ꓟꓵꓽ ꓗꓳ ꓓꓵ ꓓꓵ ꓢ‐ꓢꓲ‐ꓠ ꓟꓬꓱꓽ ꓠꓽ ꓦꓬꓼ ꓠꓬꓲ ꓗꓪ ꓠꓲ, ꓡꓱ ꓡꓱ ꓐꓰ ꓬꓰ ꓙ ꓔꓳ, ꓙ ꓠ, ꓟ ꓢꓯꓼ ꓖꓶ_ ꓟ꓾
2026 ꓘꓳꓼ 10 ꓦ ꓟ 18 ꓠꓬꓲ ꓟꓵꓽ ꓗꓳ. ꓓꓵ ꓓꓵ ꓢ‐ꓢꓲ‐ꓠ ꓟꓬꓱꓽ ꓠꓽ ꓦꓬꓼ ꓠꓬꓲ ꓕꓯ ꓖꓳ ꓟꓶ ꓟ ꓒꓴ ꓠꓬ ꓗ‐ꓕꓳ‐ꓡꓲ ꓢ‐ꓢꓲ‐ꓠ ꓟꓬꓱꓽ ꓜꓴꓻ (Pontifical Society of the Propagation of the Faith) ꓔꓯ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓢ‐ꓢꓲ‐ꓠ ꓟꓬꓱꓽ ꓬꓲ. ꓪꓴ. ꓐꓯ ꓒꓬꓱꓽ ꓟ ꓬꓲ. ꓔꓶ. ꓗꓪ ꓔꓬ ꓟ ꓢ‐ꓢꓲ‐ꓠ ꓔꓶ. 1130 ꓟꓽ ꓞꓲ ꓔꓯ ꓣꓱ ꓬꓯꓼ ꓟ ꓫꓬ, ꓖꓶ ꓠ, ꓟ ꓐꓰ ꓠꓱ. ꓐꓯꓼ ꓢ‐ꓢꓲ‐ꓠ ꓟꓬꓱꓽ ꓠꓯꓼ ꓗꓪ ꓬꓰ ꓙ ꓔꓳ, ꓙ ꓠ, ꓟ ꓥ ꓡꓳ꓿
ꓕꓱ ꓟ ꓠꓬ ꓣꓳ‐ꓟ ꓗꓪ ꓔꓬ ꓟ ꓕꓳ ꓶ ꓢꓳꓻ ꓙꓳ ꓦꓲꓻ 5 ꓟ ꓠꓯꓼ ꓗꓪ ꓥ ꓟꓲ ꓣꓱꓽ ꓙ ꓖꓶ ꓐ ꓡꓰ ꓢꓲ꓾ ꓣꓳ‐ꓟ ꓗꓪ ꓢꓷ. ꓠꓲ, ꓢꓳ ꓡ ꓟ ꓔꓲꓺ ꓒ ꓒꓬꓱꓼ ꓢꓳ ꓢꓴ ꓐꓴ꓾ ꓔꓲꓺ ꓒ ꓐꓴ ꓔꓲꓺ ꓟ ꓐꓴ ꓐꓱ ꓶ ꓮ ꓕꓯ ꓟꓲ ꓬꓰ ꓙ ꓔꓬ ꓟ ꓥꓳ꓿ ꓕꓱ ꓟ ꓠꓬ ꓢꓷ. ꓠꓲ, ꓢꓳ ꓓꓳ ꓡꓰ ꓥ ꓟꓲ ꓚꓲ. ꓛꓬ ꓔꓬ ꓔꓶ. ꓟꓵꓽ ꓗꓪ ꓛꓲ ꓬꓰ ꓔꓯ ꓥ ꓟꓲ ꓙꓲ ꓖꓴ ꓙꓳ_ ꓟ ꓬꓲ. ꓚꓰ ꓓꓽ ꓟ ꓥ ꓡꓳ꓿
