ꓢꓽ ꓣꓳ ꓕꓲ ꓖꓳꓽ ꓓꓱ ꓪꓴ‐ꓢ (Daily reflection)

ꓧꓪ. ꓧꓪ ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ 12ꓽ 44‐45 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓚꓱ, ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓠꓬ ꓕꓲ ꓡꓲ ꓥ ꓟ ꓚꓱ,꓾

ꓢꓲꓺ ꓒ ꓬꓰ‐ꓢꓴ ꓡꓰ ꓥꓪ ꓔꓯ ꓙꓵꓻ ꓢꓴ ꓠꓬ ꓥꓪ ꓔꓯ ꓙꓵꓻ ꓟ ꓟꓽ ꓥ꓾ ꓥꓪ ꓔꓯ ꓝꓲ ꓩꓴ ꓡ ꓢꓴ ꓔꓯ ꓙꓵꓻ ꓟ ꓥ ꓡꓳ꓿ ꓕꓱ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓠꓬ ꓐ, ꓐ ꓪꓴ‐ꓢ ꓔꓯ ꓐꓯ ꓟ. ꓖꓶ ꓔ ꓟ  ꓥ ꓡꓳ꓿

ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓠꓬ ꓕꓲ ꓡꓰ ꓥ ꓟ ꓚꓱ, ꓔꓯ ꓐꓯ ꓖꓶ ꓔ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓔꓯ ꓡꓳ. ꓟꓳ ꓟ ꓠꓬ ꓐ, ꓐ ꓪꓴ‐ꓢ ꓔꓯ ꓡꓳ. ꓟ ꓐꓰ ꓕꓲ ꓡꓰ ꓥ ꓡꓳ꓿

ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓢꓲꓺ ꓒ ꓬꓰ‐ꓢꓴ ꓧꓪꓽ ꓖꓳ ꓓꓱ ꓚꓵˍ ꓥ ꓟ ꓢꓲꓽ ꓫꓬ ꓑ ꓑ ꓔꓯ ꓘꓳ, ꓣꓴ ꓟ ꓝꓮꓲ ꓢꓲꓽ ꓫꓬ ꓕꓳ ꓶ ꓔꓯ ꓵꓻ ꓠ, ꓟ ꓙꓵ, ꓕꓯ ꓣꓳ ꓠꓬ ꓪꓴ‐ꓢ ꓐꓰ ꓕꓲ ꓡꓰ ꓙꓻ ꓡꓯꓽ ꓘꓳ, ꓟ ꓟꓶ ꓡꓰ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓠꓬꓲ. ꓟꓳ ꓓꓴ ꓥ ꓟ꓾

ꓢꓲꓺ ꓒ ꓬꓰ‐ꓢꓴ ꓡꓰ ꓥꓪ ꓔꓯ ꓙꓵꓻ ꓬꓢꓴ ꓟꓽ ꓟˍ ꓟꓲ ꓠꓯ ꓞꓲ, ꓟ ꓗꓪ ꓔꓬ ꓟꓽ ꓛꓵ ꓠ, ꓟ ꓟ꓾ ꓥꓪ ꓠꓬ ꓠꓬꓲ ꓟꓳ ꓓꓴ ꓡꓰ ꓐꓰ ꓟꓲ ꓠꓯ ꓗꓪ ꓡ ꓟ ꓥ ꓡꓳ ꓐꓰ ꓐꓯ ꓖꓶ   ꓔ ꓡꓳ꓿

ꓠꓬꓲ. ꓠꓬꓲ ꓓꓴ ꓓꓽ ꓪꓴ. ꓬꓲ ꓚꓰ. ꓠꓬ ꓝꓴꓲ ꓐꓰ ꓮ ꓘꓶ. ꓛꓲ ꓟꓽ ꓢꓷ. ꓔ ꓟ ꓚꓱ, ꓥ ꓢꓲ ꓠꓬꓲ ꓠꓬꓲ ꓞꓲ ꓟ ꓥ ꓡꓳ꓿ ꓠꓬꓲ ꓞꓲ ꓟ ꓗꓪ ꓔꓬ ꓢꓴ ꓠꓬ ꓙ ꓫꓱ, ꓠ, ꓟ ꓙ ꓖꓴ ꓟꓶꓽ ꓔꓬ ꓢꓴ ꓐꓴ ꓥ ꓡꓳ꓿

