ꓝꓲ‐ꓓꓴ ꓒꓳ‐ꓡꓳ ꓐꓰ ꓝꓲ ꓓꓴ ꓒꓲ‐ꓕꓱ ꓑꓮꓲꓽ ꓦꓬꓼ ꓠꓬꓲ (St. Peter and Paul)
ꓧꓪ. ꓧꓪ ꓠꓬꓲ. ꓠꓬꓲ ꓠꓬ ꓝꓲ ꓓꓴ ꓒꓳ‐ꓡꓳ ꓐꓰ ꓝꓲ ꓓꓴ ꓒꓲ‐ꓕꓱ ꓐꓴ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿ ꓝꓲ ꓓꓴ ꓒꓳ‐ꓡꓳ ꓐꓰ ꓒꓲ‐ꓕꓱ ꓐꓴ ꓠꓬꓲꓽ ꓣꓳ ꓠꓬ ꓢꓲꓺ ꓒ ꓬꓰ‐ꓢꓴ ꓐꓱ ꓶ ꓬꓲ ꓪ ꓢꓯꓼ ꓟꓬ ꓔꓯ ꓖꓶ ꓗꓷ ꓗꓪ ꓛꓲ ꓪ ꓴ‐ꓢ ꓟꓬꓱꓽ ꓗꓪ ꓢꓯꓼ ꓕꓵꓼ ꓗꓷ ꓢꓴ ꓐꓴ ꓥ ꓡꓳ꓿
ꓝꓲ ꓓꓴ ꓒꓲ‐ꓕꓱ ꓠꓬ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ (12) ꓣꓳ ꓔꓯ ꓧꓳꓽ ꓪꓴ ꓟꓴ ꓢꓴ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓐꓰ ꓟꓽ ꓜꓲꓼ ꓗꓷ ꓟ ꓙꓵ, ꓔꓯ ꓬꓲ ꓠꓬ ꓖ‐ꓡꓲ‐ꓡꓲ ꓟꓵꓽ ꓗꓪ ꓥꓪ. ꓒꓽ ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓔꓯ ꓡꓳ. ꓟꓳ ꓡꓰ ꓗ. ꓠꓯ ꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓯ, ꓗꓪ ꓛꓳꓽ ꓢꓴ ꓕꓲ ꓣꓳ ꓒꓬꓱꓼ ꓡ ꓪ꓿
ꓟꓔ ꓕꓳ ꓶ 4ꓽ18‐19 ꓝꓲ ꓗꓪ ꓬꓰ‐ꓢꓴ ꓠꓬ ꓖ‐ꓡꓲ‐ꓡꓲ ꓬꓲꓻ ꓡꓳ ꓐꓱ ꓘꓡꓽ ꓗꓪ ꓫꓱꓽ ꓔꓬ ꓕꓯ ꓥꓪ. ꓢꓰꓼ ꓒꓽ ꓒ‐ꓕꓱ ꓟꓬꓱ ꓔ ꓟꓢꓲ‐ꓟꓴˍ ꓐꓰ ꓬꓲ ꓠꓬꓲ ꓤ ꓯ‐ꓓꓱ‐ꓣꓴ ꓬꓲ ꓪ ꓠꓬꓲꓽ ꓫꓵ. ꓬꓲꓻ ꓡꓴꓽ ꓐꓱ ꓗꓪ ꓥꓪ. ꓓꓳꓽ ꓔꓬ ꓟ ꓔꓯ ꓬꓲ ꓟꓳꓻ ꓡꓳ꓿ ꓖꓳ ꓔꓯ ꓬꓲ ꓡꓰ ꓬꓲ ꓪ ꓔꓯ꓾ ꓥꓪ ꓔꓯ ꓛꓳ ꓡꓯ꓾ ꓥꓪ ꓡꓰ ꓠꓴ ꓪ ꓔꓯ ꓡ ꓞꓳ ꓧꓪ ꓢꓴ ꓒꓬꓱꓼ ꓡ ꓝꓲˍ ꓥꓳ ꓐꓯ ꓖꓶ ꓡꓳ꓿
ꓝꓮꓲ ꓬꓳ‐ꓦ ꓕꓳ ꓶ 21ꓽ15 ꓝꓲ. ꓗꓪ ꓬꓲ ꓪ ꓠꓯꓼ ꓜ ꓜꓽ ꓗꓷ ꓠꓬ ꓬꓰ‐ꓢꓴ ꓡꓰ ꓢꓲ‐ꓟꓴ ꓕꓲ‐ꓕꓱ ꓔꓯ ꓬꓳ‐ꓦ ꓬꓲ ꓮ‐ꓐꓲ ꓢꓲ‐ꓟꓴꓳ ꓕꓱ ꓟꓬ ꓟ ꓕꓯꓽ ꓢꓲ ꓠꓴ ꓥꓪ ꓔꓯ ꓠꓲ, ꓠꓵ ꓡˍ ꓐꓰ ꓠ ꓠꓬꓲ ꓕꓯ ꓬꓲ ꓡꓰ ꓥꓳ꓾ ꓢꓲꓺ ꓒꓽꓳ ꓠꓴ ꓔꓯ ꓥꓪ ꓠꓲ, ꓠꓵ ꓟ ꓠꓴ ꓢꓷ. ꓡꓳ ꓐꓯ ꓡꓳ꓿ ꓬꓰ‐ꓢꓴ ꓡꓰ ꓬꓲ ꓔꓯ ꓥꓪ ꓮ ꓣꓳ ꓔꓯ ꓚ. ꓖꓶ꓾ ꓐꓯ ꓡꓳ꓿
ꓝꓮꓲ ꓟ‐ꓕꓳ ꓶ 16ꓽ 17‐18 ꓝꓲ ꓗꓪ ꓡꓳ. ꓟꓳ ꓪ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓥꓪ ꓠꓬ ꓪꓴ‐ꓢ ꓗꓴꓷꓼ ꓜꓳ ꓜꓴ ꓠꓴ ꓔꓯ ꓖꓶˍ ꓥꓳ꓿ ꓐꓰ ꓐꓯ ꓖꓶ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓡꓰ ꓔꓲ ꓔ ꓟ ꓘꓴ ꓜꓲꓼ ꓞꓳ ꓔꓯ ꓝꓲ ꓓꓴ ꓒꓲ‐ꓕꓱ ꓔꓯ ꓧꓳꓽ ꓪꓴ. ꓟꓴ ꓠ, ꓟ ꓪꓴ. ꓓꓴ ꓣꓱ ꓠ, ꓟ ꓢꓲ, ꓔ ꓟ ꓥ ꓡꓳ꓿ ꓝꓲ ꓓꓴ ꓠꓬ ꓢꓲꓺ ꓒ ꓬꓰ‐ꓢꓴ ꓐꓰ ꓮ ꓕꓯ ꓥ ꓟꓲ ꓕꓲ ꓪ ꓔꓬ ꓢꓴ ꓝꓲ ꓓꓴ ꓕꓲ ꓣꓳ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓝꓲ ꓓꓴ ꓒꓲ‐ꓕꓱ ꓠꓬ ꓢꓽ ꓧꓪ ꓠ, ꓠꓬ ꓗꓷ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓟꓴ ꓗꓪ ꓗꓴꓷꓼ ꓗꓪ ꓓꓯ ꓙꓰ ꓗ. ꓠꓯ ꓝꓲ ꓓꓴ (12) ꓣꓳ ꓗꓪ ꓢꓲꓺ ꓒ ꓬꓰ‐ꓢꓴ ꓔꓯ ꓪꓴꓽ ꓜ ꓗꓷ ꓢꓴ ꓬꓴ‐ꓔ ꓬꓲ ꓛꓲ ꓝꓲ ꓓꓴ ꓟ‐ꓔꓲ‐ꓬ ꓔꓯ ꓢꓲ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓬꓰ ꓗꓷ ꓟꓥ ꓡꓳ꓿
ꓝꓲ ꓓꓴ ꓒꓲ‐ꓕꓱ ꓠꓬꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓗꓪ ꓝꓴꓲ ꓙꓳ ꓢꓴ ꓟꓲ ꓠꓯ ꓡ ꓞꓳ ꓔꓯ ꓫꓵꓻ ꓙ ꓖꓶ ꓢꓴ ꓢꓲꓺ ꓒ ꓥ ꓟ ꓐꓰ ꓬꓲ ꓠꓯ, ꓗꓪ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓙꓳ ꓟ ꓚꓱ, ꓔꓯ ꓟꓲ ꓠꓯ ꓡ ꓞꓳ ꓐꓴ ꓔꓯ ꓟ. ꓟꓲꓽ ꓚꓺ ꓖꓶ ꓢꓴ ꓥ ꓡꓳ꓿
ꓮꓓ( 45) ꓘꓳꓼ ꓕꓯ ꓙꓱ‐ꓣꓴ‐ꓢ‐ꓡꓱ ꓗꓪ ꓖꓪ ꓙꓱ ꓜꓲꓼ ꓓꓴ ꓓꓽ ꓟ ꓬꓰ ꓓꓳ ꓗ. ꓠꓯ ꓝꓲ ꓓꓴ ꓒꓲ‐ꓕꓱ ꓠꓬ ꓣꓳ‐ꓟ ꓗꓴꓷꓼ ꓗꓪ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓚꓺ ꓟ. ꓖꓶ ꓠ, ꓟ ꓣꓳ‐ꓟ ꓗꓴꓷꓼ ꓗꓪ ꓙꓰ ꓡꓰ ꓟ ꓥ ꓡꓳ꓿
ꓮꓓ (65) ꓘꓳꓼ ꓕꓯ ꓣꓳ‐ꓟ ꓗꓴꓷꓼ ꓔꓯ ꓙꓵꓽ ꓢꓴ ꓪ ꓔꓲ ꓠꓬ ꓠꓰ‐ꓣꓳ ꓪ ꓔꓲ ꓥ ꓡꓳ꓿ ꓝꓮꓲ ꓖꓳ ꓕꓲ ꓙꓵ, ꓗꓪ ꓘꓴ ꓜꓲꓼ ꓞꓳ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓣꓳ‐ꓟ ꓪ ꓔꓲ ꓐꓴ ꓠꓬ ꓫ. ꓓꓴ ꓟꓷ ꓓꓴ ꓮ ꓟꓬ, ꓖꓶ ꓢꓲ ꓠꓬ ꓢꓰꓼ ꓟ ꓙꓵ, ꓟꓲ ꓥ ꓡꓳ꓿
ꓕꓱ ꓡꓰ ꓐꓰ ꓝꓲ ꓓꓴ ꓒꓲ‐ꓕꓱ ꓔꓯ ꓥ ꓟꓲ ꓮꓓ(65) ꓘꓳꓼ ꓕꓯ ꓠꓰ‐ꓣꓳ ꓪ ꓔꓲ ꓡꓰ ꓖꓳ‐ꓡ‐ꓖꓳ‐ꓔ ꓪꓽ ꓛꓲ ꓗꓪ ꓡꓯꓼ ꓐꓳ ꓔꓲ ꓓꓴ ꓔꓯ ꓳ ꓔꓲ. ꓑ ꓢꓲ ꓠꓬꓲ ꓢꓰꓼ ꓗꓷ ꓟ ꓥ ꓡꓳ꓿
