ꓢꓲ ꓒ ꓠꓯꓸꓼ ꓗꓪ ꓠꓲ, ꓠꓵˍ ꓟ ꓮꓽ ꓐ ꓮ ꓟ ꓬꓲꓼ ꓤ ꓠꓬꓲ ꓤ ꓐꓴ ꓮ ꓙꓵꓽ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓗꓪ ꓣꓳ ꓓꓵꓽ ꓙꓽ ꓠꓬꓲ ꓠ ꓔˍ ꓟ ꓢꓲꓽ ꓫꓬ ꓕꓳꓽ ꓶ ꓠꓬ (ꓬꓳ‐ꓦ 6ꓽ30‐25) ꓥ ꓡꓳ꓿

ꓞꓳ ꓜꓴ ꓡꓰ ꓬꓰ‐ꓢꓴ ꓔꓯ ꓕꓱ ꓡꓱ ꓠ ꓠꓬꓲˍ ꓡꓳ꓿ “ꓥꓪ ꓠꓴꓽ ꓟꓳ ꓢꓲ ꓠꓴ ꓔꓯ ꓙꓵꓻ ꓠ, ꓟ꓾ ꓠꓴ ꓮ ꓫꓵꓽ ꓢꓷ. ꓡꓰ ꓓꓴ ꓬꓰˍ ꓐꓯˍ ꓡ” ꓐꓰ ꓠ ꓠꓬꓲˍ ꓡꓳ꓿

ꓝꓮꓲ ꓬꓲ ꓪ ꓡꓰ ꓟꓳ‐ꓫꓲ ꓦꓬꓼ ꓠꓬꓲ ꓕꓯ ꓟꓴ ꓗꓪ ꓗꓪ ꓐꓰ ꓟ‐ꓠ ꓑ ꓑ ꓖꓶ ꓜꓽ ꓗꓷ ꓟ ꓔꓯ ꓬꓰ‐ꓢꓴ ꓔꓯ ꓐꓯ ꓖꓶˍ ꓡꓳ꓿

ꓖꓳ ꓡꓱ ꓥ ꓟꓲ ꓬꓰ‐ꓢꓴ ꓡꓰ ꓬꓲ ꓪ ꓔꓯ ꓟ‐ꓠ ꓑ ꓑ ꓖꓶ ꓢꓴ ꓠꓬ ꓟꓳ‐ꓫꓲ ꓟꓽ ꓥ꓾ ꓐ, ꓐ ꓪꓴ‐ꓢ ꓡꓰꓽ ꓥ ꓡꓳ꓾ ꓐꓰ ꓒꓳ, ꓖꓶˍ ꓡꓳ꓿

ꓬꓰ‐ꓢꓴ ꓡꓰ ꓝ. ꓢꓲ “ꓥꓪ ꓠꓬ ꓢꓯꓼ ꓟꓬ ꓑ ꓑ ꓥ ꓡꓳ꓿ ꓥꓪ ꓔꓯ ꓡ ꓢꓴ ꓠꓬ ꓮ ꓕꓯ ꓟꓲ ꓟꓽ ꓦꓰꓼ ꓟꓷꓼ ꓡ꓿ ꓥꓪ ꓔꓯ ꓙꓵꓻ ꓢꓴˍ ꓟꓲ ꓕꓲ ꓞꓲꓼ ꓟꓽ ꓢꓲꓼ ꓡ꓿” ꓐꓰ ꓐꓯ ꓖꓶˍ ꓡꓳ꓿

