ꓪꓴ‐ꓢ ꓣꓱ ꓛꓰ ꓠꓬ ꓬꓲ. ꓒꓵꓽ ꓟꓽ ꓣꓴ ꓖꓶ ꓔ ꓟ ꓥ ꓢꓲ꓾ ꓣꓳ ꓝꓮꓲ ꓐꓱꓻ ꓖꓶ ꓠ ꓗ, ꓡꓳ꓿
ꓠꓽ ꓦꓬꓼ ꓠꓬꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵ, ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓪꓴ‐ꓢ ꓫꓱ. ꓤ ꓠꓵꓻ ꓠꓲ, ꓐꓰ ꓣꓱ ꓛꓰ ꓠꓬ ꓐꓲ ꓜꓲꓼ ꓟ ꓐꓰ ꓬꓰ‐ꓢꓴ ꓙꓲ‐ꓢꓴ ꓬꓲ ꓖꓽ ꓖꓶ ꓠꓲ, ꓔꓯ ꓟꓲ ꓠꓯ ꓡ ꓞꓳ ꓮ ꓙꓵꓽ ꓠꓯꓼ ꓗꓪ ꓢꓷ. ꓙ ꓟꓳ ꓙ ꓠ, ꓟ ꓙꓲ‐ꓢꓴ ꓢꓲ ꓤ ꓐꓴ ꓮ ꓙꓵ ꓠꓯꓼ ꓗꓪ ꓬꓲ. ꓚꓱ, ꓙꓳ_ ꓡꓳ ꓐꓰ ꓐꓯ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ ꓖꓳ ꓕꓲ ꓠꓬꓲ ꓶꓼ ꓓꓳꓽ ꓫꓱ, ꓓꓳꓽ (ꓟ‐ꓘꓳ 9ꓽ36‐10ꓽ8) ꓗꓪ ꓐꓰ ꓓꓵꓽ ꓙ ꓪꓴ ꓧꓶ ꓢꓲ ꓥꓳ ꓡꓳ. ꓓꓴ ꓟꓶꓽ ꓡꓰ ꓔꓬ ꓟ ꓞꓳ ꓜꓴꓻ ꓓꓽ ꓟ” ꓔꓯ ꓟꓳ ꓕꓯ ꓫꓱ. ꓤ ꓟ ꓢꓲ ꓒ ꓬꓰ‐ꓢꓴꓔꓯ ꓓꓵꓽ ꓙ ꓓꓴ ꓬꓰ ꓡꓯ꓿
“ꓪꓴ‐ꓢ ꓤ ꓔꓲ ꓠꓬ ꓟꓲ ꓠꓯ ꓡ ꓞꓳ ꓐꓴ ꓔꓯ ꓠꓬꓲ. ꓠ. ꓡꓳ꓾ ꓞꓳ ꓫꓵ ꓮ ꓙꓵ ꓔꓯ ꓡꓳ. ꓙ ꓡꓳ꓾ ꓟꓽ ꓔꓱ, ꓟ ꓑꓶ ꓓꓴ ꓓꓵ ꓙ ꓫ. ꓢꓴ ꓔꓯ ꓢꓯꓼ ꓪ ꓖꓶ_ ꓡꓳ꓾ ꓜꓲ ꓜꓲ ꓟꓴ ꓟꓴ ꓬꓰ_ ꓢꓴ ꓔꓯ ꓟꓳ ꓡꓳ꓾” “ꓢꓰꓼ ꓡꓯ ꓘꓳ ꓓꓴ ꓑꓶ ꓓꓴ ꓫ. ꓙꓵ ꓔꓬ ꓢꓴ ꓟꓲ ꓠꓯ ꓡ ꓞꓳ ꓐꓴ ꓠꓲ, ꓦꓯ, ꓟ ꓔꓯ ꓡꓳ. ꓟꓳ ꓡꓳ꓾” ꓐꓲ. ꓞ, ꓔꓬ ꓟ ꓞꓳ ꓤ ꓒꓬꓱ ꓟꓬ ꓟꓽ ꓙꓲ_ ꓟ ꓑꓶ ꓓꓴ ꓐꓬ ꓡꓰ ꓔꓬ ꓟ ꓕꓲ ꓦꓲꓻ ꓡ ꓞꓳ ꓐꓴ ꓐꓰ ꓟꓽ ꓙꓲ_ ꓟ ꓥꓳ ꓡꓳ. ꓓꓴ ꓬꓲ. ꓔꓶꓻ ꓙꓱꓼ ꓑꓶ ꓓꓴ ꓙ ꓖꓴ ꓥꓳꓽ ꓡꓰ ꓔꓬ ꓟ ꓞꓳ ꓡꓱ ꓤ ꓐꓴ ꓔꓯ ꓢꓲ ꓒꓽ ꓡꓳ. ꓟꓳ_ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓟꓳ ꓢꓲ ꓠꓲ, ꓠꓵꓻ ꓟ꓾ ꓢꓲ ꓒꓽ ꓬꓲ ꓫꓱ. ꓤ ꓠꓲ, ꓠꓬ ꓬꓲꓼ ꓠꓬꓲ ꓤ ꓡꓰ ꓐꓰ ꓠꓶꓽ ꓞ, ꓟ ꓡꓰ ꓟꓽ ꓞꓲ ꓣꓳ ꓔꓯ ꓚꓬꓴ ꓙ ꓠꓲ, ꓫꓵ_ ꓟ ꓥ ꓟꓲ ꓥ ꓡꓳ꓿
“ꓮ. ꓣꓳ ꓡꓳ. ꓒꓽ ꓟꓽ ꓔꓬ ꓟ ꓮ. ꓣꓳ ꓜꓴ ꓡꓰ ꓐꓰ” ꓗꓷ ꓔꓬ ꓟ ꓞꓳ ꓜꓴꓻ ꓓꓽ ꓟ ꓔꓯ ꓟꓳ ꓕꓯ ꓢꓲ ꓒꓽ ꓬꓰ‐ꓢꓴ ꓠꓬ ꓫ. ꓙꓵ ꓟꓷꓼ ꓙꓵ ꓔꓳ, ꓜꓳ ꓢꓴ ꓮ ꓙꓵ ꓔꓯ ꓪꓴ‐ꓢ ꓬꓲ ꓔꓬ ꓢ ꓟ ꓔꓯ ꓖꓶ ꓠ, ꓟ ꓙꓲ‐ꓢꓴ ꓬꓲ ꓛꓳꓽ ꓒꓯ, ꓐꓴ ꓔꓯ ꓟꓲ ꓠꓯ ꓗꓪ ꓝꓲ ꓩꓴ ꓡ ꓟ ꓥ ꓡꓳ꓿ ꓙꓲ‐ꓢꓴ ꓢꓲ ꓤ ꓐꓴ ꓗꓪ ꓐꓰ ꓥ ꓟꓲ ꓣꓳ ꓚꓲ. ꓛꓬ ꓙꓵꓽ ꓪ ꓠꓬ “ꓫ. ꓢꓴ ꓟꓷꓼ ꓢꓴ ꓔꓬ ꓟ ꓔꓶ. ꓗꓪ ꓫꓱ. ꓤ ꓠꓲ,꓾ ꓫ. ꓙꓵ ꓟꓷꓼ ꓙꓵ ꓔꓬ ꓟ ꓔꓶ. ꓗꓪ ꓥꓳ ꓡꓳ. ꓓꓴ ꓟꓽ ꓔꓬ ꓟ ꓔꓶ. ꓗꓪ ꓙꓵꓻ ꓠꓲ, ꓔꓯ” ꓖꓶ ꓠ, ꓟ ꓥ ꓡꓳ ꓐꓰ ꓢꓯꓼ ꓖꓶ ꓔ ꓡꓳ꓿
ꓢꓲ ꓫꓬ ꓕꓳ ꓶ ꓗꓪ ꓒꓲ‐ꓕꓱ ꓗꓪ ꓐꓰ ꓬꓴ‐ꓓ ꓗꓪ ꓛꓲ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓟꓬꓱꓺ ꓔꓯ ꓟ. ꓖꓶ ꓔ ꓟ ꓠꓬ ꓢꓲ ꓒꓽ ꓬꓰ‐ꓢꓴ ꓬꓲ. ꓛꓳꓽ ꓒꓯ, ꓐꓴ ꓬꓲ. ꓪ ꓚꓲ. ꓛꓬ ꓥ ꓟꓲ ꓢꓲ ꓒꓽ ꓔꓯ ꓪꓴꓽ ꓜ ꓗꓷ ꓟ ꓔꓯ ꓢꓷ. ꓡꓰ ꓝꓲ ꓟ ꓕꓲꓽ ꓟ ꓥ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓶꓼ ꓓꓳꓽ ꓫꓱ, ꓓꓳꓽ ꓠꓬ ꓬꓲ. ꓘꓳꓼ ꓮ ꓟꓬ, ꓗꓳ. ꓙꓰ ꓡ ꓥ ꓟꓲ ꓮ ꓕꓯ ꓟꓲ ꓕꓲꓽ ꓡꓲ, ꓔꓬ ꓢꓲ꓾ ꓮ ꓕꓯ ꓟꓲ ꓡꓲ, ꓙꓰ ꓟ ꓔꓯ ꓖꓶ ꓐ ꓡ ꓟ ꓢꓯ. ꓔꓬ ꓟ ꓔꓱ, ꓟ ꓪꓴ‐ꓢ ꓐꓯ ꓘꓶꓽ ꓐꓰ ꓔꓬ ꓟ ꓥ ꓡꓳ꓿
