ꓟ‐ꓕꓲ 7ꓽ1‐5
ꓣꓳ ꓮ ꓙꓵ ꓠꓬ ꓠꓱ. ꓐꓯꓼ ꓢꓴ ꓔꓯ ꓢ ꓢ ꓤ ꓡꓰ ꓐꓯ ꓟꓴ ꓘꓶꓽ ꓗꓴ._ ꓡꓳ ꓕꓱ ꓟ ꓔꓯ ꓮ ꓘꓶ. ꓤ ꓟꓳ ꓠ, ꓟ ꓠꓬꓲ. ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓰ ꓘꓴ ꓔ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓚꓲ. ꓛꓬ ꓔꓯ ꓐꓯ ꓟꓴ ꓟꓽ ꓞꓷ, ꓡ ꓠ, ꓟ ꓢꓴ ꓔꓯ ꓐꓯ ꓟꓴ ꓞꓷ, ꓓꓴ ꓕꓽ ꓬꓰ ꓐꓰ ꓐꓯ ꓔ ꓟ ꓥ ꓡꓳ꓿
ꓕꓱ ꓟ ꓠꓬ ꓠꓱ. ꓐꓯꓼ ꓢꓴ ꓟꓽ ꓙꓲ ꓟ ꓬꓰ_ ꓟ ꓔꓯ ꓐꓯ ꓔꓳ, ꓟ ꓐꓱ ꓶ ꓟꓽ ꓥ꓾ ꓣꓳ ꓥ ꓟꓲ ꓕꓱ ꓡꓱ ꓙꓵ, ꓕꓯ ꓪꓴ‐ꓢ ꓣꓱ ꓛꓰ ꓐꓰ ꓖꓽ ꓖꓶ ꓟ ꓔꓯ ꓣꓱ ꓬꓯꓼ ꓡꓳ ꓐꓰ ꓠꓲ, ꓟ ꓗꓪ ꓗꓶ ꓓꓵꓽ ꓙ ꓔ ꓠ, ꓟ ꓥ ꓡꓳ꓿ ꓚꓲ. ꓛꓬ ꓔꓱ, ꓚꓲ ꓛꓬ ꓙ ꓟꓶ ꓓꓴ ꓬꓰ ꓡꓯ꓾ ꓠꓱ. ꓐꓯꓼ ꓢꓴ ꓠꓯꓼ ꓗꓪ ꓟꓳ ꓪ ꓟ ꓝꓴꓲ꓾ ꓠꓻ ꓓꓴ꓾ ꓢꓯꓼ ꓐ ꓓꓴ ꓙꓳ_ ꓟ ꓓꓰ ꓢ ꓚꓲ. ꓛꓬ ꓗꓪ ꓙꓳ_ ꓟ ꓠꓬ ꓟꓬ ꓠꓬꓲ ꓟꓬ, ꓟ ꓔꓯ ꓡꓳ. ꓟꓳ ꓡꓰ ꓗꓴ._ꓡꓳ꓿ ꓢꓴ ꓔꓯ ꓐꓯ ꓟꓴ ꓞꓷ, ꓗꓴ._ ꓟ ꓠꓬ ꓚꓲ. ꓛꓬ ꓠꓬ ꓐꓲ ꓜꓲꓼ ꓢꓴ ꓟꓽ ꓥ ꓟ ꓔꓯ ꓟꓲ ꓡꓰ ꓝꓲ ꓗꓴ._ ꓡꓳ꓿ ꓢꓴ ꓔꓯ ꓢꓲ ꓒꓽ ꓡꓰ ꓡꓳ. ꓟꓳ_ ꓟ ꓡꓰ ꓐꓰ ꓡꓳ. ꓟꓳ ꓠꓬ ꓣꓳ ꓟꓲ ꓠꓯ ꓡ ꓞꓳ ꓠꓬ ꓕꓲꓽ ꓣꓳ ꓛꓳ ꓕꓲꓽ ꓣꓳ ꓝꓴꓲ ꓓꓰ ꓟ꓾ ꓝꓴꓲ ꓧꓪ, ꓟ ꓓꓰ ꓢ ꓕꓲꓽ ꓣꓳ ꓐꓰ ꓕꓲ ꓣꓳ ꓬꓰ ꓙ ꓔꓳ, ꓙ ꓗꓴ. ꓢꓲ꓾ ꓟꓬ ꓠꓬꓲ ꓡꓳ. ꓐꓲ_ ꓟ ꓙꓻ ꓡꓯꓽ ꓘꓳ ꓓꓴ ꓔꓯ ꓫꓬ, ꓔꓶꓻ ꓐ ꓡ ꓥꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓠꓱ. ꓐꓯꓼ ꓢꓴ ꓔꓯ ꓐꓯ ꓟꓴ ꓞꓷ, ꓟ ꓟꓽ ꓬꓰ ꓢꓲ ꓕꓯ ꓚꓲ. ꓛꓬ ꓢꓯꓼ ꓐ ꓟ ꓔꓯ ꓧꓶ. ꓕꓯ ꓠꓬꓲ. ꓠ. ꓠ, ꓟ ꓫꓬ, ꓠ, ꓟ ꓣꓳ ꓮ ꓙꓵ ꓔꓯ ꓘꓵ ꓔ ꓟ ꓥ ꓡꓳ꓿