ꓝꓲ ꓓꓴ ꓒꓳ‐ꓡꓳ ꓠꓬ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓦꓻ ꓡꓱ ꓡ ꓗ. ꓠꓯ ꓬꓲ ꓠꓬ ꓮ ꓟꓬ, ꓛꓲ ꓙꓵꓻ ꓠꓲ, ꓙꓳ ꓢꓴ ꓕꓲ ꓣꓳ ꓥ ꓡꓳ꓿ ꓝꓲ ꓓꓴ ꓒꓳ‐ꓡꓳ ꓪꓴ‐ꓢ ꓟꓽ ꓦꓻ ꓡꓱ ꓢꓲ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴꓗ. ꓠꓯ ꓢꓲ ꓛꓳꓽ ꓢꓴ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓢꓴ ꓕꓲ ꓣꓳ ꓥ ꓡꓳ꓿
ꓝꓲ ꓓꓴ ꓒꓳ‐ꓡꓳ ꓠꓬ ꓟꓽ ꓦꓻ ꓡ ꓢꓲ ꓟ ꓙꓵ, ꓕꓯ ꓔ‐ꓟ‐ꓢꓷ ꓡꓳ ꓒꓱ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓠ, ꓟ ꓙꓰ ꓟ ꓙꓵ, ꓕꓯ ꓬꓲ ꓪ ꓢꓲꓺ ꓒ ꓬꓰ‐ꓢꓴ ꓡꓰ ꓢꓷ. ꓡꓲ ꓓꓴ ꓟꓳ. ꓖꓶ ꓟ ꓪꓴ. ꓠꓬꓲ ꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓦꓻ ꓡꓱ ꓡ ꓪ꓿
ꓝꓲ‐ꓓꓴ ꓕꓳ ꓶ 9ꓽ 18 (ꓖꓳ ꓕꓯ ꓞꓼ ꓐꓰ ꓬꓲ ꓟꓬ ꓢꓶꓽ ꓗꓪ ꓐꓰ ꓬꓲ ꓓꓵꓼ ꓡꓰ ꓐꓰ ꓗ, ꓟ ꓕꓲ ꓫꓵꓽ ꓞꓰ ꓡꓰ ꓠꓬ ꓠꓬꓲ ꓟꓳ ꓡꓺꓳ꓿ ꓖꓳ ꓡꓱ ꓠꓬ ꓬꓲ ꓔꓴ ꓡ ꓢꓲ ꓖꓳ ꓓꓱ ꓔꓲ, ꓟꓶˍ ꓡꓳ꓿ ꓖꓳ ꓡꓱ ꓢꓲ ꓜ ꓜꓽ ꓗꓷ ꓠꓬ ꓢꓯꓼ ꓙꓳ ꓡ ꓡꓳ꓿
ꓝꓲ ꓓꓴ ꓒꓳ‐ꓡꓳ ꓠꓬ ꓮ‐ꓫ‐ꓟ‐ꓠ ꓟꓵꓽ ꓐꓰ ꓖꓣꓰꓰꓗ ꓟꓵꓽ ꓗꓪ ꓪꓴ‐ꓢ ꓶꓼ ꓓꓳ ꓫꓱ, ꓓꓳ ꓔꓯ ꓮ ꓟꓬ, ꓚꓺ ꓟ. ꓖꓶ ꓢꓴ ꓕꓲ ꓣꓳ ꓥ ꓡꓳ꓿ ꓝꓲ ꓓꓴ ꓒꓳ‐ꓡꓳ ꓡꓰ ꓪꓴ‐ꓢ ꓶꓼꓓꓳ ꓫꓱ, ꓓꓳꓽ ꓟ. ꓟꓲꓽ ꓚꓺ ꓗꓷ ꓟ ꓟꓵꓽ ꓮ ꓟꓬ, ꓗꓪ ꓪꓴ‐ꓢ ꓦꓻ ꓡꓱ ꓡ ꓢꓴ ꓮ ꓟꓬ, ꓔꓬ ꓡ ꓟ ꓥ ꓡꓳ꓿
ꓬꓲ ꓠꓬ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓐꓴ ꓘꓴꓽ ꓗꓪ ꓙꓰ ꓢꓲ ꓠꓬꓲ ꓪꓴ‐ꓢ ꓶꓼ ꓓꓳ ꓫꓱ, ꓓꓳ ꓔꓯ ꓚꓺ ꓢꓴ ꓥ ꓡꓳ꓿ ꓝꓲ ꓓꓴ ꓒꓳ‐ꓡꓳ ꓡꓰ ꓐꓳ ꓔ ꓟ ꓢꓲꓽ ꓫꓬ ꓕꓳ ꓶ ꓮ ꓟꓬ, ꓔꓯ ꓣꓳ ꓡꓳ. ꓟꓳ ꓪ ꓟ ꓥꓡꓳ꓿
