ꓢ‐ꓓꓴ‐ꓗꓷ ꓐꓴ ꓡꓰ ꓬꓰ‐ꓢꓴ ꓔꓯ ꓢꓯ. ꓬꓲꓼ ꓡ ꓟ ꓚꓱ, ꓔꓯ ꓠ ꓠꓬꓲˍ ꓟ (reflection)
ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓠꓬ ꓟ‐ꓘꓳ ꓕꓳ ꓶ 12ꓽ18‐27 ꓝꓲ. ꓗꓪ ꓛꓲ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓟꓲ ꓠꓯ ꓧꓪꓽ ꓖꓳ ꓓꓱ ꓡꓳ ꓬꓰ ꓗ. ꓠꓯ ꓦꓻ ꓝꓮꓲ ꓢꓯ. ꓬꓲꓼ ꓡ ꓟ ꓔꓯ ꓟꓽ ꓙꓵꓻ ꓢꓴ ꓐꓴ ꓢ‐ꓓꓴ‐ꓗꓷ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓫꓵꓻ ꓡꓰ ꓟ ꓤ ꓑ ꓤ (7) ꓣꓳ ꓐꓰ ꓤ ꓠꓱ ꓤ ꓚꓱ, ꓔꓯ ꓐꓯ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓔꓯ ꓢꓯ. ꓬꓲꓼ ꓡ ꓟ ꓚꓱ, ꓔꓯ ꓮ ꓡꓲ ꓟ ꓤ ꓟꓶ ꓒꓬꓱꓼ ꓡ ꓐꓰ ꓠ ꓠꓬꓲ ꓥ ꓡꓳ꓿
ꓟꓴ ꓗꓪ ꓗꓴꓷꓼ ꓠꓬ ꓟꓲ ꓠꓯ ꓗꓴꓷꓼ ꓐꓰ ꓟ. ꓫꓱ ꓡꓯꓽ ꓘꓳ, ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓥ ꓡꓳ꓿
ꓢ‐ꓓꓴ‐ꓗꓷ ꓐꓴ ꓠꓬ ꓟꓴ ꓗꓪ ꓗꓴꓷꓼ ꓔꓯ ꓟꓲ ꓠꓯ ꓡ ꓞꓳ ꓐꓴ ꓞꓳ ꓚꓱ, ꓥ ꓟ ꓦꓲꓻ ꓢꓲꓽ ꓒ ꓦꓲꓻ ꓢꓲ ꓟ ꓧꓪ ꓚꓱ, ꓗꓪ ꓐꓰ ꓡꓰ ꓔꓯꓺ ꓠ, ꓟ ꓢꓯꓼ ꓕꓵꓼ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓡꓰ ꓟꓴ ꓗꓪ ꓗꓴꓷꓼ ꓠꓬ ꓟꓲ ꓠꓯ ꓗꓴꓷꓼ ꓔꓯ ꓢꓲ ꓮ ꓘꓶ. ꓛꓲ ꓪꓴꓽ ꓟ ꓢꓲꓽ ꓫꓬ ꓟ ꓚꓱ, ꓔꓯ ꓟ. ꓖꓶ ꓟ ꓥ ꓡꓳ꓿
ꓠꓬꓲ. ꓟ ꓡ ꓞꓳ ꓝꓱ ꓟ ꓠꓬ ꓪꓴ‐ꓢ ꓠꓵꓻ ꓠꓲ, ꓔꓯ ꓟ. ꓖꓶ ꓠ, ꓟ ꓐꓰ ꓟꓲ ꓠꓯ ꓡ ꓞꓳ ꓟꓬ ꓡ ꓠ, ꓟ ꓐꓱ ꓶ ꓥ ꓡꓳ꓿ ꓟꓴ ꓗꓪ ꓗꓴꓷꓼ ꓗꓪ ꓠꓬ ꓪꓴ‐ꓢ ꓒ ꓕꓲ ꓗꓪ ꓔꓬ ꓪ ꓟꓪꓴ ꓠꓬꓲ ꓟꓴ ꓗ ꓪ ꓝꓲ ꓓꓴ ꓐꓴ ꓡꓰ ꓪꓴ‐ꓢ ꓓꓳ ꓟꓴ ꓫꓱ, ꓖꓶ ꓓꓴ ꓡꓰ ꓥ ꓟ ꓪꓴ. ꓠꓬꓲ ꓔꓱ ꓚꓵ ꓟ ꓗ, ꓛꓲ ꓓꓴ ꓔꓯ ꓘꓳ, ꓣꓴ ꓟꓶ ꓟ ꓔꓶ. ꓥ ꓡꓳ꓿