“ꓙꓲ‐ꓢꓴ ꓠꓯꓼ ꓗꓪ ꓕꓲ ꓠꓲ, ꓕꓲ ꓪ꓾ ꓢ‐ꓢꓲ‐ꓠ ꓟꓬꓱꓽ ꓠꓯꓼ ꓗꓪ ꓕꓲ ꓠꓲ, ꓕꓲ ꓪ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿” (‘One in Christ, united in mission’)
ꓕꓱ ꓕꓲ ꓘꓳꓼ ꓟꓵꓽ ꓗꓳ ꓓꓵ ꓓꓵ ꓢ‐ꓢꓲ‐ꓠ ꓟꓬꓱꓽ ꓠꓽ ꓦꓬꓼ ꓠꓬꓲ ꓐꓱ ꓶ ꓬꓲ. ꓕꓲ ꓟꓴ ꓠꓬ “ꓙꓲ‐ꓢꓴ ꓠꓯꓼ ꓗꓪ ꓕꓲ ꓠꓲ, ꓕꓲ ꓪ꓾ ꓢ‐ꓢꓲ‐ꓠ ꓟꓬꓱꓽ ꓠꓯꓼ ꓗꓪ ꓕꓲ ꓠꓲ, ꓕꓲ ꓪ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿” ꓐꓰ ꓐꓯ_ ꓟ ꓠꓬ ꓟꓵꓽ ꓗꓳ. ꓓꓵ ꓓꓵ ꓠꓯꓼ ꓗꓪ ꓬꓰ ꓟ 100 ꓘꓳꓼ ꓐꓲ ꓚꓵ. ꓟꓶ ꓓꓴ ꓥ ꓢꓲ꓾ ꓙꓲ ꓢꓴ ꓢꓲ ꓤ ꓐꓴ ꓔꓯ ꓬꓰ‐ꓢꓴ ꓙꓲ‐ꓢꓴ ꓗꓪ ꓐꓰ ꓠꓵ ꓠꓲ, ꓢ‐ꓢꓲ‐ꓠ ꓗꓪ ꓐꓰ ꓟꓬ ꓠꓬꓲ ꓬꓲ. ꓠꓯ. ꓟ ꓕꓲ ꓠꓲ, ꓕꓲ ꓪ ꓗꓷ ꓠ, ꓟ ꓘꓴ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ ꓕꓱ ꓕꓲ ꓘꓳꓼ ꓬꓲ. ꓕꓲ ꓟꓴ ꓠꓬ ꓡ ꓠ, ꓟ ꓘꓳ, ꓗꓪ ꓘꓴ ꓜꓲꓼ ꓞꓳ ꓘꓴꓽ ꓢ‐ꓢꓲ‐ꓠ ꓟꓬꓱꓽ ꓔꓯ ꓝꓮꓲ ꓧꓪ. ꓛꓲ ꓡ ꓠ, ꓟ ꓡꓵ. ꓔꓴ ꓖꓶ ꓟ ꓥ ꓡꓳ꓾ ꓕꓲ ꓠꓲ, ꓕꓲ ꓪ ꓐꓰ ꓬꓰ‐ꓢꓴ ꓙꓲ‐ꓢꓴ ꓔꓯ ꓬꓲ. ꓚꓰꓻ ꓣꓴ_ ꓟ ꓔꓱ, ꓟ ꓢ‐ꓢꓲ‐ꓠ ꓟꓬꓱꓽ ꓔꓯ ꓙꓲ‐ꓢꓴ ꓢꓲ ꓤ ꓐꓴ ꓗꓳ, ꓡꓳ ꓗꓪ ꓟꓬ ꓡ ꓠ, ꓟ ꓢꓯꓼ ꓖꓶ ꓗꓷ ꓟ ꓥꓳ꓿
