ꓝꓲ ꓓꓴ ꓒꓳ‐ꓡꓳ ꓐꓰ ꓝꓲ ꓓꓴ ꓒꓲ‐ꓕꓱ ꓠꓬ ꓢ‐ꓢꓲ‐ꓠ ꓐꓱ ꓶ “ꓟꓽ ꓫꓱ,_ꓟ ꓘꓴꓽ ꓗꓪ ꓐꓰ ꓕꓲꓽ ꓠꓲ, ꓕꓲ ꓪꓼ “ꓥ ꓟ ꓔꓯ ꓬꓲ. ꓒꓬꓱꓽ ꓔꓶ._ ꓡꓳ꓾
ꓝꓲ ꓓꓴ ꓒꓳ‐ꓡꓳ ꓐꓰ ꓒꓲ‐ꓕꓱ ꓑꓮꓲ ꓦꓬꓼ ꓠꓬꓲ ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓮꓠꓖꓰꓡꓴꓢ ꓪꓽ ꓘꓴ ꓙꓵ, ꓗꓪ ꓢꓲ ꓫꓬ_ ꓟ ꓝꓲ ꓓꓴ ꓐꓴ ꓠꓬꓲꓽ ꓣꓳ ꓠꓬ ꓬꓲ. ꓪ ꓞꓳ ꓙꓳ ꓡ ꓟ ꓬꓲ. ꓚꓱ, ꓐꓰ ꓚꓺ ꓟꓲꓽ ꓠꓯꓼ ꓗꓪ ꓟꓽ ꓪ ꓟꓽ ꓫꓱ, ꓥ ꓟꓲ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓠꓬ ꓘꓴ ꓜꓲꓼ ꓞꓳ ꓐꓱ ꓶ ꓬꓲ ꓪ ꓔꓯ ꓕꓲꓽ ꓪ ꓗꓷ ꓠ, ꓟ ꓠꓯꓼ ꓗꓪ ꓝꓲ ꓩꓴ ꓗꓷ ꓟ ꓥꓳ꓿
ꓠꓽ ꓕꓲꓽ ꓠꓬꓲ ꓕꓯ ꓑꓮꓲ ꓦꓬꓼ ꓠꓬꓲ ꓥ ꓟ ꓢꓲ ꓫꓬ ꓟ ꓝꓲ ꓓꓴ ꓐꓴ ꓥ ꓟ ꓝꓲ ꓓꓴ ꓒꓲ‐ꓕꓱ ꓐꓰ ꓒꓳ‐ꓡꓳ ꓐꓴ ꓑꓮꓲ ꓦꓬꓼ ꓠꓬꓲ ꓕꓯ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓪꓽ ꓘꓴ ꓜꓲꓼ ꓡ ꓟ ꓙꓲ‐ꓢꓴ ꓢꓲ ꓤ ꓐꓴ ꓐꓰ ꓕꓲ ꓪꓼ ꓪꓽ ꓘꓴ ꓗꓷ ꓟ ꓥꓳ꓿ ꓮ ꓘꓶ. ꓞ, ꓟ ꓣꓳ‐ꓟ ꓡꓳ ꓒꓱ ꓞ, ꓟ ꓘꓴꓽ ꓠꓯꓼ ꓗꓪ ꓔꓲꓺ ꓒ ꓪ ꓔꓲ ꓡꓰ ꓮ ꓟꓶ ꓡꓰ ꓐꓰ ꓑꓮꓲ ꓦꓬꓼ ꓠꓬꓲ ꓠꓬ ꓣꓳ‐ꓟ ꓘ‐ꓕꓳ‐ꓡꓲꓗ ꓢ‐ꓢꓲ‐ꓠ ꓐꓰ ꓟꓵꓽ ꓗꓳ. ꓓꓵ ꓓꓵ ꓗꓪ ꓔꓬ ꓟ ꓗ‐ꓕꓳ‐ꓡꓲꓗ ꓢ‐ꓢꓲ‐ꓠ ꓔꓯ “ꓙꓵꓻ ꓠꓲ, ꓐꓰ ꓫꓱ, ꓤ ꓠꓵꓻ ꓠꓲ, ꓐꓰ ꓪꓽ ꓡꓯ ꓘꓳ ꓝꓲ_ ꓟ” ꓔꓯ ꓝꓮꓲ ꓓꓵ ꓙ ꓡꓰ ꓝꓲ_ ꓡꓳ꓿
