ꓙꓵꓽ ꓗ ꓕꓳ ꓶ ꓐꓬ ꓡꓰ ꓟꓽ ꓓ ꓟ (reflection)
ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ ꓟꓲ ꓠꓯ ꓡꓳ ꓬꓰ ꓢꓲ ꓙꓵꓽ ꓗ ꓗꓪ ꓟ ꓮ ꓙꓵꓽ ꓐꓲ ꓡ ꓗꓪ ꓛꓲ꓾ ꓙꓵꓽ ꓗ ꓕꓳ ꓗꓪ ꓟ ꓕꓲ ꓔꓳ, ꓕꓲ ꓖꓳ ꓤ ꓟꓲ ꓟꓽ ꓐꓲ ꓡ ꓟꓽ ꓗꓷ ꓡꓰ꓿ ꓐꓰ ꓐꓯ ꓖꓶ ꓔ ꓟ ꓥ ꓡꓳ꓿
ꓧꓪ. ꓧꓪ ꓠꓬꓲ. ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 5ꓽ17‐19 ꓝꓲ. ꓗꓪ ꓛꓲ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓥꓪ ꓠꓬ ꓙꓵꓽ ꓗ ꓐꓰ ꓟꓷꓽ ꓠꓲ, ꓝ. ꓘꓶꓽ ꓔꓯ ꓐꓬ ꓡꓰ ꓐꓰ ꓐꓰ ꓡ ꓡꓳ ꓕꓽ ꓓꓴ ꓙ ꓐꓬ ꓡꓰ ꓐꓰ ꓡ ꓟ ꓟꓽ ꓥ ꓐꓲ ꓡꓰ ꓝꓲ ꓐꓰ ꓡ ꓟ ꓥ ꓡꓳ ꓐꓰ ꓐꓯ ꓖꓶ ꓔ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓘꓶꓼ ꓫꓵꓼ ꓡꓵ ꓗꓪ ꓐꓰ ꓢꓲꓽ ꓫꓬ ꓕꓳ ꓶ ꓔꓯ ꓐꓬ ꓡꓰ ꓝꓲ ꓠ, ꓟ ꓟꓽ ꓥ ꓐꓲ ꓜꓲꓼ ꓡꓰ ꓠ, ꓟ ꓥ ꓡꓳ ꓐꓰ ꓐꓯ ꓖꓶ ꓔ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓪꓴ‐ꓢ ꓙꓵꓽ ꓗ ꓞꓲ ꓙꓵꓽ ꓔꓯ ꓐꓲ ꓜꓲꓼ ꓡꓰ ꓠ, ꓟ ꓐꓱ ꓶ ꓣꓳ ꓠꓲ, ꓟ ꓘꓴꓽ ꓗꓪ ꓠꓵꓻ ꓠꓲ, ꓔꓯ ꓙꓳ ꓠ, ꓟ ꓐꓱ ꓶ ꓟ. ꓖꓶ ꓔ ꓟ ꓥ ꓡꓳ꓿
ꓔꓯꓺ ꓥꓳꓽ ꓐꓯ ꓠꓬ ꓡ ꓞꓳ ꓕꓽ ꓢꓰꓼ ꓪꓴ‐ꓢ ꓙꓵꓽ ꓗ ꓔꓯ ꓣꓳ ꓠꓲ, ꓟ ꓘꓴ ꓗꓪ ꓟꓽ ꓙꓲ ꓓꓴ ꓙ ꓟ꓾ ꓥꓴ ꓟ ꓢꓴ ꓔꓯ ꓠꓲ, ꓟ ꓟꓽ ꓢ ꓕꓱ ꓡꓰ ꓫꓵꓽ ꓔꓯ ꓟꓽ ꓓꓴ ꓙ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿
ꓝꓮꓲ ꓢꓲꓽ ꓫꓬ ꓕꓳ ꓶ ꓠꓬ ꓕꓲ ꓡꓰ ꓥ ꓟ ꓚꓱ, ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓪꓴ‐ꓢ ꓢꓲꓽ ꓫꓬ ꓕꓳ ꓶ ꓘꓶ ꓫꓵ ꓡꓵ ꓐꓰ ꓘꓶꓽ ꓫꓵ ꓫꓵꓼ ꓔꓯ ꓘꓶ ꓠ, ꓟ ꓟꓽ ꓥ꓿ ꓘꓶ ꓫꓵ ꓡꓵ ꓗꓪ ꓟꓷ ꓠꓷ ꓝ. ꓒ ꓐꓴ ꓡꓰ ꓚꓺ ꓔ ꓟ ꓚꓱ, ꓔꓯ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓐꓰ ꓐꓲ ꓜꓲ ꓡꓰ ꓝꓲ ꓟ ꓥ ꓡꓳ꓿
ꓕꓱ ꓡꓰ ꓟꓲ‐ꓢ ꓔꓶ ꓟ ꓙꓵ, ꓕꓯ ꓥ ꓟꓲ ꓘꓶ ꓫꓵ ꓡꓵ ꓢꓲꓽ ꓫꓬ ꓕꓳ ꓶ ꓔꓯ ꓧꓶ. ꓕꓯ ꓵꓻ ꓢꓲ ꓠꓬꓲ ꓘꓶꓼ ꓫꓵ ꓫꓵꓼ ꓢꓲꓽ ꓫꓬ ꓕꓳ ꓶ ꓔꓯ ꓵꓻ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓠꓴ ꓥꓪ ꓠꓬ ꓢꓲꓽ ꓫꓬ ꓕꓳ ꓶ ꓔꓯ ꓵꓻ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓔꓬ ꓢꓴ ꓒꓬꓱꓼ ꓔꓬ ꓡ?
ꓢꓲꓺ ꓒ ꓬꓰ‐ꓢꓴ ꓔꓶ ꓚꓰ. ꓖꓶ ꓟ꓾ ꓠꓬ ꓟꓲ‐ꓢ ꓔꓶ ꓓꓴ ꓗꓪ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓚꓲ. ꓛꓬ ꓔꓯ ꓖꓳ ꓡ ꓖꓳ ꓕ ꓪꓽ ꓚꓲ ꓗꓪ ꓔꓶ ꓖꓶ ꓟ ꓡꓰ ꓐꓰ ꓠꓬꓲ. ꓠꓬꓲ ꓟꓲ‐ꓢ ꓔꓶ ꓓꓴ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓔꓶ ꓚꓰ. ꓖꓶ ꓗꓷ ꓟ ꓔꓯ ꓠꓬꓲ. ꓠꓬꓲ ꓗꓪ ꓛꓲ ꓣꓳ ꓬꓰ ꓔꓬ ꓟ ꓥ ꓡꓳ꓿
ꓠꓴ ꓥꓪ ꓠꓬ ꓟꓲ‐ꓢ ꓔꓶ ꓓꓴ ꓗꓪ ꓣꓳ ꓦꓻ ꓢꓯꓼ ꓪ ꓘꓳ, ꓣꓴ ꓟꓶ ꓠ, ꓟ ꓢꓯꓼ ꓕꓵꓼ ꓢꓲ ꓠꓬꓲ ꓐ ꓗꓷ ꓡ ꓣꓳ ꓔꓯ ꓠ ꓠꓬꓲ ꓔꓬ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔ ꓟ ꓣꓳ ꓓꓲ ꓟ ꓕꓲ ꓔꓳ ꓤ ꓟꓲ ꓟꓽ ꓟꓶ ꓟꓽ ꓐꓬ ꓡꓰ ꓐꓰ ꓐꓯ ꓖꓶ ꓔ ꓟ ꓥ ꓡꓳ꓿ ꓠꓴ ꓥꓪ ꓠꓬ ꓣꓳ ꓦꓻ ꓕꓲ ꓒꓳ, ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓔꓯ ꓞꓳ ꓢꓲ ꓠꓬꓲ ꓣꓳ ꓤꓶꓻ ꓐꓰ ꓦꓻ ꓔꓯ ꓢꓲꓽ ꓫꓬ ꓡꓰ ꓠ, ꓟ ꓢꓯꓼ ꓕꓵꓼ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿
ꓢꓲꓽ ꓫꓬ ꓕꓳ ꓶ ꓔꓯ ꓣꓳ ꓚꓲ. ꓛꓬ ꓞꓳ ꓫꓱ, ꓠ, ꓟ ꓣꓳ ꓚꓵˍ ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔ ꓟ ꓢꓲꓺ ꓒ ꓐꓯ ꓘꓶꓽ ꓔꓯ ꓣꓳ ꓚꓲ. ꓛꓬ ꓞꓳ ꓢꓲ ꓠꓬꓲ ꓢꓴ ꓔꓯ ꓥ ꓟꓲ ꓟ. ꓖꓶ ꓢꓴ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓮ ꓘꓶ. ꓛꓲ ꓪꓴꓽ ꓢꓴ ꓒꓬꓱꓼ ꓡ ꓟ ꓥꓡꓳ ꓐꓰ ꓟ. ꓖꓶ ꓔ ꓟ ꓥ ꓡꓳ꓿
ꓙꓵꓽ ꓗ ꓗꓪ ꓐꓰ ꓟꓽ ꓥ ꓣꓱ ꓛꓰ ꓗꓪ ꓐꓰ ꓞꓳ ꓙꓳ ꓢꓯ. ꓔꓬ ꓠ, ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓪꓴ‐ꓢ ꓙꓵꓽ ꓔꓯ ꓐꓲ ꓜꓲꓼ ꓠ, ꓟ ꓐꓱ ꓶ ꓠꓵꓻ ꓠꓲ, ꓔꓴ ꓪ ꓔꓯ ꓖꓶ ꓔ ꓟ ꓥꓡꓳ꓿ ꓝꓮꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓮꓚꓣꓰꓟꓰꓠꓔꓢ) ꓣꓱ ꓛꓰ ꓡꓯ ꓫꓴ ꓔꓯ ꓖꓶ ꓔ ꓟ ꓥ ꓡꓳ꓿
ꓪꓴ‐ꓢ ꓙꓵꓽ ꓔꓯ ꓙꓳꓺ ꓟ ꓑꓶ. ꓓꓴ ꓞꓳ ꓟ ꓟꓽ ꓥ ꓥ ꓪꓴ‐ꓢ ꓔꓯ ꓠꓵꓻ ꓠꓲ, ꓟ ꓑꓶ. ꓓꓴ ꓞꓳ ꓠ, ꓟ ꓣꓳ ꓚꓵ, ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓣꓳ ꓚꓲ. ꓛꓬ ꓔꓯ ꓢꓲꓽ ꓫꓬ ꓕꓳ ꓶ ꓔꓯ ꓵꓻ ꓢꓲ ꓠꓬꓲ ꓞꓳ ꓫꓱ, ꓟ ꓙꓵ, ꓕꓯ ꓫꓬ ꓟꓴ ꓗꓪ ꓙꓰ ꓠ, ꓟ ꓐꓱ ꓶ ꓙꓳꓺ ꓟ ꓑꓶ. ꓓꓴ ꓞꓳ ꓫꓱ, ꓢꓴ ꓒꓬꓱꓼ ꓔꓬ ꓡ? ꓝꓮꓲ ꓪꓴ‐ꓢ ꓔꓯ ꓠꓵꓻ ꓠꓲ, ꓟ ꓑꓶ. ꓓꓴ ꓪꓴ‐ꓢ ꓢꓲꓽ ꓫꓬ ꓕꓳ ꓶ ꓔꓯ ꓞꓳ ꓫꓱ, ꓢꓴ ꓒꓬꓱꓼ ꓔꓬ ꓡ? ꓣꓳ ꓚꓲ. ꓛꓬ ꓔꓯ ꓠ ꓠꓬꓲ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
