ꓣꓳ ꓮ ꓙꓵꓽ ꓢꓴ ꓔꓬ ꓦꓲꓻ ꓓ ꓠꓬ ꓠꓻ ꓒꓬ ꓔꓬ ꓡꓳ (Common home)
ꓧꓪ ꓧꓪ ꓠꓬꓲ. ꓠꓬꓲ ꓟꓵꓽ ꓘꓳ, ꓡ ꓟ ꓚꓱ, ꓗꓪ ꓐꓰ ꓣꓳ ꓔꓬ ꓟ ꓦꓲꓻ ꓘꓴꓽ ꓓ ꓠꓬ ꓠꓻ ꓒꓬ ꓓꓴ ꓓ ꓔꓳ, ꓜꓳ ꓔꓬ ꓡꓳ ꓐꓰ ꓐꓯ ꓟ ꓡꓮꓴꓓꓮꓔꓳ ꓢꓲ ꓕꓳ ꓶ ꓑꓷꓠ ꓗꓪ ꓐꓰ ꓐꓯ ꓟ. ꓖꓶ ꓓꓴ ꓥ ꓡꓳ꓿
ꓮ ꓟꓶ ꓟ ꓙꓵ, ꓗꓪ ꓟꓶ ꓞ ꓮ ꓘꓶ. ꓞ ꓡ ꓟ ꓐꓰ ꓬꓲꓻ ꓙꓬ ꓙꓵꓽ ꓟ ꓮ ꓟꓬ, ꓫꓵꓽ ꓔꓯ ꓔꓳ, ꓜꓳ ꓔꓬ ꓟ ꓔꓯ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓔꓳ, ꓜꓳ ꓔꓬ ꓟ ꓥ ꓡꓳ꓿ ꓕꓱ ꓟ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓣꓳ ꓮ ꓙꓵꓽ ꓢꓴ ꓔꓬ ꓦꓲꓻ ꓓꓽ ꓦꓲꓻ ꓠꓬ ꓠꓻ ꓓꓴ ꓒꓬ ꓓꓴ ꓓ ꓟ ꓔꓳ, ꓜꓳ ꓔꓬ ꓟ ꓑꓶ. ꓓꓴ ꓥ ꓡꓳ꓿
ꓟꓬ‐ꓟ ꓗꓴꓷꓼ ꓗꓪ ꓮ ꓟꓶ ꓟ ꓙꓵ, ꓗꓪ ꓟꓶ ꓞ ꓮ ꓘꓶ. ꓞ ꓡ ꓟ ꓑꓶ. ꓓꓴ ꓟꓳ‐ꓓꓳ ꓐꓬ ꓡꓰ ꓟ ꓓꓳꓽ ꓔꓯ ꓡꓳ. ꓟꓳ ꓗꓷ ꓟ ꓥ ꓡꓳ꓿ ꓖꓳ ꓟ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓒꓬꓱꓼ ꓡ ꓟ ꓫꓵꓽ ꓪꓴꓽ ꓥ ꓡꓳ꓿ ꓝꓮꓲ ꓖꓳ ꓟ ꓡꓰ ꓟꓽ ꓞꓲ ꓟꓲ ꓠꓯ ꓦꓲꓻ ꓓꓽ ꓠꓬ ꓮ ꓘꓶ. ꓛꓲ ꓠꓻ ꓒꓬ ꓓꓴ ꓔꓳ, ꓜꓳ ꓔꓬ ꓡꓳ ꓐꓰ ꓘꓴꓽ ꓔꓬ ꓟ ꓥ ꓡꓳ꓿
ꓡꓮꓴꓓꓮꓔꓳ ꓢꓲ ꓕꓳ ꓶ ꓠꓬ ꓟꓲ ꓠꓯ ꓗꓪ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓮ ꓡꓲ ꓐꓰ ꓬꓰ ꓠꓯ, ꓟ ꓚꓱ, ꓔꓯ ꓐꓯ ꓖꓶ ꓔ ꓟ ꓕꓳ ꓶ ꓥ ꓟ ꓪꓴ. ꓠꓬꓲ ꓮ ꓟꓬ, ꓙꓲ ꓟ ꓕꓳ ꓶ ꓑꓷꓠ ꓥ ꓡꓳ꓿
ꓕꓱ ꓕꓳ ꓶ ꓗꓪ ꓟꓲ ꓠꓯ ꓗꓪ ꓣꓳ ꓔꓬ ꓟ ꓦꓲꓻ ꓓ ꓡꓰ ꓟꓽ ꓞꓲ ꓣꓳ ꓦꓲꓻ ꓗꓪ ꓔꓬ ꓟ ꓮ ꓬꓲ ꓠꓬꓲ ꓤ ꓐꓴ ꓡꓰ ꓐꓰ ꓦꓲꓻ ꓘꓴꓽ ꓗꓪ ꓔꓬ ꓟ ꓮ ꓟ ꓟꓲ ꓠꓯ ꓐꓰ ꓪꓽ ꓟ ꓥ ꓡꓳ꓿
ꓟꓲ ꓠꓯ ꓗꓪ ꓣꓳ ꓮ ꓙꓵꓽ ꓢꓴ ꓔꓬ ꓟ ꓟ, ꓟ ꓡꓰ ꓐꓰ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓟꓲ ꓠꓯ ꓡ ꓞꓳ ꓐꓴ ꓡꓰ ꓬꓲ ꓚꓱ, ꓟꓽ ꓙꓳ ꓙꓳ ꓒꓴ ꓫꓵ ꓧꓪ ꓟ ꓠꓲ ꓦꓴ ꓙꓵꓽ ꓟ ꓑꓶ. ꓓꓴ ꓣꓳ ꓟ, ꓟ ꓟꓲ ꓠꓯ ꓠꓬ ꓠꓻ ꓓꓴ ꓒꓬ ꓓꓴ ꓓ ꓟ ꓔꓳ, ꓜꓳ ꓔꓬ ꓟ ꓥ ꓡꓳ꓿
1 ꓠꓬ ꓔꓧꓣꓳꓪꓮꓪꓮꓬ ꓚꓴꓡꓔꓴꓣꓰ ꓐꓯ ꓟ ꓕꓲ ꓧꓪ, ꓣꓱ ꓗꓷ ꓢꓲ ꓠꓬꓲ ꓡꓳ ꓗꓷ ꓟ ꓥꓳꓽ ꓡꓰ ꓟ ꓫꓱ ꓙꓳ ꓟ ꓔꓯ ꓤ ꓟꓳ ꓠ, ꓟ ꓥ ꓡꓳ꓿ ꓠꓬꓲ. ꓠꓬꓲ ꓠꓴ ꓥꓪ ꓠꓬ ꓑꓡꓮꓢꓔꓲꓚ ꓐꓰ ꓬꓲꓻ ꓙꓬ ꓐꓴ ꓕꓲ ꓟꓲꓠꓴꓔꓰꓢ ꓡꓰ ꓣꓱ ꓢꓲ ꓠꓬꓲ ꓡꓳ ꓗꓷ ꓟ ꓪꓴ. ꓠꓬꓲ ꓟꓲ ꓠꓯ ꓠꓬ ꓑꓶ ꓛꓵꓽ ꓡꓰ ꓐꓲ ꓔꓬ ꓟꓲ ꓠꓯ ꓒꓬꓱꓼ ꓔꓬ ꓟ ꓥ ꓡꓳ꓿
ꓖꓳ ꓟ ꓡꓰ ꓟꓽ ꓞꓲ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓡ ꓟ ꓔꓯ ꓞꓳ ꓫ. ꓐꓴ ꓠꓬ ꓮ ꓘꓶ. ꓛꓲ ꓔꓳ, ꓜꓳ ꓢꓴ ꓡ ꓞꓳ ꓐꓴ ꓥ ꓡꓳ꓿ ꓝꓮꓲ ꓖꓳ ꓟ ꓡꓰ ꓟꓽ ꓞꓲ ꓣꓳ ꓞꓳ ꓡꓱ ꓞꓳ ꓡꓯ. ꓐꓴ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓮ ꓟꓬ, ꓔꓳ, ꓜꓳ ꓡ ꓓꓴ ꓙꓳ ꓟ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓬꓲꓻ ꓙꓬ ꓙꓵꓽ ꓟꓵꓽ ꓡꓶꓽ ꓡ ꓟ ꓠꓬ ꓟꓲ ꓠꓯ ꓔꓯ ꓐꓬ ꓡꓰ ꓝꓲ ꓟ ꓡꓰ ꓟꓽ ꓞꓲ ꓟꓲ ꓠꓯ ꓓꓲ ꓗꓪ ꓔꓬ ꓟ ꓟꓲ ꓠꓯ ꓡ ꓞꓳ ꓐꓴ ꓕꓲ ꓣꓳ ꓛꓳꓽ ꓕꓲ ꓣꓳ ꓬꓰ ꓙ ꓔꓳ, ꓙ ꓠ, ꓟ ꓣꓱ ꓞ ꓠꓲ, ꓔꓯ ꓥ ꓟꓲ ꓐꓬ ꓡꓰ ꓝꓲ ꓡꓳ ꓐꓰ ꓡꓮꓴꓓꓮꓔꓳꓢꓲ ꓡꓰ ꓐꓯ ꓟ. ꓖꓶ ꓔ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓟ ꓗꓽ ꓕꓽ ꓖꓶ ꓠ, ꓟ ꓣꓳ ꓮ ꓫꓵꓽ ꓬꓰ ꓠꓯ, ꓡ?
ꓣꓳ ꓮ ꓙꓵꓽ ꓢꓴ ꓒ ꓡ ꓟꓬ, ꓛꓲ ꓢꓲ, ꓜꓲ ꓔꓶ ꓠ, ꓟ ꓢꓯꓼ ꓕꓵꓼ ꓡꓯ꓿ ꓝꓮꓲ ꓣꓳ ꓮ ꓙꓵꓽ ꓢꓴ ꓟꓲ ꓠꓯ ꓔꓯ ꓠꓵꓻ ꓠꓲ, ꓙꓳ ꓠ, ꓟ ꓢꓯꓼ ꓕꓵꓼ ꓿ ꓟꓲ ꓠꓯ ꓔꓯ ꓠꓲ, ꓠꓵ ꓠꓬ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓚꓱ, ꓔꓯ ꓤ ꓟꓳ ꓡꓰ ꓟ ꓥ ꓡꓳ꓿
ꓝꓮꓲ ꓣꓳ ꓓꓲ ꓡꓰ ꓢꓴ ꓐꓴ ꓔꓯ ꓬꓰ ꓙ ꓣꓳ ꓢꓯꓼ ꓕꓵꓼ ꓡꓯ꓿
ꓞꓳ ꓡꓱ ꓕꓲ ꓐꓱ ꓫ. ꓕꓱ ꓖꓴ ꓟ ꓙꓳ ꓡꓳ ꓥꓪ ꓠꓲ, ꓫꓵ ꓪ ꓡꓰ ꓢꓯ. ꓔꓬ ꓟ ꓣꓳ ꓙꓳ ꓟ ꓒꓴ ꓫꓵ ꓔꓯ ꓥꓪ ꓐꓱ ꓶ ꓡꓰ ꓣꓱ ꓢꓲ ꓠꓬꓲ ꓜ ꓠꓬꓲ ꓓꓳ ꓠꓬꓲ ꓞꓳ ꓙꓳ ꓔꓬ ꓓꓴ ꓥꓳ ꓐꓰ ꓓꓴ ꓙ ꓖꓴ ꓢꓴ ꓟꓲ ꓙꓳ ꓡꓳ꓿ ꓖꓳ ꓟ ꓔꓯ ꓥꓪ ꓑꓶ. ꓓꓴ ꓟꓲ ꓠꓯ ꓦꓲꓻ ꓓ ꓐꓰ ꓠꓱ. ꓐꓯ ꓢꓴ ꓥꓪ ꓑꓶ. ꓓꓴ ꓠꓻ ꓓꓴ ꓒꓬ ꓓꓴ ꓟꓽ ꓙꓳ ꓡꓰ ꓝꓲ ꓠ, ꓟ ꓢꓯꓼ ꓕꓵꓼ ꓠ, ꓟ ꓥ ꓡꓳ꓿
ꓖꓳ ꓡꓱ ꓠꓬ ꓞꓳ ꓡꓱ ꓐꓴ ꓮ ꓡꓲ ꓐꓰ ꓟꓵꓽ ꓘꓳꓼ ꓒꓳ, ꓡ ꓚꓱ, ꓗꓽ ꓕꓽ ꓟꓬꓱꓺ ꓬꓰ ꓠꓯ, ꓡ ꓐꓯ ꓠꓬ
ꓠꓬꓲ. ꓠꓬꓲ ꓠꓴ ꓥꓪ ꓚꓲ. ꓛꓬ ꓗꓳ. ꓗꓷ ꓟ ꓙꓵ, ꓕꓯ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓚꓱ, ꓔꓯ ꓟꓬꓱꓽ ꓬꓰ ꓗꓷ ꓟ ꓔꓯ ꓓꓵ ꓙ ꓒꓳ, ꓡꓶꓽ ꓠ, ꓟ ꓥ ꓡꓳ꓿
ꓣꓱ ꓬꓯꓼ ꓟ ꓕꓯ ꓢꓲ ꓟꓽ ꓣꓱ ꓠ, ꓟ ꓥ ꓡꓳ꓿ ꓬꓲꓻ ꓙꓬ꓾ ꓜ ꓫꓵ ꓓꓳ ꓫꓵ꓾ ꓮ ꓔꓳ ꓙ ꓕꓱ ꓡꓱ ꓫꓵꓽ ꓔꓯ ꓣꓳ ꓣꓱ ꓬꓯꓼ ꓠ, ꓛꓲ ꓡꓰ ꓣꓱ ꓟ ꓔꓯ ꓐꓯ ꓟ ꓥ ꓡꓳ꓿
ꓝꓮꓲ ꓑꓡꓮꓢꓔꓲꓚ ꓣꓱ ꓟ ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓟꓶ ꓤ ꓣꓱ ꓙ ꓟ ꓔꓯ ꓣꓱ ꓓꓴ ꓬꓰ ꓡꓯ꓿ ꓝꓮꓲ ꓢꓳꓚꓲꓮꓡ ꓟꓰꓓꓲꓮ ꓗꓪ ꓐꓰ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓗꓽ ꓕꓽ ꓠ,ꓟ ꓢꓷ. ꓠꓲ, ꓚꓴ, ꓬꓲ ꓔꓯ ꓖꓶ ꓠ, ꓟ ꓥ ꓡꓳ꓿
ꓖꓳ ꓡꓱ ꓛꓳꓽ ꓒꓯ, ꓐꓴ ꓟꓲ ꓠꓯ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓟꓬꓱꓽ ꓔꓯ ꓠꓴ ꓥꓪ ꓠꓯ, ꓗꓪ ꓐꓰ ꓬꓰ ꓐ ꓡ ꓟ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓐꓰ ꓪꓴ. ꓔꓴ ꓙꓰ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓚꓱ, ꓔꓯ ꓤ ꓟꓳ ꓠꓬ ꓣꓳ ꓮ ꓙꓵꓽ ꓢꓴ ꓔꓬ ꓦꓲꓻ ꓓ ꓔꓯ ꓠꓻ ꓒꓬ ꓓꓴ ꓟꓽ ꓙꓳ ꓡꓰ ꓝꓲ ꓠ, ꓟ ꓤ ꓟꓳ ꓓꓴ ꓬꓰ ꓡꓯ꓿
ꓮ ꓙꓵꓽ ꓢꓴ ꓔꓬ ꓟ ꓦꓲꓻ ꓓ ꓔꓯ ꓟꓬꓽ ꓠꓬ ꓠꓲ, ꓚꓵꓽ ꓚꓵꓽ ꓡꓰ ꓝꓲ ꓡꓯ꓿ ꓟꓬꓽ ꓠꓲ, ꓔꓬ ꓗ, ꓛꓲ ꓟꓲ ꓠꓯ ꓒꓬꓱꓼ ꓡ ꓝꓲ ꓠ, ꓟ ꓣꓳ ꓐꓴ ꓢꓯꓼ ꓕꓵꓼ ꓙꓰ ꓡꓯ꓿ ꓫ. ꓟꓳ ꓪ꓿
