ ꓓꓴ ꓥ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓬꓲꓼ ꓠꓬꓲ. ꓐꓯ ꓔ ꓡꓳ꓿
ꓔꓱ, ꓟ ꓟ. ꓒꓽ ꓕꓲꓽ ꓣꓳ ꓡꓰ ꓐꓰ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓠꓯꓼ ꓗꓪ ꓔꓳ, ꓜꓳ ꓔꓬ ꓟ ꓠꓻ ꓓꓴ ꓔꓯ ꓓꓻ ꓡꓰ ꓝꓲ ꓢꓲ ꓠꓬꓲ ꓙ ꓡꓳ. ꓙ ꓠ, ꓟ ꓬꓲ. ꓚꓲ ꓛꓬ ꓘꓳ, ꓣꓴ ꓟ ꓥ ꓡꓳ꓾ ꓡꓯꓼ ꓐꓳ ꓔꓶ. ꓓꓴ ꓬꓲ. ꓠꓯ. ꓟ ꓢꓷ. ꓡꓰ ꓓꓴ ꓔꓯ ꓢꓷ. ꓡꓰ ꓟ ꓗꓪ ꓐꓰ ꓣꓳ ꓠꓬ ꓥꓳ ꓡꓳ. ꓓꓴ ꓐꓰ ꓠꓲ, ꓟ ꓗꓴ. ꓖꓶ ꓓꓴ ꓔꓯ ꓧꓪ ꓟꓳ ꓓ_ ꓟ ꓔꓯ ꓐꓯ ꓔ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓡꓱ. ꓡꓰ ꓙꓵ, ꓠꓯꓼ ꓗꓪ ꓣꓳ ꓔꓯ ꓖꓳ ꓔꓴ ꓖꓶ_ ꓡꓳ꓾ ꓔꓲꓺ ꓒ ꓪ ꓔꓲ ꓡꓰ ꓢꓲ ꓫꓬ ꓕꓳ ꓶ ꓟ‐ꓕꓲ 11ꓽ25‐30 ꓗꓪ ꓐꓰ ꓢꓯꓼ ꓖꓶ ꓔ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓯꓼ ꓗꓪ ꓛꓳꓽ ꓫꓱꓽ_ ꓟ ꓚꓱ, ꓠꓬ ꓣꓳ ꓖꓳ ꓓꓱ ꓔꓯ ꓫ. ꓙꓵ ꓝꓲ_ ꓟ ꓟꓽ ꓥ꓾ ꓖꓳ ꓟ ꓗꓪ ꓐꓰ ꓡꓲ, ꓙꓰ ꓝꓲ_ ꓟ ꓠꓬꓲ ꓟꓳ ꓓꓴ ꓖꓶ_ ꓟ ꓬꓲ. ꓚꓱ, ꓡꓰ ꓥ ꓡꓳ꓿ ꓡꓯ ꓐꓳ ꓔꓶ. ꓓꓴ ꓡꓰ ꓣꓳ ꓔꓯ ꓧꓪ. ꓡꓰ ꓝꓲ ꓢꓲ ꓢꓲ ꓒꓽ ꓬꓲ. ꓫꓵꓻ ꓙ ꓗꓷ ꓟ ꓗꓪ ꓐꓰ ꓣꓳ ꓪꓴꓽ ꓧꓶꓻ ꓔꓬ ꓟ ꓮ ꓙꓵ ꓪꓴꓽ ꓧꓶꓻ ꓠꓽ ꓟꓶ_ ꓟ ꓚꓬꓴ ꓙ ꓟꓶ_ ꓟ ꓔꓯ ꓪ ꓟꓶ ꓡ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓢꓲ ꓒ ꓬꓲ. ꓫꓱ. ꓤ ꓠꓵꓻ ꓠꓲ, ꓔꓯ ꓢꓷ. ꓠ, ꓟ ꓣꓳ ꓠꓯꓼ ꓗꓪ ꓙꓽ ꓣꓳꓻ ꓠꓲ, ꓠꓬ ꓟꓽ ꓙꓳ ꓟꓽ ꓓ ꓥ ꓡꓳ꓾ ꓠꓬꓲ. ꓠꓬꓲ ꓢꓲ ꓫꓬ ꓕꓳ ꓶ ꓗꓪ “ꓐ, ꓐ ꓔꓯ ꓫꓱ. ꓖꓶ ꓟ ꓗꓪ ꓬꓲ ꓐꓰ ꓕꓲ ꓪ ꓔ, ꓐ ꓠ, ꓟ ꓐꓱ ꓶ ꓘꓴ ꓔ ꓟ ꓥ ꓡꓳ꓾” ꓐ, ꓐ ꓠꓬ ꓙꓽ ꓜꓲꓼ ꓢꓴ ꓐꓰ ꓢꓷ. ꓠꓲ, ꓙꓳ ꓢꓴ ꓠꓯꓼ ꓗꓪ ꓕꓱ ꓟꓬ ꓫꓵꓽ ꓔꓯ ꓚꓵ ꓔ ꓢꓲ ꓤ ꓠꓱ ꓤ ꓔꓯ ꓟꓳ. ꓖꓶ ꓟ ꓔꓯ ꓠꓲ, ꓫꓵ ꓟ ꓥꓳ꓿
ꓚꓲ. ꓛꓬ ꓠꓬ ꓚꓲ. ꓛꓬ ꓢꓷ. ꓡꓰ ꓟ ꓗꓪ ꓐꓰ ꓡꓰ ꓐꓲ. ꓞ, ꓢꓲ ꓣꓳ ꓠꓯꓼ ꓗꓪ ꓙꓰ ꓚꓳ ꓡ ꓟ ꓢꓲ ꓒ ꓬꓰ‐ꓢꓴ ꓬꓲ ꓔꓬ ꓟ ꓔꓯ ꓟꓲ ꓡꓰ ꓗꓴ. ꓟ ꓙꓳ_ ꓡꓳ꓾ ꓖꓳ ꓟ ꓑꓶ ꓓꓴ ꓞꓳ ꓤ ꓐꓴ ꓢꓷ. ꓠꓲ, ꓐꓰ ꓟꓬꓱꓺ ꓓꓳꓽ ꓠꓬ ꓠꓲ, ꓟ ꓖꓶ ꓘ, ꓟ ꓗꓪ ꓡꓰ ꓛꓲ ꓬꓰ ꓟ ꓥꓳ꓿
ꓖꓳ ꓟ ꓗꓪ ꓐꓰ ꓒꓳ, ꓠꓬ ꓪꓴ‐ꓢ ꓬꓲ ꓔꓱ, ꓟ ꓢꓷ. ꓠꓲ, ꓠꓬ ꓟꓲ ꓠꓯ ꓗꓪ ꓙꓽ ꓣꓳꓻ ꓠꓲ, ꓐꓰ ꓬꓯꓼ ꓡ ꓢꓲ ꓟ. ꓖꓶ ꓟ ꓠꓬ ꓓꓵꓽ ꓙ ꓪꓴꓽ ꓧꓶ ꓢꓲ ꓶꓻ ꓡꓰ ꓓꓽ ꓟ ꓟꓯꓻ ꓢꓴ ꓐꓴ ꓐꓱ ꓶ ꓢꓯꓼ ꓕꓵꓼ ꓪꓴꓽ ꓧꓶ ꓢꓲ ꓶꓻ ꓡꓰ ꓓꓽ ꓟ ꓟꓯꓻ ꓢꓴ ꓐꓴꓳ꓾ ꓥꓪ ꓔꓯ ꓡꓯ꓾ ꓐꓰ ꓐꓯ ꓔ ꓟ ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓯꓼ ꓗꓪ ꓛꓳ ꓫꓱꓽ ꓟ ꓠꓬ ꓬꓲ. ꓠꓵꓻ ꓠꓲ, ꓔꓯ ꓣꓳ ꓝꓮꓲ ꓖꓶ_ ꓟ ꓐꓰ ꓡꓯ ꓐꓳ ꓔꓶ. ꓓꓴ ꓟꓯꓻ ꓢꓲ ꓬꓲ ꓤꓶꓻ ꓠꓯꓼ ꓗꓪ ꓣꓳ ꓥ ꓟꓲ ꓔ, ꓐ ꓡꓰ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿
