ꓣꓳ ꓮ ꓙꓵꓽ ꓢꓴ ꓔꓬ ꓟ ꓦꓲꓻ ꓓꓽ ꓟꓲ ꓠꓯ ꓔꓯ ꓚꓬꓴ ꓙ ꓠ, ꓟ ꓟꓬꓱꓽ ꓬꓰ ꓠ, ꓟ (Laudatosi)
ꓧꓪꓸ ꓧꓪ ꓣꓳ ꓮ ꓙꓵꓽ ꓢꓴ ꓕꓱ ꓢꓯꓸ ꓐꓬꓱ ꓔꓯ ꓛꓳꓽ ꓔꓬ ꓟ ꓙꓵꓹ ꓕꓯ ꓣꓳ ꓮ ꓙꓵꓽ ꓢꓴ ꓞꓳ ꓙꓳ ꓢꓯꓸ ꓔꓬ ꓟ ꓟꓲ ꓠꓯ ꓦꓲꓻ ꓓꓽ ꓠꓬ ꓫꓵꓻ ꓠꓽ ꓗꓪ ꓛꓲ ꓠꓻ ꓔꓬ ꓟ ꓡ ꓞꓳ ꓕꓲ ꓤꓳ ꓡꓰ ꓐꓰ ꓗꓷ ꓔꓬ ꓟ ꓑꓶꓸ ꓓꓴ ꓠꓴ ꓥꓪ ꓔꓯ ꓚꓬꓴ ꓙ ꓠꓹ ꓟ ꓢꓯꓼ ꓓꓽ ꓡꓰ ꓘꓴ ꓔꓬ ꓟ ꓔꓯ ꓑ ꓙ ꓔꓬ ꓡ?
ꓡꓮꓴꓓꓮꓔꓳꓢꓲ ꓐꓰ ꓐꓯ ꓟ ꓕꓳ ꓶ ꓗꓪ ꓑꓳꓑꓰ ꓝꓣꓮꓠꓚꓲꓢ ꓡꓰ ꓟꓵꓽ ꓘꓳꓼ ꓒꓳꓹ ꓡ ꓟ ꓗꓽ ꓕꓽ ꓠꓹ ꓟ ꓐꓱ ꓶ ꓕꓳ ꓶ ꓐꓳ ꓗꓷ ꓟ ꓐꓰ ꓣꓳ ꓮ ꓙꓵꓽ ꓢꓴ ꓔꓬ ꓟ ꓟꓲ ꓠꓯ ꓦꓲꓻ ꓓꓽ ꓠꓬ ꓫꓵꓻ ꓘꓶꓽ ꓗꓪ ꓛꓲ ꓠꓻ ꓔꓬ ꓟ ꓡ ꓞꓳ ꓕꓲ ꓣꓳ ꓡꓰ ꓗꓷ ꓔꓬ ꓢꓲ ꓠꓬꓲ ꓣꓳ ꓔꓯ ꓚꓬꓴ ꓙ ꓠꓹ ꓟ ꓢꓯꓼ ꓓꓽ ꓡꓰ ꓘꓴ ꓔꓬ ꓡꓳ ꓐꓰ ꓐꓯ ꓔ ꓟ ꓥ ꓡꓳ꓿
ꓣꓳ ꓔꓬ ꓟ ꓮ ꓘꓶꓸ ꓔꓬ ꓗꓹ ꓛꓲ ꓟꓲ ꓠꓯ ꓠꓬ ꓮ ꓤ ꓤ ꓠꓬ ꓑꓶ ꓚꓵꓽ ꓟꓲ ꓠꓯ ꓒꓬꓱꓼ ꓡ ꓟ ꓔꓯ ꓐꓯ ꓖꓶ ꓔ ꓟ ꓥ ꓡꓳ꓿ ꓕꓱ ꓡꓰ ꓗꓷ ꓡꓰ ꓟ ꓑꓶꓸ ꓓꓴ ꓟꓵꓽ ꓘꓳꓼ ꓒꓳꓹ ꓡ ꓟ꓾ ꓑꓡꓮꓢꓔꓲꓚ ꓗꓪ ꓐꓰ ꓟꓲ ꓠꓯ ꓔꓯ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓟ꓾ ꓢꓲꓹ ꓠꓯ ꓗꓪ ꓢꓲꓹ ꓜꓲ ꓡꓳ ꓜꓲ ꓟꓽ ꓙꓳ ꓗꓷ ꓡꓰ ꓟ ꓑꓶꓸ ꓓꓴ ꓒꓬꓱꓼ ꓡ ꓫꓵꓽ ꓪꓴꓽ ꓠꓬ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓯꓸ ꓔꓬ ꓟ ꓙꓵꓹ ꓕꓯ ꓟꓲ ꓠꓯ ꓡ ꓞꓳ ꓔꓯ ꓫꓵꓽ ꓪꓴꓽ ꓔꓳꓹ ꓜꓳ ꓡ ꓝꓲ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓮ ꓫꓵꓽ ꓑꓶꓸ ꓓꓴ ꓕꓱ ꓡꓰ ꓐꓰ ꓫꓵꓽ ꓪꓴꓽ ꓒꓬꓱꓼ ꓡ ꓐꓰ ꓣꓳ ꓡꓳꓸ ꓠꓬꓲ ꓓꓴ ꓬꓰ ꓡꓯ꓿
ꓟꓵꓽ ꓘꓳꓼ ꓒꓳꓹ ꓡ ꓟ꓾ ꓟꓵꓽ ꓡꓶꓽ ꓡ ꓟ꓾ ꓬꓲꓻ ꓙꓬ ꓙꓵꓽ ꓡ ꓟ ꓟꓵꓽ ꓙꓴꓽ ꓙꓵꓽ ꓡ ꓟ ꓕꓱ ꓡꓰ ꓫꓵꓽ ꓪꓴꓽ ꓮ ꓙꓵꓽ ꓬꓲ ꓚꓲꓸ ꓠꓬ ꓟꓲ ꓠꓯ ꓡ ꓞꓳ ꓐꓴ ꓠꓯꓸ ꓦꓰꓸ ꓙꓵꓽ ꓟ ꓑꓶꓸ ꓓꓴ ꓥ ꓡꓳ꓿
ꓟꓲ ꓠꓯ ꓡ ꓞꓳ ꓐꓴ ꓠꓬ ꓒꓴ ꓫꓵꓽ ꓧꓪꓹ ꓟ ꓙꓵꓹ ꓕꓯ ꓟꓵꓽ ꓘꓳꓼ ꓒꓳꓹ ꓡ ꓟ ꓔꓯ ꓗꓽ ꓕꓽ ꓟ ꓚꓱꓹ ꓗꓪ ꓐꓰ ꓟꓬꓱꓽ ꓟꓽ ꓬꓰ ꓬꓲ ꓪ ꓔꓬ ꓢ ꓙꓳ ꓢ ꓠꓹ ꓟ ꓚꓱꓹ ꓔꓯ ꓡꓰ ꓡꓳꓸ ꓠꓬꓲ ꓢꓲ ꓠꓬꓲ ꓠꓱꓸ ꓐꓯ ꓢꓴ ꓮ ꓡꓲ ꓔꓳꓹ ꓜꓳ ꓥ ꓟꓲ ꓥꓪ ꓕꓲ ꓣꓳ ꓜ ꓟꓲ ꓔꓬ ꓢ ꓠꓬ ꓓ ꓡꓰꓳ ꓐꓰ ꓓꓵꓽ ꓙ ꓢꓴ ꓮ ꓟꓬꓹ ꓙꓳ ꓡ ꓟ ꓑꓶꓸ ꓓꓴ ꓟꓵꓽ ꓘꓳꓼ ꓒꓳꓹ ꓡ ꓝꓲ ꓟ ꓔꓯ ꓒꓬꓱꓼ ꓡ ꓟ ꓥ ꓡꓳ꓿
