“ꓢꓯꓼ ꓕꓵꓼˍ ꓕ ꓑꓳꓸꓼ ꓧꓪ. ꓡꓰˍ ꓟ ꓠꓽ ꓟꓽ ꓙꓳ꓿ ꓖꓳ ꓡꓱ ꓐꓯ ꓥ ꓟꓲ ꓧꓪ. ꓡꓰ ꓢꓴ ꓥ ꓕ ꓑꓳꓸꓼ ꓠꓬ ꓢꓯꓼ ꓕꓵꓼ ꓗꓷ ꓢꓴˍ ꓡꓰꓽ ꓥ ꓡꓳ”
ꓞꓳ ꓤ ꓕꓲ ꓣꓳ ꓤꓶꓻ ꓗꓪ ꓙꓲ ꓓꓰ ꓡꓰˍ ꓟ ꓐꓰ ꓛꓳ. ꓓꓰ ꓡꓰˍ ꓟ ꓐꓰ ꓐꓯ ꓐ ꓡˍ ꓟ ꓠꓬ ꓚꓲ. ꓛꓬ ꓢꓯꓼ ꓕꓵꓼ ꓔˍ ꓟ ꓥ ꓡꓳ꓿ ꓢꓯꓼ ꓕꓵꓼˍ ꓠꓬ ꓧꓪ. ꓡꓰˍ ꓥꓳ꓾ ꓢꓯꓼ ꓕꓵꓼˍ ꓠꓬ ꓪꓴꓽ ꓡ ꓟꓴ ꓡˍ ꓥꓳ ꓐꓯˍ ꓟ ꓓꓵꓽ ꓙꓽ ꓚꓱ, ꓠꓬ ꓣꓳ ꓔꓯ ꓪꓽ ꓠꓬꓲˍ ꓟ ꓢꓯꓼ ꓪ ꓕꓲ ꓟ ꓖꓶ ꓐ ꓡˍ ꓥ ꓟꓲ ꓕꓲ ꓖ ꓕꓲ ꓧꓪ, ꓗꓪ ꓓꓵꓽ ꓙ ꓚꓱ, ꓖꓳ ꓟ ꓠꓬ ꓠꓲ, ꓟ ꓙꓬ ꓡꓰˍ ꓟ꓾ ꓓꓵꓽ ꓙꓽ ꓟꓬꓽ ꓓꓵꓽ ꓙꓽ ꓪꓴꓽ ꓧꓶˍ ꓟ ꓔꓯˍ ꓟꓲ ꓒꓬꓱꓼ ꓡꓰ ꓝꓲ ꓗꓴ.ˍ ꓡꓳ꓿
ꓔꓯꓺ ꓥꓳꓽ꓾ ꓕꓳꓽ ꓶ ꓧꓪ. ꓡꓰ ꓠ, ꓟ ꓐꓱ ꓶ ꓕꓲ ꓢ ꓘꓪ ꓗꓪ ꓛꓲ ꓕꓳꓽ ꓶ ꓵ ꓢꓳˍ ꓡꓳ꓾ ꓵ ꓝꓲ.ˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓚꓵ ꓚꓵ ꓕꓳꓽ ꓶ ꓒꓬꓰ ꓝꓲ. ꓛꓲ ꓡˍ ꓕꓯ ꓣꓳ ꓵ ꓢꓳ ꓔˍ ꓟ ꓟꓽ ꓚꓬꓼ ꓡ ꓕꓯ꓾ ꓥ ꓠꓬ ꓬꓲ ꓮ ꓟꓯꓼ ꓮ ꓟꓬꓬ, ꓟꓽ ꓟꓶ ꓕꓯ ꓠꓲ, ꓟ ꓙꓬ ꓡˍ ꓡꓳ꓿
