ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓿ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ “ꓥꓪ ꓔꓯ ꓡꓳ. ꓠꓬꓲ꓾ ꓥꓪ ꓥ ꓡꓳ꓿ ꓥꓪ ꓠꓬ ꓫꓵꓻ ꓗꓴ. ꓫꓵꓻ ꓦ ꓟꓽ ꓥ꓾ ꓠꓴ ꓪ ꓕꓽ ꓙꓳꓺ꓾” ꓐꓰ ꓐꓯˍ ꓟ ꓟ. ꓟꓲꓽ ꓗꓪ ꓐꓰ ꓣꓳ ꓠ ꓡꓳ. ꓓꓴ ꓥꓳ꓿ ꓟ. ꓟꓲꓽ ꓝꓲ. ꓠꓬ ꓡꓴ‐ꓘ ꓕꓳꓽ ꓶ 24ꓽ35‐48 ꓗꓪ ꓟ ꓥꓳ꓿

ꓟ. ꓟꓲꓽ ꓝꓲ. ꓬꓲ ꓕꓲꓽ ꓟꓴꓽ ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓠꓬꓲꓽ ꓣꓳ ꓠꓬ ꓬꓰ‐ꓢꓴ ꓫꓵꓻ ꓗꓪ ꓐꓰ ꓢꓯ. ꓬꓲꓼ ꓡ ꓗ ꓠꓯ. ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓟꓳꓻ ꓡꓰ ꓢꓰꓽ꓿ ꓖꓳ ꓡꓱ ꓐꓯ ꓥ ꓟꓲ ꓬꓲ ꓪ ꓠꓬꓲꓽ ꓫꓵ. ꓠꓬ ꓬꓲ‐ꓟ‐ꓪꓴ‐ꓢꓶ ꓗꓪ ꓙꓰ ꓔꓬ ꓟ ꓙ ꓖꓴ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓪ ꓠꓬꓲꓽ ꓣꓳ ꓗꓳ ꓡꓳ ꓗꓪ ꓞꓼ ꓐꓰ ꓠꓴ ꓪ ꓢꓲ ꓡꓲ ꓟ ꓙꓳ ꓝꓲ꓾ ꓠꓴ ꓪ ꓠꓲ, ꓟ ꓗꓪ ꓕꓽ ꓓꓵꓽ ꓙꓽ ꓫ.꓿ ꓥꓪ ꓡꓯꓽ ꓒꓯ, ꓐꓰ ꓛꓲ ꓒꓯ, ꓔꓯ ꓫꓱ, ꓠꓬꓲ꓾ ꓥꓪ ꓔꓯ ꓡꓳ. ꓠꓬꓲ꓾ ꓥꓪ ꓔꓯ ꓕꓲꓺ ꓠꓬꓲ꓾ ꓥꓪ ꓥ ꓡꓳ꓾ ꓫꓵꓻ ꓗꓴ. ꓫꓵꓻ ꓦ ꓟꓽ ꓥ꓾ ꓐꓰ ꓐꓯˍ ꓕꓯ ꓬꓲ ꓝꓲ ꓓꓴ ꓖꓳ ꓠꓬꓲꓽ ꓣꓳ ꓠꓬ ꓮ ꓘꓶ. ꓓꓵꓽ ꓙꓽ ꓮʼ ꓡꓰ ꓠꓬꓲ꓾ ꓠꓲ, ꓟ ꓗꓪ ꓮ ꓔꓳ. ꓐꓬˍ ꓟ ꓡꓰ ꓐꓰ ꓠꓲ, ꓟ ꓗꓪ ꓗ, ꓛꓲꓽ ꓔꓴ ꓡˍ ꓡꓳ꓿

ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓫꓵꓻˍ ꓟ ꓬꓲ ꓓꓳꓽ ꓠꓬ ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓟꓽ ꓙꓳ꓿ ꓣꓳ ꓠꓬ ꓫꓵˍ ꓥ ꓟꓲ ꓝꓮꓲ ꓢꓯ. ꓬꓲꓼ ꓡˍ ꓥꓳ꓿ ꓫꓵˍ ꓟ ꓔꓯ ꓧꓪ. ꓡꓰˍ ꓟ ꓢꓲ ꓒ ꓬꓰ‐ꓢꓴ ꓔꓯ ꓠꓬ ꓣꓳ ꓟꓳ ꓡꓰꓳ꓿ ꓬꓲ ꓔꓯ ꓡꓳ. ꓠꓬꓲ ꓬꓲ ꓔꓯ ꓫꓱ, ꓠꓬꓲ꓾ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿

ꓕꓱ ꓟ ꓑꓶ. ꓓꓴ ꓣꓳ ꓤꓶꓻ ꓠꓯꓸꓼ ꓗꓪ ꓠꓬ ꓣꓳ ꓟꓲ ꓠꓯ ꓡ ꓞꓳ ꓮ ꓘꓶ. ꓙꓳ ꓓꓰ ꓡꓰˍ ꓟ ꓠꓬ ꓫꓵˍ ꓟ ꓔꓯ ꓥ ꓡꓳ꓿ ꓥꓪ ꓮ ꓕꓯ ꓫꓵˍ ꓥ ꓟꓽ ꓢꓷ.꓿ ꓥꓪ ꓫꓵˍ ꓠꓬ ꓮ ꓡꓲ ꓗꓷ ꓡꓰˍ ꓥ ꓟꓽ ꓢꓷ.꓿ ꓕꓱ ꓟ ꓑꓶ. ꓓꓴ ꓣꓳ ꓠꓬ ꓧꓪꓽ ꓖꓳ ꓓꓱꓽ ꓟꓽ ꓫꓵꓻ ꓡꓰ ꓠ, ꓟ ꓐꓱ ꓶ ꓣꓳ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓜꓳꓽ ꓜꓳꓽ ꓜꓽ ꓠꓬꓲ ꓔꓬ ꓠꓬꓲ꓾ ꓠꓯ ꓞꓲꓼ ꓦꓲ ꓗꓪ ꓙꓰ ꓠꓬꓲ꓾ ꓐꓰ ꓬꓰˍ ꓟ ꓥ ꓡꓳ꓿

ꓖꓳ ꓡꓱ ꓐꓯ ꓥ ꓟꓲ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓐꓴ ꓔꓯ ꓫꓵˍ ꓗꓪ ꓐꓰ ꓢꓯ. ꓬꓲꓼ ꓡ ꓟ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓐꓱ ꓶ ꓫꓵˍ ꓟ ꓔꓯ ꓧꓪ. ꓡꓰ ꓢꓲ ꓠꓬꓲ ꓫꓵˍ ꓟ ꓠꓬ ꓣꓳ ꓐꓱ ꓶ ꓟꓽ ꓙꓳ꓿ ꓣꓳ ꓐꓱ ꓶ ꓠꓬ ꓢꓯ. ꓬꓲꓼ ꓡˍ ꓟ ꓣꓱꓽ ꓛꓰꓽ꓾ ꓢꓲ ꓡꓲ ꓟ ꓣꓱꓽ ꓛꓰꓽ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓔꓯ, ꓖꓶ ꓡˍ ꓡꓳ꓾ ꓐꓰ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓬꓲ ꓝꓲ ꓓꓴ ꓠꓬꓲꓽ ꓣꓳ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓖꓳ ꓡꓱ ꓐꓯ ꓖꓶ ꓗꓷ ꓗ ꓠꓯ. ꓬꓲ ꓪ ꓠꓲ, ꓟ ꓠꓯꓸꓼ ꓗꓪ ꓫꓵˍ ꓟ ꓔꓯ ꓟꓽ ꓙꓳꓺ ꓙꓳꓺ ꓐꓰ ꓡꓳ, ꓬꓰˍ ꓕꓯ ꓠꓬ ꓬꓲ ꓪ ꓠꓬꓲꓽ ꓫꓵ. ꓔꓯ ꓢꓰꓼ ꓗꓷˍ ꓥ ꓟꓲ ꓬꓲ ꓪ ꓠꓬ ꓫꓵˍ ꓟ ꓔꓯ ꓟꓽ ꓙꓳ꓿ ꓢꓲ ꓒ ꓬꓰ‐ꓢꓴ ꓐꓱ ꓶ ꓜꓲꓽ ꓟꓴꓽ ꓬꓰ ꓖꓶ ꓢꓲ ꓠꓬꓲ ꓟꓬꓱ ꓓꓳꓽ ꓚꓺ ꓒꓬꓱ ꓙꓰˍ ꓟ ꓥ ꓡꓳ꓿