ꓐꓯ ꓘꓶꓽ ꓕꓱ ꓟ ꓠꓬ ꓣꓳ ꓐꓱ ꓶ ꓬꓲ ꓬꓲ ꓢꓲ ꓮ ꓘꓶ. ꓠꓯ. ꓟ ꓥ ꓡꓳ꓿

ꓕꓲ ꓖ ꓕꓲ ꓧꓪ, ꓣꓳ ꓠꓬ ꓣꓳ ꓤꓶꓻ ꓠꓯꓸꓼ ꓗꓪ ꓪ ꓜꓲ ꓐꓲ ꓜꓲꓼ ꓡˍ ꓟ ꓔꓯ ꓧꓪ ꓔꓬ ꓢꓲ ꓠꓬꓲ꓾ ꓧꓪ. ꓡꓰˍ ꓟ꓾ ꓠꓵꓻ ꓠꓲ,꓾ ꓠꓲ, ꓟ ꓢꓲ ꓡꓲˍ ꓟ ꓕꓱ ꓡꓱ ꓫꓵꓽ ꓔꓯ ꓧꓪ ꓔꓬ ꓖꓴˍ ꓡꓳ꓿ ꓖꓳ ꓡꓱ ꓥˍ ꓟꓲ ꓣꓳ ꓧꓪ ꓔꓬ ꓟ ꓟꓶ ꓡꓰ ꓥˍ ꓟꓲ ꓕꓲ ꓖ ꓕꓲ ꓧꓪ, ꓣꓳ ꓠꓲ, ꓟ ꓗꓪ ꓐꓲ ꓜꓲꓼ ꓡꓰꓳ꓾ ꓐꓰ ꓟꓽ ꓓꓵꓽ ꓙꓽ ꓟꓶ ꓡ꓿ ꓣꓳ ꓧꓪ ꓔꓬ ꓟ ꓟꓶ ꓡꓰ ꓥˍ ꓟꓲ ꓪ ꓜꓲ ꓟꓶ ꓡꓰ ꓠꓲ, ꓫꓵˍ ꓡꓳ꓿ ꓠꓲ, ꓟ ꓠꓬ ꓮ ꓕꓯ ꓟꓲ ꓟꓽ ꓐꓲ ꓡ꓿

ꓠꓬꓲ. ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓡꓰ “ꓥꓪ ꓠꓬ ꓢꓯꓼ ꓟꓬ ꓑ ꓑ ꓥ ꓡꓳ” ꓐꓰ ꓐꓯ ꓔ ꓡꓳ꓿ ꓕꓱ ꓟ ꓠꓬ ꓣꓳ ꓐꓱ ꓶ ꓙꓳꓺ ꓗꓽ ꓖꓶ ꓔꓬˍ ꓟ ꓐꓯ ꓘꓶꓽ ꓥ ꓡꓳ꓿ ꓣꓳ ꓤꓶꓻ ꓗꓪ ꓫ. ꓙꓵ ꓓꓴ꓾ ꓟꓽ ꓫꓬꓽ ꓡꓰ ꓟ ꓫꓵꓽ ꓪꓴ ꓙꓳ ꓔꓬ ꓥˍ ꓟꓲ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓙꓰ ꓢꓲ ꓙꓵꓻ ꓠꓲ, ꓡꓰ ꓞꓳ ꓙꓳ ꓐ ꓡˍ ꓡꓳ꓿ ꓬꓲ ꓠꓬ ꓣꓳ ꓦ ꓐꓱ ꓶ ꓜꓽ ꓓꓴ ꓥ ꓢꓲ ꓠꓬꓲ ꓣꓳ ꓠꓲ, ꓟ ꓠꓯꓸꓼ ꓗꓪ ꓐꓲ ꓜꓲꓼ ꓡꓰ ꓝꓲˍ ꓡꓳ꓿ ꓠꓱ. ꓐꓯ ꓗꓪ ꓚꓳ. ꓐꓲ ꓜꓲꓼˍ ꓟ ꓔꓯ ꓟꓽ ꓧꓪ ꓧꓪ꓾ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓡ ꓠ, ꓟ ꓣꓳ ꓔꓯ ꓠꓬꓲ. ꓠꓬꓲ ꓗꓪ ꓘꓴ ꓔꓬ ꓟ ꓥ ꓡꓳ꓿