ꓮ ꓟꓶ ꓣꓳ ꓦꓬꓼ ꓠꓬꓲ ꓠꓬ ꓮ ꓫꓵꓽ ꓗꓪ ꓥˍ ꓟꓲ ꓞꓼ ꓞꓼ ꓟꓶ ꓠꓲ, ꓫꓵˍ ꓟ ꓦꓬꓼ ꓠꓬꓲ ꓥ ꓡꓳ꓾ ꓐꓰ ꓐꓯ ꓠ ꓗ, ꓡꓳ꓿ ꓝꓮꓚꓰꓐꓳꓳꓗ ꓗꓪ ꓑꓳꓢꓔ ꓕꓲ ꓟ ꓚꓰ, ꓩꓴ ꓗꓷˍ ꓟ ꓡꓰ ꓡꓲꓗꓰ ꓔꓯ ꓞꓼ ꓞꓼ ꓪ ꓠꓲ, ꓫꓵˍ ꓡꓳ꓿ ꓖꓬꓟ ꓗꓽ ꓠꓯ, ꓗꓷ ꓠꓬ ꓧꓪꓽ ꓘꓴ. ꓞꓼ ꓞꓼ ꓓꓳ ꓝꓲ ꓠꓲ, ꓫꓵˍ ꓡꓳ꓿ ꓶꓻ ꓡꓯꓼ ꓟꓬꓱꓽ ꓕꓲ ꓟ ꓬꓰ ꓗꓷ ꓠꓬ ꓬꓲ ꓮ ꓟꓬꓼ ꓕꓲ ꓕꓳˍ ꓟꓶ ꓠꓲ, ꓫꓵˍ ꓡꓳ꓿
ꓖꓳ ꓡꓱ ꓥ ꓟꓲ ꓟꓲ ꓠꓯ ꓠꓽ ꓖꓳ ꓡꓱ ꓟꓽ ꓚꓳꓻ ꓔꓬ꓿ ꓟꓽ ꓠꓽ ꓠꓽ ꓢꓯꓼ ꓕꓵꓼˍ ꓐꓯˍ ꓟ ꓠꓬ “ꓬꓲ ꓕꓯꓽ ꓢꓲ ꓗꓪ ꓡꓳ. ꓠꓬꓲˍ ꓠꓬ ꓮ ꓫꓵꓽ ꓡꓰ. ꓟꓽ ꓒꓬꓱꓼ ꓡ ꓟ ꓡꓰ ꓥꓳ꓾ ꓮ ꓙꓵꓽ ꓟꓽ ꓒꓳ, ꓡꓶ. ꓙꓰˍ ꓟ ꓕꓲ ꓠꓬꓲ ꓗꓪ ꓛꓲ ꓥꓳ꓿” ꓐꓯ ꓠꓲ, ꓫꓵˍ ꓟ ꓠꓬ ꓟꓽ ꓠꓽ ꓠꓽ ꓢꓯꓼ ꓕꓵꓼˍ ꓐꓯˍ ꓟ ꓠꓬ ꓬꓲ ꓢꓯꓼ ꓕꓵꓼ ꓔˍ ꓟ ꓟꓽ ꓧꓪ. ꓡꓰ ꓕ ꓑꓳꓸꓼ ꓢꓯꓼ ꓕꓵꓼ ꓔꓬ ꓟ ꓠꓬꓲꓽ ꓗꓴ. ꓝꓸꓼ ꓗꓪ ꓮ ꓫꓵꓽ ꓔꓯ ꓡꓰ ꓟꓽ ꓟꓳꓻ ꓐꓰ ꓐꓯ ꓪˍ ꓥꓳ꓿
ꓐꓯ ꓘꓶꓽ ꓕꓱ ꓟ ꓙꓽ ꓜꓲꓼ ꓡꓰ ꓠ ꓟ ꓔꓯꓺ ꓥꓳꓽ ꓕꓲ ꓟ ꓖꓶ ꓠꓲ, ꓫꓵˍ ꓡꓳ꓿ ꓟ ꓘꓪꓽ ꓬꓲ ꓫꓵ. ꓫꓵ. ꓢꓴ ꓠꓬ ꓬꓲ ꓪꓴ. (5) ꓘꓳꓼ ꓡꓱꓸꓼ ꓮ ꓫꓵꓽ ꓜꓲ ꓔꓯˍ ꓟꓲ ꓬꓲ ꓟꓽ ꓟꓳꓻ꓿ ꓬꓲ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓬꓲ ꓔꓶ ꓔ ꓟ ꓗꓪ ꓬꓲꓻ ꓙꓬ ꓧꓳꓽ ꓖꓶˍ ꓡꓳ꓾ ꓟꓲ ꓛꓬ ꓘꓪ ꓫꓴ ꓖꓶˍ ꓡꓳ꓾ ꓗꓪꓽ ꓫꓵꓼ ꓖꓶˍ ꓡꓳ꓿ ꓖꓳ ꓡꓱ ꓥˍ ꓟꓲ ꓟꓲ ꓛꓬ ꓠꓯꓸꓼ ꓗꓪ ꓚꓳ. ꓮ ꓫꓵꓽ ꓬꓲ ꓡꓲ. ꓤ ꓕꓲ ꓟˍ ꓟꓲ ꓟꓽ ꓓꓳ ꓡ꓿
ꓚꓳ ꓡꓳ ꓚꓳ ꓫꓵ ꓗꓪ ꓔꓬ ꓢꓴ ꓐꓴ ꓠꓬ ꓬꓲ ꓔꓯ ꓪꓴ. ꓡꓰꓳ꓾ ꓐꓰ ꓓꓵꓽ ꓙꓽ ꓟꓶ ꓔꓬ ꓖꓴˍ ꓡꓳ꓿ ꓠꓴ ꓠꓬ ꓮ ꓡꓲ ꓗ, ꓠꓬꓲ ꓮ ꓫꓵꓽ ꓡꓰ. ꓟꓽ ꓔꓶ ꓟ ꓟ ꓟꓲ ꓛꓬ ꓖꓳꓽ ꓗꓪ ꓕꓲ ꓠꓬꓲ ꓕꓲ ꓠꓬꓲ ꓬꓲꓻ ꓙꓬ ꓧꓳꓽ ꓔꓬ ꓡ꓾ ꓐꓰ ꓠ ꓠꓬꓲˍ ꓡꓳ꓿ ꓬꓲ ꓠꓽ ꓮ ꓫꓵꓽ ꓟꓲ ꓟꓽ ꓒꓳ, ꓖꓶ꓾ ꓬꓲ ꓬꓰ ꓙꓲꓽ ꓙꓳˍ ꓟ ꓔꓯ ꓡꓰꓽ ꓬꓰ ꓔꓬ ꓡꓳ꓿
ꓠꓴ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓕꓳꓽ ꓶ ꓵꓻ ꓔꓬ ꓥˍ ꓟꓲ ꓠꓴ ꓠꓯꓸꓼ ꓗꓪ ꓮ ꓫꓵꓽ ꓒꓳ, ꓡꓶ. ꓗꓷ ꓓꓴ ꓟꓽ ꓙꓳ ꓐꓰ ꓠꓴ ꓚꓬ, ꓪˍ ꓥꓳ꓿ ꓕꓲ ꓠꓬꓲ ꓕꓲ ꓠꓬꓲ ꓖꓬꓟ ꓗꓪ ꓙꓰ ꓔꓬ ꓥˍ ꓟꓲ ꓦꓰꓽ ꓛꓲꓽ ꓠꓽ ꓟꓽ ꓫꓱ ꓡꓰ꓿ ꓕꓲ ꓠꓬꓲ ꓕꓲ ꓠꓬꓲ ꓢꓯꓼ ꓕꓵꓼ ꓔꓬ ꓥˍ ꓟꓲ ꓮ ꓫꓵꓽ ꓪꓴꓽ ꓡ ꓟꓴ ꓡ ꓓꓴ ꓟꓽ ꓙꓳ ꓡꓰ꓿
ꓡꓳ. ꓠꓬꓲ ꓗꓷ ꓠꓬ ꓮ ꓫꓵꓽ ꓟꓲ ꓟꓽ ꓒꓬꓱꓼ ꓡ ꓟ ꓡꓰ ꓐꓰ ꓥꓳ꓿ ꓬꓲ ꓙꓵ, ꓮ ꓔꓳ, ꓒꓬ, ꓔꓬ ꓟ ꓡꓰ ꓥꓳ꓿
