ꓢꓲꓺ ꓒ ꓬꓰ‐ꓢꓴ ꓡꓰ ꓙ ꓖꓴ ꓗꓪ ꓬꓲ ꓝꓲ ꓓꓴ ꓠꓬꓲ ꓣꓳ ꓔꓯ ꓟꓳ. ꓖꓶ ꓟ 8.4.2025

ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 24ꓽ13‐35 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓠꓬꓲꓽ ꓣꓳ ꓔꓯ ꓟꓳ. ꓖꓶ ꓟ ꓚꓱ, ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓠꓬꓲꓽ ꓣꓳ ꓠꓬ ꓠꓲ, ꓟ ꓫ. ꓫ. ꓙꓱ‐ꓣꓴ‐ꓢ‐ꓡꓱ ꓗꓪ ꓐꓰ ꓓꓳ ꓡ ꓢꓲ ꓠꓬꓲ ꓬꓲ‐ꓟ‐ꓪꓴ‐ꓢꓶ ꓟꓬꓱꓽ ꓔ ꓟ ꓞꓳ ꓘ, ꓗꓪ ꓙꓰ ꓗꓷ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴ ꓥ ꓟꓲ ꓬꓲ ꓪ ꓐꓰ ꓕꓲ ꓪ ꓙꓱ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓔꓯ ꓬꓲ ꓝꓲ ꓓꓴ ꓐꓴ ꓠꓬ ꓟꓽ ꓢꓷ. ꓢꓰ꓾

ꓕꓱ ꓡꓰ ꓐꓰ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓠꓬꓲꓽ ꓣꓳ ꓔꓯ ꓢꓲꓽ ꓫꓬ ꓕꓳ ꓮ ꓟꓬ, ꓔꓯ ꓐꓯ ꓟ. ꓖꓶ ꓗꓷ ꓟ ꓙꓵ, ꓕꓯ ꓬꓲ ꓝꓲ ꓓꓴ ꓐꓴ ꓠꓬ ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓔꓯ ꓝꓮꓲ ꓙ ꓜꓲꓼ  ꓠꓲ, ꓟ ꓘꓴꓽ ꓗꓪ ꓢꓷ. ꓡꓰ ꓟ ꓥ ꓡꓳ꓿

ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓥ ꓟꓲ ꓪꓴ‐ꓢ ꓶꓼ ꓓꓳ ꓫꓱ, ꓓꓳ ꓔꓯ ꓵꓻ ꓗꓷ ꓟ ꓙꓵ, ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓟ ꓔꓯ ꓝꓮꓲ ꓙ ꓜꓲꓼ ꓡ ꓢꓲ ꓠꓬꓲ ꓣꓳ ꓙꓵꓻ ꓠꓲ, ꓪ ꓜꓲꓼ ꓙꓳ ꓡ ꓟ  ꓥꓡꓳ꓿

ꓝꓮꓲ ꓬꓲ ꓝꓲ ꓓꓴ ꓐꓴ ꓠꓬ ꓙ ꓖꓴ ꓫꓱ ꓓꓳ ꓡꓰ ꓠꓬ ꓬꓲ ꓪ ꓐꓰ ꓕꓲ ꓪ ꓔꓬ ꓡ ꓠ, ꓟ ꓘꓴ ꓗꓷꓟ ꓥ ꓡꓳ꓿ ꓦꓲꓻ ꓘꓴꓽ ꓗꓪ ꓓꓵ ꓡꓰ ꓟ ꓙꓵ, ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓕꓱ ꓡꓰ (4) ꓝꓲ. ꓔꓯ ꓬꓰ ꓗꓷ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓑ ꓑ ꓔꓯ ꓣꓴ ꓗꓷ ꓡꓳ꓿

