ꓢꓲꓺ ꓒ ꓬꓰ‐ꓢꓴ ꓠꓬ ꓢꓯꓼ ꓟꓬ ꓑ ꓑ ꓥ ꓟ (Daily reflection)

ꓧꓪ. ꓧꓪ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓬꓳ‐ꓦ ꓕꓳ ꓶ 6ꓽ35‐40 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓢꓯꓼ ꓟꓬ ꓑ ꓑ ꓥ ꓟ ꓚꓱ, ꓔꓯ ꓐꓯ ꓖꓶ ꓔ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓥꓪ ꓠꓬ ꓢꓯꓼ ꓟꓬ ꓑ ꓑ ꓥ ꓡꓳ꓿ ꓥꓪ ꓔꓯ ꓡ ꓢꓴ ꓠꓬ ꓮ ꓕꓯˍ ꓟꓲ ꓟꓽ ꓦꓰꓼ ꓟꓷꓼ ꓡ꓿ ꓥꓪ ꓔꓯ ꓙꓵꓻ ꓢꓴ ꓟꓲ ꓕꓲ ꓞꓲꓼ ꓟꓽ ꓢꓲꓼ ꓡ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓖꓶ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ (ꓔꓧꓰ ꓰꓴꓚꓧꓮꓣꓲꓢꓔ) ꓢꓲꓽ ꓫꓬ ꓖꓳ ꓓꓱ ꓠꓯ, ꓗꓪ ꓬꓲ ꓚꓵ ꓚꓵ ꓔꓬ ꓟ ꓚꓱ, ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓧꓪꓽ ꓖꓳ ꓓꓱ ꓐꓱ ꓡ ꓜ ꓓꓴ ꓔꓯ ꓢꓲ ꓣꓳ ꓚꓵˍ ꓟ ꓦꓻ ꓜ ꓓꓴ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓖꓶ ꓜ ꓔꓬ ꓟ ꓥ ꓡꓳ꓿ ꓬꓲ ꓠꓬ ꓢꓯꓼ ꓟꓬ ꓑ ꓑ ꓥ ꓡꓳ꓿ ꓣꓳ ꓢꓲꓽ ꓫꓬ ꓖꓳ ꓓꓱ ꓔꓯ ꓘꓳ, ꓣꓴ ꓪ ꓢꓴ ꓐꓴ ꓠꓬ ꓢꓯ. ꓔꓬ ꓟ ꓢꓲꓺ ꓒ ꓬꓰ‐ꓢꓴ ꓐꓰ ꓣꓳ ꓦꓻ ꓠꓬ ꓕꓲ ꓪ ꓒꓬꓱꓼ ꓡꓰ ꓝꓲˍ ꓟ  ꓥꓡꓳ꓿

ꓐ, ꓐ ꓡꓰ ꓥꓪ ꓔꓯ ꓖꓶ ꓡ ꓢꓴ ꓮ ꓙꓵꓽ ꓠꓬ ꓥꓪ ꓔꓯ ꓡˍ ꓥꓳ꓿ ꓥꓪ ꓔꓯ ꓡ ꓢꓴ ꓔꓯ ꓠꓬ ꓮ ꓡꓲ ꓥ ꓟꓲ ꓥꓪ ꓟꓽ ꓡꓳ ꓗꓷ ꓐꓰ ꓐꓯ ꓖꓶ ꓔ ꓟ ꓥ ꓡꓳ꓿ ꓖꓳ ꓟ ꓠꓬ ꓪꓴ‐ꓢ ꓣꓱ ꓛꓰ ꓑꓶ. ꓓꓴ ꓣꓳ ꓠꓬ ꓬꓰ‐ꓢꓴ ꓙꓵꓽ ꓟ ꓗꓪ ꓐ ꓟ ꓥ ꓡꓳ꓿ ꓣꓳ ꓠꓬ ꓪꓴ‐ꓢ ꓔꓯ ꓬꓲ. ꓪꓴ. ꓧꓪ ꓢꓴ ꓟꓽ ꓥ ꓪꓴ‐ꓢ ꓡꓰ ꓣꓳ ꓔꓯ ꓧꓪ ꓟ ꓥ ꓡꓳ꓿

ꓢꓲꓺ ꓒ ꓠꓯ, ꓗꓪ ꓡ ꓢꓴ ꓮ ꓟꓽ ꓔꓯ ꓥ ꓟꓲ ꓘꓳ, ꓣꓴ ꓟ  ꓥꓡꓳ꓿ ꓕꓱ ꓟ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓯ ꓗꓪ ꓐꓰ ꓢꓲꓺ ꓒ ꓡꓰ ꓣꓳ ꓔꓯ ꓥꓳꓽ ꓡꓳ ꓓꓴ ꓓꓽ ꓟ ꓖꓶ ꓔ ꓟ ꓥ ꓡꓳ꓿