ꓝꓲ ꓓꓴ ꓒꓳ‐ꓡꓳ ꓡꓰ ꓐꓳ ꓔ ꓟ ꓢꓲꓽ ꓫꓬ ꓕꓳ ꓶ ꓔꓯ ꓘꓶꓼ ꓫꓵꓼ ꓫꓵꓼ ꓢꓲꓽ ꓫꓬ ꓕꓳ ꓶ ꓗꓪ ꓗꓷ ꓔ ꓟ ꓥ ꓡꓳ꓿ ꓝꓲ‐ꓓꓲ ꓒꓳ‐ꓡꓳ ꓠꓬ ꓬꓲ ꓟꓶ ꓕꓲ ꓧꓪ, ꓬꓲ ꓪꓴ‐ꓢ ꓟ. ꓟꓲꓽ ꓚꓺ ꓗꓷ ꓟ ꓙꓰ ꓗꓷ ꓟ ꓔꓲ, ꓠꓬ ꓙꓱ‐ꓣꓴ‐ꓢ‐ꓡꓱ ꓗꓪ ꓥ ꓡꓳ꓿
ꓬꓴ‐ꓔ ꓡ ꓞꓳ ꓐꓴ ꓔꓬ ꓟ ꓔꓲ, ꓗꓪ ꓢꓲꓺ ꓒ ꓬꓰ‐ꓢꓴ ꓶꓻ ꓓꓳꓽ ꓫꓱ, ꓓꓳ ꓚꓺ ꓟ. ꓖꓶ ꓔꓬ ꓟ ꓙꓵ, ꓗꓪ ꓬꓴ‐ꓔ ꓡ ꓞꓳ ꓐꓴ ꓔꓯ ꓬꓲ ꓔꓯ ꓣꓴ ꓟꓶ ꓡꓰ ꓟ ꓥ ꓡꓳ꓿
ꓝꓲ ꓓꓴ ꓒꓲ‐ꓕꓱ ꓐꓰ ꓝꓲ ꓓꓴ ꓒꓳ‐ꓡꓳ ꓐꓴ ꓠꓬꓲꓽ ꓣꓳ ꓠꓬ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓗꓪ ꓢꓯꓼ ꓕꓵꓼ ꓗꓷ ꓟ ꓪꓴ. ꓠꓬꓲ ꓘꓴ ꓜꓲꓼ ꓞꓳ ꓠꓬ ꓬꓲ ꓠꓬꓲ ꓪ ꓔꓯ ꓟꓬꓱꓺ ꓓꓳꓽ ꓖꓶ ꓟ ꓑꓮꓲꓼ ꓦꓬꓼ ꓠꓬꓲ ꓔꓯ ꓬꓰ ꓗꓷ ꓟ ꓥ ꓡꓳ꓿
ꓦꓻ ꓡꓱ ꓢꓴ ꓪ ꓔꓲ ꓥ ꓟ ꓚꓳꓠꓢꓔꓲꓠꓰ ꓪꓽ ꓘꓴ ꓔꓯ ꓬꓲ ꓠꓬꓲꓽ ꓪ ꓧꓪꓽ ꓖꓳ ꓓꓱ ꓔꓯ ꓮ ꓘꓶ. ꓛꓲ ꓪꓴꓽ ꓟ ꓪꓽ ꓘꓴ ꓦꓲꓻ ꓫꓬ, ꓢꓲ ꓠꓬꓲ ꓔꓵ, ꓖꓶ ꓔ ꓟꓥ ꓡꓳ꓿
ꓠꓬꓲ. ꓠꓬꓲ ꓝꓲ ꓓꓴ ꓒꓲ‐ꓕꓱ ꓐꓰ ꓝꓲ ꓓꓴ ꓒꓳ‐ꓡꓳ ꓔꓵ, ꓔ ꓟ ꓡꓯꓼ ꓜꓳ ꓔꓯ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓬꓲ ꓚꓲ. ꓥ ꓟ ꓦꓮꓔꓲꓚꓮꓠ ꓡꓳ ꓒꓱ ꓝꓲ ꓓꓴ ꓒꓲ‐ꓕꓱ ꓪꓽ ꓘꓴ ꓦꓲꓻ ꓘꓴꓽ ꓗꓪ ꓡꓳ. ꓟꓳ ꓓꓽ ꓟ ꓥ ꓡꓳ꓿ ꓮ ꓙꓵꓽ ꓢꓴ ꓔꓯ ꓮ ꓘꓶ. ꓫ. ꓟꓳ
