ꓢꓲ ꓒ ꓬꓰ‐ꓢꓴ ꓖꓶ ꓜ ꓟ ꓥꓪ. ꓐꓰ ꓑ ꓑ ꓔꓯ ꓐꓳ ꓡꓰ ꓗꓪ ꓛꓲ ꓜ ꓗꓷ ꓟ ꓞꓳ ꓜꓴ ꓓꓽ ꓟ ꓠꓬ ꓢꓲ ꓒꓽ ꓔꓯ ꓧꓪ ꓠ, ꓟ ꓢꓲ ꓒ ꓔꓬ ꓟ ꓘ‐ꓒꓱ‐ꓠꓴ ꓗꓪ ꓙꓰ ꓡꓳ꓿ ꓢꓲ ꓒ ꓡꓰ ꓬꓲ ꓪ ꓔꓯ ꓥꓪ ꓔꓯ ꓧꓪ_ ꓟ ꓠꓬ ꓢꓷ. ꓡꓰ ꓓꓴ ꓟꓳ ꓗꓷ ꓠꓬꓲ ꓟꓽ ꓥ꓾ ꓑ ꓑ ꓜ ꓐꓳ ꓡꓰ ꓠꓬꓲ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿ ꓬꓲ ꓪ ꓠꓲ, ꓡꓶꓽ ꓙꓳ ꓟ ꓡꓰ ꓐꓰ ꓧꓪ ꓔ ꓟ ꓑ ꓑ ꓠꓬ ꓣꓳ. ꓚꓵ_ ꓟ ꓟꓽ ꓥ꓾ ꓢꓲ ꓒ ꓖꓶ ꓜ ꓡ ꓟ ꓔꓱ, ꓟ ꓑ ꓑ ꓠꓬ ꓕꓲ ꓞꓲ ꓕꓲ ꓑ ꓢꓯꓼ ꓟꓬ ꓔꓯ ꓪ ꓟꓶ ꓡ ꓟ ꓥ ꓡꓳ꓿
ꓬꓳ‐ꓦ 4ꓽ14 ꓗꓪ ꓢ‐ꓟ‐ꓡꓲ ꓤ ꓟꓶ ꓤ ꓔꓯ ꓢꓲ ꓒ ꓡꓰ ꓐꓯ ꓖꓶ ꓔ ꓟ ꓬꓲꓻ ꓙꓬ ꓠꓬ ꓕꓲ ꓞꓲ ꓕꓲ ꓑ ꓢꓯꓼ ꓟꓬ ꓐꓰ ꓫꓱ, ꓡꓳ꓿ ꓕꓱ ꓑ ꓑ ꓐꓯ ꓟ ꓬꓲ ꓚꓰ ꓠꓬ ꓢꓲ ꓒ ꓖꓳ ꓓꓱ ꓔꓲ, ꓟ ꓣꓱ ꓛꓰ ꓘꓳ, ꓣꓴ ꓕꓯ ꓐ, ꓐ ꓪꓴ‐ꓢ ꓡꓰ ꓕꓳꓼ ꓠꓶꓼ ꓗꓷ ꓟ “ꓠꓲ, ꓠꓵꓻ ꓟ ꓤ ꓔꓲ” ꓐꓰ ꓥ ꓡꓳ꓿ ꓬꓲ ꓪ ꓥ ꓟꓲ ꓪꓴ‐ꓢ ꓠꓲ, ꓡꓶꓽ ꓙꓳ ꓟ ꓡꓰ ꓐꓰ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓥꓪ ꓠꓴ ꓮ ꓫꓵ ꓬꓰ ꓠ ꓗ, ꓡ꓾ꓐꓰ ꓠ ꓠꓬꓲ ꓕꓯ ꓢꓲ ꓒ ꓡꓰ “ꓠꓴ ꓪ ꓬꓰ ꓠꓯ, ꓟ ꓪꓴ‐ꓢ ꓟꓬꓱꓽ ꓠꓬ꓾ ꓬꓲ ꓡꓰ ꓝꓲ ꓩꓴ ꓡ ꓢꓴ ꓖꓳ ꓕꓲ ꓣꓳ ꓔꓯ ꓙꓵꓻ ꓠꓯ, ꓟ ꓕꓱ ꓟ ꓥ ꓡꓳ꓾” ꓐꓰ ꓐꓯ ꓔ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓚꓲ ꓛꓬ ꓠꓬ ꓪꓴ‐ꓢ ꓬꓲ ꓒꓬꓱꓽ ꓐꓰ ꓟ. ꓖꓶ ꓢꓲ ꓢꓲ ꓒ ꓠꓬ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓔꓯ ꓙꓵꓻ ꓠ, ꓟ ꓡꓰ ꓟꓽ ꓞꓲ ꓙꓵꓻ ꓠꓲ, ꓔꓯ ꓛꓳ ꓠ, ꓟ ꓐꓯ ꓔ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓮ ꓟ ꓥ ꓟ ꓑꓶ ꓓꓴ ꓘꓳ, ꓣꓴ ꓟ ꓡꓰ ꓟꓽ ꓥ꓾ ꓚꓲ ꓛꓬ ꓤꓶꓻ ꓗꓪ ꓪꓴ‐ꓢ ꓐꓯ ꓘꓶꓽ ꓐꓰ ꓬꓲ ꓡꓰ ꓟ. ꓖꓶ ꓔ ꓟ ꓔꓱ, ꓟ ꓬꓲ. ꓠꓯ. ꓟ ꓐꓰ ꓚꓲ ꓛꓬ ꓡꓯꓼ ꓙꓱ ꓔ ꓟ ꓠꓬ ꓙꓵꓻ ꓠꓲ, ꓚꓱ, ꓥ ꓡꓳ꓿ ꓕꓱ ꓟ ꓡꓰ ꓐꓰ ꓔꓱ, ꓟ ꓑ ꓑ ꓥ ꓟ ꓢꓲ ꓒ ꓔꓯ ꓧꓪ ꓟꓳ ꓡ ꓥꓳ꓿ ꓢꓲ ꓒ ꓠꓬ ꓮ ꓕꓯ ꓥ ꓟꓲ ꓖꓴ ꓡꓰ ꓟꓽ ꓓ ꓟ ꓜ ꓓꓴ ꓑ ꓑ ꓥ ꓡꓳ꓿ ꓪꓴ‐ꓢ ꓐꓯ ꓘꓶꓽ ꓓꓵ ꓙ ꓔꓱ, ꓕ ꓟ ꓠꓬ ꓢꓲ ꓫꓬ ꓖꓳ ꓓꓱ ꓑ ꓑ ꓠꓬ ꓦ ꓐꓱ ꓶ ꓜ ꓓꓴ ꓥ ꓢꓲ ꓪꓽ ꓘꓴ ꓘꓶꓽ ꓠꓬ ꓣꓳ ꓙꓵꓻ ꓠꓲ, ꓐꓱ ꓶ ꓜ ꓥ ꓡꓳ꓿ ꓣꓳ ꓪꓽ ꓘꓴ ꓕꓯ ꓪꓴ‐ꓢ ꓠꓬ ꓣꓳ ꓙꓵꓻ ꓠꓲ, ꓔꓯ ꓢꓯꓼ ꓪ ꓖꓶ_ ꓡꓳ꓿