ꓕꓱ ꓟꓲ ꓠꓯ ꓗꓪ ꓟꓽ ꓪ ꓟꓽ ꓫꓱ, ꓟ꓾ ꓟꓯꓽ ꓢꓰꓼ ꓡꓯꓼ ꓘꓳ ꓓꓴ ꓫ. ꓙꓵ ꓟꓷꓼ ꓙꓵ ꓓꓴ ꓟꓬ ꓡ ꓟ ꓙꓵ, ꓗꓪ ꓔꓲꓺ ꓒ ꓪ ꓔꓲ ꓡꓰ ꓢ‐ꓢꓲ‐ꓠ ꓟꓬꓱꓽ ꓬꓲ. ꓜꓴꓻ ꓓꓽ ꓟ ꓡꓲ. ꓟ ꓠꓬ ꓢꓲ ꓡꓲ, ꓗ, ꓛꓲ ꓟ ꓢꓲ ꓒꓽ ꓥ ꓟ ꓢꓲ ꓒ ꓬꓰ‐ꓢꓴ ꓔꓯ ꓚꓺ ꓒꓬꓱꓽ ꓢꓲ ꓬꓲ. ꓒꓵꓽ ꓐꓯ ꓖꓴ ꓟꓽ ꓓ ꓟ ꓟꓬꓱꓽ ꓔꓯ ꓢꓯꓼ ꓕꓵꓼ ꓬꓰ ꓔꓬ ꓟ ꓥꓳ꓿
ꓛꓴꓽ ꓙꓳ_ ꓟ ꓐꓰ ꓜꓲ ꓜꓲ ꓟꓴ ꓟꓴ ꓬꓰ ꓟ ꓔꓳ, ꓜꓳ ꓡꓰ ꓟ ꓬꓲ. ꓔꓶ. ꓗꓪ ꓔꓬ ꓟ ꓟꓵꓽ ꓗꓳ. ꓓꓵ ꓓꓵ ꓗꓪ ꓐꓰ ꓤ ꓠꓱ ꓐꓴ ꓠꓯꓼ ꓗꓪ ꓙꓵꓻ ꓠꓲ, ꓠꓬꓲ ꓟꓳ ꓓꓴ ꓐꓰ ꓙꓲ‐ꓢꓴ ꓢꓲ ꓤ ꓠꓵꓻ ꓠꓲ, ꓔꓯ ꓡꓳ. ꓧꓳꓽ ꓖꓶ ꓗꓷ ꓟ ꓑꓶ ꓓꓴ ꓫꓱ. ꓖꓶ_ ꓡꓳ꓿
ꓢꓲ ꓫꓬ ꓢꓴ ꓒꓲ‐ꓕꓱ ꓢ‐ꓢꓲ‐ꓠ ꓟꓬꓱꓽ ꓜꓴꓻ (Society of Saint Peter the Apostle)ꓽ ꓢ‐ꓢꓲ‐ꓠ ꓟꓬꓱꓽ ꓬꓲ. ꓔꓶ. ꓫꓵꓼ ꓗꓪ ꓔꓬ ꓟ ꓔꓲꓺ ꓒ ꓒꓬꓱꓼ ꓢꓳꓻ ꓢꓴ ꓐꓴ ꓐꓰ ꓔꓲꓺ ꓟ ꓒꓬꓱꓼ ꓢꓳꓻ ꓢꓴ ꓐꓴ ꓬꓲ ꓪ ꓞꓳ ꓙꓳ ꓚꓱ,꓾ ꓦ ꓐꓱ ꓶ ꓮ. ꓣꓳ ꓟꓬꓱꓽ ꓚꓱ, ꓠꓯꓼ ꓗꓪ ꓬꓰ ꓙ ꓔꓳ, ꓙ ꓟ ꓔꓯ ꓫꓱ. ꓖꓶ_ ꓡꓳ꓿ ꓕꓱ ꓡꓱ ꓬꓰ ꓙ ꓓꓴ ꓟꓽ ꓙꓳ ꓠꓬ ꓬꓲ ꓪ ꓐꓱ ꓶ ꓣꓱ ꓬꓯꓼ ꓟ ꓕꓳ ꓶ ꓢꓳꓻ ꓓꓴ ꓪ ꓟꓶ ꓓꓴ ꓟꓽ ꓥ ꓐꓰ ꓐꓯ ꓔ ꓡꓳ꓿
