ꓠꓯꓼ ꓠꓯꓼ ꓔꓴ ꓡ ꓕꓯ ꓞꓳ ꓤ ꓟꓬꓽ ꓠꓬꓲ ꓠꓬ “ꓠꓬꓲ. ꓠꓬꓲ ꓮ ꓫꓵꓽ ꓬꓰ ꓠꓯ, ꓥ” ꓐꓰ ꓓꓵꓽ ꓙꓽ ꓔꓬ ꓗꓴ.ˍ ꓡꓳ꓿ ꓮ ꓡꓲ ꓫꓵꓽ ꓗꓪ ꓧꓪ. ꓡꓰˍ ꓡ꓾ ꓮ ꓡꓲ ꓫꓵꓽ ꓟꓶ ꓡˍ ꓡ꓾ ꓮ ꓡꓲ ꓗꓪ ꓛꓲ ꓬꓰˍ ꓡ꓾ ꓐꓰ ꓕꓱ ꓡꓱ ꓓꓵꓽ ꓙꓽ ꓔꓬ ꓢꓲ ꓠꓬꓲ ꓤꓶꓻ ꓗꓪ ꓣꓱꓽ ꓞ,ˍ ꓟ ꓡꓰ ꓐꓲ ꓞ, ꓟ ꓐꓳ ꓚꓲ. ꓔˍ ꓟ ꓕꓳꓽ ꓶ ꓒꓬꓽ ꓕꓲ ꓟˍ ꓡꓰ ꓐꓰ ꓗꓷ ꓡꓰꓳ꓿
ꓖꓳ ꓡꓱ ꓥˍ ꓟꓲ ꓚꓵ ꓚꓵ ꓬꓳ. ꓚꓰꓽˍ ꓟ ꓠ ꓠꓬꓲ ꓘꓶꓽ ꓠꓬ “ꓠꓬꓲ. ꓠꓬꓲ ꓗꓪ ꓥꓪ ꓔꓯ ꓮ ꓫꓵꓽ ꓙꓳˍ ꓡ” ꓐꓯˍ ꓟ ꓥ ꓡꓳ꓿ ꓣꓳ ꓔꓯ ꓢꓯꓼ ꓦ ꓐ ꓡˍ ꓒꓵꓽ ꓶ ꓙꓳˍ ꓡꓳ꓿ ꓠꓯꓼ ꓠꓯꓼ ꓛꓲ ꓡˍ ꓕ ꓑꓳꓸꓼ ꓔꓴ ꓐ ꓡˍ ꓟ ꓙꓵ, ꓙꓳˍ ꓡꓳ꓿ ꓠꓬꓲ ꓫꓵꓼ ꓔꓯ ꓟꓶ ꓠ, ꓟ ꓬꓲ ꓙꓵ, ꓙꓳˍ ꓡꓳ꓿ ꓕꓱ ꓟ ꓠꓬ ꓮ ꓫꓵꓽ ꓡꓰ. ꓟꓽ ꓥ ꓐꓰ ꓫꓪ. ꓟꓶˍ ꓥ ꓟꓲ꓾ ꓚꓵ ꓚꓵ ꓠꓽ ꓓꓵꓽ ꓙꓽ ꓟꓶ ꓓꓴ꓾ ꓓꓵꓽ ꓙꓽ ꓮʼ ꓓꓴ ꓥ ꓡꓳ꓿ ꓟꓲ ꓠꓯ ꓕꓱ ꓟ ꓕꓯꓽ ꓢꓲ ꓗꓪ ꓠꓬꓲ. ꓠꓬꓲ ꓟꓽ ꓧꓪ. ꓛꓲ ꓐ ꓡ ꓢꓴ ꓙꓳ ꓔꓬ ꓢꓰꓽ ꓟ ꓥ ꓡꓳ꓿
