ꓢꓴ ꓔꓯ ꓧꓪ. ꓜ ꓟ ꓔꓯ ꓔꓳ, ꓧꓪ. ꓡꓰ ꓢꓴ ꓕꓲ ꓣꓳ ꓥ ꓟ Jaylen Arnold ꓚꓱ, (Jaylen Arnold)
ꓢꓴ ꓡꓰ ꓣꓳ ꓔꓯ ꓜꓲ. ꓟ ꓑꓶ. ꓓꓴ ꓫ. ꓔꓳ ꓓꓴ ꓔꓳ, ꓜꓳ ꓡꓰ ꓢꓲ ꓠꓬꓲ ꓣꓳ ꓤꓶꓻ ꓔꓯ ꓪꓴꓽ ꓟꓴ ꓡ ꓟ ꓚꓱ, ꓗꓪ ꓟꓽ ꓢꓯꓼ ꓕꓵꓼ ꓢꓴ ꓐꓴ ꓙꓳ ꓟ ꓡꓰ ꓐꓰ ꓕꓱ ꓟ ꓔꓯ ꓔꓳ, ꓧꓪ. ꓡꓰ ꓢꓲ ꓠꓬꓲ ꓟꓲ ꓠꓯ ꓗꓪ ꓔꓬ ꓟ ꓞꓳ ꓡꓱ ꓐꓴ ꓔꓯ ꓢꓷ. ꓠꓲ, ꓚꓳꓽ ꓬꓲ ꓖꓶ ꓢꓴ ꓕꓲ ꓣꓳ ꓥ ꓟ ꓴꓢꓮ ꓗꓴꓷꓼ ꓗꓪ ꓐꓰ ꓙꓮꓬꓡꓰꓠ ꓮꓣꓠꓳꓡꓓ ꓚꓱ, ꓔꓯ ꓚꓺ ꓟ. ꓖꓶ ꓓꓴ ꓥ ꓡꓳ꓿
ꓧꓪ. ꓧꓪ ꓮ ꓟꓶ ꓟ ꓙꓵ, ꓗꓪ ꓣꓳ ꓔꓬ ꓟ ꓦꓲꓻ ꓒ ꓕꓲ ꓗꓪ ꓔꓬ ꓢꓴ ꓝꓮꓲ ꓢꓳꓻ ꓦꓲꓻ ꓙꓳ ꓦꓲꓻ ꓗꓪ ꓥ ꓟꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓢꓯꓼ ꓐꓽ ꓟ ꓔꓯ ꓫꓶ. ꓚꓺ ꓟ ꓜꓲꓻ ꓟ ꓝꓮꓲ ꓧꓪ. ꓜ ꓟ ꓔꓯ ꓣꓳ ꓔꓳ, ꓜꓳ ꓒꓽ ꓙ ꓠꓬꓲ ꓟ ꓥ ꓡꓳ꓿
ꓖꓳ ꓕꓱ ꓡꓰ ꓐꓰ ꓣꓳ ꓔꓳ, ꓜꓳ ꓗꓷ ꓟ ꓙꓵ, ꓔꓯ ꓣꓳ ꓠꓲ, ꓟ ꓐꓬ ꓡꓰ ꓢꓲ ꓠꓬꓲ ꓮ ꓫꓵꓽ ꓥ ꓟꓲ ꓟꓽ ꓬꓰ ꓔꓬ ꓢꓲ ꓠꓬꓲ ꓞꓳ ꓡꓰ ꓢꓴ ꓔꓬ ꓡꓰ ꓐꓰ ꓕꓱ ꓧꓪ. ꓜ ꓟ ꓔꓯ ꓔꓳ, ꓧꓪ ꓡꓰ ꓢꓴ ꓝꓮꓲ ꓕꓱ ꓡꓰ ꓬꓰ ꓔꓬ ꓢꓴ ꓐꓴ ꓔꓯ ꓢꓷ. ꓠꓲ, ꓚꓴꓽ ꓬꓲ ꓗꓪ ꓐꓰ ꓮ ꓡꓲ ꓐꓰ ꓧꓪ. ꓡꓰ ꓠ, ꓟ ꓟꓬꓱꓽ ꓬꓰ ꓢꓴ ꓞꓳ ꓡꓱ ꓤ ꓕꓲ ꓣꓳ ꓔꓬ ꓟ ꓥ ꓡꓳ꓿