ꓪꓴ‐ꓢ ꓠꓬ ꓫꓵꓻ ꓢꓴ ꓐꓴ ꓪꓴ‐ꓢ ꓟꓽ ꓥ ꓢꓯ. ꓔꓬ ꓢꓴ ꓐꓴ ꓪꓴ‐ꓢ ꓥ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓟ
ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓪ ꓠꓬ ꓮ ꓘꓶ. ꓛꓲ ꓓꓴ ꓙ ꓥꓳꓽ ꓡꓰꓳ꓿ ꓪꓴ‐ꓢ ꓠꓽ ꓫꓵꓻ ꓢꓴ ꓐꓴ ꓪꓴ‐ꓢ ꓟꓽ ꓥ꓾ ꓢꓯ. ꓔꓬ ꓢꓴ ꓐꓴ ꓪꓴ‐ꓢ ꓥ ꓔꓯ ꓟ. ꓖꓶ ꓡꓳ꓿ ꓝꓲ ꓓꓴ ꓐꓴ ꓙꓵꓻ ꓠꓲ, ꓪꓽ ꓘꓴ ꓘꓶꓽ ꓗꓪ ꓢꓲꓺ ꓒ ꓠꓯ, ꓗꓪ ꓫꓵꓻ ꓡꓰ ꓢꓴ ꓐꓴ ꓮ ꓙꓵꓽ ꓠꓬ ꓟꓶ ꓡꓰ ꓐꓬ ꓡꓰ ꓓꓴ ꓟꓽ ꓙꓳ ꓪꓴ‐ꓢ ꓟꓲ ꓙꓬ ꓗꓪ ꓢꓯ. ꓔꓬ ꓢꓴ ꓥ ꓟ ꓔꓯ ꓐꓯ ꓖꓶ ꓔ ꓡꓳ꓿
ꓪꓴ‐ꓢ ꓠꓬ ꓢꓯ. ꓟꓬ ꓢꓲꓺ ꓒ ꓥ ꓟ ꓪꓴ. ꓠꓬꓲ ꓕꓲ ꓞꓲꓼ ꓕꓲ ꓒ ꓢꓯꓼ ꓟꓬ ꓔꓯ ꓖꓶ ꓐ ꓡ ꓢꓴ ꓪꓴ‐ꓢ ꓥ ꓡꓳ꓿
ꓢꓲꓽ ꓫꓬ ꓕꓳ ꓶ ꓐꓰ ꓪꓴ‐ꓢ ꓢꓷ. ꓡꓲ ꓓꓴ ꓔꓯ ꓥꓳꓽ ꓡꓰ ꓟ ꓕꓲ ꓒꓳ, ꓗꓪ ꓡꓰ ꓢꓷ. ꓢꓴ ꓥ ꓟ ꓚꓱ,
ꓟꓳ‐ꓘ ꓕꓳ 12ꓽ24 ꓝꓲ. ꓗꓪ ꓠꓴ ꓪ ꓠꓬ ꓥꓳꓽ ꓡꓰ ꓟ ꓠꓬ ꓢꓲ ꓫꓬ ꓕꓳ ꓶ ꓐꓰ ꓪꓴ‐ꓢ ꓪꓽ ꓠꓬꓲˍ ꓟ ꓔꓯ ꓟꓽ ꓢꓷ. ꓠꓬꓲ ꓥꓳ꓿ ꓐꓰ ꓐꓯ ꓖꓶ ꓔ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔꓬ ꓟ ꓠꓬ ꓪꓴ‐ꓢ ꓔꓯ ꓣꓳ ꓓꓴ ꓙ ꓚꓱ, ꓗꓪ ꓐꓰ ꓝꓮꓲ ꓣꓳ ꓪꓴꓽ ꓠꓶ ꓗꓪ ꓐꓰ ꓡꓰ ꓪꓴ‐ꓢ ꓔꓯ ꓓꓴ ꓙ ꓢꓪ ꓢꓴ ꓒꓬꓱꓼ ꓔꓬ ꓡ?
ꓪꓴ‐ꓢ ꓪꓽ ꓠꓬꓲ ꓟ ꓠꓬ ꓫꓵꓻ ꓟ ꓔꓯ ꓢꓲ ꓮ ꓘꓶ. ꓛꓲ ꓪꓽ ꓠꓬꓲ ꓟ ꓔꓯ ꓬꓰ ꓐ ꓡ ꓢꓴ ꓪꓴ‐ꓢ ꓥ ꓡꓳ꓿ ꓬꓲ ꓔꓯ ꓮ ꓙꓵꓽ ꓔꓯ ꓢꓲ ꓙꓵꓻ ꓠ, ꓟ ꓣꓳ ꓚꓵ ꓡꓳ꓿
ꓠꓬꓲ. ꓠꓬꓲ ꓣꓳ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓙꓵ, ꓕꓯ ꓟꓲ ꓠꓯ ꓗꓪ ꓙꓳ ꓟ ꓔꓯ ꓡꓰ ꓟꓶ ꓢꓲ ꓔꓬ ꓢꓴ ꓒꓬꓱꓼ ꓼꓔꓬ ꓡ? ꓕꓲ ꓞꓲꓼ ꓕꓲ ꓒ ꓢꓯ. ꓟꓬ ꓚꓱ, ꓗꓪ ꓣꓳ ꓧꓪ ꓓꓴ ꓬꓰ ꓡꓯ꓿ ꓪꓴ‐ꓢ ꓠꓵꓻ ꓠꓲ, ꓔꓯ ꓣꓳ ꓠꓲ, ꓟ ꓠꓯ, ꓗꓪ ꓙꓳ ꓔꓬ ꓝꓲ ꓡꓯ꓿ ꓪꓴ‐ꓢ ꓠꓯ, ꓗꓪ ꓡ ꓓꓴ ꓬꓰ ꓡꓯ ꓫ. ꓟꓳ ꓪ꓿