ꓝꓮꓲ ꓑ ꓑ ꓔꓯ ꓶꓼ ꓥꓳꓽ ꓙꓱ ꓖꓶ ꓡꓳ꓿

ꓝꓮꓲ ꓑ ꓑ ꓔꓯ ꓦꓶ, ꓗꓷ ꓡꓳ꓿

ꓑ ꓑ ꓔꓯ ꓦꓶ ꓢꓲ ꓠꓬꓲ ꓬꓲ ꓪ ꓔꓯ ꓖꓶ ꓜ ꓗꓷ ꓟ ꓥ ꓡꓳ

ꓖꓳ ꓡꓱ ꓝꓲ ꓓꓴ ꓐꓴ ꓠꓬ ꓬꓲ ꓪ ꓟꓬ ꓢꓶ ꓐꓴ ꓡ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓔꓯ ꓢꓷ. ꓡꓰ ꓟꓥ ꓡꓳ꓿ ꓖꓳ ꓟ ꓠꓬ ꓬꓲ ꓪ ꓬꓲ ꓟꓶꓽ ꓟꓶꓼ ꓘꓶꓼ ꓜ ꓜ ꓗꓷ ꓟ ꓔꓯ ꓝꓮꓲ ꓓꓵꓽ ꓙ ꓛꓲ ꓡ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓟ. ꓖꓶ ꓟ ꓠꓬ ꓟꓲ‐ꓢ ꓔꓲ ꓖꓶ ꓟ ꓠꓬ ꓮ ꓘꓶ. ꓛꓲ ꓣꓳ ꓚꓵˍ ꓟ ꓚꓱ, ꓥ ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿

ꓝꓲ ꓓꓴ ꓐꓴ ꓐꓰ ꓕꓲ ꓪ ꓔꓬ ꓢꓲ ꓠꓬꓲ ꓜ ꓜ ꓗꓷ ꓟ ꓙꓵ, ꓔꓯ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓪ ꓟꓰ ꓕꓯ ꓗꓪ ꓟꓶ ꓡꓰ ꓟ ꓥ ꓡꓳ꓿ ꓖꓳ ꓟ ꓠꓬ ꓢꓲꓽ ꓫꓬ ꓑ ꓑ ꓠꓯ, ꓗꓪ ꓢꓲꓺ  ꓒ ꓬꓰ‐ꓢꓴ ꓚꓵˍ ꓚꓵ ꓔꓬ ꓟ ꓚꓱ, ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓠꓴ ꓥꓪ ꓠꓬ ꓢꓲꓺ ꓒ ꓬꓰ‐ꓢꓴ ꓬꓲ ꓫꓵꓼ ꓬꓲ ꓧꓪ ꓥ ꓟ ꓢꓲꓽ ꓫꓬ ꓖꓳ ꓓꓱꓽ ꓔꓯ ꓘꓳ, ꓣꓴ ꓕꓯ ꓬꓲ ꓐꓰ ꓕꓲ ꓪ ꓗꓷ ꓡꓰ ꓢꓲ ꓠꓬꓲ ꓬꓲ ꓐꓰ ꓕꓲ ꓪ ꓫꓵꓻ ꓥ ꓟꓲ ꓝꓮꓲ ꓢꓯ. ꓬꓲꓼ ꓡ ꓓꓴ ꓥ ꓡꓳ꓿

ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓝꓲ. ꓗꓷ ꓟ

ꓢꓲꓺ ꓒ ꓬꓰ‐ꓢꓴ ꓔꓯ ꓝꓲ ꓓꓴ ꓠꓬꓲꓽ ꓣꓳ ꓠꓬ ꓢꓷ. ꓡꓰ ꓗ. ꓠꓯ ꓟꓰ ꓬꓰ ꓥ ꓟꓲ ꓙꓱ‐ꓣꓴ‐ꓢꓡꓱ ꓗꓪ ꓡ ꓙꓰ ꓟ ꓥ ꓡꓳ꓿ ꓬꓲ ꓪ ꓠꓬꓲꓽ ꓣꓳ ꓠꓬ ꓗ, ꓛꓲ ꓟ ꓓꓳꓽ ꓔꓯ ꓢꓴ ꓔꓯ ꓐꓯ ꓟ. ꓖꓶ ꓠ, ꓟ ꓐꓱ ꓶ ꓡ ꓙꓰ ꓟ  ꓥꓡꓳ꓿

