ꓮ ꓕꓯ ꓥˍꓟꓲ ꓣꓳ ꓔꓯ ꓠꓲ., ꓠꓵ ꓔꓬ ꓢꓴ ꓠꓬ ꓮꓽ ꓐ ꓮ ꓟ ꓥ ꓡꓳ꓾
ꓮꓽ ꓐ ꓮ ꓟ ꓐꓯ, ꓟ ꓠꓬ ꓞꓳ ꓤ ꓕꓲ ꓣꓳ ꓤꓶ., ꓠꓯ.ꓼ ꓗꓪ ꓓꓽ ꓪꓴ ꓛꓲ ꓡ ꓟ ꓗꓪ ꓐꓰ ꓣꓳ ꓔꓯ ꓠꓬꓲ ꓙ ꓡꓳ. ꓙ ꓔꓬ ꓟ ꓬꓲ. ꓒꓵꓽ ꓞꓷ, ꓟꓽꓓˍꓟ ꓕꓲ ꓫꓵꓽ ꓥ ꓡꓳ꓿ ꓮꓽ ꓐ ꓮ ꓟ ꓠꓵ., ꓠꓲ, ꓔꓯ ꓐꓯ ꓥꓳꓽ ꓐꓰ ꓐꓯ ꓠꓬ ꓕꓱ ꓡꓱ ꓫꓵꓽ ꓬꓲꓽ ꓚꓱ, ꓗꓪ ꓐꓰ ꓢꓷ. ꓪ ꓓ ꓡꓳ꓿
ꓮꓽ ꓐ ꓮ ꓟ ꓠꓵ., ꓠꓲ, ꓠꓬ ꓣꓳ ꓠꓯ.ꓼ ꓗꓪ ꓐꓰ ꓕꓲ ꓫꓵꓽ ꓫꓵꓽ ꓪ ꓡ ꓥꓳ ꓐꓰ ꓟꓽ ꓓꓵ ꓙ ꓙ ꓣꓳ ꓔꓯ ꓠꓲ., ꓠꓵ ꓟ ꓥ ꓡꓳ꓿ ꓣꓳ ꓤ ꓣꓳ ꓠꓱ ꓐꓴ ꓮꓽ ꓡꓰ ꓗꓷ ꓡꓰ ꓥˍꓟꓲ ꓕꓲ ꓟꓲ ꓡꓰ ꓗꓪ ꓔꓬ ꓟ ꓞꓳ ꓤ ꓐꓴ ꓮꓽ ꓙꓵꓽ ꓣꓳ ꓔꓯ ꓠꓲ., ꓜꓳ ꓡꓰ ꓥˍꓟꓲ ꓬꓲ. ꓟꓶ ꓗꓪ ꓠꓬ ꓣꓳ ꓔꓯ ꓠꓲ., ꓠꓵ ꓢꓲ꓾ ꓣꓳ ꓑ ꓕꓲ ꓗꓪ ꓔꓬ ꓖꓶ ꓡ ꓢꓴ ꓠꓬ ꓮꓽ ꓐ ꓮ ꓟ ꓥ ꓡꓳ꓿
ꓣꓳ ꓤ ꓣꓳ ꓠꓱ ꓐꓴ ꓙꓲˍꓟ ꓤꓶ., ꓗꓪ ꓔꓬ ꓐ ꓡ ꓠ, ꓟ ꓐꓱ ꓶ ꓐꓰ ꓢꓷ. ꓠꓲ., ꓙꓳ ꓢꓴ꓾ ꓐꓳ ꓢꓴ ꓒꓬꓱꓼ ꓡ ꓠ, ꓟ ꓐꓱ ꓶ ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓬꓲ. ꓪ ꓬꓲ. ꓙꓵ꓾ ꓬꓲ. ꓪ ꓤꓶ., ꓮ ꓙꓵꓽ ꓔꓯ ꓣꓳ ꓐꓱ ꓶ ꓖꓶ ꓦ ꓟ ꓥ ꓡꓳ꓿ ꓚꓳ ꓡꓳ ꓚꓳ ꓫꓵꓼ ꓗꓪ ꓮꓽ ꓡꓰ ꓔꓬ ꓠꓽ ꓗ. ꓟ ꓐꓰ ꓮ ꓡꓰ ꓫꓵꓽ ꓠꓬ ꓥꓳ ꓡꓰ ꓟ꓾ ꓮ ꓡꓰ ꓬꓰ ꓠꓬ ꓜꓳˍꓟ ꓕꓱ ꓡꓱ ꓣꓳ ꓔꓯ ꓟ. ꓖꓶ ꓡ ꓟ ꓓꓽ ꓪꓴ ꓟ. ꓒ ꓟ. ꓟ ꓐꓴ ꓥ ꓡꓳ꓿
ꓣꓳ ꓤꓶ., ꓗꓪ ꓕꓲ ꓫꓵꓽ ꓫꓵꓽ ꓑꓶ. ꓓꓴ ꓠꓲ., ꓟ ꓫ. ꓔꓬ ꓕꓯ ꓫ. ꓓꓴ ꓕꓳꓽ ꓜꓳꓼ ꓔꓬ ꓕꓯ ꓮꓽ ꓐ ꓮꓽ ꓟ ꓠꓵ., ꓠꓲ, ꓐꓰ ꓳ ꓟꓶ ꓠꓬ ꓟꓲ ꓠꓯ ꓕꓯ ꓢꓲ ꓗꓪ ꓢꓲ ꓡꓲˍꓟ ꓐꓰ ꓠꓲ., ꓟ ꓗ, ꓛꓲ ꓓꓴ ꓙꓳˍꓟ ꓥ ꓡꓳ꓿ꓖꓳ ꓟ ꓑꓶ. ꓓꓴ ꓠꓲ., ꓠꓵˍꓟ ꓬꓲꓽ ꓤ ꓠꓬꓲꓽ ꓤ ꓐꓴꓳ꓾ ꓣꓳ ꓮꓽ ꓐ ꓮ ꓟ ꓟꓲ ꓠꓯ ꓗꓪ ꓔꓬ ꓟ ꓕꓲ ꓑ ꓗꓪ ꓬꓲꓽ ꓪ ꓬꓰ ꓠꓲ., ꓫꓵˍꓟ ꓐꓰ ꓬꓲꓽ ꓪ ꓜꓽ ꓠꓲ., ꓫꓵˍꓟ ꓮꓽ ꓙꓵ ꓔꓯ ꓖꓶ ꓜ ꓪ ꓡꓰ ꓝꓲ꓿ ꓬꓲꓽ ꓪ ꓐꓱ ꓶ ꓮꓽ ꓕꓯ ꓥˍꓟꓲ ꓪꓽ ꓘꓴ ꓙ ꓪ ꓡꓰ ꓝꓲ꓿ ꓬꓲꓽ ꓪ ꓠꓲ., ꓟ ꓢ ꓠꓽ ꓔꓬ ꓪ ꓡꓰ ꓝꓲ=
