ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓟꓲ ꓠꓯ ꓡ ꓞꓳ ꓐꓴ ꓠꓻ ꓒꓬ ꓓꓴ ꓮ ꓟꓬ, ꓙꓳ ꓡ ꓟ ꓚꓱ, (Environment)
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓗꓪ ꓐꓰ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓟꓲ ꓠꓯ ꓡ ꓞꓳ ꓐꓴ ꓠꓻ ꓒꓬ ꓓꓴ ꓮ ꓟꓬ, ꓙꓳ ꓡ ꓟ ꓚꓱ, ꓗꓪ ꓐꓰ ꓐꓯ ꓟ. ꓖꓶ ꓓꓴ ꓥ ꓡꓳ꓿
ꓣꓳ ꓠꓬꓲ. ꓠꓬꓲ ꓣꓳ ꓔꓬ ꓟ ꓟꓲ ꓠꓯ ꓠꓬ ꓕꓲ ꓠꓬꓲ ꓗ. ꓠꓯ ꓕꓲ ꓠꓬꓲ ꓟꓶ ꓞ ꓮ ꓘꓶ. ꓛꓲ ꓞ ꓡ ꓟ ꓔꓯ ꓣꓳ ꓔꓳ, ꓜꓳ ꓡ ꓟ ꓥ ꓡꓳ꓿ ꓗꓳ. ꓗꓷ ꓟ ꓙꓵ, ꓕꓯ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓘꓳ, ꓣꓴ ꓪ ꓥ ꓟꓲ ꓮ ꓟꓶ ꓟ ꓙꓵ, ꓗꓪ ꓟꓵꓽ ꓘꓳꓼ ꓦꓬꓼ ꓠꓬꓲ ꓠꓬ ꓮ ꓘꓶ. ꓛꓲ ꓒꓳ, ꓔꓬ ꓟ ꓔꓯ ꓣꓳ ꓔꓳ, ꓜꓳ ꓔꓬ ꓟ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓮ ꓘꓶ. ꓛꓲ ꓔꓳ, ꓜꓳ ꓔꓬ ꓟ ꓪꓴ. ꓠꓬꓲ ꓟꓲ ꓠꓯ ꓡ ꓞꓳ ꓐꓴ ꓥ ꓟꓲ ꓟꓽ ꓓꓴ ꓙ ꓔ ꓟ ꓠꓻ ꓒꓬ ꓓꓴ ꓮ ꓟꓬ, ꓔꓳ ꓜꓳ ꓔꓬ ꓟ ꓥ ꓡꓳ꓿
ꓖꓳ ꓡꓱ ꓥ ꓮ ꓡꓲ ꓐꓰ ꓠꓻ ꓓꓴ ꓒꓬ ꓓꓴ ꓮ ꓘꓶ. ꓛꓲ ꓙꓳ ꓡ ꓟ ꓚꓱ, ꓔꓯ ꓡꓳ. ꓠꓬꓲ ꓓꓴ ꓬꓰ ꓡꓯ꓿
1 ꓠꓬꓲ ꓮ ꓘꓶ. ꓛꓲ ꓟꓶ ꓞ ꓡ ꓟ (Extreme Heat) ꓥ ꓡꓳ꓿ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓮ ꓘꓶ. ꓛꓲ ꓞ ꓡ ꓟ ꓑꓶ. ꓓꓴ ꓟꓲ ꓠꓯ ꓗꓪ ꓬꓲꓻ ꓙꓬ ꓡꓳ ꓮ ꓟꓬ, ꓠꓬ ꓬꓲꓻ ꓙꓬ ꓟꓽ ꓬꓲ ꓗꓶ ꓡꓰ ꓔꓬ ꓡꓳ꓿ ꓟꓬ, ꓠꓬ ꓦꓲꓻ ꓘꓴꓽ ꓗꓪ ꓐꓰ ꓬꓲ ꓐ ꓢꓲ ꓠꓬꓲ ꓙꓰ ꓢꓲ ꓠꓬꓲ ꓟꓬꓱꓽ ꓬꓰ ꓢꓯꓼ ꓕꓵꓼ ꓔꓬ ꓢꓴ ꓐꓴ ꓐꓱ ꓶ ꓮ ꓘꓶ. ꓛꓲ ꓠꓻ ꓓꓴ ꓙꓳ ꓡ ꓟ ꓑꓶ. ꓓꓴ ꓙꓻ ꓫ. ꓓꓴ ꓓꓽ ꓟ ꓒꓬꓱꓼ ꓡ ꓟ ꓥ ꓡꓳ꓿
2 ꓠꓬꓲ ꓟꓽ ꓙꓲ ꓟ ꓟꓲ ꓦꓲꓻ ꓮ ꓟꓬ, ꓙꓳ ꓡ ꓟ ꓑꓶ. ꓓꓴ ꓢꓯꓼ ꓦ ꓓꓴ ꓗꓪ ꓠꓻ ꓓꓴ ꓙꓳ ꓢꓴ ꓟꓬ, ꓡ ꓟ ꓥ ꓡꓳ꓿ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓶ ꓞ ꓮ ꓘꓶ. ꓞ ꓡ ꓠꓬ ꓟꓵꓽ ꓘꓳꓼ ꓢꓲ, ꓜꓲ ꓮ ꓟꓬ, ꓣꓳ ꓟ ꓔꓶ. ꓗꓪ ꓮ ꓔꓳ, ꓐꓬ ꓡꓰ ꓓꓴ ꓙꓳ ꓡ ꓟ ꓥ ꓡꓳ꓿ ꓖꓳ ꓕꓯ ꓟꓵꓽ ꓘꓴꓽ ꓮ ꓟꓬ, ꓠꓬ ꓡꓳ ꓒꓱ ꓞꓳ ꓘ, ꓗꓪ ꓛꓲ ꓡ ꓟ ꓑꓶ. ꓓꓴ ꓟꓵꓽ ꓘꓴꓽ ꓠꓬ ꓢꓯꓼ ꓦꓻ ꓙꓴꓽ ꓗꓪ ꓟꓽ ꓢꓲꓽ ꓫꓬ ꓡꓰ ꓝꓲ ꓟ ꓑꓶ. ꓓꓴ ꓠꓻ ꓫꓵꓽ ꓙꓳ ꓡ ꓟ ꓥ ꓡꓳ꓿
3 ꓠꓬꓲ ꓠꓻ ꓫꓵꓽ ꓠꓽ ꓙꓰ ꓮ ꓟꓬ, ꓟꓬꓽ ꓡ ꓟ ꓥ ꓡꓳ꓿
ꓟꓶ ꓞ ꓮ ꓘꓶ. ꓞ ꓡ ꓟ ꓐꓰ ꓟꓵꓽ ꓘꓳꓼ ꓦꓬꓼ ꓠꓬꓲ ꓮ ꓘꓶ. ꓛꓲ ꓒꓳ, ꓡ ꓟ ꓑꓶ. ꓓꓴ ꓑꓶ ꓓꓲ ꓡꓯ ꓓꓲ ꓐꓴ ꓮ ꓟꓬ, ꓛꓲ ꓟꓬ ꓡ ꓠꓬ ꓠꓻ ꓫꓵꓽ ꓠꓽ ꓙꓰ ꓮ ꓟꓬ, ꓙꓳ ꓡ ꓟ ꓥꓡꓳ꓿ ꓖꓳ ꓡꓱ ꓠꓬ ꓕꓱ ꓑꓶ ꓓꓲ ꓡꓯ. ꓓꓲ ꓗꓪ ꓐꓰ ꓕꓲ ꓞ ꓡ ꓞꓳ ꓐꓴ ꓠꓻ ꓫꓵꓽ ꓮ ꓟꓬ, ꓔꓳ ꓜꓳ ꓡ ꓟ ꓥ ꓡꓳ꓿ ꓗꓳ. ꓗꓷ ꓟ ꓙꓵ, ꓕꓯ ꓠꓻ ꓫꓵꓽ ꓠꓻ ꓙꓰ ꓟꓽ ꓠꓽ ꓠꓬ ꓬꓲ ꓟꓬꓱ ꓟꓽ ꓢꓷ. ꓟ ꓠꓻ ꓫꓵꓽ ꓮ ꓟꓬ, ꓙꓳ ꓡ ꓟ ꓥ ꓡꓳ꓿