ꓝꓲ ꓓꓴ ꓒꓳ‐ꓡꓳ ꓐꓰ ꓒꓲ‐ꓕꓱ ꓐꓴ ꓬꓲ ꓪ ꓢꓯꓼ ꓟꓬ ꓖꓶ ꓗꓷ ꓟ ꓢꓷ. ꓙ ꓟꓳ ꓙ ꓗꓷ ꓟ ꓠꓬ ꓢꓲ ꓫꓬ ꓕꓳ ꓶ ꓘꓶ ꓫꓵꓼ ꓫꓵꓼ ꓠꓯꓼ ꓗꓪ ꓔꓶꓻ ꓞ, ꓟ ꓬꓲ. ꓚꓱ, ꓕꓲꓽ ꓟ ꓗꓷ ꓡꓰ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓠꓯꓽ ꓗꓪ ꓪꓴ‐ꓢ ꓬꓲ. ꓠꓯ. ꓟ ꓠꓵꓻ ꓠꓲ, ꓔꓯ ꓟ. ꓖꓶ ꓗꓷ ꓟ ꓥ ꓡꓳ꓿
“ꓬꓲ ꓪ ꓡꓰ ꓟ. ꓖꓶ ꓗꓷ ꓟ ꓐꓰ ꓢꓯꓼ ꓟꓬ ꓖꓶ ꓢꓷ. ꓙ ꓟꓳ ꓙ ꓟ ꓑꓶ ꓓꓴ ꓢꓲ ꓒ ꓬꓰ‐ꓢꓴ ꓬꓲ. ꓐꓯ ꓘꓶꓽ ꓠꓬ ꓣꓳ‐ꓟ ꓡꓳ ꓒꓱ ꓠꓯꓼ ꓗꓪ ꓬꓲ. ꓚꓰ ꓕꓶꓻ ꓞ, ꓟ ꓥ ꓡꓳ꓾ ꓐꓰ ꓐꓯ ꓠ ꓗ, ꓡꓳ꓾ ꓪꓴ‐ꓢ ꓔꓯ ꓢꓷ. ꓡꓰ ꓝꓲ_ ꓟ꓾ ꓙꓵꓽ ꓪ ꓐꓯ ꓟ ꓠꓬ ꓡ ꓞꓳ ꓮ ꓙꓵ ꓬꓲ ꓪ ꓢꓯ. ꓔꓬ ꓠ, ꓟ ꓐꓱ ꓶ ꓒꓵꓽ ꓚꓳ_ ꓟ ꓥ ꓡꓳ ꓐꓯ_ ꓟ ꓬꓲ. ꓚꓱ, ꓔꓯ ꓟ. ꓖꓶ ꓗꓷ ꓟ ꓥꓳ꓾” ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿ ꓢꓲ ꓒ ꓬꓰ‐ꓢꓴ ꓘꓴ ꓔ ꓟ ꓔꓯ ꓛꓳꓽ ꓫꓱꓽ ꓠ, ꓟ ꓢꓲꓺ ꓚꓰ. ꓢꓴ ꓮ ꓙꓵ ꓠꓬ ꓢꓲ ꓒ ꓬꓰ‐ꓢꓴ ꓘꓴ ꓔ ꓟ ꓢꓯꓼ ꓠꓬ ꓠꓬꓲ. ꓠꓬꓲ ꓗꓪ ꓛꓲ ꓡꓳ ꓒꓱ ꓗꓪ ꓐꓰ ꓶꓽ ꓞ, ꓟ ꓠꓯꓼ ꓗꓪ ꓛꓲ ꓛꓱꓻ ꓓꓳ ꓡꓰ ꓟ ꓥꓳ꓿
ꓝꓲ ꓓꓴ ꓒꓳ‐ꓡꓳ ꓐꓰ ꓒꓲ‐ꓕꓱ ꓑꓮꓲ ꓦꓬꓼ ꓠꓬꓲ ꓔꓯ ꓬꓰ ꓟ ꓗꓪ ꓐꓰ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓢ‐ꓢꓲ‐ꓠ ꓟꓬꓱꓽ ꓠꓯꓼ ꓗꓪ ꓚꓲ. ꓛꓬ ꓐ_ ꓟ ꓥ ꓡꓳ꓿ ꓣꓳ ꓠꓬ ꓟꓽ ꓐꓲ ꓜꓲꓼ ꓥ ꓟꓲ ꓖꓽ ꓖꓶ ꓟꓶ_ ꓟ ꓝꓴꓲ ꓙꓳ ꓢꓴ ꓐꓴ ꓐꓰ ꓢꓯ. ꓔꓬ ꓕꓯ ꓪꓴ‐ꓢ ꓣꓱ ꓛꓰ ꓠꓬ ꓣꓳ ꓤꓶꓻ ꓠꓯꓼ ꓗꓪ ꓣꓱ ꓛꓰ ꓟꓶ_ ꓟ ꓑꓶ ꓓꓴ ꓥ ꓡꓳ꓿