ꓣꓳ ꓔꓯ ꓠꓲ, ꓠꓵ ꓢꓴ ꓙꓳˍ ꓡꓳ꓿ ꓣꓳ ꓔꓯ ꓗꓪꓽ ꓫꓵꓼ ꓢꓴ ꓙꓳˍ ꓡꓳ꓿ ꓶꓻ ꓤ ꓗꓪ ꓥˍ ꓟꓲ ꓒ ꓕꓲꓺ ꓗꓪ ꓥˍ ꓟꓲ ꓣꓳ ꓐꓱ ꓶ ꓬꓳ. ꓚꓰꓽ ꓢꓴ ꓙꓳˍ ꓡꓳ꓿ ꓕꓱ ꓟ ꓠꓽ ꓶꓼ ꓙꓳ ꓫꓱ, ꓙꓳˍ ꓟ ꓥ ꓡꓳ꓿
ꓣꓳ ꓔꓯ ꓜꓽ ꓓꓴ ꓙꓳˍ ꓡꓳ꓿ ꓣꓳ ꓖꓳ ꓓꓱꓽ ꓔꓯ ꓣꓳ ꓡꓵ ꓐ ꓡˍ ꓡꓳ꓿ ꓒꓳ, ꓐ ꓡˍ ꓡꓳ꓿ ꓓꓵꓽ ꓙꓽ ꓫꓪ. ꓠꓬꓲ ꓐ ꓡˍ ꓡꓳ꓿ ꓢꓳ ꓣꓴ ꓐ ꓡˍ ꓡꓳ꓿ ꓡꓶ. ꓗꓷ ꓐ ꓡˍ ꓡꓳ꓿ ꓕꓱ ꓟ ꓠꓬ ꓮ ꓫꓵꓽ ꓡꓰ. ꓟꓳꓻ ꓟꓽ ꓟꓵ ꓐꓯˍ ꓥ ꓟꓲ ꓮ ꓘꓶ. ꓒꓵꓽˍ ꓟ ꓥ ꓡꓳ꓿
ꓞꓳ ꓤ ꓐꓴ ꓠꓬ ꓙꓳˍ ꓟ ꓔꓯ ꓟꓲ ꓡꓰ, ꓗꓷ ꓢꓲ꓾ ꓟꓽ ꓙꓳ ꓢꓰꓽ ꓟ ꓔꓯˍ ꓡꓰꓽ ꓟꓶ ꓠꓲ, ꓫꓵ ꓔꓬ ꓡꓳ꓿ ꓟꓬꓱꓽ ꓕꓱ ꓟ ꓬꓰ ꓟꓶ ꓡꓰ ꓕꓯ ꓠꓽ꓾ ꓒꓴ ꓕꓱ ꓟ ꓟꓶ ꓡꓰ ꓕꓯ ꓠꓽ꓾ ꓕꓱ ꓟ ꓬꓰ ꓧꓪ. ꓡꓰ ꓕꓯ ꓠꓽ ꓗ, ꓛꓲꓽ ꓪˍ ꓥꓳ꓾ ꓐꓰ ꓓꓵꓽ ꓙꓽ ꓟꓶ ꓔꓬ ꓡꓳ꓿ ꓖꓳ ꓡꓱ ꓥ ꓟꓲ ꓕꓱ ꓟ ꓟꓶ ꓡꓰ ꓗ ꓠꓯ. ꓠꓬ ꓝꓮꓲ ꓡꓯꓼ ꓫꓵ ꓟꓶ ꓠꓲ, ꓫꓵˍ ꓟ ꓓꓳ ꓡˍ ꓡꓳ꓿ ꓖꓳ ꓟ ꓠꓽ ꓟꓽ ꓠꓽ ꓗꓷ꓿ ꓮ ꓕꓯ ꓟꓲ ꓚꓳꓻ ꓔꓬ ꓡꓳ꓿ ꓕꓲ ꓙꓰ ꓟꓶ ꓡꓰ ꓠꓬ ꓝꓮꓲ ꓕꓲ ꓟ ꓟꓶ ꓠꓲ, ꓫꓵ ꓡˍ ꓡꓳ꓿