ꓬꓲ ꓟꓬꓱꓺ ꓠꓬ ꓙꓮꓬꓡꓰꓠ ꓮꓣꓠꓳꓡꓓ ꓥ ꓢꓲ ꓠꓬꓲ ꓬꓲ ꓠꓬ ꓴꓢꓮ ꓗꓴꓷꓼ ꓗꓪ ꓐꓰ ꓥ ꓡꓳ꓿
ꓬꓲ ꓠꓬ ꓞꓲꓼ ꓣꓳ ꓟ ꓙꓵ, ꓕꓯ ꓠꓱ. ꓐꓯꓼ ꓢꓴ ꓤ ꓠꓱ ꓡꓰ ꓐꓰ ꓟꓽ ꓪ ꓟ ꓠꓻ ꓫꓵꓽ ꓔꓯ ꓔꓳ, ꓜꓳ ꓡꓰ ꓢꓴ ꓥ ꓡꓳ꓿ ꓬꓲ ꓠꓬ ꓕꓲ ꓒ ꓒ ꓬꓲ ꓚꓴꓽ ꓚꓲˍ ꓟ ꓠꓻ ꓫꓵꓽ ꓔꓯ ꓔꓳ, ꓜꓳ ꓗꓷ ꓢꓴ ꓤ ꓠꓱ ꓤ ꓥ ꓡꓳ꓿ ꓖꓳ ꓡꓰ ꓥ ꓟ ꓪꓴ. ꓠꓬꓲ ꓬꓲ ꓔꓯ ꓢꓳꓻ ꓦꓲꓻ (ꓙꓳ ꓦꓲꓻ ) ꓬꓲ ꓛꓳꓽ ꓒꓯ ꓐꓴ ꓡꓰ ꓞꓲˍ ꓟ ꓝꓮꓲ ꓮ ꓘꓶ. ꓛꓲ ꓧꓪ. ꓜ ꓟ ꓔꓯ ꓔꓳ, ꓜꓳ ꓗꓷ ꓢꓴ ꓤ ꓠꓱ ꓤ ꓥ ꓡꓳ꓿
ꓓꓵꓽ ꓙ ꓠꓬꓲ ꓡꓯ꓾ ꓧꓪꓽ ꓖꓳ ꓓꓱꓽ ꓔꓬ ꓟꓽ ꓢꓽ ꓢꓴ ꓤ ꓠꓱ ꓤ ꓕꓲ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓲ ꓛꓳꓽ ꓒꓯ, ꓐꓴ ꓧꓪ. ꓜꓽ ꓟ ꓫ. ꓟꓳ ꓟ꓾ ꓞꓲ꓾ ꓟ ꓔꓯ ꓔꓳ, ꓜꓳ ꓔꓬ ꓠꓬ ꓮ ꓡꓲ ꓐꓰ ꓓꓵꓽ ꓙ ꓫ. ꓔꓬ ꓫ. ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓠꓯˍ ꓟ ꓥ ꓡꓳ꓿
