ꓧꓪ. ꓧꓪꓸꓼ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓢꓴ ꓦꓲ ꓗꓪ ꓗꓪ. ꓙꓰˍ ꓕꓯ ꓮ ꓡꓲ ꓥˍ ꓟꓲ ꓣꓳ ꓮ ꓙꓵꓽ ꓠꓬ ꓗ ꓗꓶꓽ ꓐꓰꓼ ꓗꓪ ꓐꓰ ꓓꓵꓽ ꓙꓰˍ ꓡꓳ꓿ ꓐꓱ ꓚꓱ ꓕꓯꓽ ꓢꓲ ꓗꓪ ꓚꓳ. ꓗꓪ. ꓙꓰˍ ꓟ ꓟꓽ ꓙꓳ꓿ ꓠꓱ. ꓐꓯ ꓬꓲ ꓘꓴ ꓬꓲ ꓟꓲ ꓗꓪ ꓚꓳ. ꓓꓵꓽ ꓙꓰˍ ꓟ ꓟꓽ ꓙꓳ꓿ ꓮꓽ ꓟ ꓥˍ ꓟꓲ ꓗ ꓘꓶ ꓐꓰꓼ ꓗꓪ ꓚꓳ.ˍ ꓡꓰꓽ ꓓꓵꓽ ꓙꓰˍ ꓡꓳ꓿ ꓗ ꓘꓶꓽ ꓚꓵ. ꓔ ꓠꓬ ꓗ ꓘꓶꓽ ꓲꓼ ꓢꓲ ꓠꓬꓲ ꓓꓵꓽ ꓙꓰˍ ꓡꓳ꓿ ꓕꓱ ꓟ ꓠꓬ ꓬꓲ ꓡꓲꓽ ꓕꓲ ꓟ꓾ ꓬꓲ ꓚꓳꓽ ꓕꓲ ꓫꓵꓽ ꓥ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓞꓳ ꓘꓴꓽ ꓛꓬꓮ‐ꓔꓮꓪ. ꓐꓯˍ ꓟ ꓠꓬ ꓗ ꓘꓶꓽ ꓐꓰꓼ ꓗꓪ ꓐꓰ ꓟꓽ ꓓꓵꓽ ꓙꓰ꓿ ꓐꓱ ꓚꓱ ꓕꓯꓽ ꓢꓲ ꓗꓪ ꓚꓳ. ꓓꓵꓽ ꓙꓰˍ ꓟ ꓓꓯ ꓙꓰˍ ꓟ꓾ ꓥ ꓠꓬ ꓗ ꓘꓶꓽ ꓒꓬ, ꓢꓲ ꓓꓵꓽ ꓙꓰˍ ꓟ ꓕꓱ ꓡꓱ ꓬꓰˍ ꓡꓳ꓿ ꓕꓱ ꓟ ꓠꓬ ꓘꓴꓽ ꓜꓽ ꓓꓴ ꓒꓬ, ꓜꓽ ꓓꓴ ꓬꓲ ꓚꓱ, ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓬꓳ‐ꓦ 10ꓽ1‐10 ꓗꓪ ꓢꓲ ꓒ ꓬꓰ‐ꓢꓴ ꓐꓯ ꓔ ꓡꓳ꓿ ꓥꓪ ꓠꓬ ꓗ ꓘꓶꓽ ꓐꓰꓼ ꓥ ꓡꓳ꓿ ꓬꓲ ꓠꓯꓸꓼ ꓘꓴꓽ ꓗꓪ ꓐꓰ ꓟꓽ ꓓꓵꓽ ꓡꓰ ꓢꓴ ꓮ ꓟ ꓥˍ ꓟꓲ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓡꓰ ꓟꓽ ꓓꓻ꓿ ꓠꓱ. ꓐꓯ ꓚꓱ, ꓗꓪ ꓚꓳ. ꓓꓵꓽ ꓬꓰ ꓢꓴ ꓮ ꓙꓵꓽ ꓠꓬ ꓞꓳ ꓘꓴꓽ ꓥ ꓡꓳ꓾ ꓒꓬ, ꓜꓽ ꓢꓴ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓠꓬ ꓚꓵ ꓚꓵ ꓗ ꓘꓶꓽ ꓥ ꓡꓳ꓿ ꓬꓲ ꓠꓯꓸꓼ ꓗꓪ ꓮ ꓫꓵꓽ ꓥ ꓟꓲ ꓬꓲ ꓙꓲ ꓖꓴ ꓙꓳˍ ꓡꓳ꓿ ꓗ ꓘꓶꓽ ꓐꓰꓼ ꓖꓳ ꓟ ꓗꓪ ꓐꓰ ꓓꓳ ꓡˍ ꓟ ꓶꓼ ꓤ ꓫꓱ, ꓤ ꓣꓱꓽ ꓛꓰꓽ꓾ ꓙꓲ ꓖꓴ ꓙꓳˍ ꓟ ꓮ ꓙꓵꓽ ꓡꓱꓸꓼ ꓠꓬ ꓖꓳ ꓗ ꓘꓶꓽ ꓐꓰꓼ ꓗꓪ ꓐꓰ ꓓꓵꓽ ꓡ ꓟ ꓓꓳ ꓡ ꓟ ꓥ ꓡꓳ꓿ ꓠꓬꓲ. ꓠꓬꓲ ꓠꓴ꓾ ꓥꓪ ꓤꓶꓻ ꓗꓪ ꓗ ꓘꓶꓽ ꓐꓰꓼ ꓖꓳ ꓟ ꓗꓪ ꓚꓳ. ꓟꓽ ꓓꓵꓽ ꓙꓰ ꓙꓰ꓾ ꓠꓱ. ꓐꓯ ꓕꓲ ꓚꓱ, ꓗꓪ ꓚꓳ. ꓓꓵꓽ ꓙꓰ ꓠꓲ, ꓫꓵˍ ꓥꓳ ꓐꓯ ꓠꓬ ꓗ ꓘꓶꓽ ꓒꓬ, ꓢꓲ ꓓꓵꓽ ꓙꓰ ꓠꓲ, ꓫꓵˍ ꓟ ꓠꓲ, ꓟ ꓣꓳ ꓠꓯꓸꓼ ꓗꓪ ꓙꓳˍ ꓡ ꓐꓯˍ ꓟ ꓣꓳ ꓓꓵꓽ ꓙꓽ ꓠꓬꓲ ꓓꓴ ꓬꓰ ꓡꓯ꓿