ꓪꓴ‐ꓢ ꓣꓱ ꓛꓰ ꓐꓰ ꓬꓲ ꓪꓽ ꓠꓬꓲ ꓟ꓾

ꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓠꓬꓲ ꓟꓳ ꓓꓴ ꓔꓯ ꓟꓲ  ꓠꓯ ꓗꓪ ꓔꓯꓺ ꓡ ꓢꓴ ꓡꓰ ꓟꓽ ꓞꓲ ꓬꓲ ꓠꓬ ꓟꓲ ꓠꓯ ꓠꓬꓲ ꓟꓳ ꓓꓴ ꓥ ꓡꓳ꓿

ꓙꓵꓻ ꓠꓲ, ꓐꓯ ꓟ ꓠꓬ ꓣꓳ ꓚꓲ. ꓛꓬ ꓔꓯ ꓙꓵꓻ ꓟ ꓔꓯ ꓙ ꓡꓰ ꓢꓲ ꓠꓬꓲ ꓪꓴ‐ꓢ ꓠꓯ, ꓗꓪ ꓡ ꓟ ꓪꓴ‐ꓢ ꓠꓬꓲ ꓟꓳ ꓓꓴ ꓠꓯ, ꓗꓪ ꓙ ꓫꓱ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿

ꓐꓯ ꓟꓴ ꓘꓶꓽ ꓟ ꓚꓱ,꓾

ꓢꓲꓺ ꓒ ꓬꓰ‐ꓢꓴ ꓡꓰ ꓮ ꓡꓲ ꓐꓯ ꓠꓬ ꓥꓪꓽ ꓠꓽ ꓟꓲ ꓠꓯ ꓡ ꓞꓳ ꓔꓯ ꓐꓯ ꓟꓴ ꓘꓶꓽ ꓐꓰ ꓡ ꓟ ꓟꓽ

ꓥ꓿ ꓬꓲ ꓪ ꓔꓯ ꓚꓬꓴ ꓠ, ꓟ ꓡ ꓟ ꓥ ꓡꓳ ꓐꓰ ꓐꓯ ꓖꓶ ꓡꓳ꓿

ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓣꓳ ꓞꓳ ꓙꓳ ꓢꓯ. ꓔꓬ ꓟ ꓙꓵ, ꓔꓯ ꓢꓲꓺ ꓒ ꓠꓲ, ꓒꓴ ꓪꓴ‐ꓢ ꓣꓱ ꓛꓰ ꓠꓯ, ꓗꓪ ꓔꓬ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿

  ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓟꓴ ꓟꓽ ꓘꓶꓽ ꓐꓰ ꓐꓯ ꓔ ꓡꓳ꓿

ꓢꓲꓽ ꓫꓬ ꓕꓳ ꓶ ꓡꓰ ꓐꓯ ꓟꓴ ꓘꓶꓽ ꓒꓽ  ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓔꓯ ꓛꓳꓽ ꓢꓲ ꓠꓬꓲ ꓢꓯ. ꓔꓬ ꓠ, ꓟ ꓣꓳ ꓚꓵˍ ꓟ  ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓙ ꓣꓳ ꓟ ꓠꓲ, ꓟ ꓙꓳ ꓢꓴ ꓔꓯ ꓠꓲ, ꓒꓴ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓥꓪ ꓐ, ꓐ ꓡꓰ ꓐꓯ ꓖꓶ ꓡ ꓟ ꓡꓰ ꓐꓰ ꓥꓪ ꓫ. ꓕꓱ ꓟ ꓥ ꓡꓳ ꓐꓰ ꓐꓯ ꓖꓶ ꓔ ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ  ꓤ ꓐꓴ ꓐꓱ ꓶ ꓢꓲꓽ ꓫꓬ ꓟ ꓤꓶꓻ ꓠꓬ ꓣꓳ ꓐꓱ ꓶ ꓮ ꓘꓶ. ꓣꓳ ꓚꓵˍ ꓟ  ꓥꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓖꓶ ꓔ ꓟ ꓙꓵꓽ ꓪ ꓠꓬ ꓙ ꓣꓳ ꓢꓴ ꓐꓴ ꓗꓪ ꓐꓰ ꓡ ꓟ  ꓥꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓖꓶ ꓡ ꓟ ꓢꓯꓼ ꓟꓬ ꓠꓬ ꓕꓲ ꓞꓲ ꓕꓲ ꓑ ꓐꓱ ꓶ ꓥ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓡꓰ ꓟ. ꓖꓶ ꓔ ꓟ ꓪꓴ‐ꓢ ꓶꓼ ꓓꓳꓽ ꓫꓱ,ꓓꓳꓽ ꓠꓬ ꓣꓳ ꓦꓻ ꓜ ꓓꓴ ꓥ ꓡꓳ꓿ ꓣꓳ ꓦꓻ ꓕꓲ ꓒꓳ, ꓐꓱ ꓶ ꓮ ꓘꓶ. ꓛꓲ ꓣꓳ ꓚꓵˍ ꓟ  ꓥꓡꓳ꓿

ꓠꓬꓲ. ꓠꓬꓲ ꓠꓴ ꓥꓪ ꓠꓬ ꓢꓲꓺ ꓒ ꓬꓰ‐ꓢꓴ ꓐꓰ ꓙ ꓡꓯꓽ ꓘꓳ, ꓔꓬ ꓢꓴ ꓒꓬꓱꓼ ꓔꓬ ꓡ?  ꓣꓳ ꓚꓲ. ꓛꓬ ꓓꓵ ꓙ ꓠꓬꓲ ꓡꓯ꓿

ꓣꓳ ꓪꓽ ꓘꓴ ꓦꓲꓻ ꓗꓪ ꓙꓰ ꓟ ꓙꓵ, ꓕꓯ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓔꓯ ꓑ ꓙ ꓗꓷ ꓟ ꓙꓵ, ꓔꓯ ꓕꓲ ꓞꓲꓼ ꓐꓱ ꓶ ꓦꓻ ꓜ ꓓꓴ ꓐꓰ ꓙꓵꓻ ꓡ? ꓓꓵꓽ ꓙ ꓠꓬꓲ ꓡꓯ꓿

ꓝꓮꓲ ꓠꓴ ꓥꓪ ꓠꓬꓲ ꓢꓲꓺ ꓒ ꓬꓰ‐ꓢꓴ ꓟꓲ ꓠꓯ ꓠꓬꓲ ꓟꓳ ꓓꓴ ꓐꓰ ꓶꓻ ꓤ ꓗꓪ ꓔꓬ ꓢꓴ ꓒꓬꓱꓼ ꓔꓬ ꓡ ꓣꓳ ꓚꓲ. ꓛꓬ ꓚꓱ, ꓓꓵꓽ ꓙ ꓠ, ꓟ ꓥ ꓡꓳ꓿

ꓢꓲꓺ ꓒ ꓠꓯ, ꓗꓪ ꓡ ꓓꓴ ꓬꓰ ꓡꓯ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓥꓪ ꓐꓰ ꓥꓪ ꓐꓯ ꓘꓶꓽ ꓔꓯ ꓟꓽ ꓘꓳ ꓣꓴ ꓢꓴ ꓔꓯ ꓠꓬ ꓡꓳ, ꓬꓰ ꓟ ꓦꓬꓼ ꓠꓬꓲ ꓗꓪ ꓥꓪ ꓐꓯ ꓗꓷ ꓟ ꓐꓯ ꓘꓶ ꓡꓰ ꓬꓲ ꓪ ꓔꓯ ꓐꓯ ꓟꓴ ꓘꓶꓽˍ ꓥꓳ꓿