ꓬꓲ ꓠꓬ ꓫꓵꓽ ꓪꓴꓽ ꓔꓯ ꓢꓷ. ꓠꓲ, ꓚꓴꓽ ꓬꓲ ꓔꓯ ꓣꓱ ꓢꓲ ꓠꓬꓲ ꓫꓵꓽ ꓪꓴꓽ ꓔꓯ ꓧꓪ ꓡꓰ ꓠ, ꓟ ꓮ ꓡꓲ ꓐꓰ ꓬꓰ ꓗꓷ ꓟ ꓚꓱ, ꓔꓯ ꓣꓳ ꓡꓳ. ꓠꓬꓲ ꓓꓴ ꓬꓰ ꓡꓯ꓿
ꓢꓳꓻ ꓦꓲꓻ ꓗꓪ ꓝꓮꓲ ꓙ ꓖꓴ ꓗꓪ ꓣꓳ ꓔꓯ ꓧꓪ. ꓜꓽ ꓢꓴ ꓔꓯ ꓣꓳ ꓔꓯ ꓫ. ꓟꓳ ꓫ. ꓚꓬ ꓬꓰ ꓢꓴ ꓔꓯ ꓔꓳ, ꓜꓳ ꓗꓷ ꓠꓬ ꓣꓳ ꓠꓬ ꓮ ꓘꓶ. ꓙꓳꓺ ꓢꓲ ꓠꓬꓲ ꓮ ꓫꓵꓽ ꓡꓰ ꓬꓰ ꓟꓽ ꓗꓴ. ꓜꓲꓽ ꓧꓪ. ꓡꓰ ꓢꓴ ꓐꓴ ꓮ ꓟꓬ, ꓔꓬ ꓟꓥ ꓡꓳ꓿
ꓖꓳ ꓡꓱ ꓥ ꓟꓲ ꓙꓮꓬꓡꓰꓠꓰ ꓮꓣꓠꓳꓡꓓ ꓠꓬ ꓬꓲ ꓔꓯ ꓧꓪ. ꓜ ꓢꓴ ꓬꓲ ꓔꓯ ꓟꓽ ꓙꓲ ꓬꓰ ꓢꓴ ꓐꓴ ꓔꓯ ꓕꓱ ꓡꓱ ꓐꓰ ꓟꓽ ꓜꓲꓽ ꓬꓲ ꓠꓬ ꓥꓪ ꓡꓰ ꓐꓰ ꓒꓬꓱꓼ ꓔꓬ ꓟ ꓠꓻ ꓫꓵꓽ ꓔꓬ ꓟ ꓤ ꓠꓱ ꓤ ꓐꓴ ꓔꓯ ꓧꓪ. ꓜ ꓗꓷ ꓟ ꓮ ꓟꓬ, ꓙꓳ ꓡꓳ ꓐꓰ ꓓꓴꓽ ꓙ ꓢꓲ ꓠꓬꓲ ꓬꓲ ꓪ ꓐꓱ ꓶ ꓬꓲ ꓟꓬ ꓔꓳ, ꓠ, ꓟ ꓓꓴꓽ ꓙ ꓗꓷ ꓟ ꓥ ꓡꓳ꓿
ꓕꓱ ꓡꓰ ꓐꓰ ꓓꓴꓽ ꓙ ꓗꓷ ꓢꓲ ꓠꓬꓲ ꓬꓲ ꓤꓶꓻ (8) ꓘꓳꓼ ꓙꓳ ꓟ ꓙꓵ, ꓕꓯ (ꓙꓮꓬꓡꓰꓠʼꓢ ʼꓚꓧꓮꓡꓡꓰꓠꓖꓰ ꓝꓴꓠꓓꓮꓔꓲꓳꓠ) ꓟꓬꓱꓺ ꓔ ꓟ ꓜꓴꓻ ꓕꓯ ꓒꓴ ꓗꓷ ꓟ ꓥ ꓡꓳ꓿
ꓬꓲ ꓡꓰ ꓒꓴ ꓖꓶ ꓟ ꓜꓴꓻ ꓬꓲ ꓔꓶꓻ ꓙꓱ ꓠꓬ ꓴꓢꓮ ꓗꓴꓷꓼ ꓕꓲ ꓗꓴꓷꓼ ꓡꓱꓼ ꓘꓴꓽ ꓗꓪ ꓢꓳꓻ ꓦꓲꓻ ꓙꓳ ꓦꓲꓻ ꓗꓪ ꓤ ꓠꓱ ꓤ ꓐꓴ ꓔꓯ (ꓐꓴꓡꓡꓬꓲꓠꓖ) ꓬꓰ ꓟ ꓧꓪ. ꓜ ꓟ ꓟꓽ ꓔꓳ, ꓜꓳ ꓠ, ꓟ ꓐꓱ ꓶ ꓝꓮꓲ ꓮ ꓡꓲ ꓐꓰ ꓧꓪꓽ ꓖꓳ ꓓꓱ ꓟꓽ ꓠꓽ ꓢꓴ ꓔꓯ ꓧꓪ. ꓜ ꓡ ꓓꓴ ꓐꓴ ꓔꓯ ꓮ ꓡꓲ ꓐꓰ ꓤ ꓟꓳ ꓠ, ꓟ ꓢꓷ. ꓠꓲ, ꓚꓴꓽ ꓬꓲ ꓖꓶ ꓟ ꓥ ꓡꓳ꓿