ꓝꓮꓲ ꓟꓲ ꓠꓯ ꓡ ꓞꓳ ꓐꓴ ꓠꓬ ꓕꓲ ꓧꓪ ꓣꓱ ꓟ ꓣꓱ ꓫꓵꓽ ꓣꓱ ꓫꓵꓽ ꓔꓯ ꓮ ꓔꓳ ꓔꓳ ꓡꓰ ꓡꓳ ꓟ꓾ ꓝꓮꓲ ꓕꓲ ꓣꓳ ꓣꓱ ꓓꓴ ꓕꓯ ꓢꓲ ꓣꓱ ꓟ꓾ ꓑꓡꓮꓢꓔꓲꓚ ꓔꓯ ꓮ ꓔꓳꓽ ꓔꓳꓽ ꓡꓳ ꓟ ꓑꓶꓸ ꓓꓴ ꓟꓲ ꓠꓯ ꓔꓯ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓝꓲ ꓢꓲ ꓠꓬꓲ ꓟꓵꓽ ꓘꓳꓼ ꓒꓳꓹ ꓡ ꓟ ꓥ ꓢꓲ ꓠꓬꓲ ꓟꓲ ꓠꓯ ꓠꓬ ꓢꓯꓼ ꓦꓻ ꓠꓹ ꓟ ꓮ ꓘꓶꓸ ꓫꓸ ꓡꓰ ꓟ ꓥ ꓡꓳ꓿
ꓕꓱ ꓡꓰ ꓗꓷ ꓡꓰ ꓟ ꓗꓪ ꓮ ꓘꓶꓸ ꓛꓲ ꓫꓸ ꓓꓴ ꓟꓷ ꓓꓴ ꓔꓳꓹ ꓜꓳ ꓔꓬ ꓟ ꓠꓬ ꓮ ꓫꓵꓽ ꓥ ꓡ? ꓐꓯ ꓠꓬ ꓟꓵꓽ ꓘꓳꓼ ꓒꓳꓹ ꓡ ꓟ ꓑꓶꓸ ꓓꓴ ꓫꓵꓽ ꓪꓴꓽ ꓔꓯ ꓮ ꓘꓶꓸ ꓛꓲ ꓔꓳꓹ ꓜꓳ ꓔꓬ ꓟ ꓠꓬ ꓝꓴꓲ ꓟꓽ ꓙꓳ ꓟ ꓟꓲ ꓠꓯ ꓗꓪ ꓔꓬ ꓟ ꓢꓯꓸ ꓫꓵꓽ ꓢꓯꓸ ꓙꓲ ꓟ ꓐꓴ ꓥ ꓡꓳ꓿
ꓝꓮꓲ ꓢꓲꓹ ꓜꓲ ꓡꓳ ꓜꓲ ꓐꓴ ꓥ ꓟꓲ ꓟꓵꓽ ꓘꓳꓼ ꓒꓳꓹ ꓡ ꓟ ꓫꓵꓽ ꓪꓴꓽ ꓔꓯ ꓡ ꓞꓳ ꓐꓴ ꓡꓰ ꓐꓰ ꓔꓳꓹ ꓜꓳ ꓔꓬ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴꓸ ꓠꓬꓲ ꓣꓳ ꓔꓬ ꓟ ꓟꓵꓽ ꓔꓯ ꓐꓬ ꓡꓰ ꓝꓲ ꓟ ꓑꓶꓸ ꓓꓴ ꓒꓬꓱꓼ ꓡ ꓟꓵꓽ ꓘꓳꓹ ꓒꓳꓹ ꓡ ꓟ ꓠꓬ ꓡ ꓞꓳ ꓡꓰ ꓟꓽ ꓞꓲ ꓢꓯꓸ ꓫꓵꓽ ꓢꓯꓸ ꓙꓵꓽ ꓮ ꓙꓵꓽ ꓐꓰ ꓢꓲꓹ ꓜꓲ ꓢꓲꓹ ꓟꓲ ꓮ ꓙꓵꓽ ꓔꓯ ꓔꓯ ꓟꓽ ꓔꓱ ꓟ ꓚꓱꓹ ꓗꓪ ꓐꓰ ꓫꓵꓽ ꓪꓴꓽ ꓖꓶ ꓔꓬ ꓟ ꓥ ꓡꓳ꓿
ꓣꓳ ꓟꓲ ꓠꓯ ꓡ ꓞꓳ ꓐꓴ ꓟꓵꓽ ꓘꓳꓼ ꓒꓳꓹ ꓡ ꓟ ꓔꓯ ꓗꓽ ꓕꓽ ꓠꓹ ꓟ ꓮ ꓫꓵꓽ ꓬꓰ ꓐ ꓡ ꓡ?