ꓶꓻ ꓡꓯꓼ ꓟꓬꓱꓽ ꓕꓲ ꓟ ꓬꓰ ꓠ, ꓟ ꓒꓴ ꓛꓵꓽ ꓢꓲ ꓢꓯꓼ ꓕꓵꓼ ꓬꓰˍ ꓥ ꓟꓲ ꓫꓵꓽ ꓪꓴ ꓕꓲ ꓫꓵꓽ ꓫꓵꓽ ꓑꓶ. ꓓꓴ ꓶꓻ ꓡꓯꓼ ꓟꓬꓱꓼ ꓖꓳ ꓟ ꓫꓴꓻ ꓡꓰˍ ꓕꓯ ꓚꓵ ꓚꓵ ꓠꓲ, ꓟ ꓫ. ꓪˍ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓚꓲ. ꓛꓬ ꓢꓯꓼ ꓕꓵꓼ ꓪꓴꓽ ꓧꓶ ꓔˍ ꓟ ꓮ ꓙꓵꓽ ꓠꓬ ꓧꓶꓽ ꓚꓲ ꓗꓪ ꓬꓲꓻ ꓙꓬ ꓧꓳ. ꓧꓳꓽ ꓗꓷ ꓟ ꓡꓰ ꓐꓰ꓾ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓬꓲ ꓐꓬꓱꓽ ꓐꓳˍ ꓟ ꓡꓰ ꓮ ꓙꓵꓽ ꓠꓬ ꓞꓼ ꓐꓰ ꓟꓶꓽ ꓡꓰ ꓖꓴꓳ꓾ ꓐꓰ ꓓꓵꓽ ꓙꓽ ꓟꓶˍ ꓟ ꓪꓴ. ꓠꓬꓲ ꓥ ꓡꓳ꓿
ꓖꓳ ꓡꓱ ꓔꓳ, ꓜꓳꓽ ꓡˍ ꓟ ꓙꓵ, ꓕꓯ ꓣꓳ ꓢꓯꓼ ꓕꓵꓼ ꓗꓷ ꓟ ꓠꓬ ꓮ ꓫꓵꓽ ꓬꓲ. ꓬꓲ ꓢꓲˍ ꓟꓲ ꓟꓽ ꓙꓳ ꓓꓻꓳ꓾ ꓐꓰ ꓓꓵꓽ ꓙꓽ ꓟꓶ ꓡˍ ꓡꓳ꓿ ꓕꓱ ꓟ ꓠꓬ ꓚꓵ ꓚꓵ ꓠꓽ ꓟꓽ ꓥ꓿ ꓣꓳ ꓠꓬ ꓢꓯꓼ ꓕꓵꓼˍ ꓟ ꓬꓲ. ꓬꓲ ꓢꓲ ꓬꓲ ꓟ. ꓟꓲꓽ ꓔꓯ ꓟꓽ ꓙꓽ ꓜꓲꓼ ꓟ ꓥ ꓡꓳ꓿ ꓢꓯꓼ ꓕꓵˍ ꓟ ꓐꓯˍ ꓟ ꓠꓬ ꓧꓪ. ꓡꓰ ꓓꓴ ꓐꓱ ꓶˍ ꓡꓰꓽ ꓟꓽ ꓥ꓿ ꓟꓬꓽ ꓠꓬꓲ ꓠꓬ ꓖꓳ ꓡꓱ ꓢꓯꓼ ꓕꓵꓼ ꓗꓷ ꓟ ꓗꓪ ꓐꓰ ꓣꓳ ꓟꓶˍ ꓟ ꓢꓷ. ꓠꓲ, ꓐꓰ ꓔꓳ, ꓜꓳꓽ ꓠꓬꓲˍ ꓟ꓾ ꓣꓳ ꓣꓱꓽ ꓬꓰ ꓚꓱ, ꓟꓴꓽ ꓡ ꓟꓴ ꓡˍ ꓟ ꓥ ꓡꓳ꓿
ꓮ ꓘꓶ. ꓢꓯꓼ ꓕꓵꓼ ꓗꓷ ꓥ ꓟꓲ ꓟꓽ ꓧꓪ. ꓡꓰ ꓕꓯ ꓣꓳ ꓠꓬ ꓧꓪ. ꓡꓰˍ ꓟ ꓔꓯ ꓡꓰꓽ ꓥꓳ ꓡꓳ. ꓢꓲ ꓬꓰˍ ꓕꓯ ꓠꓽ ꓠꓲ, ꓟ ꓙꓬ ꓪˍ ꓥꓳ꓿ ꓖꓳ ꓡꓱ ꓥ ꓟꓲ ꓕꓱ ꓡꓱ ꓢꓯꓼ ꓕꓵꓼˍ ꓟ ꓗꓪ ꓐꓰ ꓣꓳ ꓮ ꓡꓲ ꓫꓵꓽ ꓔꓯ ꓢꓳ ꓣꓴ ꓟꓶ ꓡꓰ ꓡ꓾ ꓝꓮꓲ ꓕꓲ ꓧꓪ, ꓕꓯ ꓪ ꓜꓲ ꓙꓲ ꓡꓰ ꓠ ꓮ ꓡꓲ ꓬꓰ ꓠ ꓗ, ꓡ ꓐꓯˍ ꓟ ꓔꓯ ꓓꓵꓽ ꓙ ꓠꓬꓲ꓿ ꓕꓱ ꓟ ꓠꓬ ꓣꓳ ꓟꓶˍ ꓟ ꓬꓲ ꓮ ꓟꓬꓯꓼ ꓥ ꓡꓳ꓿ ꓮ ꓫꓵꓽ ꓪꓴ. ꓠꓬꓲ ꓥ ꓡ ꓐꓯˍ ꓠꓬ ꓐꓬ ꓡꓰ ꓟ ꓮꓽ ꓔꓳ ꓗꓷ ꓡꓰ ꓟ ꓖꓴꓽ ꓙꓴꓽ ꓢꓶ. ꓟꓽ ꓞꓲꓺ ꓮ ꓡꓲ ꓕꓲ ꓣꓳˍ ꓟꓲ ꓘꓴꓽ ꓔꓯ, ꓙꓰ ꓟꓽ ꓠ ꓟ ꓢꓷ. ꓠꓲ, ꓐꓰ ꓬꓰ ꓗꓴ.ˍ ꓟ ꓠꓬ ꓪ ꓜꓲ ꓬꓲ ꓒꓵꓽ ꓒꓵꓽˍ ꓟ ꓑꓶ. ꓓꓴ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓣꓳ ꓢꓯꓼ ꓕꓵˍ ꓕꓯ ꓧꓪ. ꓡꓰ ꓠ, ꓟ ꓔꓯ ꓡꓰꓽ ꓟꓽ ꓥꓳ ꓡꓳ. ꓔˍ ꓔˍ ꓐꓰ ꓙꓲꓻ ꓓꓰ ꓡꓰ ꓠ ꓢꓯꓼ ꓕꓵꓼ ꓠ, ꓟ ꓬꓳ. ꓚꓰꓽˍ ꓡꓳ꓿ ꓕꓳꓽ ꓶ ꓬꓲ ꓔ. ꓧꓪ. ꓡꓰ ꓠ, ꓟ ꓢꓶ. ꓟꓽ ꓞꓲꓺ ꓕꓳꓽ ꓶ ꓕꓱ ꓟ ꓵ ꓢꓳˍ ꓟ ꓗꓪ ꓐꓰ ꓣꓳ ꓢꓷ. ꓠꓲ, ꓪꓴꓽ ꓡ ꓟꓴ ꓡ ꓠ, ꓟ꓾ ꓙꓽ ꓜꓲꓼ ꓢꓷ. ꓠꓲ, ꓪ ꓜꓲ ꓟꓬꓽ ꓡ ꓠ, ꓟ ꓐꓱ ꓶ ꓔꓶ ꓙꓱꓼ ꓗꓶ ꓢꓲ ꓢꓯꓼ ꓕꓵꓼ꓿ ꓶꓻ ꓡꓯꓼ ꓟꓬꓱꓽ ꓕꓲ ꓟ ꓬꓰˍ ꓕꓯ ꓥ ꓟꓲ ꓒꓴ ꓮ ꓟꓬ, ꓟꓶ ꓡ ꓠ, ꓟ ꓔꓯ ꓥꓳ ꓡꓳ.ˍ ꓟ ꓢꓶ. ꓟꓽ ꓞꓲꓺ ꓶꓻ ꓡꓯꓼ ꓟꓬꓱꓽ ꓕꓱ ꓟ ꓔꓯ ꓮ ꓡꓲ ꓐꓰ ꓙꓵꓽ ꓠ ꓗ, ꓡ꓾ ꓠꓱ. ꓐꓯ ꓢꓴ ꓐꓰ ꓮ ꓡꓲ ꓙ ꓡꓯ ꓘꓳ ꓠ ꓗ, ꓡ ꓐꓯˍ ꓟ ꓔꓯ ꓢꓳ ꓣꓴ ꓠ, ꓟ ꓪ ꓜꓲ ꓢꓯꓼ ꓕꓵꓼ꓿