“ꓬꓲ ꓪ ꓠꓬ ꓘꓴ ꓔ ꓟ ꓟꓽ ꓟꓶ ꓢꓲ ꓕꓯ ꓗꓪ ꓐꓰ ꓢꓲꓺ ꓚꓰ. ꓟꓶ ꓗ. ꓠꓯ. ꓥ ꓟꓲ ꓬꓲ ꓪ ꓚꓺ ꓟꓲꓽ ꓬꓲ ꓚꓱ, ꓪꓴꓽ ꓟꓴ ꓡ ꓟ ꓬꓲ. ꓚꓱ, ꓠꓬ ꓟꓽ ꓪ ꓡꓯ ꓘꓳ꓾ ꓕꓱ ꓟ ꓠꓬ ꓬꓲ ꓪ ꓔꓯ ꓕꓲꓽ ꓪ ꓫꓱ, ꓡꓯ ꓘꓳ ꓠ ꓚꓰꓼ ꓔ ꓟ ꓟꓽ ꓥ ꓟ ꓑꓶ ꓓꓴ ꓥ ꓡꓳ꓾”ꓐꓰ ꓐꓯ ꓔ ꓡꓳ꓿ ꓕꓱ ꓡꓱ ꓟꓽ ꓪ_ ꓟ ꓗꓪ ꓐꓰ ꓝꓲ ꓓꓴ ꓒꓳ‐ꓡꓳ ꓐꓰ ꓒꓲ‐ꓕꓱ ꓠꓬ ꓚꓲ. ꓛꓬ ꓟꓽ ꓪ ꓟ ꓢꓯꓼ ꓗꓪ ꓐꓰ ꓪꓴ‐ꓢ ꓐꓯ ꓘꓶꓽ ꓔꓯ ꓚꓺ ꓒꓬꓱꓽ ꓗꓷ ꓟ ꓥꓳ꓿ ꓬꓲ ꓪ ꓢꓷ. ꓙ ꓳ ꓙ ꓟ ꓠꓬ ꓚꓺ ꓟꓲꓽ ꓕꓲꓽ ꓚꓳ ꓡꓳ ꓗꓪ ꓙꓲ ꓢꓴ ꓢꓲ ꓤ ꓐꓴ ꓔꓯ ꓒꓵꓽ ꓛꓳ_ ꓟ꓾ ꓕꓲꓽ ꓠꓲ, ꓕꓲ ꓪ ꓐꓰ ꓫꓱ, ꓡꓯ ꓘꓳ_ ꓟ ꓠꓯꓼ ꓗꓪ ꓪꓴ. ꓔꓴ ꓝꓲ_ ꓟ ꓕꓲ ꓚꓱ, ꓥ ꓡꓳ꓾ ꓐꓰ ꓐꓯ ꓔ ꓡꓳ꓿
ꓬꓲ. ꓟꓶꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓟꓽ ꓪ ꓡꓯ ꓘꓳ ꓟꓽ ꓫꓱ, ꓡꓯ ꓘꓳ ꓟ ꓗꓪ ꓐꓰ ꓟꓵꓽ ꓗꓳ. ꓓꓵ ꓓꓵ ꓪ ꓡꓯ ꓘꓳ ꓟ ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓔꓯ ꓚꓲ. ꓛꓬ ꓢꓷ. ꓡꓰ ꓠ, ꓟ ꓐꓱ ꓶ ꓝꓲ ꓓꓴ ꓒꓳ‐ꓡꓳ ꓐꓰ ꓝꓲ ꓓꓴ ꓐꓴ ꓪꓽ ꓘꓴ ꓖꓶ ꓠ, ꓟ ꓶꓽ ꓓꓰꓽ ꓗꓷ ꓟ ꓥꓳ꓿
ꓘꓴ ꓜꓲꓼ ꓞꓳ ꓗꓪ ꓐꓰ “ꓞꓳ ꓫꓵ ꓞꓳ ꓙꓰ ꓗꓳ, ꓡꓳ ꓗꓪ ꓬꓲꓼ ꓠꓬꓲ ꓤ ꓐꓴ ꓜꓲ ꓶꓯ ꓘꓳ ꓟ ꓐꓰ ꓚꓲ ꓛꓬ ꓬꓲ. ꓒꓵꓽ ꓔꓯ ꓢꓷ. ꓠ, ꓟ꓾ ꓪꓽ ꓡꓯ ꓘꓳ ꓓꓴ ꓔꓯ ꓐꓬ ꓡꓰ ꓝꓲ_ ꓟ ꓮ ꓙꓵ ꓔꓯ ꓤ ꓟꓳ ꓠ, ꓟ ꓐꓰ ꓙꓲ‐ꓢꓴ ꓢꓲ ꓤ ꓐꓴ ꓕꓲ ꓣꓳ ꓛꓳ ꓕꓲ ꓣꓳ ꓕꓲ ꓠꓲ, ꓕꓲ ꓪ ꓥ ꓟ ꓬꓲ. ꓚꓱ, ꓠꓯꓼ ꓗꓪ ꓥ ꓠꓬ ꓮ ꓙꓵ ꓐꓰ ꓒꓴ ꓒꓴ ꓡꓯ ꓡꓯ ꓖꓪ ꓙꓱ ꓡꓯ ꓘꓳ ꓢꓲ ꓛꓳ ꓫꓱꓽ ꓐ ꓡꓰ ꓝꓲ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ꓿