ꓙꓮꓬꓡꓰꓠ ꓠꓬ ꓴꓢꓮ ꓗꓴꓷꓼ ꓘꓴꓽ ꓗꓪ ꓢꓳꓻ ꓦꓲꓻ ꓮ ꓟꓬ, ꓗꓪ ꓙꓰ ꓢꓲ ꓠꓬꓲ ꓟꓽ ꓠꓽ ꓠꓽ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓲ ꓠꓬꓲ ꓢꓳꓻ ꓤ ꓐꓴ ꓔꓯ ꓟꓽ ꓧꓪ, ꓜ ꓠ, ꓟ ꓫ. ꓟꓳ ꓫ. ꓚꓬ ꓟꓽ ꓬꓰ ꓠ, ꓟ ꓢꓷ. ꓠꓲ, ꓚꓴꓽ ꓬꓲ ꓮ ꓟꓬ, ꓫ. ꓕꓱ ꓗꓷ ꓟ ꓥ ꓡꓳ꓿
ꓤ ꓠꓱ ꓤ ꓔꓴ ꓔꓴ ꓟꓶ ꓟꓶ ꓤ ꓠꓱ ꓐꓴ ꓠꓬ ꓧꓪꓽ ꓖꓳ ꓓꓱꓽ ꓟꓽ ꓙꓲ ꓢꓴ ꓝꓮꓲ ꓟꓽ ꓪꓽ ꓟ ꓤ ꓠꓱ ꓤ ꓐꓴ ꓔꓯ ꓟꓽ ꓜꓲˍ ꓠ, ꓟ ꓬꓲ ꓪ ꓔꓯ ꓟꓽ ꓧꓪ, ꓜ ꓠ, ꓟ ꓐꓱ ꓶ ꓬꓲ ꓠꓬ ꓮ ꓘꓶ. ꓛꓲ ꓢꓯꓼ ꓕꓵꓼ ꓗꓷꓳ꓿
ꓙꓮꓬꓡꓰꓠ ꓮ ꓘꓶ. ꓛꓲ ꓢꓯꓼ ꓕꓵꓼ ꓗꓷ ꓟ ꓪꓴ. ꓠꓬꓲ (2014) ꓘꓳꓼ ꓕꓯ ꓕꓲ ꓟꓲ ꓠꓯ ꓡꓱꓼ ꓗꓪ ꓔꓬ ꓟ ꓤ ꓠꓱ ꓤ ꓐꓴ ꓐꓱ ꓶ ꓮ ꓘꓶ. ꓛꓲ ꓙꓲ ꓟ ꓟꓬꓱꓽ ꓔꓯ ꓬꓰ ꓖꓶ ꓢꓴ ꓐꓰ (ꓪꓳꓣꓡꓓ ꓳꓝ ꓚꓧꓲꓡꓓꓣꓰꓠ ꓮꓪꓮꓣꓓ) ꓡꓯ ꓫꓴ ꓔꓯ ꓘꓳ, ꓣꓴ ꓟꓶ ꓡꓰ ꓟ ꓥ ꓡꓳ꓿ ꓬꓲ ꓠꓬ ꓕꓲ ꓟꓲ ꓠꓯ ꓡꓱ ꓗꓪ ꓧꓪꓽ ꓖꓳ ꓓꓱ ꓠꓻ ꓒꓬ ꓓꓴ ꓙꓳ ꓢꓴ ꓔꓯ ꓠꓱ. ꓐꓯ ꓢꓴ ꓡꓰ ꓟꓽ ꓧꓪ ꓜ ꓠ, ꓟ ꓝꓮꓲ ꓟꓽ ꓫ. ꓟꓳ ꓠ, ꓟ ꓗꓽ ꓕꓽ ꓟ ꓟꓬꓱꓽ ꓔꓯ ꓬꓰ ꓖꓶ ꓢꓴ ꓥ ꓡꓳ꓿