ꓥꓪ ꓕꓲ ꓣꓳ ꓡꓰ ꓟꓽ ꓬꓰ ꓠꓬ ꓮ ꓫꓵꓽ ꓟꓽ ꓞꓲ ꓐꓰ ꓣꓳ ꓠꓬ ꓓꓵ ꓙ ꓗꓴꓸ ꓢꓴ ꓟꓲ ꓥ ꓡꓳ꓿ ꓖꓳ ꓡꓱ ꓟꓽ ꓥ ꓣꓳ ꓮ ꓙꓵꓽ ꓢꓴ ꓕꓲ ꓠꓲꓹ ꓕꓲ ꓪ ꓟꓵꓽ ꓘꓳꓼ ꓒꓳꓹ ꓡ ꓟ ꓔꓯ ꓗꓽ ꓕꓽ ꓠꓹ ꓟ ꓟꓬꓱꓽ ꓬꓰ ꓠꓹꓟ ꓢꓯꓼ ꓕꓵꓼ ꓠꓯˍ ꓟ ꓥ ꓡꓳ꓿
ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓚꓱꓹ ꓗꓪ ꓙꓲ ꓟ ꓞꓳ ꓙꓳ ꓚꓱꓹ ꓗꓪ ꓐꓰ ꓢꓯꓸ ꓔꓬ ꓟ ꓗꓪ ꓐꓰ ꓟꓲ ꓠꓯ ꓟꓵꓽ ꓘꓳꓼ ꓒꓳꓹ ꓡ ꓟ ꓔꓯ ꓗꓽ ꓕꓽ ꓐ ꓡ ꓟ ꓥ ꓡꓳ꓿
ꓑꓡꓮꓢꓔꓲꓚ ꓔꓯ ꓮ ꓘꓶꓸ ꓟꓽ ꓣꓱ ꓠꓹ ꓟ ꓤ ꓟꓳ ꓓꓴ ꓬꓰ ꓡꓯ꓿
ꓮ ꓔꓳꓽ ꓙ ꓔꓯ ꓟꓽ ꓣꓱ ꓕꓯ ꓑꓲꓸ ꓔ ꓓꓴ ꓬꓰ ꓡꓯ꓿
ꓑꓶꓸ ꓛꓵꓽ ꓡꓳꓸ ꓟ ꓙꓵꓹ ꓕꓯ ꓬꓲ ꓫꓵꓽ ꓬꓲ ꓫꓵꓽ ꓘꓶꓽ ꓢꓲ ꓠꓬꓲ ꓡꓳꓸ ꓓꓴ ꓬꓰ ꓡꓯ꓿
ꓟꓲ ꓠꓯ ꓔ ꓯꓠꓲꓹ ꓚꓵꓻ ꓚꓵꓻ ꓗꓷ ꓡꓰ ꓠꓹ ꓟ ꓢꓯꓼ ꓕꓵꓼ ꓡꓯ꓿
ꓳꓣꓖꓲꓠꓮ ꓚꓱꓹ ꓔꓯ ꓣꓱ ꓢꓲ ꓠꓬꓲ ꓔꓶ ꓜ ꓔꓶ ꓓꓳ ꓓꓴ ꓬꓰ ꓡꓯ꓿
ꓠꓲꓹ ꓠꓵ ꓟ ꓬꓲ ꓤ ꓠꓬꓲ ꓤ ꓐꓴ ꓟꓲ ꓠꓯ ꓠꓬ ꓣꓳ ꓥꓪꓸ ꓢꓲ ꓠꓬꓲ ꓔꓬ ꓟ ꓦꓲꓻ ꓓꓽ ꓟꓽ ꓥ꓾ ꓣꓳ ꓤ ꓠꓱ ꓤ ꓐꓴ ꓣꓳ ꓡꓲ ꓑ ꓡꓲ ꓟ ꓐꓴ ꓔꓯ ꓖꓶ ꓔ ꓠꓹ ꓟ ꓮ ꓙꓵꓽ ꓢꓴ ꓔꓬ ꓟ ꓦꓲꓻ ꓓꓽ ꓟ ꓥ ꓡꓳ꓿
ꓖꓳ ꓡꓱ ꓠꓬ ꓣꓳ ꓮ ꓟꓶ ꓞꓳ ꓙꓳ ꓚꓱꓹ ꓔꓯ ꓙꓲ ꓟ ꓚꓱꓹ ꓗꓪ ꓐꓰ ꓒꓳꓹ ꓡꓶꓽ ꓢꓲ ꓠꓬꓲ ꓙꓲ ꓟ ꓟꓵꓼ ꓘꓳꓼ ꓦꓬꓼ ꓠꓬꓲ ꓒꓬꓱꓼ ꓡ ꓝꓲ ꓠꓹ ꓟ ꓢꓯꓼ ꓕꓵꓼ ꓡꓯ꓿
ꓠꓬꓲꓸ ꓠꓬꓲ ꓗꓪ ꓐꓰ ꓣꓳ ꓮ ꓙꓵꓽ ꓢꓴ ꓔꓬ ꓟ ꓟꓲ ꓠꓯ ꓦꓲꓻ ꓓꓽ ꓔꓯ ꓣꓳ ꓮ ꓙꓵꓽ ꓢꓴ ꓕꓲ ꓠꓲꓹ ꓕꓲ ꓪ ꓗꓽ ꓕꓽ ꓓꓴ ꓬꓰ ꓡꓯ꓿ ꓫꓸ ꓟꓳ ꓪ꓿