ꓖꓳ ꓡꓱ ꓥ ꓟꓲ ꓚꓵ ꓚꓵ ꓐꓯ ꓪˍ ꓕꓯ ꓠꓽ ꓟ ꓘꓪꓽ ꓠꓬ ꓟꓲ ꓛꓬ ꓠꓯꓸꓼ ꓘꓪ ꓬꓲ ꓚꓰ ꓠꓬ ꓕꓶˍ ꓟ ꓕꓯꓽ ꓢꓲ ꓕꓶ ꓡꓰ ꓠ, ꓟ ꓫꓬ, ꓔꓬ ꓟ ꓬꓲ ꓙꓵ, ꓬꓲ ꓦꓬꓼ ꓠꓬꓲ ꓥ ꓡꓳ꓿
(5) ꓘꓳꓼ ꓐꓲ ꓡꓰ ꓗ ꓠꓯ. ꓕꓲ ꓠꓬꓲ ꓗꓪ ꓠꓬ ꓓꓵꓽ ꓙꓽ ꓟꓶ ꓓꓴ ꓬꓲ ꓪꓴ. ꓔꓴ ꓡꓺꓳ꓿ ꓟꓲ ꓛꓬ ꓠꓯꓸꓼ ꓗꓪ ꓚꓳ. ꓟꓻ ꓘꓪꓽ ꓬꓲ ꓡꓲ. ꓤ ꓓꓳ ꓡꓺꓳ꓿ ꓖꓳ ꓗ ꓠꓯ. (10) ꓠꓽ ꓘꓴꓽ ꓠꓯꓸꓼ ꓗꓪ ꓟꓻ ꓘꓪꓽ ꓖꓳ ꓟ ꓠꓬ 80ʼ ꓛꓲ ꓪꓴꓽ ꓡ ꓟꓴ ꓡˍ ꓡꓳ꓿
ꓞꓳ ꓤ ꓐꓴ ꓠꓬ “ꓦ꓾ ꓟꓻ ꓘꓪꓽ ꓠꓬ (10) ꓠꓽ ꓘꓴꓽ ꓠꓯꓸꓼ ꓗꓪ 80ʼ ꓛꓲ ꓪꓴꓽ ꓡ ꓐꓷ” ꓐꓰ ꓐꓯ ꓔꓬ ꓖꓴˍ ꓡꓳ꓿
ꓖꓳ ꓡꓱ ꓟꓽ ꓥ꓿ ꓟꓻ ꓘꓪꓽ ꓖꓳ ꓟ ꓪꓴꓽ ꓡ ꓠ, ꓟ (5) ꓘꓳꓼ ꓐꓰ (10) ꓠꓽ ꓛꓲ ꓟꓶ ꓫꓵ ꓗꓷ ꓟ ꓥ ꓡꓳ꓿ ꓬꓲ ꓪꓴ. (5) ꓘꓳꓼ ꓗꓪ ꓬꓲ ꓚꓰ ꓟꓽ ꓕꓶ ꓡꓰ ꓕꓯ ꓠꓽ (10) ꓘꓴꓽ ꓠꓯꓸꓼ ꓗꓪ 80ʼ ꓛꓲ ꓟꓴꓺ ꓡ ꓟ ꓔꓯ ꓬꓲ ꓚꓰꓺ ꓠꓬ ꓦꓰꓼ ꓕꓶ ꓟꓽ ꓐ ꓡ꓿ ꓠꓴ ꓮ ꓟꓶ ꓮ ꓫꓵꓽ ꓡꓰ. ꓟꓽ ꓒꓬꓱꓼ ꓡ꓾ ꓐꓰ ꓓꓵꓽ ꓙꓽ ꓟꓶˍ ꓟꓲ ꓠꓲ, ꓟ ꓕꓽ ꓙꓬ ꓡꓰ꓿ ꓠꓴ ꓠꓬ ꓮ ꓟꓶ ꓟꓲ ꓛꓬ ꓠꓯꓸꓼ ꓘꓪ ꓬꓲ ꓚꓰꓺ ꓕꓶ ꓡꓰ ꓠ ꓫꓬ, ꓔꓬ ꓪˍ ꓟ ꓑꓶ. ꓓꓴ ꓥ ꓡꓳ꓿ ꓬꓲ ꓒꓵꓽ ꓶ ꓔꓯ ꓟꓬ ꓢꓶꓽ ꓡꓰ ꓟꓽ ꓟꓳꓻ ꓢꓰꓽ ꓟ ꓙꓵ, ꓕꓯ ꓝ. ꓢꓲ ꓣꓱꓽ ꓬꓰ ꓐ ꓡˍ ꓟ ꓠꓲ, ꓟ ꓡꓰꓽ ꓠꓴ ꓔꓯ ꓠꓱ. ꓐꓯ ꓢꓴ ꓕꓯꓽ ꓢꓲ ꓙ ꓙꓰ ꓝꓲˍ ꓟ ꓥ ꓡꓳ꓿