4 ꓠꓬꓲ ꓟꓲ ꓠꓯ ꓡ ꓞꓳ ꓐꓴ ꓔꓶ ꓜ ꓔꓶ ꓓꓴ ꓓꓴ ꓫ. ꓡ ꓟ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓠꓬ ꓬꓲꓻ ꓙꓬ ꓟꓽ ꓙꓳ ꓬꓲ ꓝꓲ. ꓟꓽ ꓛꓲ ꓬꓲꓻ ꓙꓬ ꓙꓵꓽ ꓡ ꓟ ꓑꓶ. ꓓꓴ ꓔꓶ ꓫꓵꓽ ꓔꓶ ꓙꓲ ꓔꓶ ꓢꓴ ꓐꓴ ꓮ ꓘꓶ. ꓫ. ꓓꓴ ꓔꓳ, ꓜꓳ ꓡ ꓟ ꓥ ꓡꓳ꓿ ꓓꓲ ꓟꓲ ꓝꓮꓲ ꓟꓬꓱꓽ ꓬꓰ ꓢꓴ ꓐꓴ ꓮ ꓘꓶ. ꓛꓲ ꓫ. ꓡ ꓠꓬ ꓜ ꓓꓴ ꓓꓳ ꓓꓴ ꓮ ꓘꓶ. ꓫ. ꓡ ꓓꓴ ꓙꓳ ꓡ ꓟ ꓥ ꓡꓳ꓿
5 ꓠꓬ ꓮ ꓘꓶ. ꓓꓴ ꓙ ꓪꓴꓽ ꓧꓶꓽ ꓓꓴ ꓙꓳ ꓡ ꓟ ꓥ ꓡꓳ꓿ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫ. ꓓꓴ ꓟꓷ ꓓꓴ ꓮ ꓟꓬ, ꓧꓪ. ꓔꓳ ꓜꓳ ꓕꓲ ꓟꓵꓽ ꓗꓪ ꓐꓰ ꓕꓲ ꓟꓵꓽ ꓗꓪ ꓚꓵ. ꓙꓰ ꓟ ꓟꓶ ꓫꓵˍ ꓫꓵˍ ꓡꓰ ꓠꓬ ꓡ ꓞꓳ ꓠꓲ, ꓟ ꓠꓬ ꓮ ꓘꓶ. ꓓꓴꓽ ꓙ ꓟꓬꓽ ꓓꓴ ꓙꓳ ꓡ ꓟ ꓥ ꓡꓳ꓿ ꓖꓳ ꓡꓰ ꓠꓬ ꓠꓻ ꓒꓬ ꓓꓴ ꓙꓳ ꓡ ꓟ ꓥ ꓡꓳ꓿
ꓖꓳ ꓡꓱ ꓠꓬ ꓞꓳ ꓡꓱ ꓐꓴ ꓮ ꓡꓲ ꓫꓵꓽ ꓬꓰ ꓠꓯ, ꓟ ꓡ ꓐꓯ ꓠꓬ ꓟꓵꓽ ꓘꓳꓼ ꓒꓳ, ꓡ ꓚꓱ, ꓔꓯ ꓗꓽ ꓕꓽ ꓠ, ꓟ ꓢꓷ. ꓠꓲ, ꓚꓴ ꓬꓲ ꓮ ꓟꓬ, ꓧꓪ ꓠ, ꓟ ꓥ ꓡꓳ꓿
ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓟ ꓙꓵ, ꓕꓯ ꓑꓡꓮꓢꓔꓲꓚ ꓔꓯ ꓮ ꓘꓶ. ꓟꓽ ꓣꓱ ꓠ ꓟ ꓤ ꓟꓳ ꓠ, ꓟ ꓢꓯꓼ ꓕꓵꓼ ꓡꓯ꓿
ꓣꓳ ꓦꓲꓻ ꓘꓴꓽ ꓢꓴ ꓐꓴ ꓐꓰ ꓛꓳꓽ ꓒꓯ, ꓐꓴ ꓔꓯ ꓟꓵꓽ ꓘꓳꓼ ꓒꓳ, ꓡ ꓓꓴ ꓚꓱ, ꓔꓯ ꓒꓬꓱꓼ ꓡ ꓝꓲ ꓟ ꓔꓯ ꓤ ꓟꓳ ꓠ, ꓟ ꓐꓯ ꓟ. ꓖꓶ ꓡꓯ꓿
ꓠꓻ ꓓꓴ ꓟꓽ ꓙꓳ ꓟ ꓟꓲ ꓠꓯ ꓙꓳ ꓕꓯ ꓢꓲ ꓠꓬꓲ ꓟꓲ ꓠꓯ ꓡ ꓞꓳ ꓐꓴ ꓠꓻ ꓓꓴ ꓒꓬ ꓓꓴ ꓟꓽ ꓙꓳ ꓡ ꓓꓴ ꓥ ꓡꓳ꓿
ꓙꓲ ꓟ ꓟꓵꓽ ꓘꓳꓼ ꓒꓬꓱꓼ ꓡ ꓠ ,ꓟ ꓢꓯꓼ ꓕꓵꓼ ꓡꓯ꓿ ꓣꓳ ꓔꓬ ꓟ ꓟꓲ ꓠꓯ ꓔꓯ ꓠꓲ, ꓠꓵ ꓡꓯ꓿
