ꓠꓲꓽ ꓜꓴꓻ ꓜꓶꓽ ꓞ, ꓢꓴ ꓔꓯ ꓫꓬ ꓡꓰˍ ꓟ (reflection)
ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 8ꓽ28‐34 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓬꓴ‐ꓔ ꓞꓳ ꓫꓵꓽ ꓐꓴ ꓟꓽ ꓥ ꓟ ꓠꓱ. ꓐꓯ ꓕꓲ ꓟꓵꓽ ꓗꓪ ꓙꓰ ꓗꓷꓟ ꓙꓵ, ꓕꓯ ꓡꓯꓼ ꓜꓳ ꓔꓳ ꓗꓪ ꓮ ꓘꓶ. ꓛꓲ ꓦꓴ ꓟ ꓠꓲꓽ ꓠꓬꓲꓽ ꓟ ꓠꓬ ꓬꓲ ꓔꓯ ꓜꓲ ꓗꓷ ꓟ ꓥ ꓡꓳ꓿
ꓠꓲꓽ ꓐꓴ ꓠꓬ ꓡ ꓞꓳ ꓠꓯ, ꓗꓪ ꓐꓰ ꓓꓳ ꓙꓰ ꓢꓲ ꓠꓬꓲ ꓮ ꓪꓯꓼ ꓜꓴꓻ ꓗꓪ ꓓꓵꓽ ꓡꓰ ꓢꓲ ꓠꓬꓲ ꓬꓲꓻ ꓡꓳ ꓐꓱ ꓗꓪ ꓔꓶ ꓞꓷ ꓫꓵꓻ ꓡꓰ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓖꓳ ꓕꓲ ꓟꓵꓽ ꓗꓪ ꓔꓬ ꓟ ꓡ ꓞꓳ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓗ, ꓛꓲ ꓡꓰ ꓘꓳ, ꓣꓴ ꓠ, ꓟ ꓟꓽ ꓬꓰ ꓬꓲ ꓪ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓬꓲ ꓪ ꓔꓬ ꓟ ꓟꓵꓽ ꓗꓪ ꓐꓰ ꓓꓳ ꓙꓰ ꓠ, ꓟ ꓓꓰꓽ ꓗꓷ ꓟ ꓥ ꓡꓳ꓿
ꓠꓲꓽ ꓓꓯ ꓐꓴ ꓔꓯ ꓢꓲ ꓢꓲꓺ ꓒ ꓬꓰ‐ꓢꓴ ꓠꓬ ꓙꓵꓽ ꓪ ꓗꓪ ꓐꓰ ꓗ, ꓓꓳ ꓟ ꓙꓵꓻ ꓪ ꓙꓳ ꓟ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓠꓲꓽ ꓢ ꓓꓯ ꓠꓬ ꓚꓲ. ꓚꓲ. ꓔꓬ ꓟ ꓥ ꓟꓲ ꓬꓲ ꓠꓯ, ꓗꓪ ꓙꓳ ꓟ ꓪꓽ ꓠꓬꓲ ꓟ ꓢꓯꓼ ꓪ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓢꓲ ꓟꓽ ꓪ ꓠꓬꓲ ꓟ ꓚꓱ, ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿
ꓟ. ꓕꓲ ꓕꓳ ꓡ 8ꓽ 29 ꓝꓲ. ꓗꓪ ꓪꓴ‐ꓢ ꓮ‐ꓐꓲꓳ ꓠꓴ ꓠꓬ ꓮ ꓫꓵꓽ ꓑꓶ. ꓓꓴ ꓥꓪ ꓠꓴꓽ ꓔꓬ ꓗꓪ ꓡ ꓡ> ꓦꓬꓼ ꓠꓬꓲ ꓟꓽ ꓛꓲ ꓡ ꓢꓰꓽ ꓕꓯꓽ ꓡꓰ ꓥꓪ ꓠꓴ ꓔꓯ ꓫ. ꓙꓵꓻ ꓝꓲ ꓠ, ꓟ ꓕꓱ ꓗꓪ ꓡ ꓟ ꓥ ꓡ ꓐꓰ ꓐꓯ ꓡꓳ ꓐꓰ ꓐꓯ ꓖꓶ ꓔ ꓡꓳ꓿
ꓠꓲꓽ ꓢ‐ꓓꓯ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓪꓴ‐ꓢ ꓬꓲ ꓮ‐ꓐꓲ ꓐꓳ ꓐꓰ ꓪꓴ‐ꓢ ꓥ ꓟꓲ ꓚꓱ, ꓔꓯ ꓢꓷ. ꓟ ꓥ ꓡꓳ꓿ꓕꓱ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓪꓴ‐ꓢ ꓬꓲ ꓮ‐ꓐꓲ ꓐꓰ ꓢꓷ. ꓪ ꓠ, ꓟ ꓙ ꓜꓲꓼ ꓠ, ꓟ ꓬꓲ ꓙꓵ, ꓟꓶ ꓫꓵˍ ꓫꓵˍ ꓣꓳ ꓠ, ꓟ ꓔꓱ ꓚꓱ, ꓟ ꓢꓷ. ꓡꓲ ꓠ, ꓟ ꓬꓲ ꓙꓵ, ꓟꓶ ꓫꓵˍ ꓕꓯ ꓢꓲ ꓠꓬꓲ ꓢꓷ. ꓡꓲ ꓟ ꓚꓱ, ꓥ ꓡꓳ꓿
ꓠꓬꓲ. ꓠꓬꓲ ꓘꓴ ꓜꓲꓼ ꓞꓳ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓟꓲ ꓠꓯ ꓗꓪ ꓬꓯꓼ ꓡ ꓟ ꓠꓬ ꓠꓲꓽ ꓢ‐ꓓꓯ ꓔꓯ ꓧꓪ. ꓡꓰ ꓠ, ꓟ ꓥ ꓡꓳ ꓐꓰ ꓟ. ꓖꓶ ꓔ ꓟ ꓥ ꓡꓳ꓿
ꓟꓲ ꓠꓯ ꓡꓳ ꓟ ꓦꓬꓼ ꓠꓬꓲ ꓬꓲ ꓟꓶ ꓟ ꓦꓬꓼ ꓠꓬꓲ ꓐꓯ ꓟꓴ ꓘꓶꓽ ꓟ ꓦꓬꓼ ꓠꓬꓲ ꓟꓽ ꓛꓲ ꓡꓰ ꓢꓰꓽ ꓕꓯ ꓠꓲꓽ ꓢ‐ꓓꓯ ꓔꓯ ꓪꓴ‐ꓢ ꓡꓰ ꓙꓰ ꓛꓳꓽ ꓠ, ꓟ ꓙꓵꓽ ꓪ ꓖꓶ ꓔ ꓥ ꓟꓲ ꓬꓲ ꓪ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓠꓬ ꓧꓪ. ꓡꓰ ꓟꓽ ꓘꓴꓽ ꓟ ꓥ ꓡꓳ꓿ ꓪꓴ‐ꓢ ꓪꓽ ꓠꓬꓲ ꓟ ꓢꓯꓼ ꓪ ꓔꓯ ꓠꓲꓽ ꓢ‐ꓓꓯ ꓮ ꓘꓶ. ꓛꓲ ꓙꓳꓺ ꓟ ꓥꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓡ ꓞꓳ ꓐꓴ ꓪꓽ ꓙꓵꓽ ꓪ ꓟꓲ ꓠꓯ ꓡ ꓞꓳ ꓐꓴ ꓠꓬ ꓬꓲ ꓒꓴꓽ ꓮ ꓘꓶ. ꓒꓴꓽ ꓢꓴ ꓐꓴ ꓥ ꓟꓲ ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓠꓲꓽ‐ꓢ‐ꓓꓯ ꓓꓵꓽ ꓔꓬ ꓢꓴ ꓐꓴ ꓠꓬꓲꓽ ꓣꓳ ꓠꓬ ꓡꓯꓼ ꓜꓳ ꓔꓳ ꓗꓪ ꓔꓬ ꓢꓲ ꓠꓬꓲ ꓫꓵꓻ ꓢꓴ ꓐꓴ ꓔꓵꓼ ꓔꓶ. ꓗꓪ ꓔꓬ ꓢꓴ ꓐꓴ ꓥ ꓟ ꓪꓴ. ꓠꓬꓲꓬ ꓬꓲ ꓪ ꓠꓬ ꓟꓲ ꓠꓯ ꓡ ꓞꓳ ꓐꓴ ꓠꓯ, ꓗꓪ ꓮ ꓘꓶ. ꓡꓰ ꓠꓬꓲꓽ ꓟꓽ ꓒꓴꓽ ꓢꓴ ꓐꓴ ꓗꓷ ꓡꓰ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓐꓰ ꓠꓲꓽ ꓓꓵꓽ ꓔꓬ ꓟ ꓡ ꓞꓳ ꓐꓴ ꓠꓬꓲꓽ ꓣꓳ ꓐꓰ ꓜꓲꓼ ꓗꓷ ꓟ ꓙꓵ, ꓕꓯ ꓠꓲꓽ ꓔꓯ ꓮ‐ꓪꓯ ꓜꓴꓻ ꓗꓪ ꓓꓵꓽ ꓡꓰ ꓠ, ꓟ ꓙꓵꓽ ꓪ ꓖꓶ ꓗꓷ ꓟ ꓠꓬ ꓡ ꓞꓳ ꓕꓲ ꓣꓳ ꓢꓯꓼ ꓟꓬ ꓔꓯ ꓚꓬꓴ ꓗꓷ ꓟ ꓠꓬ ꓟꓲ ꓠꓯ ꓒꓴ ꓫꓵ ꓐꓴ ꓮ ꓘꓶ. ꓟꓶ ꓟ ꓟ (ꓮ‐ꓪꓯ) ꓜꓴꓻ ꓕꓯ ꓢꓲ ꓒꓴꓽ ꓟ ꓔꓯ ꓟ. ꓖꓶ ꓔ ꓟ ꓥꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓒꓴ ꓫꓵꓽ ꓙꓳ ꓟ ꓕꓯ ꓟꓲ ꓠꓯ ꓡ ꓞꓳ ꓐꓴ ꓝꓮꓲ ꓙꓲ ꓡ ꓠ, ꓟ ꓧꓪꓽ ꓖꓳ ꓓꓱꓽ ꓔꓬ ꓢ ꓠ ,ꓟ ꓐꓱ ꓶ ꓟꓬꓱꓽ ꓬꓰ ꓖꓶ ꓟ ꓥ ꓡꓳ꓿
ꓖꓳ ꓟ ꓠꓬ ꓪꓴ‐ꓢ ꓠꓬ ꓟꓲ ꓠꓯ ꓡ ꓞꓳ ꓔꓯ ꓮ ꓫꓵꓽ ꓕꓯ ꓢꓲ ꓠꓲ, ꓠꓵ ꓟ ꓚꓱ, ꓔꓯ ꓟ. ꓖꓶ ꓡ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓐꓰ ꓜꓲꓼ ꓗꓷ ꓟ ꓡ ꓞꓳ ꓐꓴ ꓠꓬ ꓪꓴ‐ꓢ ꓬꓲ ꓪꓽ ꓠꓬꓲ ꓟ ꓔꓯ ꓢꓲ ꓡꓲ ꓓꓴ ꓔꓯ ꓡꓳ. ꓟꓳ ꓡꓰ ꓢꓴ ꓡ ꓞꓳ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓗ, ꓛꓲ ꓛꓲ ꓡꓰ ꓘꓳ, ꓣꓴ ꓠ, ꓟ ꓟꓽ ꓓꓴ ꓙ ꓬꓲ ꓪ ꓮ‐ꓪꓯ ꓜꓴꓻ ꓬꓲ ꓪ ꓠꓯ, ꓗꓪ ꓙꓳ ꓟ ꓒꓴ ꓫꓵˍ ꓟꓶ ꓡꓰ ꓟ ꓔꓯ ꓙꓳꓺ ꓟ ꓑꓶ. ꓓꓴ ꓢꓲꓺ ꓒ ꓬꓰ‐ꓢꓴ ꓔꓯ ꓟꓽ ꓘꓳ, ꓣꓴ ꓟ ꓑꓶ.ꓓꓴ ꓬꓲ ꓪ ꓠꓬ ꓪꓴ‐ꓢ ꓮ‐ꓐꓲ ꓔꓯ ꓟꓽ ꓘꓳ, ꓣꓴ ꓢꓴ ꓐꓴ ꓥ ꓡꓳ꓿
ꓪꓴ‐ꓢ ꓠꓬ 9꓿(ꓝꓣꓰꓰ ꓪꓲꓡꓡ) ꓐꓯ ꓟ ꓚꓲ. ꓛꓬ ꓓꓵꓽ ꓙ ꓚꓱ, ꓔꓯ ꓚꓲ. ꓛꓬ ꓢꓲ ꓠ, ꓟ ꓖꓶ ꓔ ꓟ ꓥꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓪꓴ‐ꓢ ꓠꓬ ꓠꓵꓻ ꓠꓲ, ꓢꓲꓺ ꓒꓽ ꓥ ꓡꓳ꓿ ꓣꓳ ꓠꓬꓲ. ꓠꓬꓲ ꓟꓲ ꓠꓯ ꓡ ꓞꓳ ꓐꓴ ꓠꓬ ꓮ ꓢꓳ ꓣꓳ ꓡꓳ. ꓟꓳ ꓗꓷ ꓟ ꓞꓳ ꓜꓴꓻ ꓡꓰ ꓐꓰ ꓣꓳ ꓥ ꓟꓲ ꓮ‐ꓐꓲ ꓢꓲꓺ ꓒ ꓬꓰ‐ꓢꓴ ꓔꓯ ꓟꓽ ꓘꓳ, ꓣꓴ ꓟ ꓙꓳ ꓟ ꓥ ꓡꓳ꓿
ꓣꓳ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠ ꓠꓬꓲˍ ꓔꓬ ꓟ ꓟ ꓠꓬ ꓣꓳ ꓤꓶꓻ ꓗꓪ ꓮ‐ꓪꓯ ꓜꓴꓻ ꓠꓬ ꓮ ꓡꓲ ꓗꓪ ꓔꓬ ꓡ?
ꓠꓬꓲ. ꓠꓬꓲ ꓣꓳ ꓢꓲꓺ ꓒ ꓬꓰ‐ꓢꓴ ꓡꓰ ꓖꓶ ꓔ ꓟ ꓢꓯꓼ ꓟꓬ ꓙ ꓖꓴ ꓗꓪ ꓙꓰ ꓔꓬ ꓢꓴ ꓒꓬꓱꓼ ꓔꓬ ꓡ? ꓟꓲ ꓠꓯ ꓒꓴ ꓫꓵ ꓔꓯ ꓡꓰ ꓧꓪ, ꓔꓬ ꓢꓴ ꓒꓬꓱꓼ ꓔꓬ ꓡ?
ꓕꓲ ꓧꓪ, ꓧꓪ ꓟꓲ ꓠꓯ ꓗꓪ ꓙꓳ ꓟ ꓒꓴ ꓫꓵꓽ ꓐꓰ ꓟꓲ ꓠꓯ ꓗꓪ ꓥꓳꓽ ꓡꓳ ꓓꓴ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓤꓶꓻ ꓗꓪ ꓐꓰ ꓶꓻ ꓤ ꓗꓪ ꓓꓳ ꓙꓰ ꓠ, ꓟ ꓣꓳ ꓓꓰꓽ ꓗꓷ ꓡ? ꓚꓲ. ꓛꓬ ꓔꓯ ꓓꓵꓽ ꓙ ꓠꓬꓲ ꓡꓯ꓿
ꓢꓲꓺ ꓒ ꓠꓯ, ꓗꓪ ꓡ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
