ꓣꓳ ꓠꓬ꓾ ꓢꓴ ꓡꓰ ꓣꓳ ꓔꓯ ꓮ ꓡꓲ ꓬꓰ ꓖꓶ ꓡ ꓝꓲ ꓠꓲ, ꓫꓵˍ ꓠꓬ ꓠꓱ. ꓐꓯ ꓢꓴ ꓔꓯ ꓥˍ ꓟꓲ ꓖꓳ ꓡꓱ ꓬꓰ ꓖꓶ ꓠ, ꓟ꓾ ꓫꓵꓺ ꓙꓵꓽ ꓗ ꓔꓯ ꓬꓰ‐ꓢꓴ ꓙꓲ‐ꓢꓴ ꓡꓰ ꓣꓳ ꓔꓯ ꓖꓶ ꓔꓲ. ꓬꓰ ꓟ ꓥ ꓡꓳ꓿ ꓕꓵꓼ ꓪ ꓕꓱ ꓟ ꓠꓬ ꓙꓵꓽ ꓗ ꓕꓲ ꓟˍ ꓡꓰꓽ ꓟꓽ ꓥ ꓥ꓾ ꓪꓴ‐ꓢ ꓬꓲ ꓠꓵ ꓠꓲ, ꓔꓯ ꓖꓴ ꓟꓳ. ꓖꓶˍ ꓟ ꓞꓳ ꓤ ꓕꓲ ꓣꓳ ꓐꓰ ꓕꓲ ꓣꓳ ꓗꓶ ꓠ ꓔˍ ꓟ ꓠꓵ ꓠꓲ, ꓥ ꓟ ꓔꓯ꓾ ꓣꓳ ꓢꓷ. ꓔ ꓠ ꓗ, ꓡꓳ꓿
ꓢꓲꓽ ꓫꓬ ꓕꓳꓽ ꓶ ꓗꓪ ꓬꓰ‐ꓢꓴ ꓡꓰ ꓐꓯ ꓔ ꓟ ꓡꓰ ꓐꓰ ꓪꓴ‐ꓢ ꓡꓰ ꓣꓳ ꓔꓯ ꓠꓲ, ꓠꓵˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓠꓵ ꓡꓯ ꓘꓳ ꓠ, ꓟ ꓬꓳ. ꓚꓰꓽˍ ꓡꓳ꓿ ꓠꓵ ꓠꓲ, ꓖꓳ ꓟ ꓠꓬ ꓕꓯꓽ ꓢꓲ ꓕꓲ ꓒꓳ, ꓗꓪ ꓠꓵ ꓠꓲ, ꓟ. ꓖꓶˍ ꓟ ꓡꓰꓽ ꓟꓽ ꓥ꓿ ꓠꓵ ꓠꓲ, ꓖꓳ ꓟ ꓠꓬ ꓚꓵ ꓚꓵ ꓙꓽ ꓗꓳ ꓠꓲ,꓾ ꓢꓴ ꓐꓱ ꓶ ꓔꓲꓺ ꓖꓶˍ ꓟ ꓠꓲ, ꓟ ꓐꓰ ꓠꓯꓸꓼ ꓘꓪ ꓗꓪ ꓐꓰ ꓓꓳ ꓡˍ ꓟ ꓔꓱ, ꓚꓵˍ ꓟ ꓙꓳ ꓠ ꓔˍ ꓡꓳ꓿
ꓣꓳ ꓐꓱ ꓶ ꓣꓳˍ ꓟ ꓗ ꓘꓶꓽ ꓐꓯˍ ꓟ ꓠꓬ ꓢꓴ ꓔꓯ ꓟꓽ ꓠ ꓠ, ꓟ ꓔꓯ ꓟꓽ ꓬꓰ ꓬꓰ ꓫꓱ. ꓤ ꓙ ꓗꓳ ꓖꓶˍ ꓟ꓾ ꓠꓲ, ꓙꓳꓺˍ ꓟ ꓢꓶ. ꓟꓽ ꓞꓲꓺ ꓖꓽ ꓖꓶ ꓗꓴ.ˍ ꓟ꓾ ꓚꓲ. ꓛꓬ ꓐꓱ ꓶˍ ꓡꓰꓽ ꓓꓵꓽ ꓙˍ ꓟ ꓔꓯ ꓟꓽ ꓬꓰ ꓬꓰ ꓖꓶ ꓠꓲ, ꓒꓴˍ ꓟ ꓠꓲ, ꓟ ꓙꓳˍ ꓟ꓾ ꓕꓱ ꓡꓱ ꓫꓵꓽ ꓔꓯ ꓐꓯˍ ꓟ ꓥ ꓡꓳ꓿ ꓙ ꓖꓴ ꓕꓱ ꓟ ꓔꓯ ꓫꓱꓽ ꓙꓰˍ ꓟ ꓗꓪ ꓠꓱ. ꓐꓯ ꓢꓴ ꓣꓱꓽ ꓬꓯꓼ ꓣꓱꓽ ꓞ, ꓟ ꓔꓯ ꓓꓵꓽ ꓙꓽ ꓟꓶ ꓖꓶ ꓗꓴ.ˍ ꓟ ꓠꓲ, ꓟ ꓥˍ ꓟꓲ ꓓꓯ,ˍ ꓟ ꓥ ꓡꓳ꓿ ꓛꓴꓽ ꓙꓳ ꓡꓯ ꓘꓳˍ ꓟ ꓔꓯ ꓠꓽ ꓗꓷ ꓢꓲ ꓢꓲ ꓡꓲ ꓟ ꓔꓯ ꓣꓱꓽ ꓬꓰ ꓠ, ꓟ꓾ ꓠꓲ, ꓟ ꓙꓬ ꓗꓴ.ˍ ꓟ ꓔꓯ ꓟꓽ ꓬꓰ ꓬꓰ ꓠꓲ, ꓟ ꓫꓵ ꓗꓴ.ˍ ꓟ ꓜꓲꓽ ꓘꓴ ꓠꓲ, ꓙꓳˍ ꓟ꓾ ꓢꓴ ꓔꓯ ꓐꓯ ꓞꓷ, ꓓꓵꓽ ꓙꓽ ꓞꓷ, ꓟ ꓗꓪˍ ꓟ ꓫꓱ. ꓤ ꓗꓴ. ꓠ, ꓟ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓖꓶ ꓡˍ ꓟ ꓫꓵꓺ ꓙꓵꓽ ꓗ ꓥ ꓟ “ꓢꓴ ꓡꓰ ꓠꓴ ꓪ ꓔꓯ ꓮ ꓡꓲ ꓬꓰ ꓖꓶ ꓡ ꓝꓲ ꓠꓲ, ꓫꓵˍ ꓠꓬ꓾ ꓠꓴ ꓪˍ ꓟꓲ ꓢꓴ ꓔꓯ ꓖꓳ ꓡꓱ ꓬꓰ ꓖꓶ” ꓐꓰ ꓐꓯˍ ꓟ ꓐꓯ ꓘꓶꓽ ꓗꓪ ꓐꓰ ꓣꓳ ꓔꓯ ꓘꓴꓻ ꓔꓬ ꓟ ꓥ ꓡꓳ꓿