ꓟꓲ‐ꓢ ꓔꓲ ꓓꓴ ꓗꓪ  ꓢꓲꓺ ꓒ ꓬꓰ‐ꓢꓴ ꓚꓵˍ ꓚꓵ ꓔꓬ ꓟ ꓔꓯ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓙꓵꓻ ꓟ ꓥ ꓡꓳ꓿ ꓟꓲ‐ꓢ ꓔꓲ ꓓꓴ ꓬꓰ ꓓꓳ ꓡꓰ ꓠꓬ ꓔꓲꓺ ꓒ ꓡꓰ ꓢꓲ, ꓡꓲ ꓐꓰ ꓙꓰ ꓢꓲ ꓠꓬꓲ ꓠꓲ, ꓛꓳ ꓕꓲ ꓛꓳ ꓔꓯ ꓙꓲ ꓟ ꓟꓬꓱꓽ ꓬꓰ ꓖꓶ ꓐꓰ ꓐꓯ ꓖꓶ ꓟ ꓥ ꓡꓳ꓿ ꓖꓳ ꓟ ꓠꓬ ꓢꓲꓺ ꓒ ꓠꓵꓻ ꓠꓲ, ꓔꓯ ꓟꓲ ꓠꓯ ꓡ ꓞꓳ ꓔꓯ ꓟ. ꓖꓶ ꓠ, ꓟ ꓐꓱ ꓶ  ꓥ ꓡꓳ꓿

ꓠꓬꓲ. ꓠꓬꓲ ꓣꓳ ꓤꓶꓻ ꓠꓯ, ꓗꓪ  ꓣꓳ ꓮ ꓘꓶ. ꓛꓲ ꓠꓲ, ꓫ. ꓟꓬ ꓫ. ꓔꓬ ꓟ ꓙꓵ, ꓮ ꓘꓶ. ꓛꓲ ꓓꓵꓽ ꓙ ꓪꓴꓽ ꓧꓶꓽ ꓓꓴ ꓙꓳ ꓟ ꓙꓵ, ꓕꓯ ꓚꓬꓴ ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓐꓰ ꓕꓲ ꓪ ꓔꓬ ꓟ ꓐꓰ ꓬꓲ ꓔꓯ ꓙ ꓫꓱ, ꓢꓴ ꓞꓳ ꓒꓯ, ꓬꓰ ꓖꓶ ꓔꓬ ꓟ ꓔꓯ ꓣꓳ ꓒ ꓕꓲ ꓗꓪ ꓔꓬ ꓟ ꓢꓲꓺ  ꓒ ꓥ ꓟ ꓔꓯ ꓣꓳ ꓓꓵꓽ ꓙ ꓠꓯ, ꓟ ꓥ ꓡꓳ꓿

ꓢꓲꓺ ꓒ ꓔꓯ ꓘꓴˍ ꓟ꓾

ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓔꓯ ꓣꓳ ꓐꓰ ꓕꓲ ꓛꓳ ꓔꓬ ꓡ ꓠ, ꓟ ꓬꓲ ꓔꓯ ꓘꓴ, ꓠ, ꓟ ꓐꓰ ꓬꓲ ꓔꓯ ꓔꓬ ꓔꓶ. ꓖꓶ ꓠ, ꓟ ꓣꓳ ꓚꓵˍ ꓟ ꓔꓯ ꓐꓯ ꓟ. ꓖꓶ ꓡꓳ꓿ ꓕꓲ ꓠꓬꓲ ꓡꓰ ꓔꓲ ꓠꓬꓲ  ꓣꓳ ꓤꓶꓻ ꓠꓯ, ꓗꓪ ꓢꓲꓺ ꓒ ꓔꓯ ꓓꓵꓽ ꓡ ꓠ, ꓟ ꓘꓴ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿

ꓣꓳ ꓠꓲ, ꓫ. ꓟꓬ ꓫ. ꓔꓬ ꓟ ꓙꓵ, ꓕꓯ ꓢꓲꓺ ꓒ ꓔꓯ ꓶ ꓓꓰꓽ ꓪꓽ ꓘꓴ ꓠ, ꓟ ꓐꓰ ꓢꓲꓽ ꓫꓬ ꓖꓳ ꓓꓱ ꓟꓲ ꓕꓯ ꓗꓪ ꓙꓰ ꓢꓲ ꓠꓬꓲ ꓪꓽ ꓘꓴ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓝꓮꓲ ꓪꓴ‐ꓢ ꓐꓯ ꓘꓶ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓵꓻ ꓢꓲ ꓠꓬꓲ ꓢꓲꓺ ꓒ ꓡꓰ ꓣꓳ ꓔꓯ ꓮ ꓫꓵ ꓫ. ꓕꓱ ꓠꓲ, ꓫꓵˍ ꓟ ꓔꓯ ꓠ ꓡꓳ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