ꓶꓼ ꓓꓳꓽ ꓫꓱ, ꓓꓳꓽ ꓔꓯ ꓚꓵ ꓚꓵ ꓛꓳ ꓫꓱꓽ ꓕꓯ ꓟꓽ ꓙꓲ_ ꓟ ꓗꓪ ꓐꓰ ꓟꓶꓽ ꓡꓰ ꓟ꓾ ꓢꓲ ꓒꓽ ꓑꓶ ꓓꓴ ꓫꓵꓻ ꓟ ꓔꓯ ꓢꓯ. ꓬꓲꓼ ꓡ ꓟ ꓗꓪ ꓐꓰ ꓧꓪ. ꓡꓰ ꓟ ꓡꓰ ꓐꓰ ꓟꓽ ꓙꓲ_ ꓟ ꓮ ꓙꓵ ꓐꓬ ꓡꓰ ꓟ ꓥꓳ꓿
ꓢꓲ ꓒꓽ ꓡꓯꓼ ꓫꓴꓻ ꓠꓬ ꓬꓲ. ꓒꓵꓽ ꓟꓽ ꓣꓴ ꓖꓶ_ ꓟ ꓥ ꓡꓳ꓿ ꓮ ꓫꓵ ꓑꓶ ꓓꓴ ꓐꓯ ꓠꓬ ꓬꓲ. ꓒꓵꓽ ꓠꓬ ꓐꓯ ꓖꓴ ꓟꓽ ꓓ ꓮ ꓘꓶ. ꓒꓵꓽ_ ꓟ ꓑꓶ ꓓꓴ ꓥ ꓡꓳ꓿ ꓕꓱ ꓟ ꓔꓯ ꓚꓲ. ꓛꓬ ꓔꓱ, ꓚꓲ. ꓛꓬ ꓪ ꓟꓶ ꓠ, ꓟ (ꓥ ꓠꓬ) ꓪꓴ ꓠ, ꓟ ꓠꓬ ꓒꓬꓱꓼ ꓡꓰ ꓟꓽ ꓓ꓾ ꓣꓱ ꓛꓰ ꓠꓬ ꓣꓳ ꓮ ꓗꓪ ꓔꓬ ꓥ ꓟꓲ ꓢꓲ ꓒꓽ ꓠꓯꓼ ꓗꓪ ꓧꓳꓽ ꓔꓯ, ꓖꓶ ꓠ, ꓟ ꓧꓪ ꓔꓬ ꓟ ꓪꓴ‐ꓢ ꓬꓲ. ꓫꓱ. ꓤ ꓠꓵꓻ ꓠꓲ, ꓐꓰ ꓐꓲ ꓞ, ꓟ ꓟꓬꓱꓺ ꓓꓳꓽ ꓡꓰ ꓥ ꓡꓳ꓿
ꓬꓲ. ꓟꓶꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ ꓙꓲ‐ꓢꓴ ꓢꓲ‐ꓤ ꓐꓴ ꓗꓪ ꓐꓰ ꓫ. ꓢꓴ ꓔꓯ ꓬꓰ ꓙ_ ꓟ꓾ ꓔꓱ, ꓟ ꓐꓱ ꓶ ꓢꓯꓼ ꓕꓵꓼ ꓠ, ꓟ꓾ ꓪꓴ‐ꓢ ꓖꓽ ꓖꓶ ꓟ ꓔꓯ ꓟꓲ ꓯ ꓗꓪ ꓢꓷ. ꓙ ꓟꓳ ꓙ ꓢꓲ ꓢ‐ꓢꓲ‐ꓠ ꓟꓬꓱꓽ ꓬꓰ ꓠ, ꓟ ꓢꓯꓼ ꓖꓶ ꓡꓳ꓿
ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓖꓶ ꓡ ꓟ ꓢ‐ꓢꓲ‐ꓠ ꓟꓬꓱꓽ ꓔꓯ ꓠꓲ, ꓡꓱ ꓗ, ꓛꓲ ꓢꓲ ꓑꓶ ꓑꓶ. ꓡꓰ ꓢꓯꓼ ꓕꓵꓼ ꓠ, ꓟ ꓐꓱ ꓶ ꓣꓱ ꓛꓰ ꓐꓰ ꓐꓲ ꓞ, ꓟ ꓟ, ꓟ ꓟ‐ꓡꓲ ꓠꓯꓼ ꓗꓪ ꓪꓽ ꓘꓴ ꓢꓲ ꓢꓯꓼ ꓪ ꓣꓴ ꓓꓴ ꓬꓰ ꓡꓯ ꓐꓰ ꓢꓯꓼ ꓖꓶ ꓔ ꓡꓳ꓿