ꓝꓮꓲ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓠꓲ, ꓡꓶ ꓗꓪ ꓐꓰ ꓟꓲ ꓠꓯ ꓡ  ꓟꓽ ꓥ ꓐ, ꓐ ꓪꓴ‐ꓢ ꓠꓲ, ꓡꓶ ꓔꓯ ꓛꓳꓽ ꓟ ꓪꓴ. ꓠꓬꓲ ꓟꓲ ꓠꓯ ꓗꓪ  ꓡ ꓢꓴ ꓥ ꓡꓳ꓿

ꓮ ꓡꓲꓳ ꓐꓯ ꓠꓬ ꓮ ꓐꓲ ꓔꓯ ꓟꓳ ꓢꓲ ꓬꓲ ꓔꓯ ꓙꓵꓻ ꓢꓴ ꓥ ꓕ ꓑꓳ, ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠ, ꓟ ꓕꓱ ꓟ ꓠꓬ ꓥꓪ ꓐ, ꓐ ꓠꓲ, ꓡꓶ ꓥ ꓡ ꓳ꓿ ꓖꓳ ꓡꓱ ꓢꓲ ꓡꓳ ꓬꓰ ꓟ ꓦꓬꓼ ꓠꓬꓲ ꓗꓪ ꓥꓪ ꓬꓲ ꓔꓯ ꓢꓯ. ꓬꓲꓼ ꓡ ꓝꓲ ꓥꓳ꓾ ꓐꓯ ꓖꓶ ꓡꓳ꓿

ꓕꓱ ꓟ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓬꓲ ꓟꓶ ꓔꓶ ꓙꓱ ꓠꓬ ꓟꓲ ꓠꓯ ꓕꓯ ꓢꓲ ꓗꓪ ꓟꓽ ꓥ ꓟꓴ ꓗꓪ ꓗꓴꓷꓼ ꓗꓪ ꓥ ꓟ ꓚꓱ, ꓔꓯ ꓢꓲꓺ  ꓬꓰ‐ꓢꓴ ꓡꓰ ꓐꓯ ꓖꓶ ꓔ ꓟꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓻ ꓢꓲ ꓠꓬꓲ ꓣꓳ ꓧꓪꓽ ꓖꓳ ꓓꓱ ꓫꓵꓻ ꓡꓰ ꓥ ꓟꓲ ꓣꓳ ꓦꓻ ꓠꓬ ꓝꓮꓲ ꓢꓯ. ꓬꓲꓼ ꓡ ꓓꓴ ꓔꓯ ꓢꓲꓺ ꓒ ꓡꓰ ꓐꓯ ꓖꓶ ꓔ ꓡꓳ꓿

ꓠꓬꓲ. ꓠꓬꓲ ꓣꓳ ꓚꓲ. ꓛꓬ ꓔꓯ ꓠ ꓠꓬꓲ ꓠ, ꓟ ꓠꓬ ꓥꓪ ꓦꓻ ꓜ ꓓꓴ ꓔꓯ ꓟꓲ ꓠꓯ ꓗꓪ ꓙꓳ ꓟ ꓒꓴ ꓫꓵ ꓝꓮꓲ ꓟꓲ ꓠꓯ ꓗ, ꓛꓲ ꓓꓴ ꓗꓪ ꓐꓰ ꓡꓰ ꓛꓳꓽ ꓔꓬ ꓢꓴ ꓒꓬꓱꓼ ꓡ? ꓖꓳ ꓡꓱ ꓟꓽ ꓥ ꓢꓲꓺ ꓒ ꓬꓰ‐ꓢꓴ ꓡꓰ ꓖꓶ ꓡ ꓢꓯꓼ ꓟꓬ ꓑ ꓑ ꓔꓯ ꓘꓳ, ꓣꓴ ꓔꓬ ꓢꓴ ꓒꓬꓱꓼ ꓔꓬ ꓡ ?

ꓢꓲꓺ ꓒ ꓠꓬ ꓮ ꓟꓽ ꓔꓯ ꓥ ꓟꓲ ꓘꓳ, ꓣꓴ ꓔꓬ ꓡꓳ ꓐꓰ ꓐꓯ ꓖꓶ ꓔ ꓡꓳ꓿ ꓣꓳ ꓬꓰ ꓥꓳꓽ ꓡꓰ ꓟ ꓝꓴꓲ ꓔꓯ ꓬꓲ ꓕꓯ ꓭ ꓔꓬ ꓢꓴ ꓒꓬꓱꓼ ꓡ?

ꓠꓴ ꓥꓪ ꓠꓬꓲ. ꓠꓬꓲ ꓢꓯ. ꓔꓬ ꓟ ꓠꓬ ꓢꓲꓺ ꓒ ꓠꓲ, ꓡꓶ ꓗꓪ ꓞꓳ ꓙꓳ ꓢꓯ. ꓔꓬ ꓢꓴ ꓒꓬꓱꓼ ꓡ?

ꓢꓲꓺ ꓒ ꓠꓯ ꓗꓪ ꓡ ꓓꓴ ꓬꓰ ꓡꓯ꓿ ꓢꓯꓼ ꓟꓬ ꓑ ꓑ ꓔꓯ ꓘꓳ, ꓣꓴ ꓓꓴ ꓬꓰ ꓡꓯ꓿