ꓖꓳ ꓟ ꓑꓶ. ꓓꓴ ꓠꓬꓲ. ꓠꓬꓲ ꓣꓳ ꓔꓯ ꓙꓳˍ ꓟ ꓔꓯ ꓓꓵꓽ ꓙꓽ ꓟꓶ꓿ ꓫ. ꓟꓳ ꓖꓶ꓿ ꓒꓵꓽ ꓗ ꓬꓰ ꓖꓶ ꓠꓯ, ꓡꓳ꓿
ꓣꓳ ꓖꓳ ꓓꓱꓽ ꓔꓬ, ꓢꓻ ꓔꓬ ꓟ ꓔꓯ ꓓꓵꓽ ꓙꓽ ꓟꓶ꓿ ꓠꓻ ꓔꓬ ꓢꓴ ꓐꓴ ꓐꓱ ꓶ ꓔꓬ, ꓢꓻ ꓡ ꓠ, ꓟ ꓠꓬ ꓮ ꓙꓵꓽ ꓟ ꓕꓯꓽ ꓢꓲ ꓒꓵꓽˍ ꓡꓳ꓿ ꓣꓳ ꓔꓬ, ꓢꓻ ꓔꓬ ꓟ ꓔꓯ ꓕꓽ ꓟꓲ ꓡꓰ,꓿
ꓣꓳ ꓢꓯꓼ ꓪ ꓔꓯ ꓓꓵꓽ ꓙꓽ ꓟꓶ꓿ ꓣꓳ ꓔꓯ ꓣꓳ ꓐ ꓡˍ ꓟ ꓙꓳˍ ꓡꓳ꓿ ꓔꓳ, ꓜꓳꓽ ꓠꓬꓲˍ ꓟ ꓮ ꓟꓬ, ꓙꓳˍ ꓡꓳ꓿ ꓕꓱ ꓟ ꓠꓽ ꓬꓲ ꓒꓵꓽ ꓒꓵꓽˍ ꓟ ꓥ ꓡꓳ꓿
ꓣꓳ ꓔꓯ ꓬꓲ ꓚꓱ, ꓮ ꓟꓬ, ꓙꓳˍ ꓟ ꓔꓯ ꓓꓵꓽ ꓙ ꓟꓶ꓿ ꓠꓬꓲ. ꓠꓬꓲ ꓗꓪ ꓣꓳ ꓠꓬ ꓮ ꓫꓵꓽ ꓔꓯ ꓥˍ ꓟꓲ ꓢꓳ ꓣꓴ ꓐ ꓡˍ ꓡꓳ꓿ ꓮ ꓫꓵꓽ ꓔꓯ ꓥˍ ꓟꓲ ꓬꓰ ꓠꓬꓲ ꓐ ꓡˍ ꓡꓳ꓿ ꓮ ꓡꓲ ꓕꓲ ꓣꓳ ꓔꓯ ꓥˍ ꓟꓲ ꓠꓲ, ꓠꓵ ꓐ ꓡˍ ꓡꓳ꓿ ꓕꓱ ꓟ ꓠꓽ ꓣꓳ ꓔꓯ ꓟꓽ ꓞꓳ, ꓔ ꓟ꓾ ꓩꓴ ꓔ ꓟ ꓥ ꓡꓳ꓿
ꓞꓳ ꓤ ꓤꓶꓻ ꓠꓽ ꓐꓲ ꓜꓲꓼ ꓟꓽ ꓛꓵ꓿ ꓬꓲ ꓓꓽ ꓟ ꓧꓪ. ꓡꓰ ꓟ ꓙꓳ ꓟꓽ ꓛꓵ꓿ ꓗ. ꓛꓲꓽ ꓠ, ꓟ ꓐꓱ ꓶ ꓣꓱꓽ ꓞ, ꓟ ꓠꓬ ꓣꓳ ꓔꓯ ꓙꓳˍ ꓟ ꓔꓯ ꓟꓳꓻ ꓗꓴ. ꓠ, ꓟ ꓥ ꓡꓳ꓿ ꓚꓲ. ꓛꓬ ꓔꓯ ꓙꓳˍ ꓟ ꓔꓯ ꓒꓵꓽ ꓗꓴ. ꓠ, ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓗꓪ ꓕꓱ ꓕꓲ ꓫꓵꓽ ꓔꓯ ꓬꓰ ꓠꓬꓲ ꓡꓯ꓾ ꓣꓳ ꓠꓯꓸꓼ ꓗꓪ ꓙꓳˍ ꓟ ꓙꓲˍ ꓟ (3) ꓙꓰꓽ ꓛꓲ ꓔꓯ ꓓꓵꓽ ꓙꓽ ꓠꓬꓲ꓿ ꓕꓱ (3) ꓙꓰꓽ ꓟ ꓠꓬ ꓮ ꓫꓵꓽ ꓪꓴ. ꓠꓬꓲ ꓣꓳ ꓔꓯ ꓶꓼ ꓙꓳ ꓫꓱ, ꓙꓳ ꓝꓲˍ ꓡ꓾ ꓐꓯˍ ꓟ ꓔꓯˍ ꓟꓲ ꓓꓵꓽ ꓙꓽ ꓠꓬꓲ꓿
ꓕꓱ ꓣꓳꓺˍ ꓟ ꓣꓱꓽ ꓬꓰ ꓚꓱ, ꓐꓴ ꓠꓬ ꓣꓳ ꓟꓬ ꓢꓶꓽ ꓔꓯ ꓒꓳ, ꓡꓶ. ꓗꓷ ꓐ ꓡˍ ꓡꓳ꓿ ꓣꓳ ꓠꓲ, ꓟ ꓓꓵꓽ ꓙꓽ ꓚꓱ, ꓔꓯ ꓥˍ ꓟꓲ ꓮꓽ ꓤ ꓤ ꓡꓶ. ꓙꓰ ꓝꓲˍ ꓡꓳ꓿
ꓣꓳ ꓟꓶ ꓠꓲ, ꓫꓵˍ ꓟ ꓪ ꓠꓲ, ꓫꓵˍ ꓟ ꓠꓲ, ꓡꓶꓽ ꓗꓪ ꓐꓰ꓾ ꓣꓳ ꓔꓯ ꓙꓳˍ ꓟ ꓔꓯ ꓗ, ꓛꓲꓽˍ ꓟ ꓠꓲ, ꓟ ꓗꓪ ꓡꓶ. ꓙꓰ ꓝꓲ ꓐ ꓡˍ ꓡꓳ꓿ ꓕꓱ ꓟ ꓠꓬ ꓠꓲ, ꓟ ꓢꓲ ꓡꓲˍ ꓟ ꓔꓯ ꓣꓴ ꓔꓯ, ꓖꓶ ꓐ ꓡˍ ꓡꓳ꓿ ꓖꓳ ꓡꓱ ꓠꓬꓲ ꓕꓲ ꓠꓯꓼ ꓡꓰ ꓕꓲ ꓠꓯꓼ ꓧꓪ. ꓛꓲꓽ ꓡ ꓕ ꓑꓳꓸꓼ꓾ ꓠꓬꓲ. ꓠꓬꓲ ꓗꓪ ꓥꓪ ꓔꓯ ꓙꓳˍ ꓟ ꓠꓬ ꓡꓳꓼ ꓡꓰꓳ꓾ ꓐꓰ ꓓꓵꓽ ꓙꓽ ꓢꓲ ꓞꓳ ꓙꓳ꓿ ꓖꓳ ꓡꓱ ꓬꓰˍ ꓕꓯ ꓣꓳ ꓠꓲ, ꓟ ꓐꓱ ꓶ ꓣꓳ ꓓꓵꓽ ꓙꓽ ꓟꓬꓽ ꓔꓬ ꓟ ꓗꓪ ꓐꓰ ꓔꓬ, ꓢꓻ ꓡˍ ꓥꓳ꓿