ꓕꓱ ꓡꓱ ꓬꓰˍ ꓟ ꓗꓪ ꓐꓰ ꓣꓳ ꓥꓳ ꓡꓳ. ꓔˍ ꓟ ꓡꓰ ꓟꓽ ꓧꓪ. ꓡꓰ ꓥˍ ꓟꓲ ꓠꓲ, ꓟ ꓙꓬ ꓠꓲ, ꓟ ꓫ.ˍ ꓟ ꓢꓶ. ꓟꓽ ꓞꓲ꓾ ꓕꓱ ꓡꓱ ꓢꓯꓼ ꓕꓵꓼ ꓗꓷ ꓟ ꓗꓪ ꓐꓰ ꓕꓱ ꓟ ꓔꓯ ꓠꓬ ꓢꓳ ꓣꓴ ꓟꓶ ꓡꓰꓳ꓾ ꓐꓰ ꓓꓵꓽ ꓙ ꓟꓶ ꓢꓲ ꓢꓯꓼ ꓪ ꓒꓬꓱꓼ ꓡˍ ꓥꓳ꓿ ꓕꓱ ꓟ ꓠꓬ ꓮ ꓡꓲ ꓕꓲ ꓣꓳˍ ꓟꓲ ꓖꓶꓽ ꓟꓽ ꓐ ꓡ ꓟ ꓚꓲ. ꓛꓬ ꓢꓯꓼ ꓕꓵꓼˍ ꓟ ꓗꓪ ꓐꓰ ꓡꓰꓽ ꓟꓶ ꓐ ꓡˍ ꓟ ꓡꓯꓼ ꓫꓴ ꓓꓽ ꓟ ꓕꓲ ꓟ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓮ ꓡꓲ ꓕꓲ ꓫꓵꓽ ꓔꓯ ꓢꓯꓼ ꓕꓵꓼˍ ꓕꓯ ꓥ ꓟꓲ ꓟꓶ ꓡˍ ꓟ ꓧꓪ. ꓡꓰ ꓓꓴ ꓔꓯ ꓡꓰꓽ ꓟꓬꓽ ꓠꓬꓲ ꓕꓽ ꓥꓳ ꓡꓳ. ꓔ꓿ ꓮ ꓟꓶ ꓬꓰ ꓔꓬ ꓟ ꓔꓯ ꓡꓰꓽ ꓪ ꓜꓲ ꓙꓲꓻ ꓡꓰ ꓠ, ꓟ ꓢꓯꓼ ꓕꓵꓼ ꓣꓱꓽ ꓬꓰ꓿ ꓖꓳ ꓡꓱ ꓢꓲ. ꓡꓰꓽ ꓢꓯꓼ ꓕꓵꓼ ꓔˍ ꓟ ꓟꓽ ꓧꓪ. ꓡꓰ ꓕꓯ ꓠꓲ, ꓟ ꓟꓼ ꓙꓬ ꓡꓰ ꓡꓰ ꓐꓰ꓾ ꓣꓳ ꓟꓶ ꓗꓷ ꓟ ꓬꓲ ꓒꓵꓽ ꓙꓳˍ ꓟ ꓔꓯ ꓟꓳꓻ ꓡˍ ꓥꓳ꓿ ꓤꓶꓻ ꓗꓪ ꓢꓯꓼ ꓕꓵꓼˍ ꓕ ꓑꓳꓸꓼ ꓟꓽ ꓒꓬꓱꓼ ꓡ ꓟ ꓬꓲ ꓙꓵ, ꓙꓳˍ ꓥꓳ꓿ ꓟꓬꓽ ꓠꓬꓲ ꓬꓳ. ꓚꓰꓽˍ ꓟ ꓠꓬ ꓕꓱ ꓡꓱ ꓫ. ꓓꓴ ꓗꓪ ꓐꓰ ꓮ ꓡꓲ ꓢꓳ ꓣꓴ ꓢꓲ ꓮ ꓡꓲ ꓝ. ꓢꓲ ꓙꓰ ꓠ ꓗ, ꓡ꓾ ꓐꓯˍ ꓟ ꓡꓰꓽ ꓥ ꓡꓳ꓿