ꓕꓱ ꓟ ꓑꓶ. ꓓꓴ ꓠꓬꓲ. ꓠꓬꓲ ꓣꓳ ꓤꓶ ꓠꓯꓸꓼ ꓗꓪ ꓫꓵˍ ꓟ ꓡꓰ ꓛꓲ ꓣꓳ ꓤꓶꓻ ꓗꓪ ꓫ. ꓙꓵ ꓓꓴ ꓟꓽ ꓙꓳ꓿ ꓠꓴ ꓪ ꓦꓲ ꓗꓪ ꓮ ꓫꓵꓽ ꓡꓰ. ꓟꓽ ꓙꓳ ꓙꓳ ꓓ, ꓡ꓿ ꓠꓴ ꓪ ꓔꓯ ꓢꓴ ꓡꓰ ꓟꓽ ꓠꓲ, ꓠꓵ ꓠꓵ ꓓ, ꓡ꓿ ꓠꓴ ꓪ ꓔꓯ ꓢꓴ ꓡꓰ ꓘꓶꓻ ꓙꓵ ꓡ ꓕꓯ ꓠꓽ ꓕꓱ ꓟ ꓠꓬ ꓣꓳ ꓐꓱ ꓶ ꓠꓲ, ꓟ ꓗꓪ ꓮ ꓘꓶ. ꓗꓶ ꓔ ꓟꓽ ꓛꓵ꓿ ꓫꓵˍ ꓟ ꓔꓯ ꓢꓲ ꓒ ꓬꓰ‐ꓢꓴ ꓠꓬ ꓧꓪ. ꓡꓰˍ ꓟ ꓪꓴ‐ꓢ ꓥ ꓟ ꓑꓶ. ꓓꓴ ꓬꓲ ꓔꓯ ꓣꓳ ꓡꓳ. ꓠꓬꓲ ꓠ, ꓟ꓾ ꓬꓲ ꓐꓰ ꓕꓲ ꓡꓰ, ꓔꓬ ꓠ, ꓟ ꓐꓱ ꓶ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓘꓴ ꓔꓬ ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ꓾ ꓠꓴ ꓪ ꓫ. ꓙꓵ ꓔꓬ ꓡ꓾ ꓠꓴ ꓪ ꓠꓲ, ꓥꓴꓻ ꓔꓬ ꓡ꓾ ꓕꓽ ꓙꓳꓺ꓿ ꓥꓪ ꓥ ꓡꓳ꓿ ꓥꓪ ꓔꓯ ꓡꓯ꓿ ꓥꓪ ꓛꓲ ꓒꓯ, ꓡꓯ ꓒꓯ, ꓔꓯ ꓫꓱ, ꓠꓬꓲ꓿ ꓥꓪ ꓠꓴ ꓐꓱ ꓶ ꓫꓵˍ ꓗꓪ ꓐꓰ ꓢꓯ. ꓬꓲꓼ ꓡ ꓗꓷ ꓟ ꓥꓪ ꓥ ꓡꓳ꓿ ꓥꓪ ꓔꓯ ꓙꓵˍ ꓠꓬ ꓫꓵˍ ꓟ ꓔꓯ ꓙꓳꓺ ꓟꓽ ꓛꓵ꓿ ꓮ ꓫꓵꓽ ꓔꓯˍ ꓟꓲ ꓙꓳꓺ ꓟꓽ ꓛꓵ꓾ ꓐꓯˍ ꓟ ꓟ. ꓟꓲꓽ ꓥ ꓡꓳ꓿