ꓠꓲ, ꓟ ꓞꓳ ꓡꓱ ꓞꓳ ꓡꓯ. ꓐꓴ ꓠꓬꓲ. ꓠꓬꓲ ꓣꓳ ꓑ ꓙ ꓗꓷ ꓟ ꓤ ꓠꓱ ꓤ ꓚꓺ ꓟꓲꓽ ꓗꓪ ꓐꓰ ꓣꓳ ꓔꓯ ꓮ ꓫꓵꓽ ꓢꓯꓼ ꓪ ꓖꓶ ꓔꓬ ꓡ?
ꓠꓬꓲ. ꓠꓬꓲ ꓠꓴ ꓥꓪ ꓔꓯ ꓣꓳ ꓮ ꓙꓵꓽ ꓢꓴ ꓠꓯ, ꓗꓪ ꓢꓯꓼ ꓐ ꓓꓴ ꓙꓳ ꓢꓲ ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓡꓰ ꓟꓽ ꓙꓲ ꓟ ꓐꓯ ꓔꓬ ꓥ ꓟꓲ ꓠꓴ ꓥꓪ ꓠꓬ ꓢꓴ ꓔꓯ ꓙꓲ ꓟ ꓚꓱ, ꓗꓪ ꓐꓰ ꓬꓰ ꓙ ꓔꓳ ꓙ ꓠ, ꓟ ꓟꓬꓱꓽ ꓔꓯ ꓬꓰ ꓖꓶ ꓠ, ꓟ ꓐꓯ ꓖꓶ ꓔ ꓡꓳ꓿
ꓖꓳ ꓡꓱ ꓥ ꓪꓴ. ꓠꓬꓲ ꓚꓲ. ꓛꓬ ꓔꓯ ꓙꓵꓻ ꓢꓲ ꓠꓬꓲ ꓣꓳ ꓒꓽ ꓕꓲ ꓗꓪ ꓟꓽ ꓪꓽ ꓡꓯꓽ ꓘꓳ, ꓟ ꓟꓽ ꓫꓱ, ꓡꓯꓽ ꓘꓳ, ꓟ ꓡ ꓞꓳ ꓐꓴ ꓔꓯ ꓞꓳ ꓒꓴ ꓠ, ꓟ ꓠ, ꓟ ꓣꓳ ꓚꓵˍ ꓡꓳ꓿ ꓝꓮꓲ ꓢꓴ ꓡꓰ ꓧꓪ. ꓜ ꓔꓬ ꓢꓴ ꓣꓳ ꓓꓲ ꓡꓰ ꓢꓴ ꓐꓴ ꓔꓯ ꓬꓰ ꓙ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿
ꓙꓲ ꓟ ꓡ ꓞꓳ ꓙꓲ ꓟ ꓞꓳ ꓡꓱ ꓞꓳ ꓡꓯ. ꓐꓴ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓡꓯ꓿ ꓫ. ꓟꓳ ꓪ꓿
